ఈ 5 విష‌యాలు చ‌దివితే 'ప్ర‌తీ ఫ్రెండూ అవ‌స‌ర‌మేరా' అంటారు!!
మొన్న‌నే కొత్త సంవ‌త్స‌రం వ‌చ్చిన‌ట్టు అనిపిస్తున్నా ఇప్ప‌టికే 2017 స‌గం పూర్త‌యిపోయింది. రోజులు చాలా వేగంగా గ‌డిచిపోతున్నాయి. ఈ ఆరు నెల‌ల కాలంలో ఏం సాధించారు? అంటే చాలా మంది విద్యార్ధులు ట‌క్కున స‌మాధానం కూడా చెప్ప‌లేరు. మార్చిలో వార్షిక ప‌రీక్ష‌లు పూర్త‌య్యాక చాలా మంది విద్యార్ధులు రిలాక్స్ అయిపోయి ఉంటారు. మ‌రికొంత మంది ప‌రీక్ష‌లు స‌రిగ్గా రాయ‌క‌పోయినా వ‌చ్చే మార్చి ఉందిగా అంటూ ధీమా ఒల‌క‌బోస్తారు. ఇక ప్ర‌స్తుత మ‌న టాపిక్ విష‌యానికొస్తే కాలేజీలో ఎంతో మందితో రిలేష‌న్ ను కొన‌సాగించాలి..మ‌న‌కు న‌చ్చ‌క‌పోయినా..! ఎన్నో కొత్త విష‌యాలు నేర్చుకోవాలి.. అవి క‌ష్టం అనిపించినా..! మ‌న జీవితంలో స్నేహం అనేది చాలా ముఖ్య‌మైన‌ది. మీ స్నేహితులను చూస్తే మీ వ్య‌క్తిత్వాన్ని చెప్ప‌వ‌చ్చు. స్నేహితులను సంపాదించుకునే క్ర‌మంలో విద్యార్ధులు కాలేజీలో పాటించాల్సిన కొన్ని ముఖ్యమైన విషయాలను మ‌నం చ‌ర్చించుకుందాం. జీవితంలో ఉన్న‌తిని సాధించేందుకు, త‌ర్వాత మంచి కెరీర్ రాచ‌బాట వేసుకునేందుకు మంచి స్నేహాలే రాచ‌బాట వేస్తాయి.
1. ప‌ల‌క‌రిస్తే పోయేదేం లేదు!
చాలా మంది విద్యార్ధులు అంద‌రూ త‌మ ద‌గ్గ‌ర‌కు వ‌చ్చి ప‌ల‌క‌రించి ప‌రిచ‌యం చేసుకోవాల‌ని భావిస్తారు. అది పూర్తిగా త‌ప్పు. మీరే ముందుగా చొర‌వ తీసుకుని హాయ్ చెప్పి వాళ్ల‌ను ప‌రిచ‌యం చేసుకోండి. మీరు క్లాస్ మొత్తాన్ని ప‌రిచ‌యం చేసుకోలేరు. కానీ కొంత మందినైనా ప‌ల‌క‌రిస్తే వాళ్ల‌తో మీ బంధం బ‌ల‌ప‌డుతుంది. మీకు ఎక్కువ మంది స్నేహితులు ఉండ‌టం మీ విద్యార్ధి జీవితానికి, త‌ర్వాత కెరీర్ కు చాలా ఉప‌యోగ‌ప‌డుతుంది. అదే స‌మ‌యంలో స్నేహం చేసేట‌ప్పుడు అవ‌త‌లి వ్యక్తుల వ‌ల‌న మీకు ఇబ్బందులు క‌ల‌గొచ్చు అని భావిస్తే వాళ్ల‌తో ఎక్కువ‌గా క‌లివిడిగా ఉండొద్దు. మీ అభిరుచుల‌కు, ఆసక్తుల‌కు స‌రిపోయే స్నేహితులను ఎంచుకోవ‌డం మీ తెలివితేట‌ల‌పై ఆధార‌ప‌డి ఉంటుంది. మీ మ‌న‌స్సు తెలుసుకునే స్నేహితులను సంపాదించుకోవ‌డం మీకు మానసికంగా ఉత్సాహాన్ని ఇస్తుంది.
కాలేజీ జీవితంలో మీరు క‌లుసుకునే వ్య‌క్తులు విభిన్న నేప‌థ్యాల నుంచి వ‌చ్చిన వారై ఉంటారు. అంద‌రూ మీలా ఉండాల‌ని, మీలాంటి అభిప్రాయాల‌నే వ్య‌క్త‌ప‌ర్చాల‌ని ఆశించ‌కండి. అవ‌త‌లి వ్యక్తుల వాద‌న పూర్తిగా విన‌కుండా వారిపై నిందారోప‌ణ‌లు చేయ‌కండి. 'ప్ర‌తీ ఫ్రెండ్ అవ‌స‌ర‌మేరా..!' అన్న యాడ్ లైన్ ఇక్క‌డ అతికిన‌ట్టు స‌రిపోతుంది. కొంద‌రు మీ మ‌న‌సు తెలుసుకునే స్నేహితులు కాక‌పోయినా మీకు చ‌దువులో, ఇత‌ర విష‌యాల్లో స‌హాయ‌ప‌డ‌తారు. భ‌విష్య‌త్ లో అంద‌రితోనూ అవ‌స‌రం ప‌డుతుంది. కాబ‌ట్టి ఎవ‌ర్నీ చిన్న చిన్న విష‌యాల‌కే జ‌డ్జ్ చేయ‌కుండా అంద‌రితో క‌లుపుగోలుగా ఉండండి. మ‌నం గ‌తంలో చెప్పుకున్న‌ట్టుగా ఈ కార్పోరేట్ కెరీర్ లో నెగ్గుకు రావాలంటే ఎక్కువ మంది స్నేహితులు, విస్తృత నెట్ వ‌ర్కింగ్ చాలా అవ‌స‌రం. కాబ‌ట్టి అంద‌రితోనూ గొడ‌వ‌లు పెట్టుకుని దూరం చేసుకోకుండా, మీకు న‌చ్చినా, న‌చ్చ‌కున్నా మంచి సంబంధాల‌ను మాత్రం మెయింటైన్ చేయండి.
ఎప్పుడూ చ‌దువు అని కూర్చోకుండా అప్పుడ‌ప్పుడూ సాంస్కృతిక కార్య‌క్ర‌మాలు, క్రీడ‌ల్లోనూ పాల్గొనండి. అందులో కూడా ఏదో మొక్కుబ‌డి వ్య‌వ‌హారంలా కాకుండా అందులో న‌లుగురితో నారాయ‌ణ అని కాకుండా కాస్త కొత్త‌గా ట్రై చేయండి. కొత్త నాట‌కం స్క్రిప్ట్ రాయ‌డ‌మో, పాత నాట‌కాల‌కు బ‌దులు ఏదైనా సామాజిక అంశంపై సాంస్కృతిక కార్య‌క్ర‌మాల్లో ప్ర‌స్తావించ‌డ‌మో చేయండి. ఇక క్రీడ‌లు ఆడుతుంటే ఏదో ఆడుతున్నాం అని కాకుండా ఆడుతున్నంత సేపు ఆట‌ను సీరియ‌స్ గా తీసుకుని ఆడండి. ఇది మీలో పోటీత‌త్వాన్ని పెంచుతుంది. సాంస్కృతిక కార్య‌క్ర‌మాలు, ఎన్ సీసీ, క్రీడ‌లు మీకు మంచి స్నేహితుల్ని అందిస్తాయి. మీలానే ఆలోచించే మీలాంటి అభిరుచులు ఉండే వ్య‌క్తులు అక్క‌డే మీకు తార‌స‌ప‌డ‌తారు. కాబ‌ట్టి చ‌దువుతో పాటు ఇలాంటి కార్య‌క్ర‌మాలపై కూడా దృష్టి పెడితే అది మీకు వ్య‌క్తిగ‌తంగా చాలా ఉప‌యోగ‌ప‌డుతుంది.
4. త‌ర‌గ‌తిలో జీనియ‌స్ కాక‌పోయినా ఫ‌ర్లేదు!
అదేంటి? 'త‌ర‌గ‌తి లో నెంబ‌ర్ వ‌న్ గా ఉండాల‌ని కోరుకోవ‌డంలో త‌ప్పేం లేదుగా? అని అంటారా!' అవును త‌ప్పేం లేదు కానీ త‌ర‌గ‌తిలో నెంబ‌ర్ వ‌న్ గా ఉండాల‌ని విప‌రీత‌మైన ఒత్తిడిని మోసుకుని తిరగడం, నిరాశ చెంద‌డం క‌చ్చితంగా త‌ప్పే. మీరు స్కూల్ స్థాయిలో నెంబ‌ర్ వ‌న్ కావచ్చు కానీ కాలేజీలో మీ స్థానం కొంచెం త‌గ్గొచ్చు. అంత‌మాత్రాన మీరు తెలివైన వారు కాద‌ని కాదు. ఇక్క‌డ మ‌రింత మెరుగైన విద్యార్ధులు, మెరుగైన చ‌దువు , ప‌రిస్థితులు ఉన్నాయి. ఇటువంటి స‌మ‌యంలో మీరు ప‌రివ‌ర్త‌న చెందేందుకు ప్ర‌య‌త్నాలు ప్రారంభించండి. సాధ‌న చేస్తే క‌చ్చితంగా మీరు నెంబ‌ర్ వ‌న్ అవుతారు. కానీ త‌క్ష‌ణం నేను నంబ‌ర్ వ‌న్ కావాల‌నుకోవ‌డం ఒత్తిడిని పెంచి మీ స్థానం మ‌రింత దిగ‌జారేందుకు దారితీస్తుంది. మీకు అర్ధం కాని విష‌యాన్ని ప్రొఫెస‌ర్ ను అడిగేందుకు మొహ‌మాట‌ప‌డ‌కండి. అదే విధంగా క్లాస్ లో మీ స్నేహితుల స‌హాయం కూడా తీసుకొండి. ఈ విషయంలో స్నేహితులే మీకు స‌రైన విధంగా స‌హాయ‌ప‌డ‌గ‌ల‌రు.
స్నేహితులు చాలా అవ‌స‌ర‌మే కానీ మీ ల‌క్ష్యానికి అడ్డంకిగా ఉన్న స్నేహాల‌పై ఆత్మ‌పరిశీల‌న చేసుకోండి. చాలా మంది విద్యార్ధులు కాలేజీలో మొద‌టి ఏడాది పార్టీ మూడ్ లో ఉన్న‌ట్టుగా ఉంటారు. కొత్త స్నేహితులను సంపాదించుకోవ‌డం, కాలేజీ వాతావ‌ర‌ణానికి అల‌వాటు ప‌ట‌డం, నేర్చుకోవ‌డం ఇలా క‌ళ్లు మూసి తెరిచేలోగా ఏడాది పూర్త‌యిపోతుంది. కానీ రెండో సంవ‌త్స‌రం నుంచి మాత్రం విద్యార్ధులు ల‌క్ష్య సాధ‌న‌పై అనుక్ష‌ణం అప్ర‌మ‌త్తంగా ఉండాలి. మార్కులు త‌గ్గినా, త‌ర‌గ‌తిలో వెన‌క‌డుతున్న‌ట్టు అనిపించినా వెంట‌నే న‌ష్ట నివార‌ణ చ‌ర్య‌లు చేప‌ట్టండి. మీలాంటి ల‌క్ష్యాలే ఉన్న స్నేహితుల‌తో కంబైన్డ్ స్ట‌డీస్ చేయండి. ఒక‌రికొక‌రు స‌హాయం చేసుకోండి. కాలేజీలో స‌రైన మార్కులు రాకుంటే కెరీర్ దెబ్బ‌తింటుంద‌న్న విష‌యాన్ని గుర్తించండి. మీ స్నేహితులు చ‌దువును నిర్ల‌క్ష్యం చేస్తుంటే వారిని హెచ్చ‌రించండి. స్నేహం అనేది ఎప్పుడూ చ‌దువుకు , కెరీర్ కు ఉప‌యోగ‌క‌రంగా ఉండాలి కానీ అడ్డంకిగా మార‌కూడ‌దు అన్న విష‌యాన్ని తెలుసుకోండి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment