మీ ఉద్యోగాన్ని ఎలా కాపాడుకోవాలో మీకు తెలుసా??

        దేశీయ జాబ్ మార్కెట్లో కొత్త ఉద్యోగాల క‌ల్ప‌న బాగానే ఉన్నా కొన్ని రంగాల్లో మాత్రం ఇప్పుడు ఉద్యోగుల తొలగింపు ప్ర‌క్రియ కొన‌సాగుతోంది. ఆటోమేష‌న్ ప్ర‌భావంతో ఐటీ రంగంలోనూ, ఖ‌ర్చు త‌గ్గింపు చ‌ర్య‌లు వ‌ల‌న కొన్ని ఎంపిక చేసిన‌ రంగాల్లోనూ ఉద్యోగాల‌ను తొలగిస్తున్న‌ట్టు గ‌డిచిన కొన్ని రోజులుగా వార్త‌లు వ‌స్తున్నాయి. అటువంటిదేమీ లేద‌ని కొన్ని కంపెనీలు ఖండిస్తున్న‌ప్ప‌టికీ ఇప్ప‌టికే తొలగింపుల ప్ర‌క్రియ షురూ అయిన‌ట్టు తెలుస్తోంది. దీంతో ఉద్యోగుల గుండెల్లో రైళ్లు ప‌రుగెడుతున్నాయి. నైపుణ్యం ఉన్న‌వాళ్ల‌కు ఏ భ‌యం లేన‌ప్ప‌టికీ మిగ‌తా వాళ్లు కొన్ని హెచ్ఆర్  పాల‌సీలపై అవ‌గాహ‌న పెంచుకుంటే సంక్షోభం నుంచి గ‌ట్టెక్కే అవ‌కాశముంది. కెరీర్ ఇబ్బందుల్లో ప‌డే సంద‌ర్భం వ‌చ్చిన‌ప్పుడు కంగారు ప‌డేకంటే అటువంటి స‌మ‌యంలో ఏ విధంగా వ్య‌వ‌హ‌రించాలో తెలుసుకుంటే ఆత్మ‌ర‌క్ష‌ణ సులువ‌వుతుంది. ఒక‌వేళ తొలగింపును ఎదుర్కోవాల్సి వ‌చ్చినా ధైర్యంగా ముంద‌డుగు వేసేందుకు ఉద్యోగులు మానసికంగా సిద్ధంగా ఉండాలి. 

'తొలగింపు'కు కార‌ణాలెన్నో! 

   ఇవ్వాళ  రేపు ఉద్యోగం ఇవ్వ‌డానికి వంద అర్హ‌త‌ల‌ను చూసే కంపెనీలు, ఉద్యోగం తీసేట‌ప్పుడు మాత్రం అర్హ‌త‌ల‌ను ప‌రిగ‌ణ‌న‌లోకి తీసుకోవు. ఎందుకంటే అంత‌ర్గ‌తంగా కంపెనీ ఆర్థిక ప‌రిస్థితి, క్లయింట్లు, ఆర్డ‌ర్లు, కొత్త టెక్నాల‌జీలు..ఇలా విభిన్న విష‌యాలు కొత్త‌ ఉద్యోగాలు రావ‌డానికి , ఉన్న ఉద్యోగాలు పోవ‌డానికి కార‌ణ‌మ‌వుతాయి. నైపుణ్యం ఉన్న‌వాళ్ల‌ను కంపెనీలు ఎట్టి పరిస్థితుల్లోనూ వ‌దులుకోవు. ఖ‌ర్చు త‌గ్గింపు చ‌ర్య‌లు చేప‌ట్టిన‌ప్పుడు వాళ్ల‌కు ముందుగా గుర్తుకు వ‌చ్చేది స‌రైన ప‌నితీరు క‌న‌బ‌ర్చ‌ని సిబ్బందే. అస‌లు కంపెనీలు ఎందుకు ఉద్యోగాల తొల‌గింపును  చేప‌డ‌తాయో తెలుసుకుంటే పరిస్థితి నుంచి కొద్దిగా అయినా గ‌ట్టెక్కెందుకు ప్ర‌య‌త్నం చేయ‌వ‌చ్చు. 

    ప్రారంభంలో కంపెనీ ఉద్యోగుల మీద అపార‌మైన న‌మ్మ‌కంతో వాళ్ల‌కు కొన్ని బాధ్య‌త‌లు అప్ప‌గిస్తుంది. అయితే కొంద‌రి నిర్ల‌క్ష్యం, ఉత్సాహం త‌గ్గ‌డం వంటి కార‌ణాల‌తో ప‌నిని వాయిదా వేయ‌డమో లేక పూర్తిగా చేయ‌క‌పోవ‌డం వంటి త‌ప్పులు చేస్తుంటారు. దీని వ‌ల‌న నిర్దేశించుకున్న ల‌క్ష్యాల‌ను చేరుకోలేక కంపెనీ ఆర్థిక ఇబ్బందుల్లోకి జారుకుంటుంది. ఆర్థిక క‌ష్టాల్లోకి జారుకున్న కంపెనీకి , త‌క్ష‌ణం క‌నిపించే ప‌రిష్కారం ఖ‌ర్చు త‌గ్గింపు. ఒక కంపెనీ అధికంగా ఖ‌ర్చు పెట్టేది ఉద్యోగుల మీద‌నే. ఉదాహ‌ర‌ణ‌కు ఒక ఉద్యోగికి ఒక రూపాయి శాల‌రీ ఇస్తే, అత‌నికి క‌ల్పించే డెస్క్, కంప్యూట‌ర్స్, ఏసీ, క్యాంటీన్, శిక్ష‌ణ ఇలాంటి విష‌యాల మీద నాలుగు రూపాయ‌లు ఖ‌ర్చు చేస్తుంది. ఒక ఉద్యోగి క‌నుక స‌రైన ప‌నితీరు లేదా ఉత్పాద‌క‌త‌ను ప్ర‌ద‌ర్శించ‌క‌పోతే కంపెనీకి మొత్తం 5 రూపాయ‌ల న‌ష్టం వాటిల్లుతుంది. అందుకే కంపెనీలు ఆర్థిక ఇబ్బందుల్లో ప‌డ‌గానే మొద‌ట ఉద్యోగుల తొలగింపునే చేప‌డతాయి. 

హెచ్ఆర్ పాల‌సీలు కీలకం! 

       ఏ కంపెనీ అయినా లాభార్జ‌నే ధ్యేయంగా కార్య‌క‌లాపాల‌ను నడిపిస్తుంది. తాను నిర్దేశించుకున్న ఆర్థిక ల‌క్ష్యాలను చేరుకోలేన‌ప్పుడు కొన్నిసార్లు క‌ఠిన నిర్ణ‌యాలు తీసుకుంటుంది. అందులో భాగంగానే ప‌నితీరును మదింపు చేసి ల‌క్ష్యాల‌ను చేరుకున్న‌వారినే ఉద్యోగులుగా కొన‌సాగించేందుకు మొగ్గు చూపుతుంది. ఈ పాల‌సీలో భాగంగా నిర్దేశించిన ల‌క్ష్యంకు అనుగుణంగా 50 శాతానికి మించి ప‌నితీరు క‌న‌బ‌ర్చిన వారికి ప‌దోన్న‌తులు ఇస్తుంది. 25 శాతం ప‌నితీరు క‌న‌బ‌ర్చిన వారు ఉద్యోగంలో కొన‌సాగ‌గ‌లుగుతారు. మిగిలిన 25 శాతం మంది తొల‌గింపుకు గుర‌వుతారు. కాబ‌ట్టి ఉద్యోగులు ఈ విష‌యాన్ని ఎప్పుడూ గుర్తుపెట్టుకుని కంపెనీ ల‌క్ష్యాల అనుగుణంగా పనిచేయ‌డం నేర్చుకుంటే సంక్షోభం వ‌చ్చినా ఉద్యోగాన్ని కాపాడుకునేందుకు అవ‌కాశం ఉంటుంది. అలా కాకుండా నెల నెల జీతం వ‌స్తుంది క‌దా? ఏదో బండి న‌డిపిద్దాం! అనుకుంటే సంక్షోభం స‌మ‌యంలో ఉద్యోగాన్ని కోల్పోయి ఇబ్బందులో ప‌డాల్సి ఉంటుంది.

ప‌టిష్ఠ విధానాలతో తొల‌గింపుల‌కు చెక్!

         హెచ్ఆర్ పాల‌సీ ప్ర‌కారం ఏ కంపెనీ అయినా 20 శాతం కొత్త రిక్రూట్ మెంట్లు చేయాలి. 20 శాతం తొల‌గింపులు చేప‌ట్టాలి. మ‌రో 20  శాతం అద‌న‌పు ఉద్యోగుల‌ను విధుల్లోకి తీసుకోవాలి. ఇలా చేయ‌డం వ‌ల‌న కొంత మంది విధుల‌కు హాజ‌రుకాకున్నా లేక టెర్మినేష‌న్ కు గురైనా ఎటువంటి ఆటంకాలు లేకుండా కార్య‌క‌లాపాలు జ‌రిగిపోతాయి. మంచి సంస్థ‌ల్లో, లాభ‌సాటిగా న‌డుస్తున్న కంపెనీల్లో ఈ ప‌ద్ధ‌తి ఎప్పుడూ కొన‌సాగుతూ ఉంటుంది. ఈ ప‌ద్థ‌తిని అనుస‌రించ‌ని కంపెనీలే ఏ చిన్న సంక్షోభం వ‌చ్చినా ఉద్యోగుల‌ను తొలగిస్తున్నాయి. మాన‌వ వ‌న‌రుల విభాగంలో చాలా కంపెనీలు బ‌ల‌హీనంగా ఉండ‌టం వ‌ల‌న సంక్షోభ స‌మ‌యంలో ఇబ్బందుల‌ను ఎదుర్కోవాల్సి వ‌స్తుంది. ప‌టిష్టమైన హెచ్ఆర్ విభాగం ఉంటే సంక్షోభాలు వ‌చ్చినా త‌ట్టుకుని నిల‌బ‌డ‌గ‌లిగే సామర్ధ్యం కంపెనీల‌కు వ‌స్తుంది. హెచ్ఆర్ కు ఉన్న  ఆ ప్రాధాన్య‌త‌ను గుర్తించే ఇటీవ‌లి కాలంలో చాలా కంపెనీలు ఆ విభాగాన్ని బ‌లోపేతం చేసుకోవ‌డంపై దృష్టి సారిస్తున్నాయి.

సంక్షోభ స‌మ‌యంలో ఏం చేయాలి?

   ఉద్యోగాల తొలగింపు సంద‌ర్భం ఎవ‌రికైనా చాలా ఇబ్బందిక‌రంగా ఉంటుంది. కుటుంబ భాధ్య‌త‌ల‌కు తోడు సామాజిక గౌర‌వం ఆధార‌ప‌డి ఉండ‌టంతో ఉద్యోగాన్ని కోల్పోవ‌డం చాలా బాధ‌ను క‌లిగిస్తుంది. కొన్ని జాగ్ర‌త్త‌లు మ‌రికొన్ని ఆత్మ‌ర‌క్ష‌ణ చ‌ర్య‌లు తీసుకుంటే సంక్షోభాన్ని ఎదుర్కోవ‌డం  సుల‌భ‌మ‌వుతుంది.

• పాత మేనేజ్‌మెంట్ స్థానంలో కొత్త మేనేజ్‌మెంట్ వ‌చ్చిన‌ప్పుడు ఉద్యోగులు జాగ్ర‌త్త‌గా వ్య‌వ‌హ‌రించాలి. కొత్త యాజ‌మాన్యం పాత ఉద్యోగుల‌పై న‌మ్మకం లేక తొలగింపులు చేప‌డుతుంది. అటువంటి సంద‌ర్భంలో ఉద్యోగులు స‌మ‌స్ఫూర్తిగా వ్య‌వ‌హ‌రించాలి. యాజమాన్యంతో స‌మావేశమై త‌న ప‌ని, నైపుణ్యాల‌ను వివ‌రించి వాళ్ల‌కి న‌మ్మ‌కం క‌లిగేలా ప్ర‌వ‌ర్తించాలి.

• మ‌రికొన్ని సంద‌ర్భాల్లో తొల‌గింపుల వేళ యాజ‌మాన్యం కొంద‌రు ఉద్యోగుల‌ను రివ్యూకు పిలిచి జీతం త‌గ్గించుకోమ‌ని కోరుతుంది. ఇటువంటి స‌మ‌యంలో ఉద్యోగులు అహం, కోపం ల‌కు తావు లేకుండా ప్ర‌శాంతంగా నిర్ణ‌యం తీసుకోవాలి. త‌న‌కు త‌క్ష‌ణం ఉద్యోగం దొరికే ప‌రిస్థితి లేన‌ప్పుడు లేదా అదే ఉద్యోగంలో కొన‌సాగితే భ‌విష్య‌త్ ఉంద‌ని తెలిసిన‌ప్పుడు ఎటువంటి భేజ‌షాల‌కు పోకుండా జీతం త‌గ్గించుకునేందుకు అంగీక‌రించాలి.

• ఉద్యోగాల తొలగింపు ప్ర‌క్రియ‌లో కంపెనీలు ఉద్యోగులను పిలిచి మాట్లాడి జాబితాను త‌యారు చేయ‌వు. వారు నిర్ణ‌యించుకున్న ప్రకారం జాబితాను త‌యారు చేసి అన‌వ‌స‌రం అనుకున్న‌వాళ్ల‌పై వేటు వేస్తారు. 'పరిస్థితులు అనుకూలించ‌డం లేదు ఉద్యోగానికి ముప్పు పొంచి ఉంది' అని అనిపించిన వెంట‌నే టీమ్ లీడ్ తో మాట్లాడి జాబ్ ను ప్రొటెక్ట్ చేసుకునేందుకు త‌గిన చ‌ర్య‌లు చేప‌ట్టాలి.

• ఒక‌వేళ తొల‌గింపులో భాగంగా మిమ్మ‌ల్ని రివ్యూకు పిలిచి మేనేజ్ మెంట్ మాట్లాడుతున్న‌ప్పుడు ఆవేశం, ఆగ్ర‌హాల‌కు గురికాకుండా చూసుకోవాలి. మీరు ఉద్యోగం తొల‌గిస్తే నా ప‌రిస్థితి ఏంటి?  మిమ్మ‌ల్ని న‌మ్ముకుని ఇంత దూరం వ‌చ్చాను? అని నిందారోప‌ణ‌ల‌కు అస్స‌లు దిగ‌కండి. పంతాలు, ప‌ట్టింపుల‌కు పోతే కెరీర్ లో మీకే న‌ష్టం వాటిల్లుతుంది.

• ఉద్యోగ సంక్షోభంలో మంచి సంబంధాలు, ముందు చూపు అనేవి మిమ్మ‌ల్ని కాపాడుతాయి. బాస్ తో మంచి అనుబంధం, తోటి ఉద్యోగుల‌తో స‌త్సంబంధాలు క‌లిగి ఉంటే తొల‌గింపుల స‌మ‌యంలో అవి మీకు అక్క‌ర‌కు రావ‌చ్చు.  వ్య‌క్తిగ‌తంగా కానీ వృత్తిగ‌తంగా కానీ బాస్ కైనా, ఇత‌రుల‌కైనా మీరు గ‌తంలో స‌హాయ‌ప‌డి ఉంటే అది కూడా ఉప‌యోగ‌ప‌డుతుంది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com