బుల్లెట్ దిగిందా లేదా..?అంతే!!

    స‌మ‌య నిర్వ‌హ‌ణ‌..ప్రస్తుత టెక్నాల‌జీ యుగంలో ఈ విష‌యంపై ప‌ట్టు సాధించ‌లేని వారు జీవితంలో ముందడుగు వేయ‌లేరు. ముఖ్యంగా ప‌నిచేసే చోట స‌మ‌యాన్ని ఎలా నిర్వ‌హించుకోవాలో తెలియక పోతే కెరీర్ ఇబ్బందుల్లో ప‌డుతుంది. ప‌క్కా ప్ర‌ణాళిక క్ర‌మ‌బ‌ద్ద‌మైన జీవిన శైలి ఉంటేనే టైమ్ మేనేజ్ మెంట్ పై ప‌ట్టు చిక్కుతుంది. ఒక ప‌నిని స‌మ‌ర్ధ‌వంతంగా, గ‌డువు లోప‌ల నాణ్యంగా ముగించ‌లేక‌పోతే ఆఫీస్ లో మిమ్మ‌ల్ని అస‌మ‌ర్ధులుగా తేల్చేస్తారు. ఇటువంటి ఎంత క‌ష్ట‌ప‌డి ప‌నిచేసామ‌న్న దాని కంటే ఎంత స్మార్ట్ గా ప‌నిచేసామ‌న్న‌దే కీల‌క పాత్ర పోషిస్తుంది.  తెలుగు సినిమాలో పాపుల‌ర్ డైలాగ్ లా ఎప్పుడొచ్చామ‌న్న‌ది కాదు బుల్లెట్ దిగిందా లేదా? అన్న‌ట్టు మీరు ఆఫీస్ లో ఎంత జూనియ‌ర్ అయినా కానివ్వండి. స‌మ‌య నిర్వ‌హ‌ణ చేసుకుని ప‌నిని ఎఫెక్టివ్ గా చేస్తున్నారా లేదా? అన్న‌దే ఇంపార్టెంట్. కెరీర్ టైమ్స్ సూచిస్తున్న ఈ జాగ్ర‌త్తలు తీసుకుంటే స‌మ‌య నిర్వ‌హ‌ణ మీకు క‌ష్టం అనిపించ‌దు. 

1. మీ ప‌ని దినాన్ని ప్ర‌ణాళికతో ప్రారంభించండి. 

  
  ఆఫీస్ లో మంచి ఉత్పాద‌క‌త‌ను సాధించడం ప్ర‌ణాళిక‌తోనే సాధ్య‌మ‌వుతుంది. కాబ‌ట్టి ఈరోజు ఆఫీస్ లో ఏ ప‌నిచేయాలో , ఎంత స‌మ‌యంలో చేయాలో అన్న‌దానిపై ముందుగానే ఒక ప్లాన్ ను రెడీ చేసుకోండి. ఎంత స‌మ‌యంలో ఆ ప‌నిని పూర్తి చేస్తారో మీకు ఒక అవగాహ‌న ఉంటే మీపై ఒత్తిడి ఉండ‌దు. ప్ర‌తీ ఒక్క‌రూ రోజంతా ఒకేతీరుగా ప‌నిచేయ‌లేరు. మీరు ఏ స‌మ‌యంలో వేగంగా ప‌నిచేయ‌గ‌ల‌రో గుర్తించి ఆ స‌మ‌యాన్ని వృధా చేయ‌కుండా చ‌క్కగా స‌ద్వినియోగం చేసుకోండి. 

2. ప‌నిని ప్రాధాన్యాతాంశాల వారీగా విభ‌జించుకోండి.

     మీ టేబుల్ డెస్క్ నిండుగా ర‌క‌ర‌కాల కాగితాలు, ఫైల్స్ ఉంటే అవి మీకు తిక‌మ‌క‌ను, ఒత్తిడిని క‌లిగిస్తాయి. అలాకాకుండా ముందుగా పూర్తి చేయ‌వ‌ల‌సిన ప‌నుల‌ను కేట‌గిరీలుగా విభ‌జించుకుని ఆ ఫైల్స్ ను లేదా ప్రాజెక్ట్ ను మాత్ర‌మే టేబుల్ పై ఉండేలా చూసుకొండి. రెండు రోజుల్లో పూర్తి చేయాల్సిన ప‌నిని ఒక్క‌రోజులోనే పూర్తి చేసేందుకు మీ సామ‌ర్ధ్యం మేర ప్ర‌య‌త్నించండి. ఈ క్ర‌మంలో ప్రాముఖ్య‌త‌కు, వేగంగా పూర్తి కావాల్సిన ప‌నికి మ‌ధ్య ఉన్న తేడాను గుర్తించండి. ఏది ముందుగా జ‌ర‌గాలో నిర్ణ‌యం తీసుకుని దానికి పూర్తి చేయండి. 

3. ప‌నిని వాయిదా వేయ‌కండి. 

    వాయిదా అనేది మీ ల‌క్ష్యాల‌ను చేరుకునేందుకు అతిపెద్ద అడ్డంకి. ఇచ్చిన ప‌నిని వాయిదా వేయ‌కుండా గ‌డువులోగా పూర్తి చేసేందుకు 100 శాతం శ్ర‌మించండి. రోజువారీ ప‌నుల‌ను ఎప్ప‌టిక‌ప్పుడు పూర్తి చేయ‌డం మీ ఒత్తిడిని త‌గ్గిస్తుంది. దీంతో మీకు ప‌ని భారం అనిపించ‌దు. అలా కాకుండా ప‌నిని నిర్ల‌క్ష్యం చేసి చివ‌రి నిమిషంలో చేసుకుందామ‌నుకుంటే క‌చ్చితంగా ఇబ్బందుల్లో ప‌డ‌తారు. 

4. ఫోన్స్ కాల్స్ , ఇంట‌ర్నెట్ వినియోగాన్ని త‌గ్గించుకోండి.

    ప‌ని మ‌ధ్య‌లో ఫోన్ కాల్స్ మాట్లాడ‌టం, ఇంట‌ర్నెట్ చూసుకోవ‌డం మీ ప‌నిని డిస్ట్ర‌బ్ చేస్తుంది. దీనివ‌ల‌న గ‌డువు లోగా ప‌నిని పూర్తి చేయ‌డంలో మీరు వెనుక‌బ‌డిపోతారు. కాబ‌ట్టి ప‌ని మధ్య‌లో ఫోన్ కాల్స్ ను సుదీర్ఘంగా మాట్లాడ‌టం, ఇంటర్నెట్ లో చాట్ చేయ‌డం వంటివి అస్సలు చేయ‌వ‌ద్దు. ఫోన్ కాల్స్ మాట్లాడేందుకు, ఇంట‌ర్నెట్ బ్రౌజింగ్ ఒక నిర్దేశిత స‌మ‌యాన్ని నిర్ణ‌యించుకుంటే మీ ప‌నికి అంత‌రాయం క‌లుగు కుండా ఉంటుంది. 

5. చ‌ర్చించండి. 

    మీరు ఒక ప‌నిని చేయ‌డానికి పూనుకున్న‌ప్పుడు మీ టీమ్ లీడ్ ఒకసారి చ‌ర్చించండి. ఒకవేళ మీకు అప్ప‌గించిన ప‌ని మీరు స‌మ‌ర్ధ‌వంతంగా చేయ‌లేరు అనుకుంటే సామ‌ర్ధ్యం ఉన్న వారికి ఆ ప‌నిని అప్ప‌గించ‌మ‌ని చెప్పండి. ఒప్పుకుని పూర్తిచేయ‌కుండా ఇబ్బందులు ప‌డేకంటే ముందుగానే మీ సామర్ధ్యాలను వివ‌రించ‌డం మంచిది. ఈ విష‌యంలో అహం కు పోయి మీకు సరిగ్గా చేయ‌లేని ప‌నిని నెత్తివేసుకోకండి. 

6. మీ ప‌నితీరు గ‌మ‌నించుకోండి. 

     మీరు ఒక టాస్క్ పూర్తి చేస్తున్న‌ప్పుడు ఏ రోజుకు ఆరోజు మీరు పూర్తి చేసిన ప‌నిపై ఒక చిన్న‌పాటి నివేదిక‌ను త‌యారు చేసుకోండి. మీ ప‌నితీరును మీరు ట్రాక్ చేసుకునేందుకు, ఏమైనా త‌ప్పులు ఉంటే స‌రిదిద్దుకునేందుకు ఇది చాలా బాగా ఉప‌యోగ‌ప‌డుతుంది. ఇలాంటి స్వీయ స‌మీక్ష వ‌ల‌న ప‌నిలో మీ ఉత్పాద‌క‌త బాగా పెరిగేందుకు దోహదం చేస్తుంది. 

7. ఇష్టప‌డి పని చేయండి..క‌ష్ట‌ప‌డి కాదు! 

    ఇక అన్నింటికంటే చివ‌ర‌గా చెపుతున్న‌ది ఏంటంటే ..ఎప్పుడైనా ప‌నిని ప్రేమించండి. ప‌ని ఇష్ట‌ప‌డి చేయాలి కానీ క‌ష్ట‌ప‌డి ఎప్పుడూ ప‌నిచేయ‌కండి. కొన్ని చిన్న చిన్న టిప్స్ పాటిస్తే పని సులువైపోతుంది. దీని వ‌ల‌న ప‌నిచేసేట‌ప్పుడు మీరు ఆస్వాదించ‌డం నేర్చుకుంటారు. ప‌ని స‌ర‌ళ‌త‌రం చేసుకోవ‌డం అంటే మీరు కెరీర్ లో ముందుకు వెళుతున్న‌ట్టే. కాబ‌ట్టి ఎప్పుడూ ఒత్తిడికి లోనుకాకుండా ఇష్టంతో, అభిరుచితో ప‌నిచేస్తే మీ కెరీర్ ఎదుగుద‌ల‌ను ఆప‌డం ఎవ‌రి త‌రమూ కాదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com