ర‌జ‌నీకాంత్, అబ్దుల్ క‌లాం, చిరంజీవి..అంద‌రూ ఇంతే..!!!

     కొండ‌ల్లో, కోన‌ల్లో చిన్న పిల్ల కాలువ‌గా మొద‌లైన నీటి ప్ర‌యాణం... సెల‌యేరుగా, వ‌ర‌ద ప్ర‌వాహంగా మారి, న‌దిగా గంభీర‌త‌ను, గౌర‌వాన్ని సంపాదించుకుని చివ‌రికి స‌ముద్రాన్ని చేరుకునేందుకు ప‌రుగులు తీస్తుంది. న‌ది విష‌యంలో ప్ర‌కృతి త‌న భాధ్య‌త‌ల‌ను ఎంత అద్భుతంగా నిర్వ‌ర్తిస్తుందో చూస్తే ఆశ్చ‌ర్యం క‌లుగుక‌మాన‌దు. న‌ది క‌థ‌లాగే చిన్న స్థాయిలో కెరీర్ ప్ర‌యాణాన్ని ప్రారంభించి ఏదైనా ఒక రంగంలో అత్యున్న‌త స్థాయికి చేరుకున్న వ్య‌క్తులు చివ‌రికి ప‌రిపాల‌నా వ్య‌వ‌స్థ గూటికే చేరుకోవాల‌నుకోవ‌డం యాదృశ్చికం కానేకాదు. సినీ రంగంలో తిరుగులేని స్టార్ ఇమేజ్ ను సొంతం చేసుకుని త‌మిళుల అభిమాన న‌టుడిగా ఎదిగిన సూప‌ర్ స్టార్ ర‌జనీకాంత్,  ఇప్పుడు రాజ‌కీయాల్లోకి వ‌స్తున్నారన్న వార్త‌లు హాట్ టాపిక్ గా మారాయి. సినీ రంగంలో ల‌బ్ద ప్ర‌తిష్ఠులుగా పేరొందిన ఎంజీఆర్, క‌రుణానిధి, ఎన్టీఆర్, చిరంజీవి దారిలోనే ర‌జ‌నీకాంత్ కూడా రాజ‌కీయాల్లోకి వ‌చ్చి పాల‌నాద‌క్షునిగా మారేందుకు ప్ర‌య‌త్నాలు చేస్తున్నారు. ఒక్క సినీ రంగ‌మే కాదు ఏ రంగంలో అయినా అత్యున్న‌త స్థాయికి చేరుకున్న వ్య‌క్తులు చివ‌రికి మంచి అడ్మినిస్ట్రేట‌ర్ గా మారేందుకు  ఎందుకు ఆస‌క్తి క‌న‌బ‌రుస్తున్నారు? ప‌రిపాల‌నా రంగంలో రాణించ‌డం అంత సుల‌భ‌మా? వ‌చ్చిన ప్ర‌తివారూ విజ‌య‌వంత‌మవుతారా?  శ‌క్తి కేంద్రంగా మారిన ప‌రిపాల‌నా విభాగంపై  విద్యార్ధుల‌కు మ‌రింత అవగాహ‌న క‌ల్పించేందుకు 'కెరీర్ టైమ్స్' ప్ర‌త్యేక ప్ర‌య‌త్నం.  

వ్య‌వ‌స్థ‌కు కీల‌కం ప‌రిపాల‌నా విభాగం! 

      అది విద్యా రంగ‌మైనా, వ్యాపార రంగంమైనా వాటి వాటి సామ‌ర్ద్యం, విజ‌యం అన్న‌ది ప‌రిపాల‌నా విభాగం స‌మ‌ర్ధ‌త పైనే ఆధారప‌డి ఉంటుంది. ఈ సూత్రాన్నే ఆధారం చేసుకునే అత్యున్నత సంస్థ‌లు పరిపాల‌నా విభాగాన్ని ప‌టిష్టంగా త‌యారు చేసుకుంటాయి. ఈ విష‌యం ఒక్క కార్పోరేట్ రంగానికే ప‌రిమితం కాదు ఒక దేశ అభివృద్ధికి కూడా ఇదే కీల‌కం. మంచి ప‌రిపాల‌నా వ్య‌వ‌స్థ ఉన్న దేశాలు మంచి అభివృద్ధిని సాధించాయి. ప్ర‌జాస్వామ్య దేశ‌మైన ఇండియాలో ఏ చిన్న మార్పు రావాల‌న్నా, ఏ చిన్న సంస్క‌ర‌ణ జ‌రగాల‌న్నా ప‌రిపాల‌నా విభాగ‌మే కీల‌క పాత్ర పోషిస్తుంది. మ‌రోవైపు అదే స‌మ‌యంలో ఈ ప‌రిపాల‌నా విభాగ‌మే ప‌వ‌ర్ సెంట‌ర్ గా మారి ప్ర‌జ‌ల త‌ల‌రాత‌ల‌ను మారుస్తుంది. అంత‌టి శ‌క్తివంత‌మైన‌ది కాబ‌ట్టే మ‌న దేశంలో వివిధ రంగాల్లో విజయం సాధించిన ప్ర‌ముఖులు కూడా రాజ‌కీయాల్లో ప్ర‌వేశించి పాల‌నా రంగంపై కూడా త‌మదైన‌ ముద్ర వేయాల‌ని భావిస్తూ ఉంటారు. ఈ ప్ర‌యత్నంలో కొంద‌రు విజ‌యం సాధిస్తే మ‌రికొంద‌రు ప్ర‌య‌త్న లోపం వ‌ల‌న విఫ‌ల‌మ‌వుతూ ఉంటారు. వ్యాపార రంగంలో లేదా సినీ రంగంలో మంచి అడ్మినిస్ట్రేటర్ గా రాణించిన వాళ్లు రాజ‌కీయ వ్య‌వ‌స్థ‌లోని ప‌రిపాల‌న‌కు వ‌చ్చేస‌రికి విఫ‌ల‌మైన సంద‌ర్భాలు ఉన్నాయి. అదే విధంగా వారి వారి రంగాల‌తో స‌మానంగా పొలిటిక‌ల్ అడ్మినిస్ట్రేటర్ గానూ విజ‌యవంత‌మైన వారు ఉన్నారు. 

ఉన్నత శిఖరాలకు చేరాలంటే అడ్మినిస్ట్రేటర్ కావాల్సిందే!

      ఇప్పుడు రజనీకాంత్ తన సినీ కెరీర్ లో సాధించేందుకు ఏమీ మిగల్లేదు కాబట్టే మరింత ఉన్నత శిఖరాలకు చేరుకునేందుకు అడ్మినిస్ట్రేషన్ రంగంవైపు ఆయన దృష్టిసారించారు. కెరీర్ లో అత్యున్నత స్థాయికి చేరుకోవాలంటే అడ్మినిస్ట్రేషన్ విభాగం తలుపు తట్టాల్సిందే. ఎంజీఆర్, కరుణానిధి, జయలలిత, ఎన్టీఆర్ వీళ్లందరూ తమ సినిమా రంగ కెరీర్ లో ఉన్నత స్థితిని చవిచూసి మరింత అభివృద్ధి సాధించేందుకు అడ్మినిస్ట్రేటర్లుగా మారారు. ముఖ్యంగా తమ తమ కెరీర్ లో ఇక సాధించేందుకు ఏమీ లేదు అన్న సందర్భంలో పాలనా విభాగం వారికి ఆకర్షణీయంగా కనిపిస్తుంది. మీరు శక్తివంతంగా ఎదిగిన వ్యక్తుల కెరీర్ ను నిశితంగా గమనిస్తే వారు అడ్మినిస్ట్రేటర్ గా మారాకే వారు అనుకున్న లక్ష్యాన్ని చేరుకోగలిగారు. డాక్టర్ గా కెరీర్ ను ప్రారంభించిన వై.ఎస్.రాజశేఖర్ రెడ్డి తాను శక్తివంతమైన నాయకునిగా ఎదగాలనుకున్నప్పుడు అడ్మినిస్ట్రేషన్ కు కేంద్ర స్థానమైన రాజకీయాలను ఎన్నుకున్నారు. ఇక దేశం గర్వించే శాస్త్రవేత్త అబ్దుల్ కలాం శాస్త్రవేత్తగా తాను ఇక చేయాల్సింది ఏమీ లేదని తెలుసుకున్నప్పుడు వ్యవస్థలో  మార్పు తెచ్చేందుకు పరిపాలనా విభాగంలోకి వచ్చి రాష్ట్రపతిగా మరింత ఉన్నతిని సాధించారు. ఇక సామాన్య జర్నలిస్ట్ లుగా ఉన్న ఏబీఎన్ రాధాకృష్ణ, టీవీ9 రవిప్రకాష్ లో అడ్మినిస్ట్రేషర్స్ అవతారమెత్తినప్పుడే తమ కెరీర్ లో ఉన్నతికి చేరుకోగలిగారు. తమ తమ ఆలోచనలను ప్రజలకు మరింత ప్రభావవంతంగా చెప్పగలిగారు. అలాగే క్రికెట్ లో గంగూలీ, కుంబ్లే, ద్రావిడ్ లు కూడా తమ తమ కెరీర్ ల తర్వాత పాలనా విభాగంలోకి అడుగుపెట్టి తమ సామర్ధ్యాన్ని, పేరు ప్రఖ్యాతులను మరింత పెంచుకోవాలని ప్రయత్నిస్తున్నారు. 

పాల‌నా విభాగంపై ప‌ట్టు సాధించండి!

     పాల‌నా విభాగం ఎంత శ‌క్తివంత‌మైన‌దో తెలుసుకుని విద్యార్ధులు ఈ రంగంపై ప్ర‌త్యేక శ్ర‌ద్ధ క‌న‌బ‌ర్చాలి. మీరు ఏ రంగంలో అడుగుపెట్టినా మంచి అడ్మినిస్ట్రేటర్ గా గుర్తింపు తెచ్చుకుంటే  చాలా వేగంగా అత్యున్న‌త స్థాయికి చేరుకోవ‌చ్చు. సొంతంగా కంపెనీని ఏర్పాటు చేయాల‌నుకుంటున్న వ్య‌క్తుల‌కు పాల‌నా రంగంపై ప‌ట్టు ఉంటే అనుకున్న ల‌క్ష్యాన్ని చేరుకునేందుకు మార్గం సుగ‌గ‌మ‌వుతుంది. గ‌తంలో అంత డిమాండ్ లేకున్నా ప్ర‌స్తుతం చాలా మంది విద్యార్ధులు పొలిటిక‌ల్ సైన్స్ , పొలిటిక‌ల్ అడ్మినిస్ట్రేషన్ కోర్సులు చ‌దివేందుకు ఆసక్తి చూపిస్తున్నారు. ఈ చ‌దువు వీరికి వృత్తిగ‌త జీవితంతో పాటు వ్య‌క్తిగ‌త జీవితంలోనూ మంచి నాయ‌కునిగా, వ్యూహ‌క‌ర్త‌గా ఎదిగేందుకు దోహ‌దం చేస్తుంది. ఎన్ని ఉన్న‌త ల‌క్ష్యాలు సాధించినా గొప్ప గొప్ప వ్య‌క్తులు త‌మ చివ‌రి గ‌మ్యంగా అడ్మినిస్ట్రేషన్ నే ఎన్నుకోవ‌డం అది ఎంత శ‌క్తివంత‌మైన‌దో అన్న విష‌యాన్ని తెలియ‌జేస్తోంది. ఈ విష‌యాన్ని విద్యార్ధులు త‌ప్ప‌నిస‌రిగా గుర్తించాలి. 

శ‌క్తి కేంద్రం..ప‌రిపాల‌నా విభాగం! 

      అత్యున్న‌త స్థాయికి చేరుకున్న ఏ వ్య‌క్తినైనా గ‌మ‌నిస్తే అత‌నిలో ఒక మంచి అడ్మినిస్ట్రేటర్ ఉన్న విష‌యాన్ని గుర్తించ‌వ‌చ్చు. గొప్ప వ్యక్తుల ప్రయాణాన్ని ఒకసారి గమనిస్తే వారు ఎన్నోవంద‌ల మందికి స్ఫూర్తి నిచ్చి వారితో అత్యున్న‌త ప‌నితీరును రాబ‌ట్టుకున్నావారే. వీరు రాజ‌కీయ రంగంలోకి రాకున్నా వారి వారి విభాగాల్లోనే మంచి పాల‌నా ద‌క్షులుగా పేరు సంపాదించారు. ఇక త‌మ సినిమాల ద్వారా కోట్లాది మందిని ప్ర‌భావితం చేసే స్టార్లు, సూప‌ర్ స్టార్లు త‌మ ప‌రిధిలో స‌మాజాన్ని మార్చేందుకు అడ్మినిస్ట్రేటర్లుగా ఎదిగేందుకు రాజ‌కీయాల‌ను వేదిక‌గా చేసుకుంటున్నారు. ఇదంతా పాల‌నా విభాగంలో ఉన్న శ‌క్తి, గొప్ప‌త‌న‌మే. కాబ‌ట్టి విద్యార్ధులు త‌మ త‌మ రంగంలో రాణించేందుకు ప్ర‌య‌త్నిస్తూ అడ్మినిస్ట్రేషన్ పై ప‌ట్టు సాధిస్తే వాళ్ల‌ను ఆప‌డం ఎవ‌రి త‌రమూ కాదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com