విదేశాల్లో చ‌ద‌వాల‌నుకుంటే ముందు ఈ 'స్టోరీ' త‌ప్ప‌క చ‌ద‌వండి!!

       డ‌బ్బు వినిమ‌యం, వినియోగం గూర్చి మ‌నం చిన్న‌ప్పుడే అమ్మ‌మ్మ‌, తాత‌య్య‌, అమ్మ ద‌గ్గర నుంచి నేర్చుకుంటాం. పోపుల పెట్టెలో ఉన్న  చిల్ల‌ర డ‌బ్బుల‌ను అవ‌స‌ర‌మైన ప‌ని కోసం  ఎలా ఉప‌యోగించాలో ఇంట్లో అమ్మే మ‌న‌కు నేర్పిస్తుంది. అదే విధంగా విలువైన డ‌బ్బును మ‌న విదేశీ చ‌దువు  కోసం ఎంత బాగా వాడుకున్నామన్న‌దానిపై మ‌నం విజ‌యం ఆధార ప‌డి ఉంటుంది. ఇటీవ‌లి కాలంలో కొన్ని ఇబ్బందులు ఎదురైనా విదేశాల్లో చ‌ద‌వాల‌నుకుంటున్న విద్యార్ధుల సంఖ్య మ‌న దేశంలో తక్కువేం కాదు. విద్యా భోధ‌న‌లో నాణ్య‌త‌, అవ‌కాశాలకు కొదువ లేక‌పోవ‌డంతో చాలా మంది విదేశీ విద్య‌కు మొగ్గుచూపుతున్నారు. వ‌ల‌స విధానంపై అమెరికా అధ్య‌క్షుడు ట్రంప్ చేసిన ప్ర‌క‌ట‌న‌ల త‌ర్వాత కొంత అయోమ‌యం నెల‌కొన్నా ఇప్ప‌టికీ విద్యార్ధులు అగ్ర‌శ్రేణి యూనివ‌ర్సిటీల్లో అడ్మిష‌న్ల కోసం వ‌రుస క‌డుతున్నారు. ట్రంప్ ప్ర‌భావంతో అమెరికాలో చ‌ద‌వాల‌నుకుంటున్న విద్యార్ధుల సంఖ్య కాస్త‌ త‌గ్గినా కెన‌డా, బ్రిట‌న్, ఆస్ట్రేలియా లాంటి దేశాలు వారికి స్వాగ‌తం ప‌లుకుతున్నాయి. అయితే విదేశాల్లో చ‌ద‌వాల‌నుకుంటున్న విద్యార్ధులు కొన్ని విష‌యాల‌ను జాగ్ర‌త్త‌గా గ‌మ‌నించాలి. ముఖ్యంగా పాస్‌పోర్ట్ , వీసా అంశాల‌తో పాటు డ‌బ్బు లావాదేవీలైన‌ ఫారెక్స్ సంబంధిత అంశాలపై అవ‌గాహ‌న తెచ్చుకుంటే విదేశీ విద్య‌కు మార్గం సుగ‌మ‌మ‌వుతుంది.

ప్రాథ‌మిక విష‌యాల‌పై అవ‌గాహ‌న ముఖ్యం

      విదేశాల్లో చ‌ద‌వాల‌ని నిర్ణ‌యం తీసుకున్న త‌ర్వాత విద్యార్ధి కొన్ని విష‌యాల‌ను త‌ప్ప‌నిస‌రిగా తెలుసుకోవాలి. త‌ల్లిదండ్రులు, ఇత‌రులు స‌హాయం చేసినా స్వంతంగా అవ‌గాహ‌న పెంచుకోవ‌డం త‌ప్ప‌నిస‌రి. ఎందుకంటే ఇక్క‌డ స‌హాయం చేసేందుకు అంద‌రూ ఉండొచ్చు. కానీ దేశం కాని దేశంలో ఒంట‌రిగా చ‌దువుకుంటూ ప‌రిస్థితుల‌కు త‌గ్గ‌ట్టు వ్య‌వ‌హ‌రించాల్సి ఉంటుంది. కాబ‌ట్టి విద్యార్ధులు ప్ర‌తీ విష‌యాన్నీ కూలంకుషంగా అర్ధం చేసుకోవాలి. ప్ర‌తీ విష‌యంపై అవగాహ‌న తెచ్చుకోవ‌డం, భ‌విష్య‌త్ లో ధైర్యాన్ని ఇస్తుంది.

• ఏ దేశంలో చ‌ద‌వాల‌న్న‌ది నిర్ణ‌యించుకున్న త‌ర్వాత ఎంపిక చేసుకుని  క‌నీసం 5 యూనివ‌ర్సిటీల‌కు ద‌ర‌ఖాస్తు చేసుకుంటే మంచిది. కొన్ని యూనివ‌ర్సిటీలు ద‌ర‌ఖాస్తు రుసుము తీసుకుంటాయి. కొన్ని ఎటువంటి రుసుము వ‌సూలు చేయ‌వు. ద‌ర‌ఖాస్తు ఫీజు ఉన్న యూనివ‌ర్సిటీకి ఆన్‌లైన్ ట్రాన్స్‌ఫ‌ర్ ద్వారా డ‌బ్బులు చెల్లించాలి.

• ద‌ర‌ఖాస్తును అంగీక‌రించిన త‌ర్వాత కొన్ని యూనివ‌ర్సిటీలు ఎన్‌రోల్‌మెంట్ ఫీజును కూడా చెల్లించ‌మ‌ని కోరుతాయి. ఎన్‌రోల్‌మెంట్ ఫీజును కూడా ఆన్‌లైన్ ట్రాన్స్‌ఫ‌ర్ ద్వారా చెల్లించ‌వ‌చ్చు.

• యూనివ‌ర్సిటీ నుంచి మీకు ఆఫ‌ర్ లెట‌ర్ వ‌చ్చాక వీసాపై దృష్టి పెట్టాలి. వీసా జారీ అయ్యాక ట్యూష‌న్ ఫీజు చెల్లించాల్సి ఉంటుంది. కొన్ని యూనివ‌ర్సిటీల్లో స‌గం ట్యూష‌న్ ఫీజును వీసా జారీ అయ్యాక చెల్లించి, మిగ‌తా మొత్తం యూనివ‌ర్సిటీలో జాయిన్ అయ్యాక వ్య‌క్తిగ‌తంగా చెల్లించేందుకు అవ‌కాశం క‌ల్పిస్తాయి. ట్యూష‌న్ ఫీజును ముందుగా చెల్లిస్తే ఆన్‌లైన్ ట్రాన్స్‌ఫ‌ర్ మంచి ప‌ద్ధ‌తి, అలాకాకుండా వ్య‌క్తిగ‌తంగా చెల్లిస్తే క‌నుక ఫారెక్స్ కార్డ్ చెల్లింపు స‌రైన ఆఫ్ష‌న్.

• విదేశీ యూనివ‌ర్సిటీలో జాయిన్ అయ్యాక మీ రోజువారీ ఖ‌ర్చులు, నివాస ఖ‌ర్చుల‌కు ఫారెక్స్ కార్డు అనేది స‌రైన ఎంపిక‌. ఎందుకంటే ఆన్‌లైన్ ట్రాన్స్‌ఫ‌ర్ కంటే దీని ఖ‌ర్చు త‌క్కువ‌. పైగా ఎప్పుడు కావాలంటే అప్పుడు మ‌నీని లోడ్ చేసుకోవ‌చ్చు.

విద్యార్ధి ఎంత డ‌బ్బు క‌లిగి ఉండొచ్చు?

      విద్యార్ధికి అన్‌లైన్ ద్వారా లేదా ఫారెక్స్ కార్డు ద్వారా పంపే మొత్తం ఒక ఆర్ధిక సంవ‌త్స‌రంలో  2,50,000 డాల‌ర్ల‌కు మించ‌కూడ‌దు. ఈ మొత్తంలోనే యూనివ‌ర్సీటీ ట్యూష‌న్ ఫీజులు, రోజువారీ ఖ‌ర్చులు, జీవ‌న వ్య‌యం అన్నీ ఖ‌ర్చు చేయాల్సి ఉంటుంది. ఒక‌వేళ మీ యూనివ‌ర్సిటీ ట్యూష‌న్ ఫీజు ఈ మొత్తం కంటే ఎక్కువ‌గా ఉంటే ఆ ఫీజ్ స్లిప్ ల‌ను సంబంధిత అధికారుల‌కు స‌మ‌ర్పించాల్సి ఉంటుంది. లేకుంటే నిబంధనలను అతిక్ర‌మించినందుకు ఇబ్బందులను ఎదుర్కోనే ప్ర‌మాదం ఉంది. ఫారెక్స్ కు సంబంధించిన విష‌యాల‌పై అవ‌గాహ‌న పెంచుకోకుంటే త‌ర్వాత ఇబ్బందులు ప‌డాల్సి రావ‌చ్చు. కాబ‌ట్టి ఈ విష‌యాల‌పై ఎప్ప‌టిక‌ప్పుడు అప్‌డేట్ గా ఉండాలి.

వైర్ ట్రాన్స్‌ఫ‌ర్స్ అంటే ఏమిటి?  

     కొత్త ప‌ద్ధ‌తులు వ‌చ్చినా ఇప్ప‌టికీ వైర్ ట్రాన్స్‌ఫ‌ర్ నే చాలామంది విదేశాల‌కు డ‌బ్బు పంపించేందుకు ఉప‌యోగిస్తున్నారు. సోసైటీ ఫ‌ర్ వ‌ర‌ల్డ్ వైడ్ ఇంట‌ర్ బ్యాంక్ ఫైనాన్సియ‌ల్ టెలీ క‌మ్యూనికేష‌న్ ( స్విప్ట్ ) ప్లాట్‌ఫామ్ ద్వారా వైర్ మ‌నీ ట్రాన్స్‌ఫ‌ర్ జ‌రుగుతుంది. ఈ ప‌ద్ధ‌తి ద్వారా డ‌బ్బు పంపేందుకు, ఇటు డ‌బ్బు పంపేవాళ్ల‌కు అటు డ‌బ్బు తీసుకునేవాళ్ల‌కు ఇద్ద‌రికీ బ్యాంక్ ఖాతా ఉండాల్సిందే. ఈ విధానంలో డ‌బ్బు పంపిన బ్యాంక్ తో పాటు డ‌బ్బు రిసీవ్ చేసుకున్న బ్యాంక్ కూడా ఛార్జీలు వ‌సూలు చేస్తాయి. ఉదాహ‌ర‌ణ‌కు విదేశాల్లో ఉన్న విద్యార్ధికి 10 వేల డాల‌ర్ల‌ను పంపితే ఇక్క‌డ బ్యాంక్ రూ. 250 నుంచి రూ.2,500 వ‌ర‌కూ ఛార్జీలు వ‌సూలు చేస్తుంది. ఇక విదేశాల్లోని బ్యాంక్ బెన్ ఛార్జీలు కింద 13 నుంచి 15 డాలర్ల వ‌ర‌కూ వ‌సూలు చేస్తుంది.

ఫారెక్స్ కార్డ్స్ ఎలా ప‌నిచేస్తాయి?

      ఇక ఫారెక్స్ కార్డ్స్ ను ఇండియాలో ఇక్క‌డి క‌రెన్సీతో లోడ్ చేసుకోవ‌చ్చు. ఇవి ప్రీ పెయిడ్ కార్డ్స్ గా ప‌నిచేస్తాయి. నియ‌మిత ఛార్జీలు చెల్లిస్తే ఇక్క‌డి క‌రెన్సీ , ఫారెక్స్ కార్డ్ లో విదేశీ క‌రెన్సీగా వాడుకోవ‌చ్చు. అక్క‌డి ఏటీఎం ల‌లో డ‌బ్బును డ్రా చేసుకునేందుకు, ఆన్‌లైన్ లావాదేవీలు జ‌రిపేందుకు, కొనుగోళ్లు జ‌రిపేందుకు ఫారెక్స్ కార్డ్ చాలా ఉప‌యోగ‌క‌రంగా ఉంటుంది. ఇష్యూ ఛార్జీలు అనేవి బ్యాంకుల‌ను బ‌ట్టి ఆధార‌ప‌డి ఉంటాయి. మిగ‌తా క్రెడిట్ కార్డ్స్ , డెబిట్ కార్డ్స్ తో పోల్చుకుంటే విదేశాల్లో ఫారెక్స్  కార్డ్స్ విద్యార్ధుల‌కు బాగా ఉప‌యోగ‌ప‌డ‌తాయి.

స‌మ‌గ్ర స‌మ‌చార సేక‌ర‌ణే మిమ్మ‌ల్ని కాపాడుతుంది!

     విదేశాల్లో చ‌ద‌వాల‌నుకునే విద్యార్ధులు ఎన్నో విష‌యాల‌ను స‌మ‌గ్రంగా ప‌రిశీలించాల్సి ఉంటుంది. యూనివ‌ర్సిటీ చ‌రిత్ర‌, గుర్తింపు త‌దిత‌ర విష‌యాల‌ను ప‌రిశీలించాకే అక్క‌డ చేరేందుకు సిద్ధ‌మ‌వ్వాలి. అదే విధంగా ఎక్క‌డ చ‌ద‌వాల‌నుకుంటున్నారో ఆ దేశ చ‌ట్టాలు, ప్ర‌జ‌ల జీవన విధానంపై కూడా అన్ని విష‌యాలు తెలుసుకుని త‌గిన నిర్ణ‌యం తీసుకోవాలి. ఇక మ‌నం చెప్పుకున్న‌ట్టు వీసా అంశాలు, డ‌బ్బుకు సంబంధించిన ప్రాథ‌మిక అంశాల‌పై ప‌ట్టు ఉంటే ఎటువంటి ఇబ్బంది లేకుండా చ‌దువు సాగుతుంది. లేకుంటే దేశం కాని దేశంలో ఇబ్బందులు ఎదుర్కోవాల్సి రావ‌చ్చు.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com