ప‌వన్ క‌ళ్యాణ్ 'గో బ్యాక్' ఎందుకంటున్నాడు?

         భిన్న సంస్కృతులు, భిన్న భాష‌లు ఉన్న మ‌న‌దేశంలో హిందీని జాతీయ భాష‌గా చేయాల‌న్న ప్ర‌య‌త్నాలు ఇటీవ‌లి కాలంలో ఊపందుకున్నాయి. ఇక‌పై మంత్రులంద‌రూ హిందీలోనే ప్ర‌సంగించాల‌ని కేంద్ర ప్ర‌భుత్వం ఆదేశాలు జారీ చేయ‌డంపై ద‌క్షిణాది రాష్ట్రాల నుంచి అభ్యంత‌రాలు వ్య‌క్త‌మ‌వుతున్నాయి. త‌మ‌పై హిందీని బ‌ల‌వంతంగా రుద్దుతున్నార‌న్న భావన ద‌క్షిణ భార‌తీయుల్లో స్ప‌ష్ట‌మ‌వుతోంది. జ‌న‌సేన అధినేత ప‌వ‌న్ క‌ళ్యాణ్ అయితే ఒక అడుగు ముందుకేసి 'హిందీ గో బ్యాక్' అంటున్నాడు. అయితే కేంద్రం మాత్రం జాతీయ స‌మ‌గ్ర‌త‌, స‌మైక్య‌త‌ను పెంపోందించేందుకే హిందీకి ప్రాముఖ్యం క‌ల్పిస్తున్నామ‌ని చెపుతోంది. అస‌లు హిందీని జాతీయ భాష‌గా చేయ‌డ‌మే జాతి స‌మ‌గ్ర‌త‌కు నిద‌ర్శ‌న‌మా? వ‌్య‌వ‌హారాలు దేశం మొత్తం ఏక‌రీతిన అంద‌రికీ అర్ధ‌మ‌య్యేలా జ‌ర‌గాలంటే ఏక భాష విధానం ఉండాల్సిందే. అయితే అనుసంధాన భాష‌గా హిందీని ప్ర‌వేశ‌పెట్టే క్ర‌మంలో ప్ర‌భుత్వం చూపిస్తున్న అత్యుత్సాహం మొద‌టికే మోసం తెచ్చేలా ఉంది. విద్యా విధానంలో ఒక ప‌ద్ధ‌తి ప్ర‌కారం అనుసంధాన భాష‌ను ప్ర‌వేశ‌పెట్టాల్సిందిపోయి జాతి మ‌ధ్య చీలిక‌లు తీసుకొచ్చేలా వ్య‌వ‌హ‌రించ‌డ‌మే వివాదాన్ని మరింత రాజేస్తోంది.

త్రిభాషా సూత్రానికి మంగ‌ళం పాడారా?

        ప్ర‌స్తుతం ఏం జ‌రుగుతోంది?  ప్ర‌స్తుతం విద్యార్ధులు జాతీయ స్థాయిలో అవ‌కాశాల కోసం పోటీ ప‌డ‌వ‌ల‌సి వ‌స్తోంది. దీంతో స్థానిక భాష‌తో పాటు ఇంగ్లీష్ ఈ రెండు భాష‌ల‌కు అద‌నంగా హిందీని కూడా నేర్చుకుంటున్నారు. దేశ మొత్తం ఒక‌టే అనే భావ‌న క‌లిగేందుకు ప్ర‌జల‌ను అనుసంధానం చేసేందుకు హిందీ నేర్చుకోవాల‌ని చెప్ప‌డం త‌ప్పేమీ కాదు. కానీ త్రిభాషా సూత్రాల‌కు తిలోద‌కాలు ఇచ్చే విధంగా ప్ర‌క‌ట‌న‌లు చేయ‌డం వివాదాల‌కు కార‌ణ‌మ‌వుతోంది. త్రిభాషా సూత్రాల‌కు అనుగుణంగా అధికారిక ప్ర‌క‌ట‌న‌లు స్థానిక భాష‌తో పాటు ఇంగ్లీష్, హిందీలో విడుద‌ల చేసేవారు. ఇప్పుడు ఆ ప‌ద్ధ‌తికి కూడా మంగ‌ళం పాడుతున్నారు. స్థానిక, ఇంగ్లీష్ భాష‌ల స్థానంలో హిందీకే పెద్ద పీట వేయాల‌ని ప్ర‌ణాళిక‌లు సిద్ధం చేస్తున్నారు. ఇక విద్యా విధానంలోకూడా హిందీ ప్రాముఖ్య‌త‌ను పెంచేందుకు చాప కింద నీరులా ప్ర‌య‌త్నాలు జ‌రుగుతున్నాయి. ఇది హిందీయేత‌ర రాష్ట్రాల ప్ర‌జ‌ల‌కు ముఖ్యంగా ద‌క్షిణ భార‌తీయులకు మింగుడు ప‌డ‌టం లేదు. త‌మ ద్ర‌విడ సంస్కృతిపై జ‌రుగుతున్న దాడిగా దీన్ని వారు భావిస్తున్నారు.

సావ‌ధాన మార్పును దెబ్బ‌తీస్తున్న అస్త‌వ్య‌వ్థ నిర్ణ‌యాలు!

    అభివృద్ధిలో చైనా మ‌న దేశం కంటే ఎన్నో రెట్లు ముందుండ‌డానికి దేశం మొత్తం ఒకే భాష అనేది ఒక కార‌ణం. మన ద‌గ్గ‌ర‌కు వ‌స్తే మ‌నం ముందు చెప్పుకున్న‌ట్టు ఇండియా ఎన్నో భాష‌ల‌, సంస్కృతుల స‌మాహారం. ఇక్క‌డ ఒకే భాష‌ను ప్ర‌వేశ‌పెట్టడం అంత సులువైన విష‌య‌మేమీ కాదు. దేశం మొత్తంలో అధిక శాతం మంది హిందీని మాట్లాడ‌తార‌న్న ప్ర‌తిపాదిక‌పై త‌ప్పించి ఏతావాతా హిందీకి మ‌రే ప్రాముఖ్యం లేదు. ఈ విష‌యంలో ద‌క్షిణ భార‌త‌దేశంలో తీవ్ర వ్య‌తిరేక‌త ప‌లు సంద‌ర్భాల్లో వ్య‌క్త‌మైంది. ముఖ్యంగా త‌మిళ‌నాడులో హిందీకి వ్య‌తిరేకంగా పెద్ద ఉద్య‌మాలే జ‌రిగాయి. ఇటువంటి నేప‌థ్యంలో హిందీని మిగ‌తా ప్రాంతాల‌పై బ‌ల‌వంతంగా రుద్దే ప్ర‌య‌త్నాలు ఎప్పుడూ స‌త్ఫ‌లితాల‌ను ఇవ్వ‌వు. ఇది కాలక్ర‌మేణా జ‌ర‌గాల్సిన ఒక త‌ప్ప‌నిస‌రి మార్పు. అది గ‌డిచిన కొన్ని సంవ‌త్స‌రాలుగా మెల్ల‌గా జ‌రుగుతూ వ‌స్తోంది. ఉత్త‌ర భార‌త దేశంలో అవ‌కాశాల‌ను కొల్ల‌గొట్టేందుకు, అక్క‌డ ప‌రిస్థితుల‌కు త‌గ్గ‌ట్టుగా త‌మ‌ను తాము మ‌లుచుకునేందుకు విద్యార్ధులు హిందీపై మ‌క్కువ పెంచుకుంటున్నారు. ఇటువంటి ప‌రిస్థితుల్లో మీరు ఫ‌లానా భాష‌ను త‌ప్ప‌నిస‌రిగా నేర్చుకోవాల‌ని చెప్ప‌డం ప్ర‌శాంత‌త‌ను దెబ్బ‌తీసే విష‌య‌మే.

ఇప్ప‌టికే ఇళ్లల్లోకి వ‌చ్చింది క‌దా?

          హిందీ సినిమాలు, హిందీ ఛానెల్స్ తో ఇప్ప‌టికే  ఆ భాష అంద‌రి ఇళ్ల‌లోకి వ‌చ్చేసింది. ద‌క్షిణ భార‌త‌దేశంలోని పెద్ద ప‌ట్ట‌ణాల్లో ప్ర‌జ‌లు హిందీని విరివిగా వినియోగిస్తున్నారు కూడా. దేశంలో ఉన్న 120 కోట్ల మంది ప్ర‌జ‌ల‌ను అనుసంధానించేందుకు ఒక భాష ఈ విధంగా అభివృద్ధి చెంద‌వ‌ల‌సిందే. ఇందులో ఎవ‌రికీ ఎటువంటి అభ్యంత‌రాలు ఉండ‌వు. క‌చ్చితంగా  హిందీ భాష జాతీయ భాష‌గా ప్ర‌జ‌లంద‌రూ నేర్చుకోవాల్సిందే. కానీ స‌మ‌స్య అంతా వారిని బ‌ల‌వంతం చేయ‌డం ద‌గ్గ‌రే వ‌స్తోంది. సున్నితంగా  ప‌రిష్క‌రించాల్సిన స‌మ‌స్య‌ను జ‌ఠిలంగా మారుస్తున్నారు. ఇంగ్లీష్ అనేది ఇప్పుడు మార్కెట్ భాష‌. విద్యార్ధులైనా, ఉద్యోగులైనా ఆ భాష‌ను నేర్చుకోక పోతే వారికి మ‌నుగ‌డ లేదు. ఇక మాతృభాష అనేది ప్ర‌తీ వ్య‌క్తికి త‌న ఆత్మ‌గౌర‌వానికి సంబంధించిన విష‌యం. ఇక జాతీయ స్థాయిలో ఒక అనుసంధాన భాష కావాలి కాబ‌ట్టి హిందీని అభివృద్ధి చేయ‌డం త‌ప్పేమీ కాదు. విద్యా విధానంలో  స్థానిక భాష‌ల‌కు, మార్కెట్ భాష‌కు పెద్ద పీట వేస్తూనే అతి సున్నితంగా హిందీని విసృతం చేసేందుకు ప్ర‌య‌త్నించాలి.

పీడ‌నం ఒత్తిడిని క‌లుగుజేస్తుంది!

       బ‌ల‌వంతంగా దేన్నైనా ఒక‌రి మీద రుద్దాల‌నుకోవ‌డం ఎప్ప‌టికీ విజ‌యవంతం కానేర‌దు. ముఖ్యంగా విద్యా విధానంలో అత్యంత జాగ్ర‌త్త‌గా, సావ‌ధానంగా చేప‌ట్టవ‌ల్సిన మార్పును బ‌లం ఉప‌యోగించి చేయాల‌నుకోవడం అతిపెద్ద పొర‌పాటు. 1960 లో ఇలాంటి ప్ర‌య‌త్నాలు జ‌రిగిన‌ప్పుడే ద‌క్షిణ భార‌తీయులు హిందీ ప‌ట్ల వ్య‌తిరేక‌త‌ను పెంచుకున్నారు. ఇప్పుడిప్పుడే ప‌రిస్థితిలో మార్పు వ‌చ్చి క్ర‌మంగా ఇక్క‌డ హిందీ అభివృద్ధి చెందుతున్న ద‌శ‌లో ఏక‌రీతిన హిందీని రుద్దే ఆలోచ‌న మంచిది కాదు. ఇప్ప‌టికే మ‌న విద్యా వ్య‌వ‌స్థ అనేక లోపాల‌తో కునారిల్లుతున్న‌ది. ఇందులో త‌క్ష‌ణ సంస్క‌ర‌ణ‌లు చేప‌ట్టాల్సింది పోయి  హిందీ అంటూ ప‌ట్టుద‌ల‌కు పోతే విద్యార్ధులు న‌ష్ట‌పోతారు. ఇప్ప‌టికే ప‌వ‌న్ క‌ళ్యాణ్ వంటి కొంద‌రు రాజకీయ నేతలు 'హిందీ గోబ్యాక్' అంటూ బ‌హిరంగంగానే త‌మ వ్య‌తిరేక‌త‌ను వ్య‌క్తం చేస్తున్నారు. రానున్న రోజుల్లో ఇది ఉద్య‌మ రూపం దాల్చినా ఆశ్య‌ర్య‌పోన‌క్క‌ర్లేదు. ఇటువంటి ప‌రిస్థితుల్లో విద్యార్ధుల‌కు, విద్యా వ్య‌వ‌స్థ‌కు న‌ష్టం క‌లిగించే నిర్ణ‌యాల‌ను ప్ర‌భుత్వం తీసుకోకుండా ఉంటేనే మంచిది.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com