కారు షెడ్‌ లో, అమ్మాయి బెడ్‌ లో..ఇదేనా సంస్కృతి??

      మన సమాజంలో ఇటీవలి కాలంలో పెరిగిపోతున్న అసభ్యత, కుసంస్కారం, అనుచిత వ్యాఖ్యానాలు ఆందోళన కలిగిస్తున్నాయి. ముఖ్యంగా ప్రజలను ప్రభావితం చేసే వ్యక్తులు నోటి నుంచి వెలువడుతున్న మాటలు సభ్య సమాజం తలదించుకునేలా ఉంటున్నాయి. తాజాగా సినీ నటుడు చలపతిరావు మహిళలపై చేసిన అనుచిత వ్యాఖ్యలు  సోషల్ మీడియాలో హాట్ టాపిక్ గా మారాయి. గతంలో కూడా కొందరు సినీ నటులు, రాజకీయ నాయకులు  ఇదే విధంగా ఆడవాళ్లపై ప్రతికూల కామెంట్స్ చేసిన సందర్భాలు అనేకం. మరోవైపు ద్వందార్ధాలతో రెచ్చిపోతున్న టీవీ షోలు, యాంకర్స్.  టీవీలో చూసే ప్రతీ మాటకీ, సోషల్ మీడియాలో నడిచే ప్రతీ టాపిక్ కు స్పందించే  టీనేజీ విద్యార్ధులు, పిల్లల మానసిక స్థితిపై ఈ వ్యాఖ్యల ప్రభావం ఎంతవరకు ఉంటుందో ప్రత్యేకంగా చెప్పాల్సిన పనిలేదు.  ఇంటర్నెట్ ప్రభావంతో ఇప్పటికే గాడి తప్పుతున్న వ్యవస్థను, విలువలను నిలబెట్టాలంటే విద్యార్ధులకు సభ్యత, సంస్కారం, గౌరవం నేర్పించాల్సిన అత్యవసర పరిస్థితి ఏర్పడింది. సమాజంలో ఉన్నత స్థానంలో వ్యక్తులు ఇలా బాధ్యతారాహిత్యంగా  చెడు సందేశం ఇచ్చేలా మాట్లాడుతున్న తరుణంలో ఆ ప్రభావం పిల్లలపై పడకుండా తల్లిదండ్రులు తగు జాగ్రత్తలు తీసుకోవాలి. 

అనుచిత వ్యాఖ్యలకు అంతూ పొంతూ లేదు!

        సోసైటీలో ఉన్నత స్థానంలో ఉన్న వ్యక్తులను చాలా మంది రోల్ మోడల్స్ గా తీసుకుంటారు. వారు మాట్లాడిన మాటలకు, చేసే పనులకు ఒక ప్రత్యేకమైన గుర్తింపు ఉంటుంది. అటువంటి పరిస్థితుల్లో సెలబ్రిటీలు తమ నడవడికపై, వ్యాఖ్యలపై స్వీయ నియంత్రణ కలిగి ఉండాలి. కానీ ఇటీవల కాలంలో జరుగుతున్న వరుస సంఘటనలను గమనిస్తే కొందరు సెలబ్రెటీలు స్వీయ నియంత్రణ కోల్పోయి అనుచితంగా, అసభ్యకరంగా మాట్లాడటం ఆందోళన కలిగిస్తోంది. ముఖ్యంగా మహిళల పట్ల వాళ్ల కున్న అభిప్రాయాన్ని, చిన్న చూపును తమ వ్యాఖ్యల ద్వారా నిస్సిగ్గుగా వెల్లగక్కుతున్నారు. ఈ కామెంట్స్ అటు స్త్రీలను కించపర్చడమే కాకుండా ఇటు సోసైటీకి చెడు సంకేతాలను పంపుతున్నాయి. సినీ హీరో బాలకృష్ణ, హాస్య నటుడు అలీ, తాజాగా సీనియర్ నటుడు చలపతిరావు , వీరంతా మహిళలపై తక్కువ స్థాయి అభిప్రాయంతో కామెంట్స్ చేసారు. ఏపీ స్పీకర్ కోడెల శివప్రసాద్ రావు కూడా ఒక సందర్భంలో మహిళలపై నోరు జారి తర్వాత క్షమాపణ చెప్పాల్సి వచ్చింది. వీరంతా తమ మాటలకు తర్వాత క్షమాపణ చెప్పినా సోషల్ మీడియా ప్రభావంతో ఆ   మాటలు అప్పటికే వైరల్ గా మారిపోవడం పరిస్థితిని తీవ్రతరం చేస్తోంది.  వీళ్లంతా ఇలా మాట్లాడటానికి దారితీసిన కారణాలను పక్కన పెడితే మహిళలను తక్కవ చేస్తూ అసభ్యకరంగా మాట్లాడటం కచ్చితంగా తప్పే. 

చెత్త ప్రొగ్రామ్ లతో 'ఇల్లు' గుల్ల చేస్తున్నారు!

     సమాజంలో ఉన్నత స్థాయి వ్యక్తులు, సెలబ్రెటీల బాధ్యతారాహిత్య వ్యాఖ్యలు ఇలా ఉంటే మరోవైపు ప్రతీ రోజూ టీవీల్లో వచ్చే ప్రొగ్రామ్ లు అసభ్యతను మరింత పెంచి పోషించే విధంగా ఉన్నాయి. అడ్డగోలు వ్యాఖ్యానాలు, బూతు పదజాలంతో హోరెత్తిస్తున్నారు. దాదాపు అన్ని టీవీ ఛానెల్స్ లో ఇదే రకమైన కార్యక్రమాలు వస్తున్నాయి.  ఒక ప్రోగ్రామ్ లో అయితే విద్యార్ధులను పిలిపించి వారితో ప్రేమ విషయాలను, పనికి మాలిన చెత్త విషయాలను మాట్లాడించడం నిజంగా భాధాకరం. కాలేజీలో చదువుకునే విద్యార్ధుల సమయం ఎంత కీలకమైనదో, ఎంత విలువైనదో ఆ ఛానెల్ నిర్వాహకలకు తెలీదా? యువతను ఆ ప్రోగ్రామ్ కు తీసుకొచ్చి వాళ్లకు చేస్తున్న మేలు ఏంటి? దీనికి బదులు విద్యార్ధుల కెరీర్ కు ఉపయోగపడే కార్యక్రమాలకు రూపకల్పన చేయవచ్చు కదా? అలానే మరో ప్రొగ్రామ్ లో కేవలం బూతు డైలాగులు, మహిళలను కించపరుస్తూ జోక్ లు. ఇవన్నీ ఇప్పుడు మన కళ్ల ముందున్న పెను ప్రమాదాలు. ఈ చెత్త, అనుచిత ప్రొగ్రామ్ ల నుంచి మన పిల్లలను కాపాడుకోవడమే మన ముందున్న కర్తవ్యం. ఈ ప్రొగ్రామ్ లను చూసి పిల్లలు నేర్చుకునేది ఏమిటి? బూతు డైలాగ్ లు, పనికి మాలిన కామెంట్స్. కెరీర్ టైమ్స్ లో మనం గతంలో చెప్పుకున్నట్టు ఇంటర్నెట్ వినియోగంపై పిల్లలపై ఎలా కన్నేసి ఉంచాలో అలానే పిల్లలు చూస్తున్న ఇలాంటి అసభ్య ప్రోగ్రాముల పట్ల కూడా నియంత్రణ విధించాల్సిందే. లేకుంటే మన సెలబ్రెటీల బుర్రల్లో పేరుకుపోయిన నేలబారు ఆలోచనతీరు లానే పిల్లల మనస్థత్వం కూడా తయారవుతుంది. 

'అసభ్యత'పై కన్నేసి ఉంచండి

     సోషల్ మీడియా అనేది రెండు వైపులా పదునున్న కత్తిలాంటిది. దాన్ని మంచికీ ఉపయోగించవచ్చు, చెడుకీ ఉపయోగించవచ్చు. కానీ సోషల్ మీడియా ప్రభావం మాత్రం ఈ తరం పిల్లలపై విపరీతంగా ఉంది. ఎవరు ఏం మాట్లాడినా, ఏం చేసినా నిమిషాల్లో ఆ విషయం సోషల్ మీడియాలో ప్రత్యక్షమైపోతుంది. సదరు విషయం విద్యార్ధులపై చెడు ప్రభావాన్ని చూపించే అవకాశాలే అధికంగా ఉన్నాయి. ఈ క్రమంలో తల్లిదండ్రులు కొన్ని జాగ్రత్తలు తీసుకోవాలి. 

• మీ పిల్లల ఇంటర్నెట్ వినియోగంపై పర్యవేక్షణ ఉంచండి. 

• వాళ్ల సోషల్ మీడియా  ప్రొఫైల్ ను అప్పుడప్పుడు పరిశీలించండి. 

• టీవీలో వస్తున్న అసభ్య ప్రొగ్రామ్స్ ను చూడకుండా నియంత్రించండి. ఎందుకు చూడవద్దో వారికి వివరించండి. 

• మగపిల్లలకు స్త్రీలను గౌరవించడం నేర్పించండి.

• మీ పిల్లవాడు బయట అమ్మాయిలతో ఎలా వ్యవహరిస్తున్నాడో గమనించండి. 

• అసభ్య పదజాలం ఏమైనా మాట్లాడుతున్నట్టు గమనిస్తే వెంటనే నియంత్రించండి. 

చెడు వ్యాఖ్యానాలకు దూరంగా ఉండండి!

     సెలబ్రెటీలు మహిళలను కించపరుస్తూ అసభ్యకరంగా మాట్లాడటాన్ని ఎవరూ సమర్ధించినా అది తప్పే. ఎందుకంటే ఒక సామాన్యుడు మాట్లాడింది అందరి వరకూ చేరదు. కానీ ఉన్నత స్థాయి వ్యక్తులు మాట్లాడితే అది అందరికీ చేరుతుంది. వారి వ్యాఖ్యలకు పరిణితి ఉన్న వ్యక్తులు ప్రభావితం కారు. కానీ ఇంకా మానసికంగా పూర్తి స్థాయిలో పరిణితి సాధించని విద్యార్ధులు ప్రభావితమైతే అది సమాజానికి చేటు చేస్తుంది. వాళ్లు మాట్లాడినట్టుగానే మహిళలపై లేదా సమాజంపై గౌరవం లేకుండా వ్యవహరిస్తే నష్టపోయేది ఎవరు? ఈ విషయంలో ప్రభుత్వాలతో పాటు తల్లిదండ్రులు కూడా తగిన చర్యలు తీసుకోవాలి. ప్రభుత్వాలు అసభ్యతను పెంచి పోషిస్తున్న ప్రొగ్రామ్ లను నియంత్రించాలి. తల్లిదండ్రులు పిల్లలకు ఏది మంచి? ఏది చెడు? అన్న విషయాలపై ఎప్పటికప్పుడు తెలియజేస్తూ వారిని సన్మార్గంలో నడిపించాలి. లేకుంటే బాధ్యతారాహిత్యంగా మాట్లాడే కొందరి వ్యక్తుల వలన మొత్తం సమాజం నాశనమయ్యే పెను ప్రమాదం పొంచి ఉంది.   

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com