ఆ భ‌యాన్ని భ‌య‌పెడితేనే భ‌విష్య‌త్!
'భ‌య‌ప‌డితే చ‌చ్చిపోతాం' ..ఇది ఏదో సినిమాలో డైలాగ్ అయిన‌ప్ప‌టికీ ఈ కాలం విద్యార్ధులు క‌చ్చితంగా గుర్తుపెట్టుకోవాల్సిన మాట ఇది. భ‌యమే మ‌నిషిని పాతాళానికి తోసి ఎందుకూ ప‌నికిరాని పిరికివాడిగా మారుస్తుంది. ఇక ఈ త‌రం విద్యార్ధులకు భ‌య‌ప‌డితే అస్స‌లు మ‌నుగ‌డే ఉండ‌దు. ప‌రీక్ష‌ల్లో అయినా ఇంట‌ర్వ్యూలో అయినా కెరీర్ లో అయినా వాళ్ల‌ను కాపాడేది భ‌యాన్ని పాత‌రేసే ధైర్య‌మే. ముఖ్యంగా ఇంట‌ర్వ్యూలో భ‌య‌ప‌డితే విద్యార్ధులు ఎన్న‌టికీ ఉద్యోగం సాధించ‌లేరు. నైపుణ్యాల‌తో పాటు ధైర్యం కూడా పెంచుకున్న‌ప్పుడే విజయం సాధ్య‌మ‌వుతుంది. ఎంత‌టి తెలివైన వాడ్ని అయినా ఓడించే భ‌యాన్ని వ‌దిలించుకోవాలంటే విద్యార్ధులు కొన్ని జాగ్రత్తలు పాటించాలి.
'విష‌యం' అర్ధ‌మైతే విజయం ద‌క్కిన‌ట్టే!
చ‌దువు పూర్తిచేసి ఉద్యోగ ప్ర‌య‌త్నాలు ప్రారంభించిన విద్యార్ధికి ఇంట‌ర్వ్యూ అనేది చాలా క్లిష్ట‌మైన ప్ర‌క్రియ. సాధార‌ణంగా ఎంప్లాయ‌ర్స్ ఈమెయిల్ ద్వారా ఇంట‌ర్వ్యూ వివ‌రాల‌ను అభ్య‌ర్ధికి పంపుతారు. చాలా మంది విద్యార్ధులు ఈ మెయిల్ లో విష‌యాన్ని స‌రిగ్గా అర్ధం చేసుకోకుండా, చ‌దువ‌కుండా ఇంట‌ర్వ్యూకి రెడీ అయిపోతారు. అలా కాకుండా ఈమెయిల్ లోని విష‌యాన్ని ఒక‌టికి రెండు సార్లు క్షుణ్ణంగా చ‌దువుకుంటే ఇంట‌ర్వ్యూ విధానంపై ఒక స్పష్టత వ‌స్తుంది. ఒక వేళ అందులో అర్ధం కాని విష‌యాలుంటే రిక్రూట‌ర్ ను ఎటువంటి మొహ‌మాటం లేకుండా అడిగి తెలుసుకోవ‌డం చాలా ముఖ్యం. భ‌యాన్ని అధిగ‌మించే క్ర‌మంలో ఇది తొలిమెట్టు. ఇలా తెలుసుకోవ‌డం వ‌ల‌న ద‌శ‌ల‌వారీగా సాగే ఇంట‌ర్వ్యూలో ప్ర‌ణాళిక బ‌ద్ధంగా ఎలా స‌మాధానాలు చెప్పాలన్న‌ది దానిపై స్పష్టత వ‌స్తుంది. దీంతో పాటు తొలిసారి ఇంట‌ర్వ్యూకు వెళ్తున్న అభ్యర్ధులు కొన్ని జాగ్రత్తలు పాటిస్తే మంచిది.
- మీ రెజ్యుమెను చూడ‌కుండా ఏ సమయంలో చెప్పే విధంగా కంఠ‌తా ప‌ట్టేయండి. ఇలా చేయ‌డం వ‌ల‌న రెజ్యుమెపై సాధికార‌త వ‌స్తుంది.
- ఎప్పుడైనా రిక్రూట‌ర్ క‌ళ్ల‌లోకి సూటిగా చూస్తూ మాట్లాడ‌టం చాలా ముఖ్యం. ఐ కాంటాక్ట్ నెర‌ప‌కుండా కింద‌కో, లేక మ‌రోవైపో చూస్తూ నీకు ఆత్మ‌విశ్వాసం లేద‌ని ఎంప్లాయ‌ర్ భావిస్తాడు.
- అలాగే ఇంట‌ర్వ్యూ ముగిసింద‌ని రిక్రూట‌ర్ చెప్ప‌గానే లేచి ఒక చిరునవ్వు న‌వ్వ‌డం మ‌ర్చిపోవ‌ద్దు.
- మంచి ఆత్మ‌విశ్వాసం ఉండాలే కానీ ఇంట‌ర్వ్యూ చేస్తున్న రిక్రూట‌ర్ ద‌గ్గ‌ర నుంచి కూడా కంపెనీ వివ‌రాలు రాబ‌ట్టవ‌చ్చు. కంపెనీ వివ‌రాల‌ను అడ‌గ‌టం వ‌ల‌న రిక్రూట‌ర్ కు అభ్య‌ర్ధి ధైర్యం, సాధికారిత‌పై గురి కుదురుతుంది.
- ఇంట‌ర్వ్యూ అంటే ఎప్పుడూ భ‌య‌ప‌డ‌కూడ‌దు. ఒకవేళ విఫ‌ల‌మైతే ఉద్యోగం రాదు అంతే క‌దా? అంత‌కు మించి పెద్ద ప్ర‌మాద‌మేమీ జ‌ర‌గ‌దు క‌దా? ఈ అనుభ‌వం త‌ర్వాతి ఇంట‌ర్వ్యూలో ఉప‌యోగ‌ప‌డుతుంది. ఇక్క‌డ చేసిన త‌ప్పులు అక్క‌డ చేయ‌కూడ‌దు. ఇలాంటి సానుకూల ఆలోచ‌న‌లు చేయాలి.
- అలాగే ఇంట‌ర్వ్యూ జ‌రిగే ప్ర‌దేశానికి ఒక పావు గంట ముందు ఉంటే చాలా మంచిది. ప‌క్కా ప్రణాళికతో ముందుగా వ‌చ్చిన అభ్య‌ర్ధుల‌ను రిక్రూట‌ర్ క‌చ్చితంగా గ‌మ‌నిస్తాడు.
- అన్నింటికంటే చాలా ముఖ్యమైన విష‌యం చ‌క్క‌ని చిరునవ్వు. ఇంట‌ర్వ్యూ గ‌దిలోకి వెళ్ల‌గానే అక్క‌డ ఉన్న‌వారిని చూసి ఒక చిరునవ్వు న‌వ్వితే మీరు ఎటువంటి ఆందోళ‌న‌లో లేర‌ని, మీకు ఇంట‌ర్వ్యూ అంటే భ‌యం లేద‌ని రిక్రూట‌ర్స్ భావిస్తారు. ఇది అభ్యర్ధులు క‌చ్చితంగా గుర్తుపెట్టుకోవాలి.
చాలా మంది అభ్య‌ర్ధులకు ఇంట‌ర్వ్యూ అన‌గానే ఎక్క‌డ‌లేని భ‌యం ముంచుకొస్తుంది. పెరిగిన వాతావ‌ర‌ణం, మ‌న‌స్త‌త్వం ఆధారంగా ఈ ప‌రిస్థితి ఏర్ప‌డుతుంది. అయితే దీన్ని అధిగ‌మించేందుకు గ‌ట్టి ప్ర‌య‌త్న‌మే చేయాలి. భ‌యంతో చెమ‌ట‌లు ప‌ట్ట‌డం, ఆందోళ‌న‌కు గురికావ‌డం వ‌ల‌న అభ్య‌ర్ధి స‌రిగ్గా ఆలోచించ‌లేడు. ఇంకా మ‌రింత ఆందోళ‌న చెందితే క‌ళ్లు తిరగడం, వాంతులు కావ‌డం వంటివి కూడా జ‌రగ‌వచ్చు. కాబ‌ట్టి అభ్యర్ధులు భ‌యాన్ని వదిలిపెట్టి స్వేచ్ఛ‌గా ఇంట‌ర్వ్యూను ఎదుర్కోవాలి. మ‌నం పైన చెప్పుకున్న‌ట్టు ఇంట‌ర్వ్యూలో విఫ‌ల‌మైతే ప్ర‌పంచం మునిగిపోదు. ఇంత‌కంటే ఎన్నో మంచి అవ‌కాశాలు మ‌న కోసం వేచి ఉన్నాయ‌ని న‌మ్మాలి.
ప‌క్కా ప్రణాళికతో భ‌యాన్ని త‌రిమికొట్టండి!
విద్యార్ధులు త‌మ బ‌లాలు, బ‌ల‌హీన‌త‌ల‌పై ముందుగానే ఒక అవ‌గాహ‌న‌కు రావాలి. బ‌ల‌హీన‌త‌ల‌ను త‌గ్గించుకొని, బ‌లాల‌ను మ‌రింత పెంచుకోవాలి. ఇలా చేయ‌డం వ‌ల‌న ఆత్మ‌విశ్వాసం పెరుగుతుంది. ఆత్మ‌విశ్వాసమే భ‌యాన్ని పార‌ద్రోలేందుకు తొలి ఆయుధం. ఈ విష‌యంలో ఏమైనా సందేహాలు ఉంటే నిపుణుల స‌ల‌హాలు తీసుకుంటే మంచిది. దీంతో పాటు బ్రీతింగ్ టెక్నిక్ కూడా భ‌యాన్ని తొలిగించేందుకు ఉప‌యోగప‌డుతుంద‌ని అధ్య‌య‌నాలు చెపుతున్నాయి. ఇంట‌ర్వ్యూకు ముందు దొరికే సమయంలో ఊపిరిని గ‌ట్టిగా పీల్చి వ‌ద‌ల‌డం చేస్తే భ‌యాన్ని పొగొట్టుకోవ‌చ్చు. ఈ జాగ్రత్తలు అన్నీ తీసుకుని ఇంట‌ర్వ్యూకు వెళితే మిమ్మ‌ల్ని క‌చ్చితంగా విజయం వ‌రిస్తుంది.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment