రిలేష‌న్స్ బాగుంటే రివ్వున దూసుకెళ్తారు!!

    మ‌నిషి సంఘ‌జీవి. పుట్టినప్ప‌టి నుంచి చ‌నిపోయే వ‌ర‌కు మ‌నుగ‌డ సాగించాలంటే సాటి మ‌నుష్యుల‌తో ఆరోగ్య‌క‌ర‌మైన సంబంధాలు చాలా ముఖ్యం. తోటి వారితో, కుటుంబ స‌భ్యుల‌తో  సంబంధాలు స‌రిగా లేన‌ప్పుడు మ‌న జీవితం గాడి త‌ప్పుతుంది. ముఖ్యంగా విద్యార్ధి జీవితంలో సంబంధాల ప్రాధాన్య‌త‌ను తెలుసుకోవాలి. భావోద్వేగాల‌ను అదుపు చేసుకోవ‌డం, అంద‌రితో స‌ఖ్య‌త‌గా మెల‌గ‌డం, కుటుంబ సంబంధాల‌కు, విలువ‌ల‌కు ప్రాధాన్య‌త‌నివ్వ‌డం తెలీకుంటే వ్య‌క్తిగ‌త జీవితం అస్త‌వ్య‌స్థ‌మ‌వుతుంది. ఈ విష‌యాన్ని గుర్తించే  ప్ర‌స్తుతం చాలా దేశాలు మ‌నుష్య సంబంధాలపై తమ విద్యా విధానంలో మార్పులు చేసుకుంటున్నాయి. మ‌న దేశం విద్యా విధానం మాత్రం మాన‌వ సంబంధాలకు ఉన్న ప్రాముఖ్య‌త‌ను ఇంకా గుర్తించిన‌ట్టు క‌నిపించ‌డం లేదు. మారుతున్న సామాజిక ప‌రిస్థితుల్లో విద్యార్ధులు, ఉద్యోగులు మాన‌వ సంబంధాలు ఎంత కీల‌క‌మైన‌వో గుర్తించాలి. ఆరోగ్య‌క‌ర‌మైన మానవ సంబంధాల ద్వారానే వృత్తిగ‌త జీవితం, వ్య‌క్తిగ‌త జీవితం స‌రైన దిశ‌లో సాగుతుంద‌ని తెలుసుకోవాలి. 

సంబంధాల‌తోనే విజ‌యం సాధ్యం! 

     మ‌నిషి జీవితం సంబంధాల చుట్టూ అల్లుకుని ఉంటుంది. సంబంధ బాంధవ్యాలు లేకుండా మ‌నిషి జీవితం ఊహించడానికి కూడా క‌ష్టంగా ఉంటుంది.సంబంధాలు అంటే ద‌గ్గ‌రిత‌నం ఒక్క‌టే కాదు. దాన్ని మించి ఒక  అంత‌ర్గ‌త సంకేతం దాన్ని ప్ర‌భావితం చేస్తూ ఉంటుంది. ప్ర‌తీ గెలుపులోనూ ఓట‌మి లోనూ సంబంధాలే కీల‌క పాత్ర పోషిస్తాయి.  ఆర్థికంగా, ఉద్వేగాల ప‌రంగా, ఆధ్యాత్మికంగా మీరు విజ‌యం సాధించినా, ప‌రాజ‌యం పొందినా.. అది సంబంధాల విష‌యంలో మీరు ఎంత అప్ర‌మ‌త్తంగా ఉన్నార‌న్న దానిపై ఆధార‌ప‌డి ఉంటుంది. మీరు మీ స‌హోద్యోగులు, మీ పై అధికారులు, స‌హాధ్యాయులు, ఉపాధ్యాయులల‌తో, కుటుంబ స‌భ్యుల‌తో స‌రైన సంబంధాల‌ను క‌లిగి ఉన్నారంటే మీ విజ‌యం చాలా సుల‌భ‌మ‌వుతుంది. అలా కాకుండా మీకు ఎవ‌రితోనూ ఆరోగ్య‌క‌ర‌మైన సంబంధాలు లేవంటే సంఘంలో మీరు ఇబ్బందులు ప‌డ‌క త‌ప్ప‌దు. 

విద్యార్ధికి సంబంధాలు చాలా ముఖ్యం! 

     ఒక విద్యార్ధికి మాన‌వ సంబంధాలు అనేవి చాలా చాలా ముఖ్యం. త‌ల్లిదండ్రులు, ఉపాధ్యాయులు, తోటి విద్యార్ధుల‌తో స‌రైన సంబంధాల‌ను క‌లిగి ఉన్న‌ప్పుడు చ‌దువులో మంచి ఫ‌లితాల‌ను సాధించేందుకు వీలు క‌లుగుతుంది. ఒక విద్యార్ధి అక‌డ‌మిక్ గా విజ‌యం సాధించాడంటే అది అత‌ని ఒక్క‌డి ప్ర‌తిభే కాదు. అత‌ని స‌హ విద్యార్ధులు, పేరెంట్స్, టీచ‌ర్స్ కు కూడా అత‌ని విజ‌యంలో భాగం ఉంటుంది. త‌ల్లిదండ్రులు త‌మ పిల్ల‌వాడ్ని స్కూల్ లో జాయిన్ చేస్తే టీచ‌ర్స్ అత‌నికి విభిన్న విష‌యాలు నేర్పిస్తారు. అలాగే తోటి విద్యార్ధుల‌తో పోటీ, స్నేహం వారిని విజ‌యం దిశగా న‌డిపిస్తుంది. ఒక విద్యార్ధి విజ‌యంలో ఇన్ని మాన‌వ‌ సంబంధాలు ఒకదానికి మ‌రొక‌టి అవినాభావంగా ఏర్ప‌డి ఉంటాయి.  మ‌నం పైన చెప్పుకున్న ఈ మూడు సంబంధాల్లో ఏది స‌రిగ్గా లేకున్నా ఆ విద్యార్ధి వికాసం స‌రైన విధంగా సాగ‌దు. 

ఉద్యోగికి సంబంధాలే ఆయువుప‌ట్టు! 

       కెరీర్ లో మాన‌వ సంబంధాల‌కు ఎంత ప్ర‌ముఖ స్థానం ఉందో మ‌నం గ‌తంలోనే చెప్పుకున్నాం. కెరీర్ విజ‌య‌వంతంగా సాగాలంటే అంద‌రితోనూ ఆరోగ్యక‌ర‌మైన సంబంధాల‌ను క‌లిగి ఉండటం చాలా ముఖ్యం. స‌హోద్యోగుల‌తో స‌రైన విధంగా వ్య‌వ‌హ‌రిస్తే చాలా స‌మ‌స్య‌లు తీరిపోయాయి. కొత్త‌గా ఉద్యోగం జాయినై నేర్చుకునే ద‌శ‌లో ఉన్న‌ప్పుడు తోటి ఉద్యోగుల‌తో మంచి సంబంధాలు మేలు చేస్తాయి. అదే విధంగా మీ మేనేజ‌ర్ తో కూడా మంచి సంబంధాల‌ను కొన‌సాగించాలి. మీ ప‌దోన్న‌తుల‌తోనూ, మీ వేత‌నం పెంపులోనూ మీరు స‌హోద్యోగుల‌తోనూ, మీ పై అధికారితోనూ ఎంత మంచి సంబంధాల‌ను క‌లిగి ఉన్నార‌న్న విష‌యమే కీల‌క పాత్ర పోషిస్తుంది. అంద‌రితోనూ క‌లుపుగోలుగా ఉంటూ, అవ‌స‌ర‌మైతే మీ తోటి ఉద్యోగులు స‌హాయం చేస్తూ ఉంటే అది మీకు మంచి  సంబంధాల‌ను సృష్టిస్తుంది. అలా కాకుండా అంద‌రితో గొడ‌వ ప‌డుతూ , అంద‌ర్నీ నిందిస్తూ ఉంటే కెరీర్ ఎదుగుద‌ల సాధ్యం కాదు. కెరీర్ లో ఉన్న‌త స్థితికి చేరుకోవాలంటే మాన‌వ సంబంధాలు అత్యంత ముఖ్య‌మ‌ని గుర్తిస్తే విజయం సాధించ‌డం సులువ‌వుతుంది. 

ఉన్న‌తికి కుటుంబ సంబంధాలు కీల‌క‌మే! 

       ఇంట్లో కుటుంబ స‌భ్యుల‌తో మంచి సంబంధాలు క‌లిగి ఉన్న‌ప్పుడే ఆఫీస్ లో మంచి ప‌నితీరు క‌న‌బ‌ర్చేందుకు అవ‌కాశం ఉంటుంది. కుటుంబ స‌భ్యుల‌తో స‌ఖ్య‌త లేక‌పోవ‌డం, గొడ‌వ‌లు ప‌డితే అది అత‌ని వృత్తిగ‌త జీవితాన్ని తీవ్రంగా ప్ర‌భావితం చేస్తుంది. అలా కాకుండా కుటుంబ స‌భ్యుల‌తో ఆరోగ్య‌క‌ర‌మైన సంబంధాల‌ను క‌లిగి ఉంటే వాళ్లు మీ కెరీర్ ఉన్న‌తికి స‌హాయ‌ప‌డ‌తారు. మీ ఉద్య‌గ బాధ్య‌త‌ల‌ను, ఒత్తిడుల‌ను అర్ధం చేసుకుని మీకు చేదోడు వాదోడుగా ఉంటారు. కెరీర్ లో అత్యున్న‌త స్థాయికి వెళ్లాలంటే ఆఫీస్ లో ఎంత మంచి సంబంధాల‌ను క‌లిగి ఉండాలో అదే విధంగా కుటుంబ స‌భ్యుల‌తోనూ అదే విధ‌మైన సంబంధాల‌ను కొన‌సాగించాలి. ఈ రెండింటిలో ఏ చోటైనా మీరు మంచి సంబంధాల‌ను కొన‌సాగించ‌లేక‌పోతే కెరీర్ క‌చ్చితంగా దెబ్బ‌తింటుంది. ఉద్యోగులు ఈ విష‌యాన్ని త‌ప్ప‌నిస‌రిగా గుర్తుపెట్టుకోవాలి. 

స‌క్సెస్ ఫుల్ లైఫ్ అంటే స‌క్సెస్ ఫుల్ రిలేష‌న్స్ ! 

      చాలా మంది స‌క్సెస్ ఫుల్ లైఫ్ ను సాధించాలి అని క‌ల‌లు కంటారు. కానీ విజ‌య‌వంత‌మైన జీవితం మంచి ఆరోగ్యక‌ర‌మైన సంబంధాలే అని గుర్తించ‌రు. కెరీర్ లో మంచి ఉన్న‌త స్థానానికి చేరుకుని కుటుంబ స‌భ్యుల‌తో సంబంధాలు లేకుంటే ఆ విజ‌యాన్ని అత‌ను ఎలా సెల‌బ్రేట్ చేసుకుంటాడు? ఒక ప‌దోన్న‌తి సాధించినా ప‌క్క‌నే కూర్చున్న ఉద్యోగులు అభినందిచ‌క‌పోతే ఆ పదోన్న‌తికి విలువ ఏముంది? ఇలాంటి విష‌యాల‌ను గుర్తించి.. జీవితం అంటేనే సంబంధాలు అని గుర్తించి అంద‌రితో మంచి రిలేష‌న్స్ ను ఏర్ప‌రుచుకోవాలి. అదే స‌మ‌యంలో మీ ఎదుగుద‌ల‌కు అడ్డుగా నిలిచే చెడ్డ రిలేష‌న్స్, స్నేహాలు ఉంటే తొలిగించుకోవాలి. మ‌న స‌క్సెస్ ను సెల‌బ్రేట్ చేసుకునేందుకు మ‌న ఫెయిల్యూర్స్ నుంచి మ‌న‌ల్ని కాపాడేందుకు అవ‌స‌ర‌మైన రిలేష‌న్స్ ను మ‌నం సంపాదించుకోక‌పోతే అది క‌చ్చితంగా మ‌న ఫెయిల్యూర్.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com