ఇలా చేస్తే ఆఫీస్ లో మీకు పని 'భారం' అనిపించదు!!

      ఇటీవల కాలంలో ఎక్కవగా వినిపిస్తున్న పదం, చాలా మందిని ఇబ్బంది పెడుతున్న పదం 'పని ఒత్తిడి'.  ముఖ్యంగా టార్గెట్లు, డెడ్ లైన్లు అంటూ విభిన్న పనివాతావరణం ఉండే కార్పోరేట్ రంగంలో ఉద్యోగులు, ఈ పని ఒత్తిడికి ఎక్కువగా గురవుతున్నారు. ఒక వైపు ఉద్యోగ భద్రత కోసం పాకులాట, మరోవైపు తీవ్ర మానసిక ఒత్తిడితో పనిచేయడంతో చాలా మంది ఉద్యోగులు అనారోగ్యం పాలవుతున్నారు. సరైన ప్రణాళికతో, ప్రశాంత చిత్తంతో పనిచేయకుంటే వీరి ఉద్యోగం జీవితంతో పాటు ఆరోగ్యం కూడా ఇబ్బందులో పడే అవకాశముంది. పని ఒత్తిడిని భరించలేక చాలా మంది ఉద్యోగులు అటు వ్యక్తిగత జీవితంలోనూ, ఇటు ఉద్యోగం లోనూ తాము అనుకున్న లక్ష్యాలను సాధించలేక చతికిలపడుతున్నారు. ఇటువంటి పరిస్థితుల్లో ప్రస్తుత పని వాతావరణానికి అనుగుణంగా తనను తాను మలుచుకుని ఒత్తిడిని దరికి చేరనీయకుండా, అనుకున్న లక్ష్యాలను సాధించాలంటే ఇప్పుడు మనం చెప్పుకుంటున్న జాగ్రత్తలు పాటించాల్సిందే. 

1.  పక్కా ప్రణాళిక

     'వాయిదా' అనేది ఒత్తిడిని పెంచే అతిపెద్ద సమస్య. ఒక పనిని వాయిదా వేయడం వలన ఆ ఫలితం పనితీరుపై తీవ్ర ప్రభావాన్ని చూపిస్తుంది. కాబట్టి వాయిదా ను ఎప్పుడూ వాయిదా వేయండి. ప్రతీ రోజూ ఒక ప్రణాళిక సిద్ధం చేసుకుని దాని ప్రకారం పనులను చేయడం అలవాటు చేసుకోండి. దీని వలన ఒత్తిడి తగ్గి గడువు ప్రకారం పనులను పూర్తి చేసేందుకు అవకాశం ఉంటుంది. దీంతో పాటు ఏ రోజు పని ఆ రోజు పూర్తి చేయడం వలన వర్క్ లోడ్ తగ్గి మరుసటి రోజు మరింత ఉత్సాహంగా పనిచేసేందుకు వీలు కలుగుతుంది. 

2. పని మధ్యలో విరామం 

    పని మధ్య కాస్త విరామం తీసుకోవడం ఉత్పాదకతను పెంచుతుందని శాస్త్రీయంగా రుజువైంది. కాబట్టి రెండు మూడు గంటల ఏకధాటిగా పనిచేసిన తర్వాత కొంచెం సేపు విరామం తీసుకోండి. దీనివలన మానసికంగా కొత్త శక్తిని పుంజుకుంటారు. ఒకవేళ 10 నుంచి 20 నిమిషాలు సమయం తీసుకునే అవకాశం ఉంటే అలా కొంచెం దూరం నడిచి వస్తే  రిలాక్స్ గా ఉంటుంది. అదే విధంగా సీట్లో కూర్చుని గట్టిగా ఊపిరి పీల్చి వదలటం వలన ఒత్తిడి నుంచి ఉపశమనం పొందవచ్చు. అలా కాకుండా వర్క్ బ్రేక్ లో ఇంటర్నెట్ చూడటం, వీడియో గేమ్స్ ఆడటం చేస్తే అవి మరింత ఒత్తిడికి  గురి చేస్తాయి. అలా కాకుండా విరామాన్ని ఒత్తిడిని తగ్గించుకునేందుకు ఉపయోగించుకోండి. 

3. 'నో' చెప్పడం నేర్చుకోండి!

     మీరు ఒక పనిని గడువులోగా పూర్తి చేయాల్సిన డెడ్ లైన్ ఉన్నప్పుడు జాగ్రత్తగా నడుచుకోండి. మానసికంగా ఈ పనిని నేను గడువులోగా పూర్తి చేయగలను అని మననం చేసుకోండి . ఈ సమయంలో ఇతర పనులు చేయమని ఎవరైనా అడిగినా చేసేందుకు కుదరదని కూల్ గా చెప్పండి. ఎక్కువ పనులు నెత్తిన వేసుకోవడం వలన వాయిదా అనేది మీ పనిలోకి ప్రవేశించి మిమ్మల్ని ఇబ్బంది పెడుతుంది. ఇలా పనులు వాయిదా వేయడం అంటే మీకు మీరు ఒత్తిడిని కొనితెచ్చుకున్నట్టే. ఎక్కువసార్లు పనిని వాయిదా వేస్తే మీపైన యాజమాన్యానికి తక్కువ భావంతో పాటు మీ పనితీరుపై అనుమానాలు కలుగుతాయి. 

4. పనిని, సమయాన్ని సమన్వయం చేసుకోండి

     ఎప్పుడూ మీ మనస్సులో చేరుకోవాల్సిన లక్ష్యాలు, దానిని సాధించేందుకు కావాల్సిన సమయం, పని నిర్వహణ పై ఒక స్పష్టమైన విధానాన్ని ఏర్పరుచుకోండి. పని, విరామంపై ఒక షెడ్యూల్ ను తయారు చేసుకోండి. పనిని వీలైనంత తొందరగా పూర్తి చేయడం వలన ఒత్తిడిని వదలించుకోవచ్చు. ఆఫీస్ కు 10 నిమిషాలు ఆలస్యంగా వచ్చినా అది పనిపై ప్రభావాన్ని చూపిస్తుంది. కాబట్టి ఆఫీస్ కు సమయానికి రావడాన్ని అలవాటుగా మార్చుకోండి. అదే విధంగా ప్రాధాన్యతాంశాలను గుర్తించడం కూడా ఒత్తిడిని తగ్గిస్తుంది. ముందుగా చేయాల్సిన పనిని, తప్పని సరిగా చేయాల్సిన పనులను విడదీసుకుంటే పని సులువైపోతుంది. అదే విధంగా ఆఫీస్ లో మీ రోల్, కంపెనీ ప్రాధాన్యత ఇచ్చే విషయాలు, మీ వ్యక్తిగత లక్ష్యాలు, మీ బలాలు వీటిపై స్పష్టత తెచ్చుకంటే ఒత్తిడిని అధిగమించొచ్చు.

5. స్నేహితులు, సహొద్యోగులతో మాట్లాడండి 

    ఎప్పుడూ ఒంటరిగా ఒక దగ్గర ఉండిపోవడం మీ ఒత్తిడిని మరింత పెంచుతుంది. మీ పని సమస్యలు, ఇబ్బందులను మీకు నమ్మకమైన, మీ శ్రేయోభిలాషులైన స్నేహితులుతో సహోద్యోగుల‌తో పంచుకోండి. సమస్యలను వేరే వాళ్లకు చెప్పుకోవడం వలన కాస్త ఒత్తిడి నుంచి రిలాక్స్ కావచ్చు. భావోద్వేగాల పరంగా మీకు మద్ధతు లభించినప్పుడు మీ మానసిక ప్రశాంతత పెరుగుతుంది. 

6. మంచి ఆహారపు అలవాట్లను కొనసాగించండి 

   మంచి ఆహార నియమాలు మీ శక్తి సామర్ధ్యాలను పెంచుతాయి. అతిగా భోజనం చేయడం వలన మీకు ఎప్పుడూ నిద్ర వస్తున్న ఫీలింగ్ కలుగుతుంది. అదే తక్కువగా తింటే శక్త లేనట్టు నీరసంగా అనిపిస్తుంది. అలా కాకుండా సమతుల ఆహారం తీసుకోవడం వలన మీ శక్తి పెరిగి ఉత్సాహంగా పనిని పూర్తి చేయగలుగుతారు.  ఆహారంపై తగిన శ్రద్ధ పెట్టకపోయినా మీకు ఒత్తిడి పెరగడం ఖాయం. 

7. కంటి నిండా నిద్రపోండి 

       సరిగ్గా నిద్ర పోకుంటే అది మీ మొత్తం పనినే దెబ్బతీస్తుంది. నిద్రలేకపోవడం వలన బద్ధకంగా అనిపించి మీ ఉత్పాదకతపై ప్రతికూల ప్రభావం పడుతుంది. రోజు మొత్తం ఒక డల్ ఫీలింగ్ కలిగి పనిపై ఆసక్తి సన్నగిల్లుతుంది. అదే కంటి నిద్రపోతే భావోద్వేగాలను, మానసిక ఒత్తిడులను అదుపు చేసుకోవడం సులువవుతుంది. దీని వలన పనిలో ఎదురయ్యే సవాళ్లను సమర్ధవంతగా ఎదుర్కొనే సామర్ధ్యం మీ సొంతమవుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com