పవన్ కళ్యాణ్...కేసీఆర్ ను చూసి నేర్చుకో!!

      'ప్ర‌శ్నిస్తా' అంటూ సంచ‌ల‌న రీతిలో రాజ‌కీయ రంగ ప్ర‌వేశం చేసాడు ప‌వ‌ర్ స్టార్ ప‌వ‌న్ క‌ళ్యాణ్. గ‌తంలో త‌న అన్న‌య్య చిరంజీవి పెట్టిన 'ప్ర‌జారాజ్యం'లో క్రియాశీల‌క పాత్ర పోషించినా , ప్ర‌త్య‌క్ష రాజ‌కీయాల్లో మాత్రం ప‌వ‌న్ ఇప్ప‌టికీ జూనియ‌రే. జ‌న‌సేన పార్టీ పెట్టి మూడేళ్లు పూర్తి కావ‌స్తున్నాపార్టీ సంస్థాగ‌త నిర్మాణం మాత్రం ఇటీవ‌లి కాలంలోనే కాస్తో కూస్తో వేగం పుంజుకుంది. గ‌త ఎన్నిక‌ల్లో కేవ‌లం వైసీపీనే ప్ర‌శ్నించి మ‌ద్ధతుల‌కే ప‌రిమిత‌మైన జ‌న‌సేనాని రానున్న ఎన్నిక‌ల్లో మాత్రం పోటీ చేస్తామ‌ని ప్ర‌క‌టించాడు. ఈ మూడేళ్ల కాలంలో కొన్ని మార్కులు వేయించుకున్నా అంత‌కు మించి కొన్ని విమ‌ర్శ‌లను  కూడా మూట‌గ‌ట్టుకున్నాడు. స‌మ‌స్య‌ల‌పై చివ‌రి వ‌ర‌కూ పోరాటం చేయ‌డ‌ని, ట్విట్ట‌ర్ లోనే రాజ‌కీయం చేస్తాడ‌ని ప‌వ‌న్ పై కొన్ని అప‌వాదులున్నాయి. 'కెరీర్ టైమ్స్' ప‌వ‌న్ క‌ళ్యాణ్ రాజ‌కీయ ప్ర‌స్థానంపై స్పందించ‌డానికి కొన్ని కార‌ణాలున్నాయి. ముఖ్యంగా ఈ మూడేళ్ల కాలంలో ప‌వ‌న్ క‌ళ్యాణ్ విద్యా స‌మ‌స్య‌ల‌పై పోరాడ‌టం కానీ, విద్యార్ధుల‌కు స్పూర్తినిచ్చేలా ఏదైనా కార్య‌క్ర‌మం చేప‌ట్ట‌డం కానీ చేయ‌లేద‌నే చెప్పాలి. దేశ భ‌విష్య‌త్ ను మార్చేసే విద్యా వ్య‌వ‌స్థ‌పై, దాని స‌మ‌స్య‌ల‌పై ప‌వ‌న్ దృష్టిపెట్ట‌క‌పోవ‌డం అత‌ని రాజ‌కీయ వైఫ‌ల్యాల్లో ఒక‌టిగా చెప్పొచ్చు.

విద్యార్ధులే మన బలం, బలగం!

     ఒక ప్రభుత్వం నిలబడలన్నా, కూలిపోవాలన్నా విద్యార్ధుల‌దే కీలక పాత్ర. అయితే మన దేశంలో ఈ మాట మెల్లగా కనుమరుగయ్యే సూచనలు కనిపిస్తున్నాయి. కాలేజీ క్యాంపస్ లలో పాగా వేసిన రాజకీయ పార్టీలు విద్యార్ధి సంఘాలను ఒక ప్రణాళిక ప్రకారం నిర్వీర్యం చేస్తూ వస్తున్నాయి. తమ పొరపాట్లను, లోపాలను గట్టిగా ప్రశ్నించే గళాన్ని లేకుండా చేయడమే రాజకీయ పక్షాల పన్నాగం. గతంలో ఎన్టీఆర్ హయాంలో విద్యార్దులను, విద్యార్ధి సంఘాలను నిర్దాక్షిణ్యంగా అణిచివేయాలని ప్రయత్నించారు. అయితే తర్వాత ఎన్నికల్లో ఆయన్ను ఓడించి విద్యార్ధులు తమ సత్తా ఏంటో నిరూపించుకున్నారు. ఆ తర్వాత నుంచి విద్యార్ధులను రాజకీయ చైతన్యం లేకుండా నీరుగార్చేందుకు రాజకీయ పార్టీలు ప్రయత్నిస్తూనే ఉన్నాయి. అయితే విద్యార్ధుల శక్తిని, ఆవేశాన్ని సరైన దిశలో వాడుకున్న ఒకే ఒక్క నాయకుడు కేసీఆర్. తెలంగాణా ఉద్యమంలో విద్యార్ధుల పాత్ర, ఉద్యమాన్ని నడిపించడంలో వారు చూపిన చొరవను ఎవ్వరూ మర్చిపోలేరు. విద్యార్ధుల్లో తెలంగాణా స్ఫూర్తిని రగిలించడంలో , వారి ఆవేశాన్ని లక్ష్య సాధన దిశగా మళ్లించడంలో కేసీఆర్ విజయవంతమయ్యారు. ఇదే తరహాలో విద్యార్ధులకు స్ఫూర్తినివ్వడంలో వారి సమస్యల పోరాటంలో వెన్నంటి నిలవడంలో పవన్ కళ్యాణ్ విఫలమయ్యారు. ప్రత్యేక హోదా కానివ్వండి, విద్యా సమస్యలు కానివ్వండి , మిగతా విషయాల్లోనూ విద్యార్ధుల నిర్మించిన ఆందోళనను ముందుండి నడిపించే నాయకుడు ఇప్పుడు కరవయ్యాడు. ఆ స్థానాన్ని భర్తీ చేసే అవకాశం ఉన్నా పవన్ కళ్యాణ్ మాత్రం ఆ దిశగా ఆలోచన చేయడం లేదు. మిగతా రాజకీయ నాయకుల్లానే విద్యార్ధుల సమస్యలు, పోరాటాలపై నిర్లిప్త వైఖరిని ప్రదర్శిస్తున్నాడు.  

భాగ్య‌రేఖ‌ల‌ను మార్చేది విద్యే!

   అభివృద్ధి చెందిన దేశంగా మారాల‌ని ఆశ‌ప‌డి, ఆత్ర‌ప‌డుతున్న దేశం ఏం చేస్తుంది? అక్క‌డి రాజకీయ నాయ‌కులు ఏ అంశాల‌పై దృష్టిపెడ‌తారు? ఈ ప్ర‌శ్న‌ల‌కు సంక్షేమ రాజ్యంపై స్వ‌ల్ప అవ‌గాహ‌న ఉన్న‌వారేవ‌రైనా ట‌క్కున స‌మాధానం చెప్తారు. విద్య‌, వైద్యంల‌కు పెద్ద పీట వేస్తూ సంక్షేమానికి అగ్ర‌తాంబూలం ఇవ్వాల‌ని. కానీ దుర‌దృష్ట‌వ‌శాత్తూ మ‌న రాజ‌కీయ నాయ‌కులు ఈ రెండు విష‌యాల‌పై ఎప్పుడూ శీత‌క‌న్ను వేస్తూనే ఉంటారు.  ఆ రెండింటిని గాలికొదిలి కుల, మ‌త‌, ప్రాంతీయ‌, వ‌ర్గ రాజకీయాలు చేస్తూ ప‌బ్బం గ‌డుపుకుంటూ ఉంటారు. విద్య‌ను, వైద్యాన్ని ప్ర‌జ‌ల‌కు దూరం చేస్తూ వారిని అభివృద్ధికి ఆమ‌డ దూరంలోనే ఉంచుతున్నారు. ఇటువంటి స‌మ‌యంలో కొత్త త‌ర‌హా రాజకీయాలు అంటూ రంగ ప్ర‌వేశం చేసిన ప‌వ‌న్ కూడా ఈ రెండు కీల‌కాంశాల‌పై దృష్టి పెట్టిన సంద‌ర్భాలు క‌నిపించ‌డం లేదు.  విద్యా రంగ స‌మ‌స్య‌ల‌పై ప‌వ‌న్ ఎందుకు నోరు మెద‌ప‌డం లేదు ?  ప్ర‌భుత్వ స్కూళ్ల‌లో వ‌స‌తుల లేమి, ఉపాధ్యాయులు కొర‌త‌, హాస్ట‌ల్స్ లో అర‌కొర సౌక‌ర్యాలు...ఇలా విద్యా రంగానికి సంబంధించి ఎన్నో స‌మ‌స్య‌లు ప‌రిష్కారం కోసం ఎదురుచూస్తున్నాయి. ప‌వ‌న్ క‌ళ్యాణ్ కు రాజ‌కీయంగా ఇంకా ఎటువంటి మ‌ర‌క అంట‌న‌ప్ప‌టికీ, అత‌ను ఈ విష‌యాల్లో మాత్రం  పాత సీసాలో కొత్త సారా అనిపించేలా వ్య‌వ‌హ‌రిస్తున్నాడు.

ఫాలోయింగ్ ను పోరాటంగా మార్చ‌డంలో విఫ‌లం!

    ఒక రాష్ట్రానికి ముఖ్య‌మంత్రి అయ్యే అవ‌కాశాలున్న వ్య‌క్తికి అన్ని విష‌యాల‌పై అవ‌గాహ‌న, ఆత్మ‌ప‌రిశీల‌న చాలా ముఖ్యం. ఈ విష‌యంలో ప‌వ‌న్ ఇంకా చాలా నేర్చుకోవాలేమో అనిపిస్తోంది. యువ‌త‌లో, విద్యార్ధుల్లో మంచి ఫాలోయింగ్ ఉన్న ప‌వ‌న్ క‌ళ్యాణ్, ఏం చేసినా, ఏం చెప్పినా అది మంచి ప్ర‌భావాన్ని చూపిస్తుంది. ఆ ఫాలోయింగ్ ను ఆధారం చేసుకుని యువ‌త‌ను ముందుండి న‌డిపించి వారి స‌మ‌స్య‌ల‌ను తీర్చేందుకు ఇప్ప‌టివర‌కూ ఒక్క పోరాటం చేయ‌క‌పోవ‌డం ప‌వ‌న్ మూడేళ్ల వైఫ‌ల్యాల్లో ఒక‌టి. ప్ర‌స్తుతం విద్యా రంగం ఎన్నో స‌మ‌స్య‌ల‌ను ఎదుర్కొంటోంది. స‌మ‌స్య‌ల ప‌రిష్కారానికి ఎదురొడ్డి పోరాడాల్సిన విద్యార్ధి సంఘాలు రాజ‌కీయ పార్టీల‌కు అనుబంధ సంఘాలుగా మారిపోయి రాజ‌కీయాల్లో బిజీ అయిపోయాయి. ఇక ప్ర‌తిప‌క్ష పార్టీలు వ్య‌క్తిగ‌త అజెండాల కోసం పోరాటాలు చేస్తున్నాయి కానీ పేద విద్యార్ధుల స‌మ‌స్య‌ల‌పై పోరాటాలు వీరికి ప‌ట్ట‌వు. ఇటువంటి సంక్షోభ స‌మ‌యంలో విద్యార్ధుల‌, విద్యా వ్య‌వ‌స్థ స‌మ‌స్యల ప‌రిష్కారానికి ఒక బ‌ల‌మైన నాయ‌కుని అవ‌స‌రం ఏర్ప‌డింది. జ‌న‌సేన ఆగ‌మ‌నంతో అటువంటి నాయ‌కుని కొర‌త తీరిన‌ట్టేన‌ని కొంద‌రు భావించారు. కానీ ప‌వ‌న్ క‌ళ్యాణ్ మాత్రం అస‌లు విద్యా రంగం వైపే క‌న్నెత్తి చూడ‌క‌పోవ‌డం విద్యార్ధుల‌ను నిరాశ ప‌రుస్తోంది.

కీల‌క సంద‌ర్భాల్లో మౌనం!

విద్యా రంగానికి సంబంధించి ఇటీవ‌ల కాలంలో ఒక వార్త , విద్యార్ధుల‌ను, త‌ల్లిదండ్రుల‌ను, ఉపాధ్యాయుల‌ను ఆందోళ‌న‌కు గురిచేస్తోంది. ఏపీలో దాదాపు 9 వేల ప్ర‌భుత్వ పాఠ‌శాలల మూసివేత‌కు ప్ర‌భుత్వం జీవో జారీ చేసింద‌న్న వార్త ఆ అల‌జ‌డికి కార‌ణం. ప్ర‌భుత్వం చెపుతున్న కార‌ణాల‌ను కాస్త ప‌క్క‌న పెడితే ఇంత భారీ సంఖ్య‌లో స్కూళ్ల‌ను మూసివేస్తున్న సంద‌ర్భంలో ప్ర‌తిప‌క్షాల పాత్ర చాలా కీల‌కం. చ‌ట్ట‌స‌భ‌ల్లో త‌న‌కు ప్రాతినిధ్యం లేదు కాబ‌ట్టి తాను ప్ర‌తిప‌క్షం పాత్ర ఎందుకు పోషించాలి అనుకున్నాడో ఏమో కానీ ప‌వ‌న్ క‌ళ్యాణ్ ఈ విష‌యంపై అస్స‌లు నోరు మెద‌ప‌లేదు. ఇటువంటి సంద‌ర్భాల్లో త‌ల్లిదండ్రులు, ఉపాధ్యాయుల ఆందోళ‌న‌ల‌ను ప‌రిగ‌ణ‌న‌లోకి తీసుకుని దీనిపై జ‌న‌సేనాని స్పందిస్తే చాలా బావుండేద‌నే వాద‌న‌లు వినిపిస్తున్నాయి. గ‌డిచిన కొన్ని రోజులుగా ప‌వ‌న్ క‌ళ్యాణ్ అస్సలు స్పందించ‌ని విష‌యాల‌ను, అంశాల‌ను కొంద‌రు సోష‌ల్ మీడియాలో వైర‌ల్ చేస్తున్నారు. ఇందులో విద్యారంగంపై , దాని స‌మ‌స్య‌ల‌పై ప‌వ‌న్ ప్ర‌శ్నించ‌ని వైనాన్ని వాళ్లు ఎండ‌గ‌డుతున్నారు.

పోరాటాలు చేయ‌ని సేనాని ఎందుకు?

    ఒక స‌మ‌స్య‌పై నిరంత‌రం పోరాటం చేసి దాని పరిష్కారం కోసం ఉద్య‌మాలు నిర్మిస్తేనే నాయ‌కుడిపై ప్ర‌జ‌ల‌కు న‌మ్మ‌కం కుదురుతుంది. కేసీఆర్ లాంటి నాయ‌కులు ఇలానే అలుపెర‌గ‌ని పోరాటం చేసి ఉన్న‌త స్థాయికి చేరుకున్నారు. స‌మ‌స్య‌పై స్పందించ‌డం వేరు దానిని ప‌రిష్కారానికి కృషి చేయ‌డం వేరు. ప‌వ‌న్ క‌ళ్యాణ్ ఇప్ప‌టి వ‌ర‌కూ స‌మ‌స్య‌ల‌పై స్పందిస్తున్నారు కానీ వాటి ప‌రిష్కారాల కోసం పోరాటాలు చేయ‌డం కానీ ఫాలోఅప్ చేయ‌డం కానీ చేయ‌డం లేద‌నే విమ‌ర్శ ఉంది. మిగ‌తా విష‌యాల‌పై క‌నీసం స్పందించినా, అస‌లు విద్యా రంగ స‌మ‌స్య‌ల‌ను ప‌వ‌న్ అస్స‌లు ప‌ట్టించుకోక‌పోవ‌డం అత‌ని పొలిటిక‌ల్ ఇమేజ్ కు భంగం క‌లిగించ‌వ‌చ్చ‌న్న‌ది కొంద‌రి విశ్లేష‌కుల అంచ‌నా. కోట్లాది మంది యువ‌త ఆరాధించే ప‌వ‌న్, ఆ యువ‌త ఎదుర్కొంటున్న ప్ర‌ధాన స‌మ‌స్య‌ల‌నే గాలికొదిలేయ‌డం అత‌ని నాయ‌క‌త్వాన్ని నీరుగారుస్తోంది. ఈ విమ‌ర్శల నేప‌థ్యంలో భ‌జ‌న బృందాన్ని కాస్త  ప‌క్క‌న పెట్టి ప‌వ‌న్ క‌ళ్యాణ్ , విద్యార్ధుల స‌మ‌స్య‌ల‌పై గ‌ళ‌మెత్తితే రానున్న రోజుల్లో బ‌ల‌మైన నాయ‌కునిగా ఎదిగేందుకు అవ‌కాశం ఉంటుంది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com