'డిజిట‌ల్ పేరెంటింగ్' లో స‌వాళ్లు..6 సూప‌ర్ టిప్స్!!
ఈ టెక్నాల‌జీ యుగంలో పిల్ల‌ల్ని మంచి పౌరులుగా తీర్చిదిద్ద‌డం త‌ల్లిదండ్రుల‌కు అతి పెద్ద స‌వాలు. ఒకవైపు సాంకేతిక‌త తెచ్చిన సౌక‌ర్యాలు, మ‌రోవైపు అదే సాంకేతిక‌త మోసుకొచ్చిన ప్ర‌మాదాలు. క‌త్తిని సరైన ప‌ద్ధ‌తిలో వాడ‌టం రాకుంటే చేయి ఎలాగైతే తెగుతుందో అలానే టెక్నాల‌జీని కూడా స‌రిగా వాడ‌టం రాకుంటే జీవితం ప్ర‌మాదంలో ప‌డుతుంది. ఇటువంటి ప‌రిస్థితుల్లో పిల్ల‌ల‌కు టెక్నాల‌జీని ఎంత మోతాదులో అందించాల‌న్న విష‌యం ఇప్పుడు పేరెంటింగ్ స్కిల్స్ లో ఒక ముఖ్యమైన అంశంగా మారిపోయింది. డిజిట‌ల్ పేరెంటింగ్ గా వ్య‌వ‌హ‌రించే ఈ న‌యా పేరింటింగ్ లో కొన్ని జాగ్రత్తలు, మ‌రికొన్ని టెక్నిక్స్ ను ఉప‌యోగించి పిల్లల‌కి అవ‌స‌రం మేర‌కే టెక్నాల‌జీని అందించ‌డం కీల‌కం.
ఇప్పుడు ప్ర‌తీ పిల్ల‌వాడి చేతిలో స్మార్ట్ ఫోన్ ఉంటోంది. హైస్కూల్ స్థాయి వ‌ర‌కూ కొంత మంది పిల్ల‌ల ద‌గ్గ‌ర స్మార్ట్ ఫోన్ లేకున్నా ఇంట‌ర్నెట్ సౌక‌ర్యం మాత్రం వాళ్లకు అందుబాటులో ఉంటోంది. ఒక ప‌క్క మేసేజింగ్ యాప్స్, మ‌రోవైపు సోష‌ల్ మీడియా. పిల్లలు సందేశాలను పంపిస్తున్నారు..సోష‌ల్ మీడియాలో ఫోటోల‌ను అప్ లోడ్ చేస్తున్నారు. ఇంట‌ర్నెట్ గ‌దిని దాటి స్మార్ట్ ఫోన్ ద్వారా చేతిలోకి వ‌చ్చిన‌ప్ప‌టి నుంచి త‌ల్లిదండ్రుల‌కు స‌మ‌స్య‌లు మరింత పెరిగాయి. ఈ నేప‌థ్యంలో డిజిట‌ల్ యుగంలో ఉన్న త‌ల్లిదండ్రల‌కు డిజిట‌ల్ పేరెంటింగ్ పై కెరీర్ టైమ్స్ కొన్ని టిప్స్ ను అందిస్తోంది.
1. పిల్ల‌ల‌తో స్నేహితుల్లా మెల‌గండి! 
ప్ర‌తీరోజూ త‌ల్లిదండ్రులు పిల్ల‌ల‌లో ఎక్కువ స‌మ‌యం గ‌డప‌డం మంచి ఫ‌లితాల‌ను ఇస్తుంది. వారితో గ‌డిపే స‌మ‌యంలో విభిన్న విషయాలను చ‌ర్చించండి. వాళ్లు ఇంట‌ర్నెట్ ద్వారా చేసే ప‌నిలో అవ‌స‌ర‌మైతే త‌మ స‌హాయం తీసుకోమ‌ని చెప్పండి. వాళ్ల‌లో భ‌యాన్ని పోగొట్టి ఏ విష‌య‌మైనా మీతో చ‌ర్చించేలా వాళ్ల‌తో మీ సంబంధాన్ని దృఢం చేసుకుంటే ఇది సాధ్య‌మ‌వుతుంది.
- మీ పిల్ల‌ల ఆన్ లైన్ అలవాట్లపై నిరంత‌రం ఒక క‌న్నేసి ఉంచండి.
- ఆన్ లైన్ లో పిల్లలు చేసే ప‌నిలో మీ భాగ‌స్వామ్యం ఉండేలా జాగ్ర‌త్త పడండి.
- వాళ్లు ఏదైనా గేమ్ ను ఇష్ట‌ప‌డుతుంటే ఆ ఆట అంటే నీకెందుకు అంత ఇష్టం? అని అడ‌గండి. వారు చెప్పే స‌మాధానాన్ని ఓపిగ్గా వినండి.
- ఒకవేళ వాళ్లు స్నేహితుల‌తో ఛాటింగ్ చేస్తూ ఉంటే అది మరింత శృతి మించితే హెచ్చ‌రించండి.
- వాళ్ల స్నేహితులు ఎవ‌రు? ఎటువంటి వారు అన్న‌దానిపై నిఘా పెట్టండి.
- పిల్లలు ఇంట‌ర్నెట్ లో సెర్చ్ చేస్తున్న సైట్ల‌ను అప్పుడ‌ప్పుడూ గ‌మ‌నిస్తూ ఉండండి.
ఈ త‌రం త‌ల్లిదండ్రులు టెక్నిక‌ల్ గా ఎప్ప‌టిక‌ప్పుడు అప్ డేట్ గా ఉండాల్సిందే. నా వ‌ల్ల కాదు అని చేతులెత్తేస్తే డిజిట‌ల్ పేరెంటింగ్ లో మీరు విఫ‌లం చెందిన‌ట్టే. ఎందుకంటే టెక్నిక‌ల్ గా మీరు అప్ డేట్ గా ఉన్న‌ప్పుడే మీ పిల్ల‌ల‌కు కొత్త విష‌యాలు నేర్పేందుకు అదే స‌మ‌యంలో వాళ్లు త‌ప్పుదారిలో న‌డ‌వ‌కుండా నిలువ‌రించేందుకు వీలు క‌లుగుతుంది.
- మీ పిల్ల‌ల‌కు ఇంట‌ర్నెట్ లో కొన్ని వెబ్ సైట్ల‌ను మాత్ర‌మే అందుబాటులో ఉంచే నైపుణ్యం మీకు అవ‌స‌రం.
- మీ పిల్ల‌ల ఇంట‌ర్నెట్ అలవాట్లపై దృష్టి సారించాలంటే ముందుగా మీకు కంప్యూట‌ర్ నైపుణ్యం ఉండాలి.
- మీ పిల్లలు చూడ‌కూడ‌దు అని అనుకుంటున్న వెబ్ సైట్ల‌ను మీరు బ్లాక్ చేయ‌గ‌ల‌గాలి.
- సోష‌ల్ మీడియాలో మీ పిల్లలు ఏమైనా అనుచిత వ్యాఖ్య‌లు, కామెంట్లు చేస్తుంటే మీకు వెంట‌నే తెలిసేలా జాగ్ర‌త్త పడాలి.
3. ఇంట‌ర్నెట్ వాడ‌కంపై దిశానిర్దేశం చేయండి!
అస‌లు ఇంట‌ర్నెట్ అంటే ఏంటి? ఇంట‌ర్నెట్ ను ఉప‌యోగించుకుని ఎంత ఉన్న‌తిని సాధించ‌వ‌చ్చోన‌న్న‌ది మీ పిల్ల‌ల‌కు అర్ధ‌మ‌య్యేలా వివ‌రించాలి. ఇంట‌ర్నెట్ వాడ‌కం మితిమీరితే జ‌రిగే అన‌ర్ధాల‌ను వాళ్లకు వివ‌రించాలి. మ‌నం ముందుగా చెప్పుకున్న‌ట్టు ఇవ‌న్నీ పిల్ల‌ల‌తో స్నేహంగా మెలిగి చేయాల్సిన ప‌నులు.
- టెక్నాల‌జీకి కెరీర్ కు ఉన్న సంబంధాన్ని వాళ్లకు అర్ధ‌మ‌య్యేలా వివ‌రించాలి.
- సోష‌ల్ మీడియా ప్రోఫైల్ మొదలుకొని జాబ్ పోర్ట‌ల్ లో ప్రోఫైల్ వ‌ర‌కూ క్రెడిబిలిటీ ఎంత ముఖ్య‌మో పిల్ల‌ల‌కు తెలియ‌జెప్పాలి.
- ఇంట‌ర్నెట్ లో జ‌రిగే మోసాలు, అసాంఘిక విష‌యాల‌పై వాళ్ల‌ను అప్ర‌మ‌త్తం చేస్తూ వాళ్లు ఆ దిశగా వెళ్ల‌కుండా జాగ్ర‌త్త వ‌హించాలి.
- డిజిట‌ల్ రెప్యుటేష‌న్ ఒక‌సారి పోతే తిరిగి సంపాదించుకోవ‌డం ఎంత క‌ష్ట‌మో అర్ధ‌మ‌య్యేలా చెప్పాలి.
డిజిట‌ల్ పేరింటింగ్ లో ఇది చాలా ముఖ్యమైన విష‌యం. మీ పిల్లలు ఎంత స‌మ‌యం ఇంట‌ర్నెట్ ఉప‌యోగించాల‌న్న దానిపై వారికి ఒక స‌మ‌య ప‌రిమితిని విధించండి. వాళ్లు టెక్నాల‌జీని అందుబాటులో ఉంచుతూనే అదే స‌మ‌యంలో వాళ్లు దానికి బానిస‌లు కాకుండా జాగ్ర‌త్త వ‌హించాలి.
- ఇంట‌ర్నెట్ ఏ స‌మ‌యంలో ఉప‌యోగించాలో మీ పిల్ల‌ల‌కు ఓ టైమ్ టేబుల్ త‌యారు చేయండి.
- ఒకవేళ మీ పిల్లలు కాలేజీలో చదివే యువ‌కులైతే టెక్నాల‌జీ లైఫ్ స్టైల్ ను నాశ‌నం చేయ‌కుండా ఎలా మ‌సులు కోవాలో తెలియ‌జేయండి.
- ముఖ్యంగా భోజనం చేసేట‌ప్పుడు, ఎవ‌రితోనైనా మాట్లాడేట‌ప్పుడు ఫోన్ దూరంగా పెట్టే అల‌వాటును వారికి నేర్పించండి.
- టెక్నాల‌జీ మీ పిల్ల‌ల జీవితంలో ప‌రిధి దాటి రాకుండా ఉండేందుకు మీ ఇంట్లో కొన్ని రూల్స్ ను విధించండి.
- రాత్రి ప‌డుకోబోయే ముందు ఎట్టి ప‌రిస్థితుల్లోనూ మీ కాలేజీ పిల్లలు ఫోన్ స్విచ్ఛాఫ్ చేసేలా చూడండి.
ఇటీవ‌ల కాలంలో చిన్న పిల్ల‌ల‌కు కూడా స్మార్ట్ ఫోన్లు, ట్యాబ్లెట్లు ఇవ్వాల్సిన ప‌రిస్థితులు ఏర్ప‌డుతున్నాయి. చిన్న‌తనంలోనే ఇంట‌ర్నెట్ అందుబాటులో ఉండ‌టం వాళ్లకు ఎంత మేలు చేస్తుందో అంతే కీడు కూడా చేస్తుంది. కాబ‌ట్టి ఈ విష‌యంలో త‌ల్లిదండ్రులు కొన్ని లేటేస్ట్ టెక్నాల‌జీ అప్ డేట్స్ ను ఉప‌యోగించుకోవాలి.
- మీ స్కూల్ కు వెళ్లే పిల్ల‌ల‌కు స్మార్ట్ ఫోన్ లేదా ట్యాబ్లెట్ ఇవ్వాల్సిన ప‌రిస్థితి వ‌స్తే అందులో పేరెంట‌ల్ కంట్రోల్ యాప్స్ ను ఇన్ స్టాల్ చేయండి.
- వాళ్లు ఏదైనా అవాంఛ‌నీయ విషయాలను చూస్తే మీ దృష్టికి వెంట‌నే వ‌చ్చేలా వ్య‌వ‌హ‌రించండి.
- కొంచెం పెద్ద పిల్ల‌లైతే వాళ్ల ఫోన్స్ లో ఇటువంటి యాప్స్ ను ఇన్ స్టాల్ చేయ‌కండి.
- వాళ్లు నిద్ర పోయాక వాళ్ల ఫోన్ ను ప‌రిశీలించి త‌గిన జాగ్రత్తలు తీసుకోవాలి.
- కానీ ఇవ‌న్నీ చేసిన‌ప్ప‌టికీ మీరు వాళ్ల‌ను ఒక క‌నిపెడుతున్నార‌న్న విష‌యాన్ని వాళ్లకు తెలియ‌కుండా జాగ్ర‌త్త పడండి.
- పిల్లలు త‌మ‌ను అనుమానిస్తున్నార‌ని తెలిస్తే త‌ట్టుకోలేరు.
- ఒకవేళ పిల్లలు ఏమైనా అవాంఛ‌నీయ విష‌యాలు చూసార‌ని తెలిస్తే వాళ్లకు స్నేహితుల్లా అతి సున్నితంగా అది మంచిది కాద‌ని వివ‌రించి చెప్పాలి.
ఇక డిజిట‌ల్ అల‌వాట్ల విష‌యంలో మీరు మీ పిల్ల‌ల‌కు రోల్ మోడ‌ల్ లా వ్య‌వ‌హ‌రించాలి. ఎందుకంటే పిల్లలు ఎప్పుడూ త‌ల్లిదండ్రుల్నే గ‌మ‌నిస్తూ ఉంటారు. వాళ్లు ఏం చేస్తే అదే చేయ‌డానికి ప్ర‌యత్నిస్తూ ఉంటారు. మీరు త‌ప్పులు చేస్తే మీ పిల్లలు కూడా అదే ఫాలో అవుతారు. కాబ‌ట్టి ఈ విష‌యంలో చాలా జాగ్ర‌త్త‌గా ఉండండి.
- భోజనం చేసేట‌ప్పుడు మీ ఫోన్ ను ఎప్పుడూ చెక్ చేసుకోకండి.
- డ్రైవింగ్ చేసేట‌ప్పుడు ఫోన్ మాట్లాడ‌కండి.
- పిల్ల‌ల ముందు ఫోన్ లో బిగ్గ‌ర‌గా మాట్లాడ‌కండి.
- పిల్లలు మీతో గ‌డుపుతున్న స‌మ‌యంలో ఫోన్ ను దూరంగా పెట్టండి.
డిజిట‌ల్ పేరెంటింగ్ పై అంద‌రూ త‌ల్లిదండ్రులు అవ‌గాహ‌న తెచ్చుకుని పిల్ల‌ల పెంప‌కంపై త‌గిన జాగ్రత్తలు వ‌హించాలి. కొంచెం స‌హ‌నం, చిన్న ప్ర‌య‌త్నం చేస్తే మీ పిల్ల‌ల‌ను సరైన విధంగా తీర్చిదిద్ద‌వ‌చ్చు. టెక్నాల‌జీ వ‌ర‌ల్డ్ లో మంచి చెడును వాళ్లకు విడ‌మ‌రిచి చెప్పేందుకు వాళ్ల‌తో స్నేహ‌పూర్వ‌కంగా, ప్రేమగా మెల‌గ‌డ‌మే మంచి ప‌ద్ధ‌తి. ఈ క్ర‌మంలో మీరు కూడా టెక్నాల‌జీ అల‌వాట్ల‌ను మార్చుకుని మీ పిల్ల‌ల‌కు మార్గ‌నిర్దేశం చేయండి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment