రహదారిలో స్పీడ్ బ్రేక‌ర్లే మార్గద‌ర్శ‌కాలు!?

      స‌మాజంలో మంచి పౌరునిగా మ‌నుగ‌డ సాగించాల‌న్నా, కెరీర్ లో ఉన్న‌త శిఖ‌రాల‌కు ఎద‌గాల‌న్నా విద్యార్ధులు మాన‌వ సంబంధాల ప్రాముఖ్య‌త‌ను తెలుసుకోవాలి. మంచి ఆరోగ్య‌క‌ర‌మైన మానవ సంబంధాలే మ‌న జీవ‌న ప్ర‌యాణం నాణ్య‌త‌ను నిర్ణ‌యిస్తాయి. మాన‌వ సంబంధాల విష‌యంలో స‌రైన అవ‌గాహ‌న లేకుంటే జీవితం అస్త‌వ్య‌స్థ‌మ‌వుతుంది.  మ‌నం ఉద‌యం లేచిన ద‌గ్గ‌ర్నుంచి రాత్రి నిద్ర‌పోయే వ‌ర‌కూ విభిన్న మ‌న‌స్త‌త్వాలు ఉన్న వ్య‌క్తుల‌తో సంబంధాల‌ను నెర‌పాల్సి ఉంటుంది. ఇటువంటి ప‌రిస్థితుల్లో అన‌వ‌స‌ర‌ భావోద్వేగాల‌కు లోనైతే మ‌న‌కున్న సంబంధాలు పూర్తిగా చెడిపోతాయి. ప్ర‌తీ వ్య‌క్తి ఒక విష‌యంపై త‌న‌దైన ఒక‌ అభిప్రాయాన్ని క‌లిగి ఉంటాడు. అదే అభిప్రాయం మిగ‌తా క‌లిగి ఉండాల‌నే నిబంధ‌న ఏమీ లేదు. మ‌నం మ‌న‌స్పూర్తిగా న‌మ్మిన విష‌యాల‌ను, సిద్ధాంతాల‌ను అవ‌త‌లి వ్య‌క్తులు ఆచ‌రించాల‌ని, పాటించాల‌ని అనుకోవ‌డం మ‌న‌కు స‌న్నిహితుల‌ను, స్నేహితుల‌ను దూరం చేస్తుంది. ఇది చాలా చిన్న విష‌యంలా క‌నిపిస్తున్నా ప్ర‌స్తుతం అభిప్రాయాల్లో వైరుధ్యాలు, ఆలోచ‌న‌ల్లో సంఘ‌ర్ష‌ణ‌లు మానవ సంబంధాల‌ను తీవ్రంగా దెబ్బ‌తీస్తున్నాయి. ఈ విష‌యంపై అవ‌గాహ‌న,  మానవ సంబంధాల‌ను కాపాడుకోవ‌డంలో జాగ్ర‌త్త వ‌హించ‌కుంటే విద్యార్ధులు భ‌విష్యత్ లో న‌ష్ట‌పోవాల్సి ఉంటుంది.  

నీ రూల్ నీదే..ఎదుట‌ వాళ్ల‌ది కాదు!  

      మీరు ఒక‌ విష‌యాన్ని బ‌లంగా న‌మ్మిన‌ప్పుడు దాన్ని ఒక రూల్ గా చేసుకుని దాన్ని పాటించండి. దాన్ని పాటించ‌డం వ‌ల‌న వ‌చ్చే లాభ‌న‌ష్టాల‌కు కానీ ఇత‌ర ప‌ర్య‌వ‌సానాల‌కు కానీ మేరే బాధ్యులు. అలా కాకుండా మీరు బ‌లంగా న‌మ్మిన విష‌యాన్ని ఇత‌రులు కూడా పాటించాల‌ని కోరుకున్న‌ప్పుడు మానవ సంబంధాలు దెబ్బ‌తింటాయి. స‌మాచార మాధ్య‌మాల ప్ర‌భావ‌మో, లేక సామాజిక మార్పో తెలియ‌దు కానీ ఇటీవ‌లి కాలంలో మ‌నుష్యుల‌కు అహం పెరిగింది. త‌న అహం దెబ్బ‌తిన్న‌ప్పుడు ఎంత‌టి దూరమైనా వెళ్లేందుకు, అవ‌త‌లి వారితో బ‌ల‌మైన, సుధీర్ఘ‌మైన సంబంధాల‌ను సైతం తెంచుకోవడానికి వెనుకాడ‌టం లేదు. ఇటువంటి ప‌రిస్థితుల్లో అవ‌త‌లి వ్య‌క్తుల అహం దెబ్బ‌తినకుండా వ్య‌వ‌హ‌రించ‌డం అనే నేర్పును మ‌నం సాధించాలి. నువ్వు క‌రెక్ట్ గా ఉన్నావా లేదా? అన్న విష‌యాన్ని ఎప్ప‌టిక‌ప్పుడు స‌మీక్షించుకుని మీ వ్య‌క్తిత్వంలో మార్పులు చేసుకోండి. అంతేకానీ ఇత‌రుల‌ను మార్చాల‌ని ప్ర‌య‌త్నిస్తే మొద‌టికే మోసం వ‌స్తుంది. ఎప్పుడైతే మీరు అవ‌త‌లి వ్యక్తిని మార్చాల‌ని ప్ర‌య‌త్నం చేస్తారో అప్పుడే వాళ్ల‌కు మీకు మ‌ధ్య స‌న్న‌టి విభ‌జ‌న‌ గీత ఏర్ప‌డుతుంది. 

అంద‌ర్నీ మార్చ‌డం మీ ప‌ని కాదు!!

     'మీరు రోడ్డుపై వెళ్తున్నారు. కొంద‌రు వ్య‌క్తులు రూల్స్ ని అతిక్ర‌మించి రాంగ్ రూట్ లో వ‌స్తున్నారు'. అప్పుడే మీరేం చేస్తారు. అవ‌త‌లి వ్యక్తుల‌తో రోడ్డుపై గొడ‌వ ప‌డి వాళ్ల‌ను మార్చేందుకు ప్ర‌య‌త్నిస్తారా? అలా ఎప్పుడూ చేయ‌వ‌ద్దు. 'రూల్స్ ను పాటించ‌ని వ్య‌క్తుల‌తో పోరాటం చేయ‌డం, వాళ్ల‌ను మార్చ‌డం మీ ప‌ని కాదు'. రూల్స్ విరుద్ధంగా ఉన్న వాళ్లంద‌ర్నీ మార్చాలంటే మీ జీవిత కాలం కూడా స‌రిపోదు. మీ చేతుల్లో లేని విష‌యాల కోసం బుర్ర బ‌ద్ద‌లు కొట్టుకోకండి. మీరు ఎంత వ‌ర‌కూ రూల్స్ ను పాటిస్తున్నారు. ఎంత నిజాయితీగా ఉన్నారు. అన్న‌ది మాత్ర‌మే చూసుకోండి. మీ వ్య‌క్తిగ‌త ఎదుగుద‌ల‌ను స‌రిగ్గా ప్లాన్ చేసుకోండి. నిబంధ‌న‌లు పాటించ‌ని వ్య‌క్తుల‌తో ఎప్పుడూ వాద‌న పెట్టుకోకండి. ఎందుకంటే వాద‌న అనేది సంబంధాల‌ను దెబ్బ‌తీస్తుంది. మీ ఎదుటి వాళ్ల‌ను, నిబంధ‌న‌లు పాటించ‌ని వ్యక్తుల‌ను మీరు మార్చ‌లేర‌ని తెలుసుకున్నాక మొద‌ట మీరే మారిపోండి. ఎందుకంటే అది మీ చేతుల్లో ప‌ని. 

అహం దెబ్బ‌తిన‌కుండా చూసుకోండి!

        మ‌నం ముందు చెప్పుకున్న‌ట్టు మ‌నుష్యులు ప్ర‌స్తుతం అహాన్ని సంతృప్తి పర్చుకునేందుకే ఎక్కువ ప్రాధాన్య‌తనిస్తున్నారు. మాన‌వ సంబంధాల విష‌యంలో ఈ అంశమే అత్యంత కీల‌క‌మైన‌ది. అహంతో ఇటీవ‌లి కాలంలో స్నేహితుల ఏంటి కుటుంబ స‌భ్యుల‌తో కూడా సంబంధాల‌ను తెంచుకుంటున్న సంఘ‌ట‌న‌లు చూస్తున్నాం. కాబ‌ట్టి ఎప్పుడూ ఎదుటి వ్య‌క్తి ఈగో దెబ్బ‌తినేలా వ్య‌వ‌హ‌రించ‌కండి. ఆ సంబంధిత విష‌యంలో ఎదుటి వాళ్ల‌దే త‌ప్పు ఉన్నా ఆ క్ష‌ణాన్ని వాయిదా వేసేందుకు ప్ర‌య‌త్నించండి. అప్ప‌టికప్పుడు త‌క్ష‌ణం వాళ్ల‌తో గొడ‌వ పెట్టుకుంటే సంబంధాలు శాత్వ‌తంగా దూర‌మ‌వుతాయి. మ‌నం ఫ‌ర్ ఫెక్ట్ గా ఉన్నామ‌ని ఎదుటి వాళ్లు కూడా అలానే ఉండాల‌ని కోరుకోవ‌ద్దు. అలా కోరుకున్న‌ప్పుడే మ‌న‌కు మానవ సంబంధాల విష‌యంలో ఇబ్బందులు ఏర్ప‌డ‌తాయి. మీరు రిలేష‌న్ షిప్ కు ఇస్తున్న ప్రాధాన్య‌త‌ను గుర్తిస్తే ఎదుటి వ్య‌క్తులే మీ దారిలోకి వ‌స్తారు. అంతేకానీ వాళ్ల‌ను మార‌మ‌ని మీరు ఎప్పుడూ అడ‌గొద్దు. మనం ఈ విష‌యంలో జాగ్ర‌త్త‌గా వ్య‌వ‌హ‌రించ‌కుంటే మ‌న చుట్టూ ఉన్న వాళ్ల‌తో రిలేష‌న్స్ దెబ్బ‌తినడంతో పాటు శ‌త్రువులు కూడా త‌యార‌య్యే ప్ర‌మాదం ఉంది.  

'నొప్పింప‌క తానొవ్వ‌క' అన్న‌ట్టు ఉండాలి! 

      ఈ ప్ర‌పంచంలో ఏ విష‌యం మ‌న‌కు న‌చ్చిన‌ట్టు జ‌ర‌గ‌దు. మ‌న‌కు న‌చ్చిన‌ట్టు ఉండ‌దు. ఆయా ప‌రిస్థితులకు, వ్య‌క్తుల‌కు అనుగుణంగా మ‌న‌మే మార్పు చెందాల్సి ఉంటుంది. ఆయా సంద‌ర్భాల‌కు అనుగుణంగా మ‌న మాన‌సిక స్థితి, మ‌న స్థిర‌త్వం ఏ విధంగా ఉంది అన్న‌విష‌యాన్ని బ‌ట్టే మ‌న భ‌విష్య‌త్ ఆధార‌ప‌డి ఉంటుంది. ఉదాహ‌ర‌ణ‌కు మీ కింద ప‌నిచేస్తున్న వ్యక్తులు ఒక క్ర‌మశిక్ష‌ణ లేకుండా ఇష్ఠారాజ్యంగా వ్య‌వ‌హ‌రిస్తున్న‌ప్పుడు వాళ్ల‌పై అర‌వ‌డం, గొడ‌వ ప‌ట‌డం ఎటువంటి ఫ‌లితాల‌ను ఇవ్వ‌దు. వీలైతే వాళ్ల‌ను మీ కార్యాల‌య నిబంధ‌న‌ల‌కు అనుగుణంగా మార్చుకోవ‌డం లేదా ఉద్యోగం నుంచి తొలిగించ‌డం చేయాలి. ఒక్క కార్యాల‌యం లోనే కాదు, ఇంటిలో, రోడ్డుపై, స‌మూహాల ద‌గ్గ‌ర మ‌న‌కు ఇష్టం లేని ప‌నులు, మ‌నుష్య‌లు ఎంద‌రో తార‌స‌ప‌డ‌తారు. వాట‌న్నింటిని మ‌న‌సులోకి తీసుకుని కోపంతో ఊగిపోవ‌డ‌మే లేక సంబంధాల‌ను తెంపుకోవ‌డ‌మో చేస్తే చివ‌రికి మ‌న‌తో మాట్లాడేందుకు మ‌నుష్యులు కూడా ఉండ‌రు. ఆరోగ్య‌క‌ర‌మైన మానవ సంబంధాలే మ‌న కెరీర్ కు మ‌న వ్య‌క్తిగ‌త జీవితానికి మూలాధారాలు. అటువంటి కీల‌క‌మైన అంశాన్ని అనుక్ష‌ణం గుర్తుపెట్టుకుంటే మ‌న ఎదుగుద‌ల‌కు ఢోకా ఉండ‌దు. మ‌నం మానసికంగా ఏ స్థాయిలో ఉండాలంటే ఎదుటి వ్య‌క్తులు మ‌న రాళ్లు వేస్తే వాటితో ఇళ్లు క‌ట్టుకోవాలి. చెప్పులు విసిరితే వాటితో చెప్పుల దుకాణం పెట్టుకోవాలి. అప్పుడే మ‌నుగ‌డ సాధ్య‌మ‌వుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com