రోడ్ సైడ్ నుంచి రోల్స్ రాయిస్ దాకా తీసుకెళ్లే కెరీర్స్..!!

    రోడ్ సైడ్ కెరీర్స్ ఏంటి? అని ఆశ్చర్యపోతున్నారా? అసలు కెరీర్ అంటే ఏమిటి? మనసుకు నచ్చిన పనిచేస్తూ సౌకర్యవంతమైన జీవితానికి కావాల్సిన డబ్బును సంపాదించుకుంటే విజయవంతమైన కెరీర్ ఉన్నట్టే. మనం గత ఆర్టికల్ లో చెప్పుకున్నట్టు అత్యున్నత విద్యాలయాల్లో పెద్ద చదువులు చదివిన వారే మంచి కెరీర్ ను నిర్మించుకునేందుకు అర్హులా? కానే కాదు..పెద్దగా చదువు లేకపోయినా జీవితంలో ఎదగాలనే తపన ఉంటే ఎవరైనా ఉన్నత స్థానానికి చేరుకోవచ్చు. అయితే ప్రారంభంలో కష్టాన్ని ఓర్చుకోవాల్సి ఉంటుంది. అలాంటి ఒక విజయవంతమైన కెరీర్ ను మీరు నిర్మించుకునేందుకు కెరీర్ టైమ్స్ మీకు సహాయపడుతుంది. అందులో భాగంగానే పెద్దగా చదువులేకపోయినా ఉన్నత స్థానానికి వెళ్లేందుకు ఉపయోగపడే రోడ్ సైడ్ కెరీర్స్ కోసం చర్చించుకుందాం. ఇందులో సిగ్గు పడేందుకు ఏం లేదు. ఆత్మవిశ్వాసంతో పని చేస్తే సామాన్యులు కూడా జీవితంలో మంచి స్థాయికి ఎదగవచ్చో తెలియజేయడమే మా ఉద్దేశ్యం. మరింకెందుకు ఆలస్యం రోడ్ సైడ్ కెరీర్స్ గూర్చి తెలుసుకుందామా??

రోడ్ సైడ్ కెరీర్స్!!

    రోడ్ సైడ్ కెరీర్స్ అని చీప్ గా అనుకోవద్దు. ఆత్మగౌరవాన్ని పొగొట్టుకోకుండా మంచి జీవన సౌకర్యాలను సాధిస్తే అది కచ్చితంగా మంచి కెరీరే.  మన దేశంలో లాభసాటి వ్యాపారాల్లో ముందు వరుసలో ఉండేది ఫుడ్ బిజినెస్. మంచి నాణ్యమైన పదార్ధాలు అందిస్తే చాలా వ్యాపారం పుంజుకున్నట్టే. ఆర్ధికంగా, విద్యాపరంగా తక్కువ స్థాయిలో ఉన్నవారి కోసం మనం మాట్లాడుకుంటున్నాం కాబట్టి ..పెద్ద పెద్ద రెస్టారెంట్లు, హోటల్స్ కోసం మన చర్చ అనవసరం. ప్రస్తుత బిజీ బిజీ లైఫ్ లో ప్రతీ ఒక్కరికీ ఉదయం బ్రేక్ ఫాస్ట్ తినే సమయమే ఉండటం లేదు. ఇక బ్రేక్ ఫాస్ట్ తయారు చేసుకోవడం అంటే అది  అసాధ్యమే. అందుకే ఇటీవలి కాలంలో ఉదయం పూట తోపుడు బండ్లలో పెడుతున్న టిఫిన్స్ కు మంచి డిమాండ్. పెద్ద హోటల్స్ లో భారీ బిల్లులకు  తోడు  సర్వీస్ టాక్స్ కు తోడు ఆర్డర్ వచ్చేందుకు సమయం పట్టడంతో ఇప్పుడు చాలా మంది తోపుడు బండ్లలో టిఫిన్స్ తినేందుకే మొగ్గు చూపుతున్నారు. కేవలం నాలుగైదు గంటలు కేటాయిస్తే రోజుకు నాలుగు, ఐదు వేలు సంపాదించుకునే అవకాశం ఇక్కడ  ఉంది. 

కష్టం కొంచెం..ఆదాయం ఘనం!

      తోపుడు బండ్లలో టిఫిన్స్ తో పాటు మంచి కెరీర్ కు అంతకు మించి లాభాలకు బాటలు వేసే మరో వ్యాపారం సాయింత్రం స్నాక్స్. మార్నింగ్ టిఫిన్స్ అంత స్థాయిలో లాభాలు రాకున్నా సాయింత్రం తోపుడుబళ్లపై వేసే స్నాక్స్ కు కూడా మంచి డిమాండ్ ఉంది. అయితే ఇందులో ఉండే ప్రధాన వెసులుబాటు తక్కువ కష్టం, తక్కువ  సమయం ఎక్కువ లాభం. సాయింత్రం వరకూ వేరే ఏదైనా పనిచేసుకుని సాయింత్రం కేవలం నాలుగు గంటలు కష్టపడితే పెట్టుబడి పోయినా రోజుకు 2 నుంచి 3 వేలు సంపాదించే అవకాశాలున్నాయి. సాయింత్రం అమ్మే సమోసాలు, బజ్జీలు, పకోడిలకు ఇప్పుడు ఎంతటి డిమాండ్ ఉందో మనకు తెలియంది కాదు. కానీ అందులోనే అద్భుతమైన కెరీర్ కు అవకాశాలున్నాయని మనం తెలుసుకోలేం. పెద్దగా ఆదాయం లేకుండా జీవితాన్ని నెట్టుకొస్తున్న వారు ఈ కెరీర్ లపై దృష్టి సారిస్తే మంచిది. 

అవకాశాలెన్నో..ముందడుగు వేస్తే చాలు!

    మార్నింగ్ టిఫిన్స్, ఈవెనింగ్ స్నాక్స్ వ్యాపారంలో మంచి అనుభవం గడిస్తే కాస్త పెట్టుబడి పెట్టి క్యాటరింగ్ వ్యాపారంలోకి అడుగుపెట్టవచ్చు. క్యాటరింగ్ వ్యాపారం విజయవంతమై మీ జీవితం రోడ్డు సైడ్ నుంచి రోల్స్ రాయిస్ కు మారిపోయినట్టే. అయితే మనం చెప్పుకుంటున్న రోడ్ సైడ్ కెరీర్స్ లో ఇంకా ఎన్నో ఉన్నాయి. కాస్త కొత్తగా, విభిన్నంగా ఆలోచిస్తే డబ్బులు సంపాదించడం సులువవుతుంది. బిజీ సెంటర్స్ లో వేడి వేడి స్వీట్ కార్న్ అమ్మడం, కొన్ని సంస్థలకు చెందిన పాంప్లెట్స్ ను డిస్ట్రిబ్యూట్ చేయడం, బిజీ సెంటర్స్ లో సీజన్ తగినట్టు వస్తువులను అమ్మడం. ఉదా..వర్షాకాలంలో గొడుగులు, వేసవి కాలంలో జ్యూస్ లు అమ్మడం వంటివి. అదే విధంగా  టోల్ గేట్స్ దగ్గర, రైల్వే క్రాసింగ్ దగ్గర తినుబండారాలు అమ్మడం వంటివి కూడా మంచి రోడ్ సైడ్ కెరీర్స్. టూరింగ్ స్పాట్ లో అక్కడికి అవసరమైన వస్తువులు అమ్మడం, ఫోటోలు తీయడం, టూరిస్ట్  లకు కొత్త ప్రదేశాలు చూపించడం వంటివి కూడా మంచి కెరీర్ లుగా ఉన్నాయి. 

ఎన్నో సానుకూలతలు

    రోడ్ సైడ్ కెరీర్స్ లో తక్కువ  సమయంలో ఎక్కువ డబ్బు సంపాదించే అవకాశాలతో పాటు మరెన్నో సానుకూలతలు కూడా ఉన్నాయి. అవేంటో ఇప్పుడు చూద్దాం. 

• ప్రభుత్వానికి పన్నులు కట్టాల్సిన అవసరం లేదు.
• లైసెన్సింగ్ తలనొప్పి లేదు. 
• నచ్చితేనే పని చేసే వెసులుబాటు 
• నో జీఎస్టీ, నో సర్వీస్ టాక్స్ 
• ప్రతీరోజూ లిక్విడ్ గా కరెన్సీ రూపంలో వచ్చే మనీ 
• పార్ట్ టైమ్ గా చేసుకునే సౌకర్యం 

ఆత్మవిశ్వాసమే పెట్టుబడి !

      మంచి కెరీర్స్ ఉన్నత చదువులు చదివిన వారికే ఉంటాయి అనుకోవడం తప్పు. కష్టపడితే ఎవరైనా గొప్పవాళ్లు కావొచ్చు. అందుకే మేం పెద్దగా చదువుకోని వారికి కూడా మార్గనిర్దేశం చేసేందుకు కెరీర్ టైమ్స్ లో ప్రయత్నిస్తున్నాం. ఎంత పెద్ద ప్రయాణమైనా చిన్న అడుగుతోనే మొదలవుతుంది. పెట్టుబడి లేదు, చదువు లేదు అని చింతించడం మాని ఆత్మవిశ్వాసంతో అడుగు  వేస్తే లక్ష్యం చేరుకోవచ్చు. తోపుడు  బండ్లు, స్నాక్స్ ఇవి చాలా చిన్నవి అన్న ఆలోచన మానేయండి అందులో వచ్చే ఆదాయం మంచి  ఉద్యోగాలు చేస్తున్న వారితో సమానంగా ఉన్నప్పుడు, పెద్ద స్థాయికి చేరుకునేందుకు పునాదిలా ఉపయోగపడినప్పుడు ఆ అవకాశాన్ని చేజార్చుకుంటే మనదే తప్పు అవుతుంది. సో..మీ భారీ కలలను నెరవేర్చుకుని రోడ్ సైడ్ నుంచి రోల్స్ రాయిస్ లో తిరిగే స్థాయికి ఎదగండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com