కేజ్రీవాల్, జేపీ ఒక‌వైపు..ఉమేష్ చంద్ర, ఐవైఆర్ ఇంకోవైపు..!!
వ్య‌వ‌స్థ గొప్ప‌దా? వ్యక్తి గొప్ప‌వాడా? విన‌డానికి ఈ ప్ర‌శ్న చాలా సాధార‌ణంగా ఉన్నా ఇందులో అసాధార‌ణ అంశాలు దాగి ఉన్నాయి. ఈ ప్ర‌శ్న‌కు స‌రైన అర్ధం తెలుసుకోలేక చాలా మంది ప‌త‌న‌మైతే మ‌రికొంద‌రు దీనిలోని లోతును తెలుసుకుని నిర్దేశించుకున్న ల‌క్ష్యాల‌ను చేరుకోగ‌లిగారు. ముఖ్యంగా విద్యార్ధులు, ఉద్యోగులు వ్య‌క్తికి, వ్యవస్థకు మధ్య ఉన్న ఆ స‌న్న‌టి గీత‌ను గుర్తించ‌గ‌లిగితే కెరీర్ లో ఉన్న‌తి సాధించేందుకు వీలు క‌లుగుతుంది. ఎప్పుడైతే సంస్థ లేదా వ్య‌వ‌స్థ కంటే తాను గొప్ప‌వాడ్ని, అతీతుడ్ని అనుకోవ‌డం మొద‌ల‌వుతుందో అప్పుడే వ్యక్తి ప‌త‌నం ప్రారంభమవుతుంది. ఢిల్లీ ముఖ్య‌మంత్రి అర‌వింద్ కేజ్రీవాల్, జ‌య‌ప్ర‌కాష్ నారాయ‌ణ, దివంగ‌త పోలీస్ అధికారి ఉమేష్ చంద్ర, ఏపీ మాజీ సీఎస్ ఐవైఆర్ కృష్ణారావుల ఉదంతాల‌ను తీసుకుంటే మ‌న‌కు ఈ విష‌యంపై సంపూర్ణ అవ‌గాహ‌న వ‌స్తుంది. వ్యవస్థకు అతీతులం అనుకునేవాళ్లు ఏ విధంగా ప‌త‌నమ‌య్యారు, వ్య‌వ‌స్థ మార్చేందుకు, లోపాల‌ను ఎత్తిచూపేందుకు బ‌య‌టికి వ‌చ్చి పోరాటం చేసిన వారు ఏ విధంగా విజ‌య‌వంత‌మ‌య్యారు అన్నవిష‌యాల‌పై 'కెరీర్ టైమ్స్' అందిస్తున్న ప్ర‌త్యేక విశ్లేష‌ణ.
రాజు కూర్చుంటేనే గుర్రానికి విలువ!
'రాజు గారు గుర్రం పై ఊరేగుతున్నారు. ప్ర‌జ‌లు దారి పొడ‌వునా రెడ్ కార్పెట్ ప‌రిచి పూల వ‌ర్షం కురిపిస్తున్నారు.' రెడ్ కార్పెట్ పై స‌గ‌ర్వంగా న‌డుస్తున్న గుర్రం త‌న కోస‌మే రెడ్ కార్పెట్ ప‌రిచి త‌నకు రాచ‌మ‌ర్యాద‌లు చేస్తున్నార‌ని అనుకుంటే అది క‌చ్చితంగా మూర్ఖ‌త్వ‌మే అవుతుంది. రాజుగారు త‌న వీపు మీద ఉన్నంత వ‌ర‌కే గుర్రానికి విలువ. అలా కాకుండా తానే రాజును అనుకుంటే ప‌త‌నం ప్రారంభమవుతుంది. ఇక్కడ వ్య‌వ‌స్థ రాజు అయితే వ్యక్తి గుర్రం. వ్య‌వ‌స్థ‌లో ఉన్నంత వ‌ర‌కూ వ్యక్తి దాన్ని నిరంతరం కాపాడేందుకు ప్ర‌య‌త్నించాలి. అందులో లోపాలు ఉండొచ్చు. ఉంటాయి కూడా. అయినా స‌రే వ్య‌వ‌స్థ‌లో తాను భాగం కాబట్టి అందులో ఉంటూనే మార్పుకు ప్ర‌య‌త్నించాలి. అలా కాని ప‌క్షంలో బ‌య‌ట‌కు వ‌చ్చి వ్య‌వ‌స్థ‌లోని లోపాల‌ను ఎండ‌గ‌ట్టి, మార్పు కోసం తాను ఏం చేయ‌గ‌లుగుతానో చెప్పగ‌ల‌గాలి. అలా కాకుండా సంస్థ‌లో లేదా వ్య‌వ‌స్థ‌లో ఉంటూనే దానికి వ్య‌తిరేకంగా న‌డుచుకోవ‌డం మ‌న ఎదుగుద‌ల‌ను దెబ్బ‌తీస్తుంది. దీంతో పాటు ఈ విధ‌మైన వ్య‌వ‌హార శైలి మ‌నపై అంద‌రికీ విశ్వాసాన్ని స‌న్న‌గిల్లేలా చేస్తుంది. ఎప్పుడైతే విశ్వసనీయతను కోల్పోయామో అప్పుడు మ‌నం వ్య‌వ‌స్థ‌లోని లోపాల‌ను ఏ విధంగా స‌రిదిద్ద‌గ‌లం? మాన‌వ వ‌న‌రుల విభాగంలో అతి ముఖ్యమైన ఈ విష‌యాన్ని విద్యార్ధులు, ఉద్యోగులు జాగ్ర‌త్త‌గా అవ‌గాహ‌న చేసుకోవాలి.
మార్పు రావాలంటే ముందు మ‌న‌మే మారాలి!
మ‌న దేశంలో ప్ర‌భుత్వ వ్య‌వ‌స్థ‌ల ప‌నితీరు అస్త‌వ్య‌స్థంగా ఉంటుంది. ఇందులో ఎటువంటి సందేహం లేదు. అవినీతి, లంచ‌గొండిత‌నం, బంధుప్రీతి ఇలా ఒక‌టేమిటి స‌వాల‌క్ష అవ‌ల‌క్షణాలు వ్య‌వ‌స్థ‌లో ఉన్నాయి. ఆ వ్య‌వ‌స్థ‌లో ప‌నిచేస్తున్న ఒక అధికారి ప్ర‌తీరోజూ వ్య‌వ‌స్థ‌ను తిడుతూ కూర్చుంటే స‌మ‌స్య‌కు ప‌రిష్కారం దొరుకుతుందా? ఆ ఆస్త‌వ్య‌స్థ వ్య‌వ‌స్థ‌లో అత‌నూ ఒక భాగం. అంటే త‌న‌ను తాను తిట్టుకున్న‌ట్టే. తాను ఒక్క‌డ్నీ దాన్ని మార్చ‌లేనని నిర్ణ‌యించుకుంటే అక్క‌డి నుంచి బ‌య‌ట‌ప‌డి ప‌రిష్కార మార్గాలు చూపాలి. కలెక్ట‌ర్ గా పని చేసి, ఎన్నో ఉన్న‌త భావాలు ఉన్న జ‌య‌ప్ర‌కాష్ నారాయ‌ణ, తాను ప్ర‌భుత్వ స‌ర్వీసులో ఉన్నంత కాలం ప్ర‌భుత్వం అలాంటి త‌ప్పులు చేసింది. సిస్టమ్ చెడిపోయింది. అంటూ లోపాలు వెత‌క‌లేదు. ప్ర‌భుత్వాధికారిగా తాను వ్య‌వ‌స్థ‌ను మార్చ‌లేనని నిర్ణ‌యించుకున్నాక, ప్ర‌భుత్వ ప‌ద‌వికి రాజీనామా చేసి రాజ‌కీయాల్లోకి ప్ర‌వేశించి తాను న‌మ్మిన సిద్ధాంతాల‌ను ప్రచారం చేసారు. వ్య‌వ‌స్థ‌లో మ‌నుగ‌డ సాగించే వ్య‌క్తిగా, మార్పును కోరుకునే పౌరునిగా జ‌య‌ప్ర‌కాష్ చేసింది 100 స‌రైన పని.
మీరేం కోరుకుంటున్నారో చేసి చూపించండి!
ఐఆర్ఎస్ అధికారిగా భాధ్య‌త‌ల‌ను నిర్వ‌ర్తించిన ప్ర‌స్తుత ఢిల్లీ ముఖ్య‌మంత్రి అర‌వింద్ కేజ్రీవాల్ ఒక స్ప‌ష్ట‌మైన విధానంతో ముందుకు వ‌చ్చారు. ప్ర‌భుత్వ అధికారిగా ఉన్న‌ప్పుడు త‌న ప‌రిధిలో నిజాయితీగా ఉండేందుకు ప్రాధాన్య‌త‌నిచ్చారు. అంత‌కు మించి మ‌రోదే మార్పు కావాల‌ని కోరుకున్న‌ప్పుడు అధికారం అవ‌స‌రమ‌ని గుర్తించి కేజ్రీవాల్ రాజ‌కీయ పార్టీ పెట్టి త‌ను కోరుకున్న విధానాల‌ను ప్ర‌వేశ‌పెట్టాడు. వ్య‌వ‌స్థ‌లో మ‌మేక‌మై ఉన్న‌ప్పుడు వ్య‌వ‌స్థ‌ను తిడితే త‌న‌ను తాను తిట్టుకున్న‌ట్టే అన్న వాస్త‌వాన్ని గ్ర‌హించిన వాళ్లు ఇటువంటి పొర‌పాట్లు చేయ‌రు. మీరు ఒక కంపెనీలో ప‌నిచేస్తూ ప్ర‌తీ రోజూ అందులోని లోపాల‌ను, లోటు పాట్ల‌ను ఎత్తి చూపుతుంటే మిమ్మల్ని మీరు కించ‌ప‌ర్చుకున్న‌ట్టే. ఇలా ఎప్పుడూ కంప్లైంట్స్ చేసే వారు న‌మ్మ‌కాన్ని కోల్పోతారు. నీకు నీ సంస్థ‌పై అసంతృప్తి ఉన్న‌ప్పుడు అక్క‌డ రాజీనామా చేసి నీవు కోరుకున్న మార్పును చేసి చూపించి ఆ సంస్థ‌ను విమ‌ర్శిస్తే మీ గౌర‌వం పెరుగుతుంది.
వ్య‌క్తికి, వ్యవస్థకు ఆరోగ్య‌క‌ర‌మైన సంబంధాలు ముఖ్యం!
వ్య‌క్తికి, వ్యవస్థకు మధ్య స‌రైన సంబంధాలు లేకుంటే కొన్ని అవాంఛ‌నీయ సంఘ‌ట‌న‌లు జ‌రుగుతాయి. నిజాయితీ గ‌ల పోలీస్ అధికారిగా పేరు తెచ్చుకున్న ఉమేష్ చంద్ర విష‌యంలో ఇలానే జ‌రిగింది. వ్య‌వ‌స్థ‌ను ప‌క్క‌న పెట్టి వ్య‌వ‌స్థ‌లో ఉంటూ త‌ను న‌మ్మిన సిద్ధాంతాల‌కు అనుగుణంగా ప‌నిచేయ‌డం వ‌ల‌న ఉమేష్ చంద్ర అర్ధాంత‌రంగా త‌నువు చాలించాల్సి వ‌చ్చింది. సంస్థాగ‌త నిర్ణ‌యాల‌ను ఆయ‌న డామినేట్ చేయ‌డంతో వ్య‌వ‌స్థ నుంచి ఆయ‌న‌కు స‌హ‌కారం కొర‌వ‌డింది. దీంతో స‌రైన భ‌ద్ర‌త లేకపోవ‌డంతో ఆయ‌న న‌క్స‌లైట్ చేతిలో హ‌త్య‌కు గుర‌య్యారు. ఎంత నిజాయితీ ఉన్నా వ్య‌వ‌స్థ‌లో ఉంటూ వ్యవస్థకు వ్య‌తిరేకంగా ప‌నిచేయ‌డం సాధ్యం కాద‌న్న విష‌యం ఉమేష్ చంద్ర ఉదంతం తెలియ‌జేస్తోంది. ఇక తాజాగా మాజీ సీఎస్ ఐవైఆర్ కృష్ణారావు ఉదంతం కూడా వ్యక్తి కంటే వ్య‌వ‌స్థ గొప్ప‌ద‌నే విష‌యాన్ని మ‌రోసారి చాటి చెప్పింది. ఛీప్ సెక్ర‌ట‌రీగా సుధీర్ఘ అనుభ‌వం ఉన్న ఐవైఆర్ తాజాగా ఏపీ ప్ర‌భుత్వానికి వ్య‌తిరేకంగా వ్య‌వ‌హ‌రించారు. ప్ర‌భుత్వం చేస్తున్న త‌ప్పిదాల‌ను ఎత్తి చూపారు. అక్క‌డ వ‌ర‌కూ బాగానే ఉంది కానీ ఆయ‌న ఏ వ్య‌వ‌స్థ‌నైతే విమ‌ర్శిస్తున్నారో అదే వ్య‌వ‌స్థ‌లో ప‌ద‌వి అనుభ‌విస్తూ ప్ర‌భుత్వాన్ని త‌ప్పుప‌ట్ట‌డం ఆయ‌న్ని విమ‌ర్శ‌ల పాల్జేసింది. ఆయ‌న త‌న ప‌ద‌వికి రాజీనామా చేసి ప్ర‌భుత్వాన్ని, వ్య‌వ‌స్థ‌ను త‌ప్పుప‌ట్టి ఉంటే మంచి ఫ‌లితం ఉండేది. అలా కాకుండా ప్ర‌భుత్వంలో భాగంగా ఉంటూ వ్య‌వ‌స్థ‌ను విమ‌ర్శించ‌డం ఆయ‌న విశ్వసనీయతను దెబ్బ‌తీసింది.
ఎప్పుడైనా సంస్థే ఉన్న‌త‌మైన‌ది!
కెరీర్ లో ఉన్న‌త స్థానాల‌కు చేరుకోవాల‌ని ల‌క్ష్యాన్ని నిర్దేశించుకున్న వాళ్లు అన్ని వేళ‌లా సంస్థే ఉన్న‌త‌మైన‌ద‌ని గుర్తించాలి. 'సంస్థ అంటే ఒక్క‌రు కాదు అది వ్య‌క్తుల, కొన్ని సిద్ధాంతాల స‌మూహం'. అందులో ఎన్నో లోపాలు, విభేదాలు ఉంటాయి. సంస్థ‌కు కొన్ని సార్లు మీ వ‌ల్ల పేరు ప్ర‌ఖ్యాతులు రావ‌చ్చు. అంత మాత్రం చేత మీరు సంస్థ కంటే గొప్ప‌వాళ్లు అనుకోవ‌డం అవివేకం అవుతుంది. సంస్థ‌లో ప‌నిచేసే ఏ ఒక్క‌రైనా సంస్థ కంటే త‌క్కువే. సంస్థే ఉన్న‌త‌మైన‌ది. మీరు ప‌నిచేస్తున్న సంస్థ విధానాలు న‌చ్చ‌లేన‌ప్పుడు అందులో ప‌నిచేస్తూనే ఆ సంస్థ‌ను విమ‌ర్శించే కంటే అందులోంచి బ‌య‌ట‌కు విమ‌ర్శిస్తే బాగుంటుంది. వ్య‌క్తిగ‌త చాడీలు కెరీర్ ను దెబ్బ‌తీస్తాయ‌ని మ‌నం ఇంతకుముందే చెప్పుకున్నాం. ఇక ఒక సంస్థ మీకు న‌చ్చ‌న‌ప్పుడు దాన్ని తిడుతూ అందులోనే ప‌నిచేయ‌కుండా అందులోంచి వీలైనంత తొంద‌ర‌గా బ‌య‌ట‌ప‌డితే మంచిది. మ‌నం పైన చెప్పుకున్న న‌లుగురు వ్య‌క్తుల ఉదంతాల‌ను నిశితంగా గ‌మ‌నిస్తే మ‌న‌కు ఉద్యోగ జీవితంలో ఎలా వ్య‌వ‌హ‌రించాలో, వ్య‌వ‌హ‌రించ‌కూడ‌దో ఒక క‌చ్చిత‌మైన అవ‌గాహ‌న వ‌స్తుంది.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment