ఈ 6 టిప్స్ తో కొత్త విద్యా సంవత్సరాన్ని ఘనంగా స్టార్ట్ చేయండి!!

     స్కూల్/ కాలేజీలో జాయిన్ కావడం అనేది జీవితంలో చాలా ఉత్తేజకరమైన సందర్భం. వ్యక్తిగత ఎదుగులకు, సమాజంలో మనుగడకు అవసరమైన విషయాలను అక్కడే నేర్చుకుంటాం. స్కూల్ / కాలేజీనో వదిలిపెట్టి పై స్థాయికి వెళ్లినప్పుడు బాధ కలగడం సహజమే అయినా లైఫ్ లో మరింత ముందుకు పోయేందుకు అవసరమైన శక్తి సామర్ధ్యాలను అవి అందిస్తాయి. సెలవులు పూర్తయ్యాయి. ఇక మళ్లీ స్కూల్ కో లేక కాలేజ్ కో వెళ్లేందుకు రెడీ కావాల్సిందే. చాలా మంది విద్యార్ధులు.. 'అబ్బా.. అదే స్కూల్,  అదే టీచర్స్ , సేమ్ క్లాస్ రూమ్...సెలవులు అప్పుడే అయిపోయాయా' అని బాధపడుతూ ఉంటారు. కానీ కొత్త నాలెడ్జ్ ను సంపాదించుకుని క్లాస్ రూమ్ కు రీఎంట్రీ ఇస్తే అంతా కొత్తగా కనబడుతుంది. ఆ కొత్త నాలెడ్జ్ ను, టిప్స్ ను ఇప్పుడు మనం నేర్చుకుందాం. విద్యార్ధులు ఇప్పుడు మనం చెప్పుకోబేయే చిన్న చిన్న మార్పులు చేసుకోవడం, పాటించడం వలన చదువులో మిగతా వారికంటే ముందుండేందుకు అవకాశం ఏర్పడుతుంది. 

1.పునశ్చరణ 

   ప్రతీ విద్యార్ధికి అతి ముఖ్యమైనది పునశ్చరణ. పరీక్షలప్పుడు మాత్రం పునశ్చరణ చేసుకుంటే సరిపోతుంది అనుకోకండి. అది కేవలం సబ్జెక్ట్ కు సంబంధించిన పునశ్చరణ. కానీ విద్యార్ధి కాలేజీ లేదా స్కూల్ కు సెలవులు తర్వాత వెళ్తున్నప్పుడు ఏడాది మొత్తంలో తను నేర్చుకున్న విషయాలను ఒకసారి అవలోకనం చేసుకోవాలి. దీని వలన తన లోపాలు, బలాలు తెలిసి లోపాలను సరిదిద్దుకునేందుకు బలాలను మరింత పెంచుకునేందుకు అవకాశం కలుగుతుంది. అదే విధంగా విద్యార్ధులు ఏదైనా పెద్ద ఈవెంట్ లో భాగస్వాములు అయినప్పుడు దాని  వలన ఎటువంటి ఉపయోగం కలిగించే స్వీయ సమీక్ష చేసుకోవాలి. అదే విధంగా స్నేహాల విషయంలో కూడా ఈ సమీక్ష ను ఉపయోగించాలి. ఈ క్రింద మనం చెప్పుకుంటున్న విధంగా ఆ సమీక్ష ఉండాలి. 

• దాని వలన నాకు ప్రయోజనం చేకూరిందా? 

• నేను కొత్త విషయం ఏమైనా నేర్చుకున్నానా?

• వాటి వలన నాకు ఏమైనా నష్టం వాటిల్లిందా? 

      ఈ మూడు స్వీయ ప్రశ్నల ఆధారంగా విద్యార్ధులకు ఏయే పనులు చేయాలి. ఏం చేయకూడదు. పరిస్థితిని ఎలా అధిగమించాలి. స్నేహం విషయంలో ఎలాంటి జాగ్రత్తలు తీసుకోవాలి అన్న విషయాలపై ఒక క్లారిటీ వస్తుంది. 

2.నోట్‌బుక్స్ ను సిద్ధం చేసుకోండి!

      చాలా మంది విద్యార్ధులు ఈ విషయాన్ని విస్మరిస్తారు. స్కూల్ లేదా కాలేజీకి వెళ్లే  చాలా మంది విద్యార్ధులు మొదట్లో టెక్ట్స్ బుక్స్, నోట్ బుక్స్ వెంటతీసుకెళ్లరు. ఒక రఫ్ బుక్ వెంటేసు వెళ్లడం వలన ఎటువంటి ప్రయోజనం ఉండదు. మొదట్లో ఎందుకు నోట్‌బుక్స్ అని చాలా మంది విద్యార్ధులు అనుకుంటారు. ఆ ఆలోచన తప్పు. ఇక్కడే విద్యార్ధి తెలివిగా ఆలోచించాలి. మొదటి నుంచి నోట్స్ రాసి పెట్టుకోవడం వలన మీరు ట్రాక్ లో ఉంటారు. రఫ్ బుక్ లో రాసుకుని ఎగ్జామ్ దగ్గరకు రాగానే దాన్ని హడావుడిగా తిరగేయడం మంచి ఫలితాలను ఇవ్వదు. ముందు నుంచే నోట్స్ ప్రిపేర్ చేసుకోవడం ఒత్తిడి తగ్గడంతో పాటు ఎగ్జామ్ ప్రిపరేషన్ సులువవుతుంది. 

3.మీ సామాగ్రిని సరిచూసుకొండి!

     సుదీర్ఘ సెలవుల తర్వాత స్కూల్ లేదా కాలేజీకి వెళ్లే విద్యార్ధులు ముందుగానే తమ సామాగ్రిని రెడీ చేసుకోవాలి. ఎప్పుడూ వాడే వస్తువులు బోర్ కొడుతుండే కొత్త వస్తువులు కొనుక్కోండి. మీకు నచ్చిన బ్యాగ్, జోక్స్ తో వచ్చే వాటర్ బాటిల్స్ , ట్రెండీ లంచ్ బాక్స్ . ఇలా చేయడం వలన చాలా రోజుల తర్వాత స్కూల్ / కాలేజీకి వెళ్తున్నాం అన్న ఫీల్ పోయి జోష్ వస్తుంది. కొత్త పెన్ను సెట్టులు, బాక్స్ ల సమకూర్చుకోవడం వలన మూడ్ మారుతుంది. కొత్తలో స్కూల్ / కాలేజీకి వెళ్లేందుకు మనసు మొరాయిస్తుంది కాబట్టి ఈ చిన్న చిన్న మార్పులతో మూడ్ ఛేంజ్ చేసుకుని ఉత్సాహంతో రీఒపెనింగ్ కు రెడీ కావచ్చు. 

4.ఆరోగ్యకరమైన తిండి తినండి

    ఆరోగ్యకరమైన తిండికి స్కూల్/ కాలేజీ రీఒపెనింగ్ కు ఏంటి సంబంధం అని మీరనుకోవచ్చు!  తాజా అధ్యయనాల ప్రకారం ఆహారం అనేది మీ మూడ్ పై ప్రభావం చూపతుందని తేలింది. కాబట్టి మంచి ఆరోగ్యకరమైన ఆహారపు అలవాట్ల వలన మీ మూడ్ బాగుంటుంది. మీకు నచ్చిన ఫుడ్ ను ప్రతీ రోజూ కాకుండా కొన్ని సందర్భాల్లోనే తినడం వలన మీ రోజువారీ డైట్ ప్రణాళిక దెబ్బతినకుండా ఉంటుంది. మంచి ఆరోగ్యకరమైన తిండి తినే అలవాటును స్కూల్/ కాలేజీ లు రీఒపెన్ చేసిన దగ్గర్నుంచే ప్రారంభిస్తే కొన్ని రోజులకు అది దినచర్యగా మారిపోతుంది. 

5.క్యాలెండర్ ను రూపొందించుకొండి 

   మీరు ఏడాది మొత్తం చదవాల్సిన సబ్జెక్ట్ తెలిసినప్పుడు వెంటనే ఒక సమయ పట్టిక తయారు చేసుకోండి. మీరు ఏయే సబ్జెక్ట్ లు ఏయే సమయాల్లో , ఏయే రోజుల్లో చదవాలో ఒక సమగ్ర క్యాలెండర్ ను రూపొందించుకొండి. 

•  ఆ వారంలో మీరు చదవాల్సిన సబ్జెక్ట్ లు, అదే విదంగా నెలలో చదవాల్సిన సబ్జెక్ట్ లను విడదీసి రోజువారీ క్యాలెండర్ ను రెడీ చేసుకోండి. 

• మీకు కష్టంగా సబ్జెక్ట్ కు మీ టైం టేబుల్ లో ఎక్కువ సమయం కేటాయించండి. అలా అని మిగతా సబ్జెక్ట్స్ ను నిర్లక్ష్యం చేయకండి.

• రిలాక్స్ అయ్యేందుకు కొద్దిగా సమయాన్ని కేటాయించుకోండి. ప్రతీ 45 నిమిషాల చదువు తర్వాత 10 నిమిషాల బ్రేక్ వచ్చేలా చూసుకోండి. అదే విధంగా వీకెండ్ లో చిన్న టూర్ ప్లాన్ చేసుకుంటే  మీకు పునరుత్తేజం కలుగుతుంది. 

   చదువు అనేది చాలా ముఖ్యం. ఇందులో ఎటువంటి సందేహం లేదు. చాలా మంది విద్యార్దుల విద్యా సంవత్సరం మొదట్లో  కేవలం చదువుకే ప్రాధాన్యతనిస్తూ ఉంటారు. అయితే కొన్ని మీ అభిరుచులను నెరవేర్చుకునేందుకు కూడా ప్రయత్నించాలి. అదే విధంగా కొన్ని సామాజిక కార్యక్రమాలో పాలుపంచుకోవాలి. అయితే చదువును అభిరుచులను, భాధ్యతలను ప్రాధాన్యతాంశాల వారీగా విభజించుకుంటే ఈ పనులన్నీ చాలా సులువుగా నెరవేర్చవచ్చు. 

6.ఒత్తిడి వద్దు, ప్రశాంతంగా ఉండండి 

     ఇలా చెప్పడం చాలా సులువుగానే ఉంటుంది. కానీ అలా ఉండటం చాలా కష్టం అంటారా! కొత్త విద్యా సంవత్సరంలో ఆందోళనలు వదిలేయండి. మీ కొత్త జర్నీలో అన్నీ అనుకూల విషయాలే ఉంటాయని, జరుగుతాయని గట్టిగా అనుకోండి. మీ స్కూల్/ కాలేజీ లో లైఫ్ ను ఒక అందమైన అనుభూతిగా మార్చుకోండి. మీ మనసుకు నచ్చిన స్నేహితులతో ఆనందంగా గడపండి. మనసుకు నచ్చిన పని చేయండి. మరింకెందుకాలస్యం బ్యాగ్ తీసుకుని సంతోషంగా నవ్వుతూ స్కూల్ / కాలేజీకి వెళ్లండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com