వీళ్లు ఎవ్వ‌రి మాటా విన‌రు..'వై' దిస్ కొల‌వ‌రి??

    విద్యా సంవ‌త్స‌రం ముగిసిపోయింది. మ‌ళ్లీ అడ్మిష‌న్ల హ‌డావుడి మొద‌లైంది. ముఖ్యంగా ఇంట‌ర్ పూర్తి చేసిన విద్యార్ధుల త‌ల్లిదండ్రులు హైరానా ప‌డిపోతున్నారు. త‌మ పిల్ల‌వాడ్ని ఇంజినీరింగ్ లో జాయిన్ చేయాలా?  మెడిసిన్ చ‌దివించాలా?  లేక ఏదైనా ప్ర‌త్యేక‌మైన కోర్సులో చేర్పిస్తే మంచిదా? అని కిందా మీదా అవుతున్నారు. ఈ విష‌యం మీద కొన్ని కుటుంబాల్లో పెద్ద చ‌ర్చ‌లే సాగుతున్నాయి. కానీ త‌ల్లిదండ్రులు ఈ విష‌యంలో కాస్త సీరియ‌స్ నెస్ త‌గ్గించి కూల్ గా ఉంటే మంచిది. ఎందుకంటే ఇంట‌ర్ పూర్తి చేసిన విద్యార్ధులు వై జ‌న‌రేష‌న్ కేట‌గిరీకి చెందిన వారు. ఇంట‌ర్నెట్ పై పూర్తి ప‌ట్టున్న ఈ వై జ‌న‌రేష‌న్ విద్యార్ధులకు,  తాము ఏమి చ‌ద‌వాల‌న్న దానిపై ఇప్ప‌టికే ఒక స్ప‌ష్ట‌త ఉంటుంది. వాళ్లు అనుకున్న‌దే చ‌దువుతారు కానీ త‌ల్లిదండ్రులు చెప్పింది చ‌దివేందుకు వీరు ఇష్ట‌ప‌డ‌రు. కాబట్టి పేరెంట్స్, వై జ‌న‌రేష‌న్ పిల్ల‌ల‌తో కాస్త నేర్పుగా, ఓర్పుగా వ్య‌వ‌హ‌రించాల్సిందే. వై అక్ష‌రం ఎలాగైతే నిట్ట‌నిలువుగా తలెత్తుకుని ఉండి అభివృద్ధికి నిలువుట‌ద్దంగా ఉంటుందో వై జ‌న‌రేష‌న్ విద్యార్ధులు కూడా మంచి పురోగ‌తి ఆలోచ‌న‌లున్న త‌రం. 

వీళ్ల లోకం వేరు! 

      ప్ర‌స్తుతం ప‌ద‌హారు, ప‌దిహేడు వ‌య‌స్సున్న విద్యార్ధులంతా వై జ‌న‌రేష‌న్ కేట‌గీరిలోకి వ‌స్తారు.  ఇంట‌ర్నెట్ విస్త‌ర‌ణ ప‌తాక స్థాయిలో ఉన్న కాలంలో పుట్టిన జ‌న‌రేష‌న్ వీళ్ల‌ది. వీళ్లు ఈట్ ఇంట‌ర్నెట్, డ్రింక్ ఇంట‌ర్న‌ట్ టైప్ అన్న‌మాట‌. ఇంట‌ర్నెట్ తో నిరంత‌రం ట‌చ్ లో ఉంటే వై జ‌న‌రేష‌న్ వాళ్ల‌కి త‌మ భ‌విష్య‌త్ పై కొన్ని అంచ‌నాలుంటాయి. తాము ఏం కావాల‌న్న‌దానిపై ఒక ప్ర‌ణాళిక‌తో పాటు అంచ‌నాలు కూడా రెడీ చేసి ఉంచుకోవ‌డంలో వై జ‌న‌రేష‌న్ రూటే సెప‌రేటు. అంత‌కు ముందు త‌రంలా త‌ల్లిదండ్రులు ఏం చ‌ద‌వ‌మంటే అది త‌లొంచుకుని చ‌దివే టైప్ కాదు వీళ్లు. ఇంట‌ర్నెట్ ప్ర‌భావంతో వీళ్లు ప్ర‌త్యేకమైన అభిరుచులు,  ఆసక్తులు ఏర్ప‌రుచుకుంటారు. దానికి అనుగుణంగానే న‌డుచుకుంటారు. ఇక వీళ్ల నెట్ వ‌ర్కింగ్ కూడా మామూలుగా ఉండ‌దు. ఇంట‌ర్నెట్ ద్వారా ప‌రిచ‌య‌మైన స్నేహితులతో పాటు బ‌య‌ట కూడా వీళ్ల స్నేహ గ‌ణం చాలా పెద్ద‌దిగా ఉంటుంది. దీంతో ఎక్కడ అవ‌కాశాలున్నాయి? ఏం చ‌దివితే భ‌విష్య‌త్ లో కెరీర్ బాగుంటుంది? అన్న‌దానిపై వీళ్ల ద‌గ్గ‌ర చాలా స‌మాచారమే ఉంటుంది. దీంతో ఇంట‌ర్ పూర్త‌య్యే స‌రికి ఏ కోర్సు చ‌ద‌వాలి? ఏ కెరీర్ లో స్థిర‌ప‌డాలి అన్న‌దానిపై వై జ‌న‌రేష‌న్ వాళ్ల‌కి ఒక స్ప‌ష్ట‌త ఉంటుంది. 

పేరెంట్స్ కు క‌త్తిమీద సామే! 

     వై జ‌న‌రేష‌న్ పిల్ల‌ల‌తో వ్య‌వ‌హ‌రించ‌డం త‌ల్లిదండ్రుల‌కు క‌త్తి మీద సాము లాంటిదే  అని చెప్పాలి. ఎందుకంటే పిల్ల‌లు అతివిశ్వాసంతో ఎక్క‌డ త‌ప్ప‌ట‌డుగు వేస్తారో అన్న ఆందోళ‌న పేరెంట్స్ ను వేధిస్తుంది. మొండిత‌నంతో అదే స‌మ‌యంలో మంచి తెలివితేట‌ల‌తో ఉండే ఈ త‌రం పిల్ల‌లు త‌ల్లిదండ్రుల‌కు ఒక ప‌ట్టాన అర్ధం కారు. తాము ఎంపిక చేసిన కోర్సులో జాయిన్ కావాల్సిందే అని చెప్తే వీళ్ల‌కు న‌చ్చ‌దు. పోనీ వాళ్ల‌కు న‌చ్చిన కోర్సులో జాయిన్ చేద్దామంటే , భ‌విష్య‌త్ ఎలా ఉంటుందో అన్న ఆదుర్దా పీడిస్తుంది. ఈ ప‌రిణామం ఇప్పుడు త‌ల్లిదండ్రుల‌కు పీడ‌క‌ల‌లా మారుతోంది. వాళ్ల అభిరుచుల‌కు ప్రాధాన్య‌త‌నిస్తూనే అదే స‌మ‌యంలో భ‌విష్య‌త్ కు భరోసానిచ్చే కోర్సులో వాళ్ల‌ను జాయిన్ చేయ‌డం ఎలా అన్న‌దే పెద్ద ప్ర‌శ్న‌గా మారుతోంది. ఈ సంక‌ట స్థితికి చాలా ప‌రిష్కార మార్గాలున్నాయి. 

• పిల్ల‌ల‌తో స్నేహితుల్లా మెల‌గండి. వాళ్లు ఇష్ట‌ప‌డుతున్న‌, ఎంపిక చేసుకున్న కోర్సు వివ‌రాల‌ను నిశితంగా ప‌రిశీలించండి. 

• ఒకవేళ వాళ్లు ఎంచుకున్న కోర్సు అన్ని విధాలా బాగుంది అనిపిస్తే నిర‌భ్య‌రంత‌రంగా య‌స్ చెప్పండి. 

• మీ పిల్ల‌లు జాయిన్ అవుతాను అని చెపుతున్న కోర్సుకు భ‌విష్య‌త్ లేదు అని మీరు గ‌మ‌నిస్తే, ఆ విష‌యాన్ని మీ పిల్ల‌వాడికి సావ‌ధానంగా, స‌వివ‌రంగా వివ‌రించండి. 

• ఇంట‌ర్నెట్ ప‌రిజ్ఞానం, భారీ నెట్ వ‌ర్క్ మూలాన వై జ‌న‌రేష‌న్ విద్యార్ధులు చాలా విష‌యాల్లో మెరుగ్గా ఆలోచించ‌గ‌ల‌ర‌న్న విష‌యాన్ని పేరెంట్స్ అంగీక‌రించాలి. 

• భ‌విష్య‌త్ ను తీర్చిదిద్దే చ‌దువులో పేరెంట్స్ వాళ్ల అభిరుచుల‌ను, క‌ల‌ల‌ను పిల్ల‌ల‌పై రుద్ద‌కుండా, వాళ్ల అభిరుచుల‌కు పెద్ద పీట వేయాలి. 

• వాళ్ల భ‌విష్య‌త్ పై మీరు ప‌డుతున్న ఆందోళ‌న‌ను వాళ్ల‌కు తెలిసేలా చేయండి.  అతి విశ్వాసానికి, ఆత్మ‌విశ్వాసానికి మ‌ధ్య ఉన్న స‌న్న‌టి గీత‌ను వాళ్ల‌కు తెలిసేలా చెప్పండి. 

అభిరుచి, ఆస‌క్తే ప‌ర‌మావ‌ధి! 

     ప్ర‌తీ విద్యార్ధికి ఒక్కో ర‌క‌మైన అభిరుచి, ప్ర‌తిభ‌, సామ‌ర్ధ్యాలు ఉంటాయి. వాళ్లు పెరుగుతున్న కొద్దీ వాళ్ల సామ‌ర్ధ్యాలు, అభిరుచుల ఆధారంగా ఒక్కొక్క‌రు ఒక్కో రంగంపై ఇష్టం పెంచుకుంటారు. మ‌నం ముందుగా చెప్పుకున్న‌ట్టు ఇంట‌ర్నెట్ బాగా విస్త‌రించిన నేప‌థ్యంలో తమ క‌ల‌ల‌ను ఎలా సాకారం చేసుకోవాల‌న్నదానిపై అంద‌రికీ ఒక  స్ప‌ష్ట‌త ఏర్ప‌డుతోంది. క్ర‌మంగా విస్త‌రిస్తున్న ఈ మార్పును ముందుగా త‌ల్లిదండ్రులు ఆక‌ళింపు చేసుకోవాలి. ప్ర‌స్తుతం ఉన్న డిగ్రీల‌లో ఆ డిగ్రీ చెత్త , ఈ డిగ్రీ అద్భుతం అన్న‌ది లేదు. అన్ని డిగ్రీలు మంచివే. చ‌దువు పూర్త‌వ‌గానే ఉద్యోగాన్ని సాధించే పెట్టే కోర్సుల‌ను మ‌నం మంచి డిగ్రీలు అంటున్నాం. కానీ ఆ స‌బ్జెక్ట్ ఇష్టం లేని విద్యార్ధికి అదే డిగ్రీ బ్యాడ్ డిగ్రీగా మారుతుంది. మ‌న స‌మాజంలో ఇప్పుడు జాబ్ ను తెచ్చిపెట్టే డిగ్రీల‌నే మంచి డిగ్రీలుగా ప‌రిగ‌ణిస్తూ ఆ కోర్సుల్లోనే త‌మ పిల్ల‌ల‌ను జాయిన్ చేస్తున్నారు. విద్యార్ధికి అభిరుచి లేకుంటే ఎంత మంచి కోర్సులో జాయిన్ చేసినా అది వృధా ప్ర‌య‌త్న‌మే. అలా కాకుండా విద్యార్ధికి ఆస‌క్తి ఉన్న కోర్సులో జాయిన్ చేసి ప్ర‌స్తుత పోటీ వాతావ‌ర‌ణానికి అనువైన నైపుణ్యాలు నేర్పిస్తే  అత‌ను త‌న కెరీర్ ప‌ట్ల ఆనందంగా ఉంటాడు. పిల్ల‌ల ఆనందం కంటే త‌ల్లిదండ్రుల‌కు కావాల్సింది ఏమీ ఉండ‌దు క‌దా? 

తుది నిర్ణ‌యం అత‌నిదే!

       కెరీర్ లో మంచి  ఉన్న‌తి, బంగారు భ‌విష్య‌త్ కావాలంటే ప్ర‌తీ విద్యార్ధి ఏం చేయాలి? త‌న డిగ్రీ స‌మ‌యంలో లోతైన ప‌రిజ్ఞానం, స‌బ్జెక్ట్ ప‌ట్ల ఇష్టం, అవ‌గాహ‌న పెంచుకోవాలి. అదే స‌మ‌యంలో మార్కెట్ కు అవ‌స‌ర‌మైన నైపుణ్యాల‌ను సంపాదించుకోవాలి. త‌న అభిరుచికి అనుగుణంగా జాయిన్ అయిన కోర్సులో త‌న‌దైన ముద్ర వేసేందుకు ప్ర‌య‌త్నించాలి. అప్పుడే విజ‌యం సాధ్య‌మ‌వుతుంది. ఈ విష‌యంలో త‌ల్లిదండ్రులు ఎప్ప‌టిక‌ప్పుడు త‌మ స‌హ‌కారాన్ని అందించాలి. ప్రోత్సాహంతో పాటు ప‌ర్య‌వేక్ష‌ణ కూడా ఉండాలి. విద్యార్ధి సంక్లిష్ట‌మైన సంద‌ర్భాల‌ను, ఇబ్బందుల‌ను ఎదుర్కొన్న‌ప్పుడు పేరెంట్స్ అండ‌గా నిల‌బ‌డాలి. స్థానిక అవ‌కాశాల‌కే ప‌రిమితం కాకుండా గ్లోబ‌ల్ అవ‌స‌రాల‌కు అనుగుణంగా విద్యార్ధులు త‌మ‌ను తాము మ‌లుచుకోవాలి. అటు పేరెంట్స్ ఇటు మెంటార్స్ ఎన్ని స‌ల‌హాలు, సూచ‌న‌లు ఇస్తున్నా తుది నిర్ణ‌యం మాత్రం నాదే అన‌డం  వై జ‌న‌రేష‌న్ విద్యార్ధుల స్టైల్. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com