చంద్ర‌బాబు చెప్పింది నిజ‌మేనా..వాళ్ల‌కు నోబెల్ ప్రైజ్ ఇవ్వొచ్చా?
కొన్ని విష‌యాలు విన‌డానికి, చూడ‌టానికి అసాధ్యంగా క‌నిపించినా, అంతులేని ప‌ట్టుద‌లతో, కృషితో ప్ర‌య‌త్నిస్తే సుసాధ్యంగా మార‌తాయి. అయితే ఈ విషయాన్ని పూర్తి స్థాయిలో ఆక‌లింపు, అవ‌గాహ‌న చేసుకోకుండా ముందుగానే దాన్ని విమ‌ర్శించ‌డం లేదా అప‌హాస్యం చేయడం చేస్తే నేర్చుకోవ‌డంలో వెనక‌బ‌డిపోయిన‌ట్టే. విద్యార్ధులు ఇప్పుడు మ‌నం చెప్పుకున్న విషయాన్ని జాగ్ర‌త్త‌గా అధ్య‌య‌నం చేయాలి. త‌ర‌గ‌తి గ‌దిలో ముందుగా టీచ‌ర్ చెపుతున్న విషయాన్ని పూర్తి స్థాయిలో అర్ధం చేసుకోవ‌డానికి ప్ర‌య‌త్నించాలి. తాజాగా ఏపీ సీఎం చంద్ర‌బాబు చేసి నోబెల్ ప్రైజ్ వ్యాఖ్య‌ల‌ను విష‌యం పూర్తిగా తెలుసుకోకుండానే విమ‌ర్శలు గుప్పిస్తున్నారు. ఇది స‌రైన ప‌ద్ధ‌తి కాదు. చెప్పిన విషయాన్ని ఆక‌లింపు చేసుకోవ‌డం మాని విమ‌ర్శ‌ల‌కే శ‌క్తిని, స‌మ‌యాన్ని వెచ్చిస్తే మీరు మంచి విద్యార్ధిగా ఎప్ప‌టికీ త‌యారు కాలేరు. త‌ర‌గ‌తి గ‌దిలోనే కాదు బ‌య‌ట కూడా విద్యార్ధులు, ముందుగా అవ‌త‌లి వారు చెప్పింది విన‌డం అల‌వాటు చేసుకోవాలి. ఆ విన్న విష‌యంపై ఒకవేళ అభ్యంత‌రాలు ఉంటే మ‌రింత స‌మాచారాన్ని సేక‌రించి అది స‌రైన‌దా కాదా అన్న‌దానిపై స్ప‌ష్ట‌త తెచ్చుకోవాలి. అలా కాకుండా మిగ‌తా వాళ్ల‌తో పాటు ఆ విషయాన్ని హేళ‌న చేస్తూ స‌మ‌యాన్ని వృధా చేస్తూ ఉంటే అందులో ఉన్న నిజాన్ని మీరు గ్ర‌హించ‌లేక‌పోవ‌చ్చు.
'వినదగు నెవ్వరు చెప్పిన వినినంతనె వేగపడక వివరింపదగున్'..సుమ‌తీ శ‌త‌కంలోని ఈ ప‌ద్యాన్ని విద్యార్ధులు అనుక్ష‌ణం గుర్తుపెట్టుకోవాలి. ఎవ్వ‌రూ ఏమి చెప్పినా ఓపిగ్గా వినేవాడే ఉత్త‌ముడు అన్న సుమ‌తీకారుని మాట‌ల‌ను గుర్తు చేసుకుని వ్య‌వ‌హ‌రించాలి. ప్ర‌స్తుతం సోష‌ల్ మీడియా ప్ర‌భావం విద్యార్ధుల‌పై అప‌రిమితంగా ఉంది. ఒక విష‌యం వాస్త‌వ‌మా? అబ‌ద్ధ‌మా? అన్న విష‌యం తెలుసుకోకుండానే దాన్ని ప్రచారం చేస్తున్నారు. న‌మ్ముతున్నారు. దీని వ‌ల‌న విద్యార్ధులు పుకార్ల‌ను న‌మ్మ‌డం, దానినే నిజంగా భావించ‌డం అనే ప్ర‌మాదంలో చిక్కుకుంటున్నారు. సాంకేతిక విప్ల‌వం పుణ్య‌మాని ఒక్క క్లిక్ తోనే స‌మ‌స్త సమ‌చారాన్ని తెలుసుకునే వీలుంది. కాబ‌ట్టి విష‌యం మీ వ‌ద్ద‌కు వ‌చ్చిన‌ప్పుడు అది స‌రైన‌దా? కాదా? అన్న విషయాన్ని ఒక‌టికి రెండు సార్లు స‌రిచూసుకోవాలి. అదే విధంగా ఎవ‌రైనా ఒక వ్యాఖ్య చేసిన‌ప్పుడు దానిపై వాద‌న చేయ‌కుండా మౌనంగా ఉండ‌టం మంచిది. ఒకవేళ అది త‌ప్పు అనిపిస్తే దాన్ని మ‌రోసారి స‌రిచూసుకుని అవ‌త‌లి వ్యక్తులకు తెలియ‌జేయాలి. అంతేకానీ ఎదుటి వ్య‌క్తుల‌తో వాదించ‌డం, అవ‌హేళ‌న చేయడం వ‌ల‌న మీ వ్య‌క్తిత్వం దెబ్బ‌తిన‌వ‌చ్చు.
ఒక అంశంపై వివిధ వ్యక్తులకు ఒక్కోర‌క‌మైన అభిప్రాయం ఉంటుంది. వాళ్ల అభిప్రాయంతో మ‌నం ఏకీభ‌వించాల్సిన ప‌నిలేదు. కానీ ఒక్కోసారి వాళ్ల అభిప్రాయంతో ముడిపెట్టి చెప్పే విష‌యానికి విశ్వ‌స‌నీయ‌మై ఆధారం ఉంటుంది. అది తెలుసుకోకుండా అవ‌త‌లి వ్య‌క్తుల‌ను తెలివిలేని వాళ్లుగా, అజ్ఞానులుగా చిత్రీక‌రించ‌డం స‌రైన ప‌ద్ధ‌తి కానేర‌దు. తాజాగా ఏపీ సీఎం చంద్ర‌బాబు నాయుడు చేసిన వ్యాఖ్య‌ల‌నే మ‌నం ఉదాహ‌ర‌ణ‌గా తీసుకుందాం. క్రీడాకారులు అత్యుత్త‌మ ఫ‌లితాలు సాధించాలి. నేను నోబెల్ ప్రైజ్ ఇస్తా అని నేను ఇటీవ‌లే ప్ర‌తిపాదించాను అని అన్నారు. ఈ వ్యాఖ్య‌ను ప‌ట్టుకుని సోష‌ల్ మీడియాలో ర‌చ్చ చేస్తున్నారు. ప్ర‌తిప‌క్ష పార్టీ వాళ్లు ఇటువంటి ప్ర‌చారాలు చేసుకుంటే అతి రాజ‌కీయ పోరులో భాగం అనుకోవ‌చ్చు. కానీ విద్యార్దులు, ఉద్యోగులు ఇలా అంద‌రూ చంద్ర‌బాబుకు క‌నీస ప‌రిజ్ఞానం లేదు క్రీడాకారులకు నోబెల్ ప్రైజ్ ఎలా ఇస్తారు అంటూ విమ‌ర్శలు గుప్పించారు. కానీ ఒక్క‌రు కూడా ఈ విష‌యంపై అధ్య‌య‌నం చేయడం కానీ ఆయ‌న ఎందుకు అలా అన్నాడో అని తెలుసుకోవ‌డం కానీ చేయ‌లేదు. ఒక విషయాన్ని పూర్తి స్థాయిలో అర్ధం చేసుకోక‌పోవ‌డం వ‌ల‌న ఇటువంటి ప‌రిస్థితులే ఉత్ప‌న్న‌మ‌వుతాయి.
ప్ర‌ఖ్యాత శాస్త్ర‌వేత్త సర్ అల్ఫ్రెడ్ నోబెల్ పేరు మీద నోబెల్ బ‌హుమ‌తుల‌ను 1901 సంవ‌త్సం నుంచి ప్ర‌ధానం చేస్తున్నారు. మానవ జాతి మేలు కోసం శాస్త్రాన్ని వినియోగిస్తూ స‌మాజ మేలు కోసం ప‌రిత‌పించే వ్య‌క్తుల‌ను నోబెల్ బ‌హుమ‌తుల‌కు ఎంపిక చేస్తున్నారు. భౌతిక శాస్త్రం, రసాయ‌న శాస్త్రం,వైద్యం, ఆర్థిక శాస్త్రం, సాహిత్యం, శాంతి ఇలా 6 రంగాల్లో విశేష కృషి చేసిన వ్యక్తులకు ఈ ప్రైజ్ ను ఇస్తున్నారు. అయితే క్రీడా రంగంలో విశేష ప్ర‌తిభ క‌న‌బ‌ర్చిన వ్యక్తులకు కూడా నోబెల్ బహుమతి ఇవ్వాల‌నే డిమాండ్ ఎప్ప‌టినుంచో ఉంది. మానవ జాతిని ఒక్క‌టి చేయ‌డంలో, స‌మాన‌త్వాన్ని, స్వేచ్ఛ‌ను అందివ్వ‌డం క్రీడ‌ల ద్వారా సాధ్యం కాబ‌ట్టి క్రీడాకారులుకు కూడా నోబెల్ బహుమతి ఇవ్వాల‌ని కొంద‌రు కోరుతున్నారు. చంద్ర‌బాబు గారు ఆ ఉద్దేశంతో ఆ విష‌యం చెప్పి ఉంటారు. లేక వేరే ఉద్దేశ్యంతో చెప్పి ఉండొచ్చు. వేరే రంగం వాళ్ల గురించి చెపుతూ తడబడి చెప్పి ఉండవచ్చు. ఒక విషయాన్ని ఒక వ్య‌క్తి ఏ ప‌రిస్థితుల్లో, ఏ సంద‌ర్భంలో చెప్పారు అన్న అంశాన్ని తెలుసుకోకుంటే ఇటువంటి ప‌రిణామాలే ఉత్ప‌న్న‌మ‌వుతాయి. ఏపీ సీఎం చేసిన వ్యాఖ్య‌పై పూర్తి స‌మాచారాన్ని తెలుసుకున్న‌ప్పుడు, అవ‌త‌లి వ్య‌క్తుల తెలివితేట‌ల‌పై, మాట‌ల‌పై మ‌నం ఒక అభిప్రాయాన్ని ఏర్ప‌రుచుకోకుండా ఉంటాం. ఈ విషయాన్ని ఒక ఉదాహ‌ర‌ణ‌గా తీసుకుంటే విద్యార్ధులకు ఎంత‌గానో ఉప‌యోగ‌ప‌డుతుంది. ప్ర‌తీ అంశాన్ని పూర్తిగా అవ‌గాహ‌న చేసుకున్నాకే వ్య‌క్తుల‌పై , మాట‌ల‌పై తీర్పు ఇవ్వాల‌న్న విష‌యం అర్ధ‌మ‌వుతుంది.
మ‌నం ఒక విష‌యంపై అన‌ర్గ‌ళంగా, సాధికారికంగా ఎప్పుడు మాట్లాడ‌గ‌లం? ఆ విష‌యంపై మ‌న‌కు పూర్తి స్థాయిలో పట్టు ఉన్న‌ప్పుడు. ఆ విధంగా త‌న‌ను తాను మ‌లుచుకునేందుకు విద్యార్ధి నిరంత‌రం కృషి చేయాలి. త‌న‌లో ఉన్న చిన్న లోపాల‌ను స‌రిదిద్దుకునేందుకు ప్ర‌య‌త్నించాలి. అంతేకానీ ఎదుటి వ్య‌క్తుల‌ను, టీచ‌ర్ల‌ను విమ‌ర్శించేందుకు వాళ్ల త‌ప్పుల‌ను ఎత్తి చూపేందుకు ప్ర‌య‌త్నిస్తే మీ ఎదుదుగ‌ల ఆగిపోతుంది. ఎప్పుడూ స్వీయ విమ‌ర్శ చేసుకుంటూ, ఎదుటి వ్య‌క్తులు చెప్పింది శ్ర‌ద్ధ‌గా విన‌డం అల‌వాటు చేసుకుంటే చ‌దువులో, కెరీర్ లో ఉన్న‌తి సాధ్య‌మ‌వుతుంది. వాద‌న‌లు, విమ‌ర్శలు మాని విష‌యంపై పూర్తి ప‌రిజ్ఞానం పెంచుకున్న‌ప్పుడు స‌ద్విమ‌ర్శ చేసేందుకు, త‌ప్పుల‌ను స‌రిదిద్దేందుకు అవ‌స‌ర‌మైన అర్హ‌త‌ను సంపాదించుకోగ‌లుగుతారు.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment