ఈ అస్పష్టతను దాటి ఎంబీబీఎస్ సీటును సాధించుకోవాలంటే??

  నీట్ ఫ‌లితాలు వ‌చ్చినా రాష్ట్ర స్థాయి ర్యాంకులు రాక‌పోవడంతో విద్యార్ధులు ఇంకా అయోమ‌యంలోనే ఉన్నారు. మ‌న రెండు తెలుగు రాష్ట్రాల్లో రాష్ట్ర స్థాయి ర్యాంకుల ఆధారంగానే ప్ర‌వేశాలు ఉంటాయి కాబ‌ట్టి వీటికోసం అంద‌రూ ఆతృత‌గా ఎదురుచూస్తున్నారు. అయితే ర్యాంకుపై ఒక అవ‌గాహ‌న తెచ్చుకుంటే ఎక్క‌డ సీటు దొరుకుతుంది? ఏ కేట‌గిరీలో దొరుకుతుంది? అన్న‌విష‌యాల‌పై ఒక స్ప‌ష్ట‌త వ‌స్తుంది. దీని వ‌ల‌న స్టేట్ కౌన్సిలింగ్ జ‌రిగే వ‌ర‌కూ వేచి చూడాలా లేక ఆల్ ఇండియా కౌన్సిలింగ్ లో పాల్గొవాలా అన్న విష‌యం అర్ధ‌మ‌వుతుంది. మ‌న రాష్ట్రంలో సీటు వ‌చ్చే అవ‌కాశాలు లేవు అనుకుంటే  ఇత‌ర రాష్ట్రాల్లో ఉన్న బీ,సీ కేటగిరీల సీట్లను ( మీ అవగాహన కోసమే ఇలా చెప్పాం. ఆయా రాష్ట్రాల్లో వాటిని వేరే పేరుతో వ్యవహరించొచ్చు) సాధించేందుకు ప్ర‌ణాళిక వేసుకుంటే బాగుంటుంది. క‌ర్ణాట‌క వంటి రాష్ట్రాల్లో మ‌న రాష్ట్రం కంటే ఫీజులు చాలా త‌క్కువ‌గా ఉండ‌టంతో అక్క‌డ చేరే విష‌యాన్ని కూడా ప‌రిశీలించుకోవ‌చ్చు. విద్యార్ధులు ముందుగా వారి ర్యాంకుకు సీటు సాధించే కాలేజీలు ఏమున్నాయో తెలుసుకుంటే ద‌ర‌ఖాస్తు ప్ర‌క్రియ‌ను ప్రారంభించుకోవ‌చ్చు. ఈ ఏడాది నీట్ పరీక్ష తర్వాత ఎన్నడూ లేనంత అస్పష్టత ఏర్పడింది కాబట్టి విద్యార్ధులు పూర్తి అప్రమత్తతతో వ్యవహరించాల్సిన పరిస్థితి ఏర్పడింది. 

నియ‌మ నిబంధ‌నల‌పై అవ‌గాహ‌న తెచ్చుకోవాలి! 

   ముఖ్యంగా విద్యార్ధులు నీట్ నియ‌మ నిబంధ‌న‌లు, ఆల్ ఇండియా,  స్టేట్ కౌన్సిలింగ్, కేట‌గిరీల వారీగా సీట్లు ఫీజులు వంటి వాటిపై స‌మ‌గ్ర స‌మాచారం సేక‌రించి పెట్టుకుంటే మంచిది. నీట్ ర్యాంకులు, ఫీజుల వివ‌రాలు, సీట్ల కేటాయింపుపై కెరీర్ టైమ్స్ తాజాగా స‌మ‌గ్ర స‌మాచారాన్ని అందించింది. ఆ ఆర్టిక‌ల్ ను చ‌దివేందుకు ఇక్క‌డ క్లిక్ చేయండి.http://careertimesonline.blogspot.in/2017/06/blog-post_24.html ఆల్ ఇండియా కౌన్సిలింగ్ లో విద్యార్ధులు తెలుసుకోవాల్సిన ముఖ్య‌మైన విష‌యం ఏంటంటే 371 డీ ప్ర‌కారం మ‌న రెండు రాష్ట్రాల విద్యార్ధులు ఇత‌ర రాష్ట్రాల్లోని ప్ర‌భుత్వ మెడిక‌ల్ సీట్లు పొంద‌డానికి అర్హులు కాదు. అలాగే వేరే రాష్ట్రాల విద్యార్ధులు కూడా ఇక్క‌డ సీట్ల‌ను పొంద‌లేరు. అంటే తెలుగు రాష్ట్రాల్లో ఉన్న దాదాపు 10,000 మెడిక‌ల్ సీట్ల‌లో , ప్ర‌భుత్వ‌, ప్ర‌యివేట్ కాలేజీల్లో ఉన్న  ఏ కేట‌గిరీ సీట్ల‌ను పూర్తిగా తెలుగు విద్యార్ధుల‌కు మాత్ర‌మే  కేటాయిస్తారు. మిగ‌తా బీ, సీ కేటగిరీలు, గీతం యూనివ‌ర్సిటీలోని సీట్ల‌కు అన్ని రాష్ట్రాల విద్యార్ధులూ అర్హులే. 

ఎంత ర్యాంకు వ‌స్తే సీటు వ‌స్తుంది?  

రాష్ట్ర‌స్థాయి ర్యాంకులు రానందున జాతీయ ర్యాంకులు ఆధారంగానే విద్యార్ధులు త‌మకు ఎక్క‌డ, ఏ కేట‌గిరీ సీటు వ‌స్తుంద‌న్న విష‌యాన్ని తెలుసుకోవాల్సి ఉంటుంది. 

• అందుబాటులో ఉన్న సీట్ల ఆధారంగా చూసుకుంటే జాతీయ స్థాయిలో 20,000 లోపు ర్యాంకు సాధించిన విద్యార్ధికి ప్ర‌భుత్వ కాలేజీలో సీటు దొరికే అవ‌కాశం ఉంటుంది. 

• అదే విధంగా 40,000 నుంచి 45,000 లోపు ర్యాంకులు సాధించిన విద్యార్ధులకు ప్ర‌యివేట్ కాలేజీల్లో ఏ కేట‌గిరీ సీట్లు పొందే ఛాన్స్ ఉంది. 

• ఒక అంచ‌నా ప్ర‌కారం 50,000 లోపు ర్యాంకులు సాధించిన విద్యార్ధులకు తెలుగు రాష్ట్రాల్లో ఏ కేట‌గిరీ సీట్లు ద‌క్క‌వ‌చ్చు. 

• ఇక ప్ర‌యివేట్ కాలేజీల్లో ఎంబీబీఎస్, బీడీఎస్ సీట్ల‌ను బీ, సీ కేట‌గిరీల కింద పొందాలంటే విద్యార్ధులు నీట్ లో 720 మార్కుల‌కు గాను 350కి పైగా మార్కులు పొందితే ఛాన్స్ ఉండొచ్చు. 

క‌ర్ణాట‌క‌, త‌మిళ‌నాడుల‌పై లుక్కేయండి! 

     నీట్ కు అర్హ‌త సాధించిన విద్యార్ధులు కేవ‌లం తెలుగు రాష్ట్రాల పైనే కాకుండా క‌ర్ణాట‌క‌, త‌మిళ‌నాడు, మ‌హారాష్ట్ర వంటి పొరుగు రాష్ట్రాల‌పై దృష్టి సారిస్తే మంచింది. బీ, సీ, కేట‌గిరీల‌తో పాటు డీమ్డ్ యూనివ‌ర్సిటీల‌ను తీసుకుంటే ఈ మూడు రాష్ట్రాల్లో దాదాపు 10,000 వేల వ‌ర‌కూ సీట్లు ఉన్నాయి. మంచి ప్రణాళిక‌తో కౌన్సిలింగ్ కు వెళితే ఇందులో తెలుగు విద్యార్ధులు దాదాపు 2,000 వ‌ర‌కూ సీట్ల‌ను పొందేందుకు అవ‌కాశం ఉంది. అన్నింటికంటే ముఖ్య‌మైన విష‌యం ఏంటంటే మ‌న తెలుగు రాష్ట్రాల్లోని బీ, సీ కేట‌గిరీల సీట్ల ఫీజుల‌తో పోల్చుకుంటే క‌ర్ణాట‌క‌లో ఫీజులు చాలా త‌క్కువ‌గా ఉన్నాయి. దీంతో ఈ ఏడాది క‌ర్ణాట‌కలోని ప్ర‌యివేట్ కాలేజీల్లో చేరే తెలుగు విద్యార్ధులు సంఖ్య పెర‌గొచ్చు. ఏడాదికి 15 ల‌క్ష‌ల ఫీజు క‌ట్టే స్తోమ‌త ఉన్న విద్యార్ధులు నీట్ లో త‌క్కువ మార్కులు వ‌చ్చినా మెడిక‌ల్ సీటు పొందేందుకు అవ‌కాశం ఏర్ప‌డింది.

ఎన్నడూ లేనంత అస్పష్టత ఏర్పడింది! 

     నీట్ పరీక్ష ఫలితాలు వచ్చాక ఇప్పుడు ఎన్నడూ లేనంత అస్పష్టత ఏర్పడింది.  జూలై మూడు నుంచి ఆల్ ఇండియా కౌన్సిలింగ్ ప్రారంభమైపోతున్న నేపథ్యంలో అటు విద్యార్ధులకు, ఇటు తల్లిదండ్రులకు మెంటల్ టెన్షన్ స్టార్ట్ అవుతోంది. గతంలో మెరిట్ కోటాలో సీటు పొందలేని వాళ్లు ఎలాగైనా మెడిసిన్ పూర్తి చేయాలనే ఉద్దేశ్యంలో పక్క రాష్ట్రాలకు వెళ్లి మేనేజ్‌మెంట్ కోటాలో సీటు సాధించి ఎంబీబీఎస్ పూర్తి చేసేవారు. ఇప్పుడు మాత్రం అటువంటి పరిస్థితి కనపించడం లేదు. సుప్రీంకోర్టు తీర్పు ప్రకారం మెరిట్, నాట్ మెరిట్, మైనారిటీ ఇలా అన్ని రకాల సీట్లను సెంట్రల్ కౌన్సిలింగ్ పూల్ ద్వారా మాత్రమే భర్తీ చేయాల్సి ఉంది. దీని వలన ఎక్కడ సీటు దొరుకుతుందో తెలియని పరిస్థితి. అసలు నీట్ ను ప్రవేశపెట్టిన అసలు ఉద్దేశ్యం ఏంటి? విద్యార్ధలు వివిధ పరీక్షలు రాయకుండా ఒకే పరీక్ష రాసి ఎక్కడైనా సీటు పొందేందుకు అవకాశం కల్పించాలని. కానీ ఆచరణలో అస్పష్ట విధానాలతో ఇది నీరుగారిపోతుందేమోనన్న సందేహాలు కలుగుతున్నాయి. ఐఐటీ, ఎన్ఐటీల్లో సీట్లను ఏ విధంగా అయితే భర్తీ చేస్తారో అదే విధంగా మెడికల్ సీట్లను కూడా భర్తీ చేస్తే ప్రయోజనం ఉంటుంది. ఆయా రాష్ట్రాల్లో కాలేజీల్లో సౌకర్యాల ఆధారంగా ఫీజులను ముందుగానే నిర్ణయిస్తే కామన్ కౌన్సిలింగ్ పెట్టినా ఎటువంటి ఇబ్బందులు ఉండవు. అలా చేసినప్పుడు విద్యార్ధులకు ఒక స్పష్టత వస్తుంది. ఇక్కడ  సీటు రాదని తేలిస్తే పక్క రాష్ట్రానికి వెళతాడు. అతనికి ముందే ఫీజు కూడా తెలుసు కాబట్టి ఎటువంటి ఇబ్బంది ఉండదు. కామన్ సెంట్రల్ కౌన్సిలింగ్ కాకుండా కేంద్ర పరిధిలో ఒకే కౌన్సిలింగ్ ను నిర్వహిస్తే ఫలితం ఉంటుంది. 

నీట్ పై మీ సందేహాల‌ను నివృత్తి చేసుకునేందుకు డైరెక్ట్ గా ఈ నెంబ‌ర్ కు కాల్ చేయొచ్చు . 

97006 09135

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com