ఎడ్యుకేషన్ లోన్ కావాలంటే మీకు తెలియాల్సిన 4 ముఖ్య విషయాలు!

    మన దేశంలో ఇప్పుడు విద్య, వైద్యం అనేవి ఖరీదైన విషయాలుగా మారిపోయాయి. ఇప్పుడు సామాన్యులకు ఎల్‌కేజీలో తమ పిల్లలను జాయిన్ చేసేటప్పటికే చెమటలు పడుతున్నాయి.  ప్రస్తుతం స్కూళ్లలో, కాలేజీలో ఉన్న ఫీజులు మధ్య తరగతి వారికి అందుబాటులో లేవన్నది తెలిసిన విషయమే. టెన్త్ వరకూ ఎలాగోలా బండి నడిపించినా ఆ తర్వాతే అసలు కథ మొదలవుతుంది. ఈ రోజుల్లో మంచి కాలేజీలో మంచి ప్రొఫెషనల్ కోర్సు చదవకుంటే ఉన్నత స్థానానికి వెళ్లడం కష్టంగా మారింది. అటువంటి మంచి కాలేజీల్లో తమ పిల్లలను చదివించాలని ఉన్నా ఆర్థిక స్తోమత లేక మధ్యతరగతి వారు ఇబ్బందులు పడుతున్నారు. అయితే విద్యా రుణంతో సామాన్యులు కూడా తమ ఉన్నత విద్య కలను సాకారం చేసుకోవచ్చు. చిన్న చిన్న జాగ్రత్తలు, కాస్త ప్రణాళిక ఉంటే విద్యా రుణం తీసుకోవడం, తిరిగి చెల్లించడం సులువవుతుంది. ఈ క్రమంలో విద్యారుణం తీసుకోవాలనుకుంటున్న విద్యార్ధులు, తల్లిదండ్రులు కొన్ని విషయాలపై తప్పనిసరిగా అవగాహన తెచ్చుకోవాలి. 

1. అన్నీ కోర్సులకు విద్యా రుణం ఇస్తారా? 

    విద్యారుణం అనేది అన్‌సెక్యూర్డ్ లోన్ గా బ్యాంక్ లు పరిగణిస్తాయి. కాబట్టి కొన్ని జాగ్రత్తలు తీసుకున్నాకే రుణాలను మంజూరు చేస్తాయి. ముఖ్యంగా ప్రభుత్వ సంస్థల గుర్తింపు ఉన్న కోర్సులకే ప్రాధాన్యతనిస్తాయి. అదే విధంగా పేరెంట్స్ తో పాటు హామీదారుని రుణ చరిత్రను కూడా పరిశీలించాక రుణం ఇస్తాయి. 

• ప్రస్తుతం ఇండియన్ బ్యాంక్ అసోసియేషన్ (ఐబీఏ) గుర్తించిన సంస్థలకే బ్యాంకులు రుణాలు ఇస్తున్నాయి. ఐబీఏ దాదాపు 1,100 సంస్థలను గుర్తించింది.  

• రుణం తీసుకునే ముందు కోర్సుకు లేదా మీరు చదివే సంస్థకు ఐబీఏ గుర్తింపు ఉందా లేదా అన్న విషయం పరిశీలించండి. 

• ఇంటర్ తర్వాత చదివే కోర్సులకు మాత్రమే ఎడ్యుకేషన్ లోన్ లభిస్తుంది. 

• కోర్సులన్నింటీకి యూజీసీ, ఏఐసీటీఈ, ఐఎంసీ వంటి ప్రభుత్వ సంస్థల నుంచి గుర్తింపు ఉండాలి. 

• పెద్ద విద్యా సంస్థల్లో చేసే కోర్సులతో పాటు ఒకేషనల్ కోర్సులు, డిప్లొమో, టీచర్, నర్సింగ్, పైలెట్ ట్రైనింగ్ కోర్సులకు విద్యా రుణం లభిస్తుంది. 

2. గరిష్ఠంగా ఎంతవరకు లోన్ వస్తుంది? హామీ ఏంటి? 

     మనకు విద్యా రుణం ఎంత వరకూ వస్తుందన్నది కోర్సు ఫీజ్, బుక్స్ , ఇతర అవసరాలపై ఆధార పడి ఉంటుంది. రుణ మొత్తాన్ని లెక్కించడంలో బ్యాంకులు వీటన్నంటిని పరిగణనలోకి తీసుకుని ఎంత మొత్తం లోన్ ఇవ్వాలనేది నిర్ణయిస్తారు. 

• ప్రస్తుతం విదేశీ విద్యకైతే గరిష్ఠంగా రూ.30 లక్షల వరకూ రుణాన్ని మంజూరు చేస్తున్నారు. కొన్ని ప్రత్యేక కోర్సులకు అంతకంటే ఎక్కువ కూడా ఇవ్వొచ్చు. 

• ఇండియాలో చదివే కోర్సులకు రూ.10 లక్షల వరకూ రుణం దొరుకుతుంది. మంచి కోర్సులైతే ఆ మొత్తాన్ని రూ.30 లక్షల వరకూ కూడా పెంచొచ్చు. 

• రుణం మొత్తాన్ని కాలిక్యులేట్ చేసేటప్పుడు కాలేజీ ఫీజ్ తో పాటు హాస్టల్ ఫీజు,  లైబ్రరీ, ల్యాబ్, పుస్తకాలు, యూనిఫాం వంటి ఖర్చులను కూడా పరిగణనలోకి తీసుకుంటారు. 

• రూ. 4లక్షల లోపు విద్యా రుణానికి బ్యాంకులు ఎటువంటి హామీ అడగవు. కొన్ని సందర్భాల్లో అడిగినా అడగొచ్చు. అదే విధంగా రూ. 4  నుంచి 7 లక్షల మధ్య రుణం తీసుకుంటే థర్డ్ పార్టీ గ్యారంటీని లేదా థర్డ్ పార్టీ హామీతో పాటు ఏదైనా ప్రాపర్టీని ష్యూరిటీగా చూపించాలి. 

3. వడ్డీ ఎంతో తెలుసా? 

   విద్యా రుణంలో అత్యంత కీలకమైనది వడ్డీ రేటే. ఈ విషయంతో విద్యార్ధులతో పాటు తల్లిదండ్రులు కూడా పూర్తిగా అవగాహన తెచ్చుకోవాలి. రాయితీలు, ఇతర విషయాలపై ఎప్పటికప్పుడు అప్‌డేట్ గా ఉంటే రుణ చెల్లింపు సులువవుతుంది. 

• ఎడ్యుకేషన్ లోన్ లో వడ్డీ అనేది మొత్తం రుణం, కాలపరిమితి, కోర్సు వంటి విషయాలపై ఆధారపడి ఉంటుంది. విద్యా రుణంపై వడ్డీ రేటు ఎప్పుడూ బ్యాంక్ బేస్ రేటు కంటే 2 నుంచి 3 శాతం అధికంగా ఉంటుంది. 

• ప్రస్తుతం దేశంలో అతిపెద్ద బ్యాంక్ అయిన స్టేట్ బ్యాంక్ ఆఫ్ ఇండియా,  రూ. 7 లక్షల లోపు రుణాలపై 10 శాతం, ఆ పైన ఉన్న రుణాలపై 10.75 శాతం వడ్డీని వసూలు చేస్తోంది. 

• అదే విధంగా అమ్మాయిలకు కొన్ని బ్యాంకులు వడ్డీలో రాయితీ ఇస్తున్నాయి. ఆ విషయాన్ని గుర్తించుకోండి. 

• ఇక పేరెంట్స్ వార్షికాదాయం రూ.4.5 లక్షల కంటే తక్కువ ఉన్నా కూడా వడ్డీపై రాయితీ వస్తుంది. 

4. ఎప్పుడు చెల్లించాలి? 

    రుణం తిరిగి చెల్లించే విష‍యంలో విద్యా రుణాలకు మిగతా రుణాలకు చాలా వ్యత్యాసం ఉంది. మిగతా లోన్స్ లా తీసుకున్న తర్వాత నెల నుంచి చెల్లింపులు జరపాల్సిన పనిలేదు. కోర్సు పూర్తయ్యాక లేదా ఉద్యోగం వచ్చిన 6 నెలల తర్వాత రుణం చెల్లించే అవకాశాన్ని బ్యాంకులు కల్పిస్తున్నాయి. 

• కోర్సు పూర్తయ్యాక ఏడాది లేదా ఉద్యోగం వచ్చిన 6 నెలల తర్వాత ఈ రెండింటిలో ఏదో ఒక ఆప్షన్ ను ఎంచుకోవాలి. 

• లోన్ ను గరిష్ఠంగా 8 సంవత్సరాల్లో తిరిగి చెల్లించాలి. 

• రుణం భారంగా మారకుండా ఉండాలంటే తీసుకున్న తొలి ఏడాది నుంచే తిరిగి చెల్లిస్తే సులువైపోతుంది. 

• సాధారణంగా కోర్సు చేస్తున్న కాలంలో సాధారణ వడ్డీని లెక్కించి దాన్ని అసలు మొత్తానికి కలుపుతారు. ఆ తర్వాత చక్రవడ్డీని కలుపుతారు. దాని ప్రకారం ఈఎంఐ ను చెల్లించాలి. 

• ప్రస్తుతం చాలా బ్యాంకులు ముందస్తు చెల్లింపులకు పెనాల్టీలు వసూలు చేయడం లేదు. లోన్ తీసుకున్న తర్వాత నుంచి రుణం తిరిగి చెల్లించడం ప్రారంభిస్తే రాయితీని కూడా ఇస్తున్నాయి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com