డా.పెళ్లికొడుకులు ఇక ఉండ‌రు!!

      నేష‌న‌ల్ ఎలిజిబిలిటీ కమ్ ఎంట్ర‌న్స్ టెస్ట్- నీట్, ప్ర‌వేశ ప‌రీక్ష‌ల విభాగంలో ఈ ప‌దం సృష్టించిన సంచ‌ల‌నం అంతా ఇంతా కాదు. ఒకవైపు విమ‌ర్శలు, మ‌రోవైపు ప్ర‌శంస‌లు, ఇంకోవైపు అనుమానాలు..అనుకూల‌, ప్ర‌తికూల వాద‌న‌ల‌ న‌డుమ ఈ వైద్య విద్య ప్ర‌వేశ పరీక్ష ఎన్నో క‌ఠిన ప‌రీక్ష‌ల‌ను ఎదుర్కొంది. ఇప్ప‌టికీ బాలారిష్టాల ద‌శ‌లోనే ఉన్నా నీట్ మాత్రం వైద్య విద్య ప్ర‌వేశాల్లో ఒక కొత్త ఒర‌వ‌డిని సృష్టించింది. కేవ‌లం డ‌బ్బు, మెరిట్ ఆధారంగానే న‌డుస్తున్న డాక్ట‌ర్ చ‌దువును అంద‌రికీ అందుబాటులోకి తెచ్చేందుకు ఒక విప్ల‌వాత్మ‌క ముంద‌డుగు నీట్ తోనే ప‌డింద‌ని చెప్పాలి. స‌ర‌స్వ‌తీ దేవి కొలువుండాల్సిన కాలేజీల‌ను ల‌క్ష్మీదేవి నివాసాలుగా మార్చిన వ్యాపార ధోర‌ణికి నీట్ తో ఫుల్ స్టాప్ ప‌డింది. సుప్రీంకోర్టు  చెప్పిన‌ట్టుగా పేద‌వాడు కూడా వైద్య విద్య చ‌దివేందుకు అవ‌స‌ర‌మైన అన్ని అవ‌కాశాల‌ను క‌ల్పించ‌డ‌మే నీట్ యొక్క ముఖ్యోద్దేశ్యం. మ‌రి సుప్రీంకోర్టు ఉద్దేశం నీట్ తో నెర‌వేరుతుందా?  నీట్ తో వైద్య విద్య‌ను ప‌ట్టిపీడిస్తున్న డ‌బ్బు జాడ్యం వ‌దిలిపోతుందా?  నీట్ పై వ‌స్తున్న విమ‌ర్శ‌ల సంగ‌తేంటి? అన్న విభిన్న అంశాల‌పై 'కెరీర్ టైమ్స్' స‌మ‌గ్ర విశ్లేష‌ణ‌. 

ఇష్టారాజ్యానికి చ‌ర‌మ గీతం! 

     మ‌న దేశంలో దాదాపు 400 వైద్య క‌ళాశాలలు ఉన్నాయి. ఇందులో అధిక శాతం ప్ర‌యివేట్ రంగ కాలేజీలే. ఈ  400 కాలేజీల్లో దాదాపు 50 వేల వైద్య సీట్లు ఉన్నాయి. ఈ 50 వేల సీట్ల కోసం ప్ర‌తీ ఏటా దాదాపు 10 ల‌క్ష‌ల మంది విద్యార్ధులు పోటీ ప‌డుతున్నారు. అయితే డాక్ట‌ర్ చ‌దువు చ‌దివి దేశానికి సేవ చేయాల‌న్న యువ విద్యార్ధుల క‌ల నెర‌వేర‌డం అంత ఈజీ ఏమీ కాదు. అందుబాటులో ఉన్న సీట్ల‌కు ఆశిస్తున్న విద్యార్ధుల సంఖ్య‌కు ఎక్క‌డా పొంత‌న కుదర‌దు. దీంతో  వైద్య విద్య‌లో డ‌బ్బు ప్రాబ‌ల్యం విప‌రీతంగా పెరిగిపోయింది. త‌మ డాక్ట‌ర్ క‌ల‌ను నెర‌వేర్చుకోవాలంటే భారీగా డ‌బ్బు గుమ్మ‌రించాల్సిన ప‌రిస్థితిని ప్ర‌యివేట్ కాలేజీలు క‌ల్పించాయి. లెక్క‌లేన‌న్ని ప్ర‌వేశ ప‌రీక్ష‌లు, ర‌క‌ర‌కాల ప‌రీక్ష తేదీలు, దీంతో విద్యార్దుల బాధ వ‌ర్ణ‌ణాతీతం. ఇక ఈ ఎంట్ర‌న్స్ ఎగ్జామ్స్ ద్వారా త‌మ‌కు అనుకూలంగా ప‌రీక్ష‌లను నిర్వ‌హించి సీట్ల‌ను అధిక ధ‌ర‌కు అమ్ముకోవ‌డం ప‌రిపాటిగా మారింది. సమాజంలో ఒకప్పుడు ఉన్నత స్థాయి కెరీర్ అంటే డాక్టర్, ఇంజినీరే. సంఘంలో స్థాయిని, గౌరవ మర్యాదలను తెచ్చి పెట్టే కెరీర్ లో డాక్టర్ వృత్తి ఇప్పటికీ అగ్రస్థానంలో ఉంది. దీంతో ఎక్కువ డ‌బ్బు పెట్టి మెడిక‌ల్ సీట్ కొనుక్కున్న విద్యార్ధి డాక్ట‌ర్ గా బ‌య‌ట‌కు వ‌చ్చాక అవినీతికి పాల్ప‌డి, అనైతిక ప్రాక్టీస్ చేసి త‌ను ఖ‌ర్చు పెట్టిన డ‌బ్బును సంపాదించుకోవ‌డ‌మే ధ్యేయంగా పెట్టుకోవ‌డం వంటి దుష్ఫ‌లితాలు ఏర్ప‌డ్డాయి. సొంత కళ్యాణంలో అధిక కట్నం వస్తుందన్న ఆశతో డాక్టర్లు అయిన వారూ ఉన్నారు. కానీ ఇప్పుడు సమాజ కళ్యాణం కోసం డాక్టర్ అయ్యేందుకు నీట్ అవకాశం కల్పిస్తుంది. 

ఒక‌ విప్ల‌వాత్మ‌క ముంద‌డుగు!

       నీట్ ను ప్ర‌వేశ‌పెడ‌తామ‌ని ప్ర‌భుత్వం ప్ర‌క‌టించ‌గానే ఎన్నో ఆటంకాలు, అనుమానాలు, ఆందోళ‌న‌లు వ్య‌క్త‌మ‌య్యాయి. ఈ ఉమ్మ‌డి ప్ర‌వేశ‌ప‌రీక్ష‌తో రాత్రికి రాత్రే అద్భుతాలు జ‌రిగిపోవ‌ని కొంద‌రు పెద‌వి విరిచారు. మ‌రికొంద‌రు కోర్టు కెళ్లి ఈ విధానాన్ని నిలుపుద‌ల చేయాల‌ని వాదించారు. అయితే సుప్రీంకోర్టు మాత్రం అనుమానాల‌ను, ఆందోళ‌న‌ల‌ను ప‌రిగ‌ణ‌న‌లోకి తీసుకోకుండా నీట్ ను ప్ర‌వేశ‌పెట్టేందుకు మొగ్గు చూపింది. నీట్ తో దీర్ఘ‌కాలంలో విద్యార్ధుల‌కు అప‌రిమిత మేలు క‌లుగుతుందని అత్యున్న‌త న్యాయ‌స్థానం విశ్వ‌సించింది. ముఖ్యంగా వైద్య విద్య‌లో పెరిగిపోతున్న డ‌బ్బు ప్రాబ‌ల్యాన్ని త‌గ్గించేందుకు సామాన్యుల‌కు వైద్య విద్యను అందుబాటులోకి తేవాల‌న్న రెండు విష‌యాల‌ను ప్రాతిప‌దిక‌గా తీసుకుని నీట్ కు అనుకూలంగా తీర్పునిచ్చింది. దీంతో ఈ ఏడాది ఎటువంటి ఆటంకాలు లేకుండా నీట్ ప‌రీక్ష సాఫీగా జ‌రిగిపోయింది. ప్ర‌యివేట్ యాజ‌మాన్యాల‌కు రుచించ‌క‌పోయినా కొంద‌రి విద్యావేత్త‌ల ఆలోచ‌నల ప్ర‌కారం వైద్య విద్య‌లో ఉమ్మ‌డి ప్ర‌వేశ ప‌రీక్ష అనేది ఒక విప్ల‌వాత్మ‌క ముంద‌డుగు. 

ఇప్ప‌టికీ కొన్ని స‌మ‌స్య‌లున్నాయి! 

     వైద్య విద్య‌లో ప్ర‌వేశాల‌కు నీట్ ప్ర‌వేశ‌పెట్ట‌డంతోనే అన్ని స‌మ‌స్య‌లు తీరిపోయాయ‌నుకుంటే పొర‌పాటే. ఈ ఏడాది ప్రారంభ‌మైన నీట్ ప్ర‌వేశ ప‌రీక్ష‌ల్లోనే ఎన్నో లోపాలు బ‌య‌ట‌ప‌డ్డాయి. దీనికి తోడు ఫీజులపై ఇప్ప‌ట‌కీ ఒక స్ప‌ష్ట‌మైన విధానం లేదు. అన్ని కాలేజీల్లో ఒకే విధంగా ఫీజులు వ‌సూలు చేసేందుకు అనువైన ప‌రిస్థితులు లేవు. ఎందుకంటే కొన్ని కాలేజీల్లో నిబంధ‌న‌ల‌కు అనుగుణంగా మంచి మౌలిక స‌దుపాయాలు, సౌక‌ర్యాలు ఉంటే మ‌రికొన్ని కాలేజీల్లో అవి క‌నీస స్థాయిల్లో ఉన్నాయి. ఈ నేప‌థ్యంలో అన్ని సౌక‌ర్యాలు ఉన్న కాలేజీల‌కు, అస‌లు స‌రైన సౌక‌ర్యాలు లేని కాలేజీల‌కు ఒక‌టే ఫీజు ఎలా నిర్ణ‌యిస్తార‌న్న వాద‌న‌లున్నాయి. ఇప్ప‌టికే త‌మ కాలేజీల్లో అత్యున్న‌త స‌దుపాయాల‌కు అధిక మొత్తాల‌ను ఇన్వెస్ట్ చేసిన ప్ర‌మోట‌ర్లు, ఫీజులు త‌గ్గించేందుకు సుముఖంగా లేరు. మ‌రోవైపు డిమాండ్ కు ల‌భ్య‌త‌కు మ‌ధ్య ఉన్న అంత‌రాన్ని త‌గ్గించేందుకు ప‌బ్లిక్ ప్ర‌యివేట్ భాగ‌స్వామ్యంతో మ‌రిన్ని కాలేజీలు నెల‌కొల్పాల‌నే ప్ర‌తిపాద‌న‌లు కూడా బాగా ఊపందుకుంటున్నాయి. 

'నీట్' స్ఫూర్తిని కొన‌సాగించాలి! 

   వైద్య విద్యలో డ‌బ్బు ప్రాధాన్యత‌ను త‌గ్గించేందుకు, విద్యార్ధులు విభిన్న ప‌రీక్ష‌లు రాసే యాత‌న‌ను పొగొట్టేందుకు తెచ్చిన నీట్ దీర్ఘ‌కాలంలో అనుకున్న ల‌క్ష్యాల‌ను సాధిస్తుందా? అంటే ఇప్ప‌టికిప్పుడు అవున‌ని కాద‌ని వెంట‌నే చెప్పేందుకు వీలు లేదు. కేవ‌లం ఒక్క ప‌రీక్ష మాత్ర‌మే పూర్త‌యినందున‌, ఇంకా అడ్మిష‌న్లు మొద‌లుకానందున నీట్ ప్ర‌భావం ఏమేర ఉందో తెలుసుకోవ‌డం సాధ్యం కాదు. మ‌రో రెండు విద్యా సంవ‌త్స‌రాలు ముగిస్తే నీట్ ప‌నితీరుపై అవ‌గాహ‌న వ‌స్తుంది. ముఖ్యంగా కాలేజీల్లో ఫీజులు సామాన్యుల‌కు అందుబాటులోకి రాకుంటే నీట్ అస‌లు ఉద్ద‌శ్యం సిద్ధించ‌నట్టే. కోట్లాది రూపాయ‌లు పెట్టుబ‌డులుగా పెట్టి కాలేజీల‌ను నెల‌కొల్పిన మెడిక‌ల్ కాలేజీ నిర్వాహ‌కులు ఫీజులు త‌గ్గించేందుకు, త‌మ వ్యాపార దృక్ఫ‌ధాన్ని వ‌దిలిపెట్టేందుకు సిద్ధ‌ప‌డ‌తారా? అన్న‌దే సందేహం. ఒకవేళ ఫీజులు త‌గ్గించేందుకు, వ్యాపార ధోర‌ణిని విడ‌నాడేందుకు కాలేజీలు నిరాక‌రిస్తే ఏం చేయాల‌న్న దానిపై ప్ర‌భుత్వం వ‌ద్ద ముంద‌స్తు ప్ర‌ణాళిక ఉందా?  లేదా? అన్న‌దానిపై ఎటువంటి స్ప‌ష్ట‌త లేదు. ఎందుకంటే ఉద్దేశ్యం మంచిది అయితే స‌రిపోదు దాన్ని అమ‌లు చేసేందుకు అవ‌స‌ర‌మైన ప్ర‌ణాళిక కూడా ముఖ్యం. మ‌రి నీట్ వ‌ల్ల విద్యార్ధుల‌కు భ‌విష్య‌త్ లో ఎటువంటి లాభాలు ఉంటాయో తెలుసుకోవాలంటే కొన్ని రోజులు ఆగాల్సిందే. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com