మీకు ఎందుకు ఉద్యోగం రాలేదో తెలుసా?

     ఇది పోటీ ప్ర‌పంచం. అది వ్యాపార‌మైనా, ఉద్యోగ‌మైనా ఉన్న ఒక్క అవ‌కాశం కోసం వేలాది మంది పోటీప‌డుతున్నారు. ఇటువంటి ప‌రిస్థితుల్లో విద్యార్ధులు స‌రైన ప్ర‌ణాళిక అంత‌కు మించిన ప‌ట్టుద‌ల ఉంటేనే కానీ ఇంట‌ర్వ్యూలో విజయం సాధించ‌డం కుదర‌దు. ఇంట‌ర్వ్యూలో ఏం ప్ర‌శ్న‌లు అడుగుతారో ముందుగా తెలియ‌న‌ప్ప‌టికీ, కొన్ని జాగ్ర‌త్త‌లు తీసుకుంటే ఎంప్లాయ‌ర్స్ ను మెప్పించ‌వ‌చ్చు. ముఖ్యంగా ఇంట‌ర్వ్యూ అధికారులు అభ్య‌ర్ధుల నుంచి ఏమి ఆశిస్తున్నారో తెలుసుకుంటే స‌గం విజ‌యం సాధించ‌న‌ట్టే. వాళ్లు ఏమి కోరుకుంటున్నారో తెలుసుకోవ‌డం వ‌ల‌న తిర‌స్క‌రించ‌బ‌డే అవ‌కాశాలు త‌గ్గుతాయి. అభ్య‌ర్ధులు ఉద్యోగం ఆశించిన‌ట్టే ఎంప్లాయ‌ర్స్ మంచి ఉద్యోగుల‌ను కోరుకుంటారు.  అభ్య‌ర్ధుల వ్య‌వ‌హార శైలి, ఆహార్యంతో పాటు స‌మాధానాలు చెప్పే విధానాన్ని కూడా ప‌రిగ‌ణ‌న‌లోకి తీసుకుంటూనే ఎంప్లాయ‌ర్స్ ఆలోచించే విధానం ఈ విధంగా ఉండవ‌చ్చు. 

• అభ్య‌ర్ధులు నిజాయితీతో పాటు వారు ఉద్యోగం చేయాల్సిన అవ‌స‌రం క‌లిగిన వారా? కాదా?

• అభ్య‌ర్ధులు మ‌రే ఇత‌ర ఉద్యోగం చేస్తూ కేవ‌లం ఇంట‌ర్వ్యూ అనుభ‌వం కోసం ఇక్క‌డకు వ‌చ్చారా? 

• స్ప‌ష్ట‌మైన ల‌క్ష్యం లేకుండా ఏదో ఉద్యోగం చేయాలి కాబ‌ట్టి, త‌ప్ప‌నిస‌రి ప‌రిస్థితుల్లో వ‌చ్చారా? 

• అభ్య‌ర్ధులు మంచి ఉద్యోగం చేస్తూ, ఇత‌ర కంపెనీల అధికార్ల‌ను అంచ‌నా వేయడానికి, స్థాయిని త‌గ్గించే చ‌ర్య‌ల్లో ఇక్క‌డ‌కు వ‌చ్చారా? 

'తిర‌స్క‌ర‌ణ‌'కు ఎన్నో కార‌ణాలు! 

            ఇన్ని ర‌కాలుగా ఆలోచించే ఇంట‌ర్వ్యూ అధికార్లు, అలాంటి వారి నుండి త‌మ‌కు అవ‌స‌ర‌మైన అభ్య‌ర్ధుల‌ను వడ‌పోసే క్ర‌మంలో చాలా మంది అభ్య‌ర్ధుల‌ను తిర‌స్క‌రిస్తూ ఉంటారు. ఇలా తిరస్కారానికి గురిచేసే కార‌ణాలు చాలా ఉంటాయి. త‌మ కంపెనీలో చేర‌బోయే అభ్య‌ర్ధి ఉద్యోగం చేయ‌గ‌ల‌డా? లేదా?చేయ‌డానికి స‌రిపోయే నైపుణ్యాలు ఉన్నాయా లేదా? స‌్వ‌యం ప్రేరితుడా? కాదా? ఈ ఉద్యోగ‌మే ఎందుకు చేయాల‌నుకుంటున్నాడు? ఎంత కాలం కొన‌సాగ గ‌లుగుతాడు. ఈ విధంగా ఆలోచించి అభ్య‌ర్ధుల‌ను వ‌డ‌పోస్తారు. ఈ వ‌డ‌పోత‌లో అభ్య‌ర్ధుల‌ను వేరు చేసేందుకు లేదా తిర‌స్క‌రించేందుకు ప‌లు కార‌ణాలు ఉండ‌వ‌చ్చు.

• స్వాభ‌విక నైజం ప్ర‌ద‌ర్శించే విధానం చాలా పేల‌వంగా ఉండ‌టం

• మ‌ర్యాద‌, మ‌న్న‌న‌లు ప్ర‌ద‌ర్శించ‌క‌పోవ‌డం 

• ఉద్యోగంలో ఉన్న‌త స్థానాల కంటే డ‌బ్బు, జీతం, ఇంక్రిమెంట్లకే ప్రాధాన్య‌త ఇచ్చేటట్లు క‌నిపించ‌డం 

• త‌న కెరీర్ అవ‌స‌రాల‌ను త‌నే స‌రిగ్గా గుర్తించ‌లేక అయోమ‌యంలో క‌న్పించ‌డం

• నాణ్య‌త లేని భాష‌, ప్ర‌వ‌ర్త‌న‌తో పాటు అత్యాశ‌తో ఉన్న‌ట్టు ప్ర‌వ‌ర్తించ‌డం

• అప‌రిప‌క్వ ఆలోచ‌నా స‌ర‌ళి ఉన్న‌ట్టు అధికార్ల దృష్టిలో ప‌డ‌టం

• స‌రైన కుటుంబ సంబంధాలు లేకుండా, వైవాహిక జీవితం కుంటుప‌డ‌టం కూడా కావొచ్చు 

• వ్య‌వ‌స్థ, సామాజిక ప‌ద్ధ‌తులు ప‌ట్ల తృణీక‌ర భావాన్ని ప్ర‌ద‌ర్శించ‌డం 

• త‌ప్పించుకునే ధోర‌ణితో పాటు, బాధ్య‌తా రాహిత్యం, ఇత‌రుల‌పై నెపం వేసే దిశ‌గా స‌మాచారం ఇస్తున్న‌ట్టు క‌న్పించ‌డం.

• అస్ప‌ష్ట‌మైన విధానాన్ని క‌లిగి ఉండి అధికార్ల‌ను అయోమ‌యానికి గురిచేస్తున్న‌ట్టు వ్య‌వ‌హ‌రించ‌డం .

         ఇటువంటి కార‌ణాలే అని క‌చ్చితంగా చెప్ప‌లేం కానీ వేలాది మంది అభ్య‌ర్ధులు ఇచ్చిన స‌మాధానాల‌ను అనుస‌రించి వీటిని విశ్లేషించ‌డం జ‌రిగింది. కాబ‌ట్టి ఈ విధంగా వ్య‌వ‌హ‌రించ‌కుండా త‌గిన జాగ్ర‌త్త‌లు తీసుకుంటే ఇంట‌ర్వ్యూలో తిర‌స్క‌ర‌ణ‌కు గురికాకుండా, విజ‌యం సాధించేందుకు అవ‌కాశం ఉంటుంది. 

ఈ 'ప్ర‌శ్న‌'కు స‌మాధానం చాలా క‌ష్టం! 

       
      ఇక వీటితో పాటు ఎంప్లాయ‌ర్స్ అభ్య‌ర్ధుల‌ను ఎక్కువ‌గా అడిగే ప్ర‌శ్న ఒక‌టుంది. ఇది చాలా క‌ఠిన‌త‌ర‌మైన ప్ర‌శ్న‌. ఆ ప్ర‌శ్న ఏంటంటే గ‌తంలో చేసిన ఉద్యోగాన్ని ఎందుకు వ‌దిలేసారు?  ఈ క‌ష్ట‌త‌ర‌మైన ప్ర‌శ్న‌కు స‌రైన విధంంగా స‌మాధానం చెప్ప‌కుంటే ఉద్యోగం సాధించ‌డం దుర్ల‌భం. ధైర్యంగా చెప్పేందుకు ప్రిపేర్ అయిన‌ప్ప‌టికీ ఈ ప్ర‌శ్న ఎదుర‌వ‌గానే చాలా మంది అభ్య‌ర్ధులు త‌డ‌బాటుకు గుర‌వుతారు. అయితే ఈ పిడుగు లాంటి ప్ర‌శ్న‌కు కాస్త స‌మ‌స్ఫూర్తితో, విభిన్నంగా స‌మాధానాలు చెప్పి గండం నుంచి గ‌ట్టెక్క‌వ‌చ్చ‌ని నిపుణులు చెపుతున్నారు. 

• పాత కంపెనీలో చాలా అనుభ‌వం గ‌డించాను. ఇక అక్క‌డ నేర్చుకునేందుకు ఏమీ మిగ‌ల్లేదు. కొత్త ఛాలెంజింగ్ కెరీర్ కోసం మీ కంపెనీ ఇంట‌ర్వ్యూకు వ‌చ్చాను. 

• నేను గ‌తంలో ప‌నిచేసిన కంపెనీలో చాలా క‌ష్ట‌ప‌డ్డాను. కెరీర్ ప‌రంగా ఉన్న‌తంగా  ఎద‌క‌లేక‌పోయినా వాళ్లు అప్ప‌గించిన ప‌నుల్ని పూర్తిచేసాను. ప్ర‌స్తుతం కొత్త కెరీర్ ను ప్రారంబించాల‌నుకుంటున్నాను.

• నేను ప‌నిచేసిన కంపెనీ విధానాలు నా స్వ‌భావానికి స‌రిపోవ‌డం లేదు. అందులో ప‌నిచేయ‌డం ఇష్టం లేక మీ కంపెనీని సంప్ర‌దించాను. 

• నాకు కొత్త విష‌యాలు నేర్చుకోవడం అంటే చాలా ఇష్టం. అలాగే చేసిన ప‌నికి త‌గిన గుర్తింపు ద‌క్కాల‌ని కోరుకుంటాను. నా పాత కంపెనీలో అవేమీ నాకు ల‌భించ‌లేదు. 

• నేను గ‌తంలో ప‌నిచేసిన కంపెనీలో ఎన్నో ఘ‌న‌త‌లు సాధించాను. ఇక అక్క‌డ సాధించేందుకు ఏమీ మిగ‌ల్లేదు. అందుకే మీ కంపెనీని సంప్ర‌దించాను. 

• నా పాత కంపెనీ ప్రారంభం నుంచి అందులో ఉన్నాను. ఆ కంపెనీ అభివృద్ధి ఎంత‌గానే శ్ర‌మించాను. ఇప్పుడు కొత్త ప‌ని అనుభ‌వం కోసం మీ కంపెనీలో చేరాల‌నుకుంటున్నాను. 

• నేను ఇప్ప‌టివ‌ర‌కూ ప‌నిచేసిన కంపెనీల్లో మీ కంపెనీ చాలా పెద్ద‌ది. ఇక్క‌డ ప‌నిచేస్తే నాకు కెరీర్ ప‌రంగా ఉప‌యోగ‌ప‌డుతుంద‌ని అనుకుంటున్నాను. 

            ఇలా చాలా తెలివిగా, ఎవ‌ర్నీ తీవ్రంగా విమ‌ర్శించ‌కుండా  స‌మాధానం చెప్పిన‌ప్పుడు ఎంప్లాయ‌ర్స్ మీ స‌మాధానం ప‌ట్ల సంతృప్తి చెందుతారు. అలా కాకుండా మీరు వాళ్ల ప్ర‌శ్న‌కు త‌డ‌బ‌డినట్టు గ్ర‌హిస్తే మిమ్మ‌ల్ని సందేహ‌పు అభ్య‌ర్ధిగా జ‌మ‌క‌ట్టి  తిర‌స్క‌రించే అవ‌కాశం ఉంది. కాబ‌ట్టి ఇంట‌ర్వ్యూకు వెళ్లేముందు అభ్య‌ర్ధులు మ‌నం చెప్పుకున్న జాగ్ర‌త్తలు  అన్నీ తీసుకుని, విశ్వాసంతో వ్య‌వ‌హ‌రిస్తే విజయం మీ సొంత‌మైన‌ట్టే. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com