వైఎస్ఆర్, చంద్ర‌బాబుల‌కు దానివ‌ల్లే ప్ర‌త్యేక గుర్తింపు!

    వైఖ‌రి, న‌డ‌వ‌డిక‌, హావ‌భావాలు ఒక మ‌నిషి వ్య‌క్తిత్వాన్ని నిర్దేశిస్తాయి. ఇత‌ను ప్ర‌త్యేక‌మైన వాడా?  కాదా?  వివిధ అంశాల‌పై ఇత‌ని జ్ఞానం స్థాయి ఏంటి?  గౌర‌వ, మ‌ర్యాద‌లు ఇచ్చిపుచ్చుకోవ‌డం తెలుసా? అన్న విష‌యాలు కొద్దిపాటి ప‌రిచ‌యంతోనే తేలిపోతాయి. ముఖ్యంగా వస్త్రధారణ అనేది మనిషి వ్యక్తిత్వాన్ని ప్రతిబింబిస్తుంది.  రాజ‌కీయాల్లోకి వ‌చ్చాక‌ ఎన్టీఆర్ ప్ర‌త్యేక‌త అత‌ని డ్రెస్సింగ్ స్టైల్ లో ఉండేది. ఇక త‌న ప్ర‌సంగాల‌తో  విదేశాల్లో సంచ‌ల‌నం రేపిన స్వామి వివేకానంద‌ది ఓ డిఫ‌రెంట్ డ్రెస్సింగ్ స్లైల్. అలాగే దివంగ‌త ముఖ్య‌మంత్రి వైఎస్ఆర్ అన‌గానే పంచెక‌ట్టు, ఏపీ సీఎం చంద్ర‌బాబు అన‌గానే ఫుల్ హ్యాండ్ చొక్కా ఠ‌క్కున గుర్తుకు వ‌స్తాయి. వాళ్లు త‌మ డ్రెస్సింగ్ స్టైల్ తో ఒక బ్రాండింగ్ క్రియేట్ చేసుకోవ‌డం వ‌ల‌న‌ ఆ గుర్తింపు సాధ్య‌మైంది.  మిగ‌తా వారి సంగ‌తి కాస్త ప‌క్క‌న పెడితే విద్యార్ధులు, ఉద్యోగుల‌కు కూడా డ్రెస్సింగ్ సెన్స్ అనేది చాలా ముఖ్యమైన విష‌యంగా మారిపోయింది. మంచి జాబ్ సంపాదించాల‌న్నా, ఉద్యోగంలో ఉన్న‌తిని సాధించాల‌న్నా అత్యున్న‌త వ్య‌క్తిత్వ నైపుణ్యాలతో పాటు మంచి ఆహార్యం, అత్యుత్త‌మ‌ డ్రెస్ సెన్స్ అవ‌స‌ర‌మ‌వుతున్నాయి.  ఒక వ్య‌క్తిని చూడ‌గానే అత‌నిపై  ఒక త‌క్ష‌ణ అభిప్రాయాన్ని క‌లిగించేది అత‌ను వేసుకున్న దుస్తులే. మంచి దుస్తుల‌తో పాటు అవి ధ‌రించే విధానం కూడా అవ‌త‌లి వారిని ప్ర‌భావం చేస్తుంది. ఫ‌స్ట్ ఇంప్రెష‌న్ ఈజ్ బెస్ట్ ఇంప్రెష‌న్ కాబ‌ట్టి , విద్యార్ధుల‌కు మంచి డ్ర‌స్ సెన్స్ తో పాటు 'డ్రెస్ సైన్స్' కూడా తెలియాలి. 

మీకో బ్రాండ్ సృష్టించుకోండి!

      వృత్తి జీవితంలో ఉన్న‌త స్థితికి చేరుకుని మీదైన గుర్తింపును పొందాల‌నుకుంటున్నారా? అయితే ఇప్ప‌డే ఒక బ్రాండ్ ను క్రియేట్ చేసుకునేందుకు ప్ర‌య‌త్నాలు చేయండి. బ్రాండ్ అంటే ఒక కంపెనీ కాదు. మీ వ్య‌క్తిత్వం, ఆహార్యం, వైఖ‌రి ముడి ప‌దార్ధాలుగా ఆ బ్రాండ్ కు రూప‌క‌ల్ప‌న చేయండి. మ‌న ప్ర‌ధాన మంత్రి నరేంద్ర మోడీని తీసుకోండి. మోడీ అన‌గానే వ‌దులు స‌గం చేతుల చొక్కా, దానిపై స్లీవ్ లెస్ కోటు మ‌న మ‌దిలో మెదులుతుంది. త‌న డ్రెస్ సెన్స్ తో అత‌ను అంత‌గా ప్ర‌జ‌ల‌పై ప్ర‌భావం చూపారు. అలాగే  మీరు కూడా వేసుకునే డ్రెస్ ద‌గ్గ‌ర్నుంచి స‌మ‌స్య‌పై స్పందించే విధానం, మీ న‌డ‌వడిక‌పై శ్ర‌ద్ధ పెట్టండి. మిమ్మ‌ల్ని చూడ‌గానే ఎదుటి వ్య‌క్తులు సౌక‌ర్య‌వంతంగా, ఆనందంగా ఫీల్ అవుతున్నారంటే మీ బ్రాండ్ నిర్మాణంలో మీరు విజ‌యం సాధించ‌న‌ట్టే. స్నేహితులు, తోటి ఉద్యోగులు, మేనేజ్ మెంట్, మీ సాన్నిహిత్యం, ప‌ని కోసం ఆస‌క్తి చూపిస్తున్నారంటే మీరు ఇంకో మెట్టు ఎక్కిన‌ట్టే. మీ సోష‌ల్ మీడియా ప్రొఫైల్, మీరు పెట్టే పోస్టులు, మీరు మాట్లాడే విధానంతో పాటు డ్రెస్ సెన్స్ పై  మీకున్న శ్ర‌ద్ధ మీ బ్రాండ్ ఇమేజ్ ను పెంచుతాయి. మీరు అంటే ఇది అని ఒక బ్రాండ్ క్రియేట్ చేసుకున్నప్పుడు వ్య‌క్తిగ‌త జీవితంలోనూ, వృత్తిగ‌త జీవితంలోనూ ప‌ర‌ప‌తి పెరుగుతుంది. మీపై, మీ ప‌నిపై అంద‌రూ గౌర‌వ భావం ప్ర‌ద‌ర్శించేలా చేసుకోవ‌డాన్ని మంచి ఆక‌ర్ష‌ణీయ‌మైన డ్రెస్ సెన్స్ తోనే ప్రారంభించండి.

డ్రెస్ సెన్స్ ప్రాముఖ్య‌త‌ను గుర్తించండి!

    మ‌నం గుడికి వెళ్లిన‌ప్పుడు ఎటువంటి డ్రెస్ ధ‌రిస్తాం? స్విమ్మింగ్ కు సిద్ధ‌మైన‌ప్పుడు ప్ర‌త్యేక‌మైన డ్రెస్ వేసుకుంటాం క‌దా? అలానే విద్యార్ధులు ఇంట‌ర్వ్యూల‌కు సిద్ధ‌మైన‌ప్పుడు డ్రెస్ సెన్స్ పై కూడా దృష్టి సారించాలి. ఇంట‌ర్వ్యూలో నైపుణ్యాల‌తో పాటు మంచి ఆహార్యం, చూడ‌గానే ఆక‌ట్టుకునే డ్రెస్ చాలా ముఖ్యం. ముందు చెప్పుకున్న‌ట్టు  ఫ‌స్ట్ ఇంప్రెష‌న్ ఈజ్ బెస్ట్ ఇంప్రెష‌న్ కాబ‌ట్టి డ్రెస్ విష‌యంలో విద్యార్ధులు త‌గిన జాగ్ర‌త్త‌లు తీసుకోవాల్సిందే.

• ఇంట‌ర్వ్యూల‌కు వెళ్లేట‌ప్పుడు లైట్ క‌ల‌ర్ డ్రెస్ ల‌కే ప్రాధాన్య‌త నివ్వండి.

• పింక్, రెడ్, గ్రీన్, బ్లాక్ వంటి రంగులు ఉన్న దుస్తుల‌ను ఎంచుకోక‌పోవ‌డ‌మే మంచిది.

• ఇంట‌ర్వ్యూల‌కు వెళ్లేట‌ప్పుడు జీన్స్ అస్స‌లు ధ‌రించ‌వద్దు.

• నీట్ గా ఇన్ ష‌ర్ట్ చేసుకుని ట్రౌజ‌ర్ కు బెల్ట్ పెట్టుకోవాలి. డ్రెస్ ఫిట్ గా ఉండేలా జాగ్ర‌త్త ప‌డాలి.

• ట్రౌజ‌ర్ ను కింద మ‌డ‌త పెట్ట‌డం, షర్ట్ హ్యాండ్ ఫోల్డ్ చేయ‌డం అస్స‌లు చేయొద్దు.

'అతి' గొప్ప‌ల‌కు పోకండి!

     డ్రెస్ సెన్స్ బాగుండాలి, ఆక‌ర్ష‌ణీయంగా క‌నిపించాలి  అనేది ముఖ్యమే కానీ కేవ‌లం అదే మీకు అవ‌కాశాల‌ను తీసుకురాదు. చూడ‌గానే మీపై ఒక చిన్న అంచ‌నాకు వ‌చ్చేందుకు మాత్రమే దుస్తులు ఉప‌యోగ‌ప‌డ‌తాయి. కెరీర్ లో మిమ్మ‌ల్ని న‌డిపించేవి, నిలబెట్టేవి నైపుణ్యాలు మాత్రమే. కాబ‌ట్టి దుస్తుల‌ను అందంగా, ప‌రిశుభ్రంగా ఉంచుకోవ‌డంతో పాటు నైపుణ్యాల‌ను కూడా మెరుగ్గా ఉంచుకునేందుకు నిరంత‌రం ప్ర‌య‌త్నించండి. ఇక చాలామంది మంచి డ్రెస్ సెన్స్ అంటే చాలా ఖ‌రీదైన బ్రాండెడ్ దుస్తులు అనే భ్ర‌మ‌లో ఉంటారు. ఈ ఆలోచ‌న పూర్తిగా త‌ప్పు. త‌క్కువ ఖ‌రీదు దుస్తులు అయినా వాటిని ధ‌రించే విధానం, శుభ్రంగా ఉంచుకునే అల‌వాటే మ‌న డ్రెస్ సెన్స్ కు మార్కులు ప‌డేలా చేస్తుంది. దుస్తులు కోసం మీ స్థాయిలో ఎంత ఖ‌ర్చు పెట్ట‌గ‌ల‌రో అంతే ఖ‌ర్చు పెట్టండి. అంతేకానీ గొప్ప‌ల‌కు పోయి స్థోమ‌త‌కు మించి ఖ‌ర్చులు చేయ‌కండి. ధరించే విధానం, న‌డ‌క‌లో ఆత్మ‌విశ్వాసం కొర‌వ‌డితే బ్రాండెడ్ దుస్తులు కూడా వెల‌వెల‌పోతాయి.

ఎంపిక కీల‌క‌మ‌ని గుర్తించండి!

     ప్ర‌స్తుతం చాలా ఆఫీసుల్లో ఫార్మ‌ల్స్ నే అనుమ‌తిస్తున్నారు. ఇటువంటి స‌మ‌యంలో మిగ‌తా వారి కంటే మీరు ప్ర‌త్యేకంగా క‌నిపించేందుకు జాగ్ర‌త్త‌లు తీసుకొండి.

• మీ అభిరుచిని ప్ర‌తిబింబించే విధంగా మీ డ్రెస్ ల‌ను ఎంపిక చేసుకోండి.

• ముఖ్యంగా మంచి రంగుల‌ను ఎంపిక చేసుకోవ‌డంలోనే మీ సామ‌ర్ధ్యం బ‌య‌ట‌ప‌డుతుంది.

• కంపెనీ నిబంధ‌న‌ల‌కు అనుగుణంగా న‌డుచుకుంటూనే డ్రెస్ సెన్స్ తో ఎంప్లాయ‌ర్స్ ను ఆక‌ట్టుకోవ‌డం చాలా ముఖ్యం.

• ప్ర‌స్తుతం చాలా చోట్ల టై, కోటును ధ‌రించాల‌న్న నిబంధ‌న‌ను తొలిగించారు. అలాంటి నిబంధ‌న ఇంకా అమ‌ల‌వుతున్న చోట టై ప‌ద్ధ‌తిగా క‌ట్టుకోవ‌డం, కోటు తొడుక్కునే విధానంపై ప్ర‌త్యేక శ్ర‌ద్ధ పెట్టాలి.

•  చాలా మంది ఉద్యోగులు, విద్యార్ధులు చేస్తున్న ముఖ్య‌మైన పొర‌పాటు షూస్ ను ప‌రిశుభ్రంగా పాలిష్ చేసుకోక‌పోవ‌డం. మంచి డ్రెస్ సెన్స్ కు షూస్ పాలిష్ మరింత వ‌న్నె తెస్తుంది. ఎంత మంచి డ్రెస్ వేసుకున్నా షూ స‌రిగ్గా లేకుంటే అది వృధా అవుతుంది. కాబ‌ట్టి డ్రెస్ సెన్స్ లో షూ పాలిష్ కు కూడా ప్రాధాన్య‌త నివ్వండి.

   మంచి డ్రెస్ సెన్స్ తో మీదైన స్టైల్ లో మీకో ప్ర‌త్యేక‌మైన బ్రాండ్ ను సృష్టించుకోండి. నైపుణ్యాల‌ను ఎప్ప‌టిక‌ప్పుడు పెంచుకుంటూ, ఆహార్యంపై త‌గిన శ్ర‌ద్ధ చూపిస్తే ఎంప్లాయ‌ర్స్ దృష్టిలో ప్ర‌త్యేక‌మైన వ్య‌క్తిగా నిలుస్తారు. అటువంటి గుర్తింపు మీ కెరీర్ ఉన్న‌తికి ఎంత‌గానో ఉప‌యోగ‌ప‌డుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com