బుల్స్, బేర్స్ తో షం'షేర్' చేయండి!!

     వేగంగా అభివృద్ధి చెందుతూ ప్రపంచంలోనే అతిపెద్ద ఆర్ధిక వ్యవస్థల్లో ఒకటిగా నిలుస్తోంది ఇండియా. మన దేశం సాధిస్తున్న ఈ ఆర్థిక పురోగతిలో స్టాక్ మార్కెట్ల ది కీలక పాత్ర. దేశీయ మదుపుదార్లతో పాటు విదేశీ ఇన్వెస్టర్లు కూడా స్టాక్ మార్కెట్ల ద్వారా మన కంపెనీల్లో భారీ పెట్టుబడులు పెడుతున్నారు. దీంతో ప్రస్తుతం మన స్టాక్ మార్కెట్లు రాకెట్ వేగంతో దూసుకుపోతున్నాయి. ఈ పరిణామం విద్యార్ధులకు సరికొత్త కెరీర్ అవకాశాలను కల్పిస్తోంది. స్టాక్ మార్కెట్ నిపుణులు, స్టాక్ బ్రోకర్లకు  మంచి డిమాండ్ ఏర్పడటంతో సరికొత్త కోర్సులు రంగప్రవేశం చేస్తున్నాయి. ఎకానమీ, స్టాక్ ఎక్చ్సేంజీ, కరెన్సీ, బులియన్ ఇలాంటి విషయాలపై ఆసక్తి, అభిరుచి ఉండాలే కానీ  ఈ కెరీర్ లో సరికొత్త ఎత్తులకు చేరుకోవచ్చు. ఉద్యోగంతో పాటు ఎంటర్‌ప్రెన్యూర్ గా కూడా ఎదిగే అవకాశాలున్న ఈ కెరీర్ పై ఓ లుక్కేద్దామా..

ఆసక్తే 'ఇక్కడ' చాలా కీలకం!

        విదేశాలతో పోల్చుకుంటే మనదేశంలో స్టాక్ మార్కెట్లు, షేర్ల కొనుగోళ్లు, మార్కెట్  పెట్టుబడులపై అవగాహన కాస్త తక్కువే అని చెప్పాలి. ఇంకా చెప్పాలంటే మన స్టాక్ మార్కెట్ల ప్రస్థానం ఇంకా శైశవ దశలోనే ఉంది. ప్రజలు ఇప్పటికీ సంప్రదాయ పెట్టుబడులపై తప్ప స్టాక్ మార్కెట్ పెట్టుబడులపై దృష్టి సారించడం లేదు. 125 కోట్ల జనాభా ఉన్న ఇండియాలో రానున్న రోజుల్లో మార్కెట్ ఆధారిత పెట్టుబడులు భారీగా పెరగనున్నాయని సర్వేలు చెపుతున్నాయి. ఈ నేపథ్యంలో స్టాక్ మార్కెట్ కెరీర్ లకు కూడా మంచి భవిష్యత్ ఉంది. ప్రారంభంలో కాస్త కష్టపడాలే కానీ ఈ రంగంలో మంచి ఉన్నత స్థితికి చేరుకోవచ్చు. అయితే నిరంతర ఆసక్తి , నేర్చుకోవాలన్న తపన తప్పనిసరిగా ఉండాల్సిందే. లేకుంటే ఇక్కడ రాణించడం కష్టం. ప్రతీ రోజూ విషయాలపై అప్ డేట్ అవుతూనే ఉండాలి. నాకు అన్నీ తెలుసు, నేను కాస్త రిలాక్స్ కావచ్చు అనుకునే వాళ్లకు ఈ రంగం సరిపడదు. 

దిశానిర్దేశమే మీ 'దశ'ను మారుస్తుంది!

       ప్రస్తుతం స్టాక్ మార్కెట్లలో బ్రోకర్లకు విపరీతమైన డిమాండ్ ఏర్పడుతోంది. షేర్ల కొనుగోళ్లు , అమ్మకాలు, బాండ్లు, బులియన్, కరెన్సీ ఇలా అన్ని క్రయ విక్రయాల్లోనూ స్టాక్ బ్రోకర్లదే ప్రధాన పాత్ర. వ్యక్తులకు, సంస్థలకు సంబంధించిన మార్కెట్ లావాదేవీల్లో స్టాక్ బ్రోకర్,  డీలర్, అడ్వైజర్, అనలిస్గ్ ఇలా వివిధ దశల్లో పనిచేయాల్సి ఉంటుంది. పనితీరు, అనుభవం ఆధారంగా గుర్తింపు, వేతనం పెరుగుతూ ఉంటాయి. పొదుపు కాస్త వేగంగా వృద్ధి చెందాలంటే స్టాక్ మార్కెట్లలో మదుపు చేయడమే సరైన నిర్ణయం. అయితే పెట్టుబడిదారులకు మార్కెట్ విషయాలపై అవగాహన ఉండదు. పెట్టుబడిదారులకు సరైన దిశానిర్దేశం చేయడమే స్టాక్ బ్రోకర్ల పని. వారికి మంచి పెట్టుబడి పథకాలను సూచించి వారి డబ్బు వృద్ధి అయ్యేలా చేయగలిగితే మీకు తిరుగుండదు. లాభాలను ఇచ్చే పెట్టుబడులను కచ్చితంగా అంచనా వేయగలిగితే స్టాక్ బ్రోకర్లకు మంచి ఆదాయంతో పేరు, ప్రఖ్యాతులు కూడా అదనంగా వస్తాయి.

సవాళ్లను స్వీకరించే గుణం ఉండాల్సిందే

      స్టాక్ మార్కెట్స్ ఆధారిత కెరీర్ ను ఎంచుకోవాలనుకునే గ్రాడ్యుయేట్లకు స్టాక్ బ్రోకరేజీ సంస్థల్లో ఉద్యోగ అవకాశాలు ఉంటాయి. నేషనల్ స్టాక్ ఎక్ఛ్సేంజీ వాళ్లు నిర్వహించే ఎన్‌సీఎఫ్ఎమ్ డీలర్స్ మాడ్యూల్ పరీక్షలో ఉత్తీర్ణత సాధిస్తే ప్రారంభంలో అసిస్టెంట్ రిలేషన్ షిప్ మేనేజర్, రిలేషన్ షిప్ మేనేజర్ గా ఉద్యోగ అవకాశాలు వస్తాయి. వీటితో పాటు డీలర్, అడ్వైజర్, అనలిస్ట్ ఇలా వివిధ విభాగాల్లో కూడా పనిచేయవచ్చు. ఈ రంగంలోకి వచ్చిన వారికి స్టాక్ మార్కెట్ పరిస్థితులను ఒడిసిపట్టుకునే నేర్పు ఉండాలి. అదే విధంగా ఆర్థిక వ్యవహారాల్లో నమ్మకం ప్రధానం కాబట్టి క్లయింట్ నమ్మకం చెదరకుండా జాగ్రత్తగా వ్యవహరించాలి. మీరిచ్చే సూచనలే క్లయింట్ కు లాభాలు తెచ్చినా, నష్టాలు తెచ్చినా. కాబట్టి పొరపాటు నిర్ణయాలకు అస్సలు అవకాశం ఇవ్వకూడదు. ఏమాత్రం కాస్త నిర్లక్ష్యం వహించినా క్లయింట్ డబ్బుతో పాటు మీ కెరీర్ కూడా చిక్కుల్లో పడుతుంది. ఈ కెరీర్ లో ప్రారంభంలో వేతనం కాస్త తక్కువ ఉన్నప్పటికీ మంచి పనితీరు కనబరిస్తే ఎంత మొత్తం ఇచ్చేందుకైనా బ్రోకరేజీ కంపెనీలు సిద్ధంగా ఉంటాయి. 

'ఎంటర్‌ప్రెన్యూర్' గా మారేందుకూ అవకాశం 

         స్టాక్ మార్కెట్ ఆధారిత కెరీర్ ను ఎంచుకున్న వారు ఉద్యోగాలకే పరిమితం అయిపోవాల్సిన అవసరం లేదు. మార్కెట్ స్థితిగతులపై మంచి పట్టు , క్లయింట్ వద్ద నుంచి మంచి పేరు ప్రఖ్యాతులు సంపాదించుకోగలిగితే ఎంటర్‌ప్రెన్యూర్ గానే రాణించేందుకు అవకాశం ఉంది. పెద్ద బ్రోకరేజీ కంపెనీ నుంచి సబ్ బ్రోకరేజీ, ఫ్రాంచైజీలను తీసుకుని సొంతంగా కార్యాలయాన్ని నడుపుకోవచ్చు. క్లయింట్ల నమ్మకాన్ని చూరగొంటే అమ్మకాలు, కొనుగోళ్లపై వాళ్ల నుంచి లభించే కమీషన్ తో అభివృద్ధిని సాధించవచ్చు. అయితే మనం ముందుగా చెప్పుకున్నట్టు సవాళ్లను తట్టుకునే మనస్తత్వం, ఓర్పు, నేర్పు ఉంటేనే ఈ రంగంలో రాణించడం సాధ్యమవుతుంది. అదే విధంగా ఎప్పటికప్పుడు మార్కెట్ స్థితిగతులను తెలుసుకుంటూ అప్‌డేట్ అవ్వడం కూడా చాలా ముఖ్యం. అందుకే ఎన్‌ఎస్ఈ, బీఎస్ఈ లు నిర్వహించే సర్టిఫికేషన్ లు కూడా ప్రతీ మూడేళ్లకు గడువు తీరిపోతూ ఉంటాయి. తిరిగి మన విషయ పరిజ్ఝాన సామర్ధ్యం నిరూపించుకుని ఆ సర్టిఫికేట్లను తిరిగి పొందాల్సి ఉంటుంది. స్టాక్ మార్కెట్ ఆధారిత రంగంలో రాణించాలంటే నిత్య విధ్యార్ధిలా ఉండాల్సిందే. ఈ అన్ని అడ్డంకులను అధిగమించి, సవాళ్లను ప్రతీ క్షణం ఎదుర్కొనే థ్రిల్లింగ్ జాబ్ కావాలంటే ఈ రంగంపై దృష్టి సారించండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com