నీట్ ర్యాంక్‌ వచ్చిందా? ఎంబీబీఎస్ సీటు సాధించేందుకు ఈ విషయాలు తెలుసుకోవాల్సిందే!

     విద్యార్ధులు, త‌ల్లిదండ్రులు ఎప్పుడెప్పుడా అని ఎదురు చూసిన నీట్ ఫ‌లితాలు వ‌చ్చేసాయి. ఈసారి నీట్ లో తెలుగు రాష్ట్రాల విద్యార్ధులు మంచి ప్ర‌తిభ‌ను క‌న‌బ‌రిచారు. 100 లోపు ర్యాంకుల్లో దాదాపు 30 కి పైగా ర్యాంకులు సాధించి స‌త్తా చాటారు. రాష్ట్ర స్థాయి ఫ‌లితాలు ఇంకా వెల్ల‌డి కాన‌ప్ప‌టికీ వంద‌లోపు ర్యాంకుల్లో తెలంగాణాకు 20, ఏపీ కి 10 ర్యాంకుల వ‌చ్చాయ‌ని తెలుస్తోంది. గ‌త ఏడాది ప్ర‌యివేట్ మెడిక‌ల్ కాలేజీల్లో 50 శాతం మేనేజ్‌మెంట్, ఎన్ఆర్ఐ కోటా సీట్ల భ‌ర్తీకి మాత్ర‌మే నీట్ ను ప‌రిగ‌ణ‌న‌లోకి తీసుకున్నారు. కానీ ఈ ఏడాది ప్ర‌భుత్వ‌, ప్ర‌యివేట్ క‌ళాశాల‌ల్లోని అన్ని ఎంబీబీఎస్, బీడీఎస్, ఆయుష్ సీట్ల‌ను నీట్ ద్వారానే భ‌ర్తీ చేయ‌నున్నారు. విద్యార్ధులు ఈ ఏడాది కౌన్సిలింగ్ లో ప్రముఖంగా గుర్తుపెట్టుకోవాల్సిన విష‌య‌మిది. వీటితో పాటు అస‌లు ఎన్ని సీట్లు ఉన్నాయి? ఎన్ని కాలేజీలు ఉన్నాయి ? వ‌చ్చిన ర్యాంకుకు అనుగుణంగా ఎక్క‌డ సీటును సాధించ‌వ‌చ్చు?  కేట‌గిరీల వారీగా క‌టాఫ్ మార్కులు ఎంత‌?  అన్న ప‌లు విష‌యాల‌పై కెరీర్ టైమ్స్ స‌మగ్ర విశ్లేష‌ణ‌. 

దేశ వ్యాప్తంగా ఇన్ని సీట్లు ఉన్నాయి! 

     అస‌లు మొత్తం ఎన్ని వైద్య క‌ళాశాల‌లు ఉన్నాయి? అందులో ఎన్ని సీట్లు ఉన్నాయి? అన్న విష‌యాలను విద్యార్ధులు త‌ప్ప‌నిసరిగా తెలుసుకోవాలి. ఈ ప్రాథ‌మిక విష‌యంపై అవ‌గాహ‌న ఉంటే త‌మ‌కు వ‌చ్చిన ర్యాంకును బట్టి ఎక్క‌డ సీటు సాధించ‌వ‌చ్చో , ఏ సీటు  సాధించ‌వ‌చ్చో అన్న విష‌యంపై ఒక స్ప‌ష్ట‌త వ‌స్తుంది. మెడిక‌ల్ కౌన్సిల్ ఆఫ్ ఇండియా వెబ్ సైట్లో పొందుప‌ర్చిన స‌మాచారం ప్ర‌కారం దేశ‌వ్యాప్తంగా 470 వైద్య క‌ళాశాల‌లు ఉన్నాయి. అందులో సుమారు 65,170 ఎంబీబీఎస్ సీట్లు ఉన్నట్టు ఎంసీఐ చెపుతోంది. ఇక 308 డెంట‌ల్ కాలేజీలు ఉండ‌గా అందులో దాదాపుగా  25,730 బీడీఎస్ సీట్లు ఉన్నాయి. మ‌న రెండు తెలుగు రాష్ట్రాల విష‌య‌మే తీసుకుంటే ఇరు రాష్ట్రాల్లో క‌లిపి మొత్తం 83 మెడిక‌ల్ కాలేజీలు ఉన్నాయి. ఇందులో ఏపీలో 46 కాలేజీలు ఉంటే తెలంగాణాలో 37 కాలేజీలు ఉన్నాయి. ఈ 83 కాలేజీల్లో దాదాపు 10, 980 సీట్లు అందుబాటులో ఉన్నాయి. ఇందులో ఎంబీబీఎస్ సీట్లు 8,450 కాగా, బీడీఎస్ సీట్లు 2,530. 

అవ‌గాహ‌న త‌ప్ప‌నిసరి! 

     నీట్ లో అర్హ‌త సాధించిన విద్యార్ధులు, త‌ల్లిదండ్రులు వివిధ విషయాల‌పై అవ‌గాహ‌న, స‌మాచార సేక‌ర‌ణ చేయ‌డం త‌ప్ప‌నిస‌రి. అన్ని విష‌యాలు స‌మ‌గ్రంగా తెలిస్తే కౌన్సిలింగ్ నాటికి ఒక స‌మ‌గ్ర ప్ర‌ణాళిక‌తో స‌ర్వ స‌న్న‌ద్ధంగా ఉండేందుకు వీలు క‌లుగుతుంది. ఈ నేప‌థ్యంలో నీట్ పై స‌హ‌జంగా వ‌చ్చే సందేహాల‌ను చూద్దాం. 

రాష్ట్ర స్థాయి ర్యాంకులు ఎప్పుడు ప్ర‌క‌టిస్తారు? 

    నీట్ ఫ‌లితాలు విడుద‌లైనా రాష్ట్రస్థాయి ర్యాంకులు ప్ర‌కటించ‌క‌పోవ‌డంతో విద్యార్ధుల గంద‌ర‌గోళ‌ప‌డుతున్నారు. రాష్ట్ర స్థాయి ర్యాంకులు రావాలంటే ప్ర‌వేశ ప్ర‌క‌ట‌న వ‌చ్చే వ‌ర‌కూ ఆగాల్సిందే. జూలై రెండో వారం వీటిపై ఒక  స్ప‌ష్టత వ‌స్తుంది. వైద్య సీట్ల భ‌ర్తీ రాష్ట్ర ప‌రిధిలోనే ఉన్నందున రాష్ట్ర స్థాయి ర్యాంకుల ప్ర‌క‌ట‌న‌కు చాలా ప్రాధాన్య‌త ఉంది. 

ఎంబీబీఎస్, బీడీఎస్ సీట్లు ఎన్ని ర‌కాలు? 

ఇందులో నాలుగు ర‌కాలు సీట్లు ఉంటాయి. 

1. ప్ర‌భుత్వ కాలేజీల్లోని సీట్లు 
2. ప్ర‌యివేట్ కాలేజీల్లో కేటగిరీ ఏ సీట్లు ( క‌న్వీన‌ర్ కోటా) 
3. కేట‌గిరీ బి సీట్లు  ( మేనేజ్ మెంట్ ) 
4. కేట‌గిరీ సీ సీట్లు ( ఎన్ఆర్ఐ కోటా సీట్లు) 

    ఇందులోని కేట‌గిరీ ఏ సీట్ల‌ను ప్ర‌భుత్వం, బీ, సీ కేట‌గిరీ సీట్ల‌ను ప్ర‌యివేట్ క‌ళాశాలల  అసోసియేష‌న్ భ‌ర్తీ చేసేవి. అయితే ఈ ఏడాది సుప్రీంకోర్టు తీర్పును అనుస‌రించి ఈ ఏడాది ఆరోగ్య విశ్వ‌విద్యాల‌యాలే మెరిట్ ప్రాతిప‌దిక‌న సీట్ల‌ను భ‌ర్తీ చేసే అవ‌కాశం కనిపిస్తోంది. అయితే దీనిపై ఇంకా స్ప‌ష్ట‌త రాలేదు. 

తెలంగాణాలో ప్ర‌భుత్వ కాలేజీలు ఎన్ని? ప‌్ర‌యివేట్ కాలేజీలు ఎన్ని? 

   తెలంగాణా రాష్ట్రంలో ఉస్మానియా యూనివ‌ర్సిటీ ప‌రిధిలో ఎంబీబీఎస్ కాలేజీలు మొత్తం 25 ఉండ‌గా అందులో 7 ప్ర‌భుత్వ క‌ళాశాలలు, 15 ప్ర‌యివేట్ క‌ళాశాలలు, మూడు మైనారిటి కాలేజీలు  ఉన్నాయి. అదే విధంగా బీడీఎస్ కాలేజీలు 12 ఉండ‌గా, అందులో ప్ర‌భుత్వ కాలేజీ 1, ప్ర‌యివేట్ కాలేజీలు 11. 

ఏపీ లో ప్ర‌భుత్వ కాలేజీలు ఎన్ని? ప్ర‌యివేట్ కాలేజీలు ఎన్ని? 

     ఆంధ్ర‌ప్ర‌దేశ్ లో ఆంధ్రా యూనివ‌ర్సిటీ, వెంక‌టేశ్వ‌ర విశ్వ‌విద్యాల‌యం ప‌రిధిలో చూసుకుంటే..ఎంబీబీఎస్ కాలేజీలు మొత్తం 31 ఉంటే, అందులో ప్ర‌భుత్వ కాలేజీలు 12 , ప్ర‌యివేట్ కాలేజీలు 18 ప్ర‌యివేట్ కాలేజీలు ఉన్నాయి. అదే విధంగా ఒక మైనారిటీ కాలేజీ ఉంది. ఇక బీబీఎస్ కాలేజీల విష‌యానికొస్తే ప్ర‌భుత్వ కాలేజీలు 2 ఉంటే, ప్ర‌యివేట్ కాలేజీలు 13 ఉన్నాయి.

ఫీజులు ఎంత ఉన్నాయి? 

     ఫీజుల విష‌యానికొస్తే కేట‌గిరీల వారిగా ఏపీ, తెలంగాణాల్లో ఫీజ‌లు వేరువేరుగా ఉన్నాయి. ప్ర‌భుత్వ క‌ళాశాల‌ల్లో ఫీజు మాత్రం ఒకేర‌కంగా ఉంది. ప్ర‌భుత్వ క‌ళాశాలల్లో ఏడాదికి ఎంబీబీఎస్ ఫీజు 10 వేల రూపాయ‌లుగు ఉంది. ఇక ఏ కేట‌గిరీల్లో ఏపీ, తెలంగాణాకు చాలా వ్య‌త్యాస‌ముంది. ఏపీ లో బీ కేట‌గిరీ సీట్ల‌లో ఫీజును ప్ర‌తీ ఏడాది 5 శాతం పెంచుతుంటారు. గ‌త ఏడాది బీ కేట‌గిరీ సీటు 11,55,000 గా ఉంది. ఈ ఏడాది 5 శాతం పెర‌గొచ్చు కాబ‌ట్టి రూ. 12,00,000 అయ్యే అవ‌కాశం ఉంది. డెంట‌ల్ కాలేజీల్లో బీ కేట‌గిరీ సీట్ల‌కు ప్ర‌తీ ఏడాది ఫీజును 5 శాతం పెంచుతారు. గ‌త ఏడాదితో పోల్చుకుంటే ఈ ఏడాది బీ కేట‌గిరీ డెంట‌ర్ సీటు ఫీజు 5,00,000 వ‌ర‌కూ ఉండొచ్చు. 

నీట్ 2017 లో  క‌టాఫ్ మార్కులు ఎన్ని? 

      నీట్ లో క‌టాఫ్ అనేది ప‌ర్సంటైల్ లో ఉంది. ఈ విధానంలో విద్యార్ధి వ్య‌క్తిగ‌త మార్కుల‌పై కాకుండా ప‌రీక్ష రాసిన విద్యార్ధుల సంఖ్య‌, ప్ర‌శ్న‌ల క్లిష్ట‌త మీద ఆధార‌ప‌డి ఉంటుంది. ఉదాహ‌ర‌ణ‌కు మొత్తం 10 ల‌క్ష‌ల మంది విద్యార్ధులు ప‌రీక్ష రాసార‌నుకుంటే వారి మార్కుల‌ను అవ‌రోహ‌ణ క్ర‌మంలో అమ‌ర్చిన‌ప్పుడు 4,00,000 వ విద్యార్ధి సాధించిన మార్కుల‌ను 40వ ప‌ర్సంటైల్ క‌టాఫ్ మార్కుగా నిర్ణ‌యిస్తారు. ఈ ఏడాది నీట్ లో కటాఫ్ మార్కును జ‌న‌ర‌ల్ వారికి 131 గానూ, ఓబీసీ వారికి 107 గానూ , ఎస్సీ , ఎస్టీల‌కు 107 గాను నిర్ణ‌యించారు. ఇందులో 5,43,473 మంది జ‌న‌ర‌ల్ విద్యార్ధులు క‌టాఫ్ మార్కుల ఆధారంగా అర్హ‌త‌ సాధించ‌గా, 47,382 మంది ఓబీసీ విద్యార్ధులు, 14,599 ఎస్సీ విద్యార్ధులు, 6018 మంది ఎస్టీ విద్యార్ధులు అర్హ‌త సాధించారు. 

కౌన్సిలింగ్ ఎప్పుడు ప్రారంభమ‌వుతుంది? 

    15 శాతం ఆల్ ఇండియా కోటాకు కౌన్సిలింగ్ షెడ్యూల్ ఇప్పటికే విడుద‌లైంది. జూలై 3 నుంచి ఈ కౌన్సిలింగ్ ప్రారంభ‌మ‌వుతుంది. అయితే ఆల్ ఇండియాలో కౌన్సిలింగ్ లో మ‌న రెండు తెలుగు రాష్ట్రాలు పాల్గొనందున మ‌న విద్యార్ధుల‌కు ఆ అవ‌కాశం లేదు. ఆల్ ఇండియా కోటా కౌన్సిలింగ్ పూర్తికాగానే 16 ఆగ‌స్టు త‌ర్వాత స్టేట్ కౌన్సిలింగ్ ప్రారంభ‌మ‌య్యే అవ‌కాశ‌ముంది. 

వైద్య విద్యలో ప్ర‌వేశానికి ఇంట‌ర్ మార్కులు ప్రాతిప‌దిక‌గా తీసుకుంటారా? 

   వైద్య విద్య‌లో ప్ర‌వేశానికి నీట్ కు అర్హ‌త సాధించ‌డంతో పాటు ఇంట‌ర్ లోని బైపీసీ గ్రూప్ లోని 3 స‌బ్జెక్ట్ ల‌లోనూ 50శాతం మార్కులు సాధించాలి. గ్రూప్ స‌బ్జెక్ట్ లో 50 శాతం మార్కుల‌ను సాధించ‌లేకుంటే నీట్ కు అర్హ‌త సాధించినప్ప‌టికీ, సీటు పొందేందుకు అవ‌కాశం ఉండ‌దు. 

సీట్ల భ‌ర్తీలో రిజ‌ర్వేష‌న్ ఉంటుందా? 

    ఎంబీబీఎస్, బీడీఎస్ లో ప్ర‌వేశానికి గ‌తంలో మాదిరిగానే రిజ‌ర్వేష‌న్లు వ‌ర్తిస్తాయి. నీట్ జాతీయ ప‌రీక్ష అయినా భ‌ర్తీ ప్ర‌క్రియ అంతా స్థానికంగానే జ‌రుగుతుంది కాబట్టి రిజ‌ర్వేష‌న్ కు ఇబ్బంది లేదు. గ‌తంలో ఉన్నట్టే ఎస్సీ 15%, ఎస్టీ 7% , బీసీ, ఏ, బీ, సీ,డీ, ఈ అలానే ఉంటాయి. ఇందులో ఆందోళ‌న చెందాల్సిన ప‌నిలేదు. తెలంగాణాలో ఉస్మానియా యూనివ‌ర్సిటీ ప‌రిధిలో విద్యార్ధుల‌కు 85 శాతం సీట్లు ఉంటాయి. మిగిలిన 15 శాతం సీట్ల‌ను ఆంధ్రాయూనివ‌ర్సీటీ, శ్రీ వెంక‌టేశ్వ‌ర యూనివ‌ర్సిటీ విద్యార్ధుల‌తో భ‌ర్తీ చేస్తారు. అలానే ఆంధ్రా యూనివ‌ర్సిటీ ప‌రిధిలోని విద్యార్ధుల‌కు 85 % సీట్లు కేటాయించి మిగ‌తా సీట్ల‌ను శ్రీ వెంక‌టేశ్వ‌ర‌, ఉస్మానియా యూనివ‌ర్సిటీ విద్యార్దుల‌కు కేటాయిస్తారు.   

నీట్ పై మీ సందేహాల‌ను నివృత్తి చేసుకునేందుకు మీరు డైరెక్ట్ గా ఈ నెంబ‌ర్ కు కాల్ చేయొచ్చు . 

97006 09135

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com