'బాహుబలి'ని మించిన హీరోలు ఉన్నారు!!

    ఇప్పుడు దేశం మొత్తం 'బాహుబ‌లి' మేనియాతో ఊగిపోతోంది. ఎక్క‌డ చూసినా, ఏ న‌లుగురు క‌లిసినా ఈ సినిమా కోసమే చ‌ర్చించుకుంటున్నారు. సినిమాకు అన్ని కోట్లు ఖ‌ర్చు పెట్టారు, ఇన్ని సెట్లు వేసారు. ఇంత వ‌సూలు చేస్తుంది..ఆ రికార్డులు గ‌ల్లంతే..ఇలా సాగుతోంది ఆ చ‌ర్చ‌ల సారాంశం. ఇక యువ‌త‌, విద్యార్ధులైతే చ‌దువును కాస్త ప‌క్క‌న పెట్టి టిక్కెట్లు ఎలా సంపాదించాలి?  అన్న దానిపై సీరియస్ గా దృష్టి సారించారు. సామాజిక సమ‌స్య‌ల ప్ర‌స్తావనే లేని ఓ ఫ‌క్తు క‌మ‌ర్షియ‌ల్ సినిమాను అదేదో దేశ‌భ‌క్తి సినిమా, ఆ సినిమా చూడ‌కుంటే జీవితం వృధా అన్న రీతిలో యువ‌త ఊగిపోవ‌డం విద్యావేత్త‌ల‌ను ఆందోళ‌న‌ప‌రుస్తోంది. సామాజిక స్పృహపై విద్యార్ధుల్లో నెల‌కొన్న అప‌రిప‌క్వ ఆలోచ‌నా విధానాన్ని ఈ ప‌రిణామం క‌ళ్ల‌కు క‌డుతోంది. సరిహద్దులో కాపలా కాసే సైనికులు, దేశానికి అన్నం పెట్టే రైతులే అసలుసిసలు హీరోలని తెలుసుకోకుంటే సినీ మాయలో సామాజిక స్పృహ కొట్టుకుపోయినట్టే. 

చ‌దువే కాదు స‌మాజాన్ని చ‌ద‌వండి!

      ఈ త‌రం విద్యార్ధి త‌ర‌గ‌తి గ‌దికే ప‌రిమిత‌మైపోతున్నాడు. బ‌య‌ట ప్ర‌పంచం అంటే ఏంటో తెలియ‌కుండా ఇళ్లు, పాఠ‌శాల అంటూ అత‌ని జీవితం నాలుగు గోడ‌ల‌కే ప‌రిమితం అయిపోతోంది. ఇక్క‌డే మ‌న విద్యా విధానం అతిపెద్ద ప్ర‌మాదం దిశ‌గా ప‌య‌నిస్తోంద‌ని నిపుణులు హెచ్చ‌రిస్తున్నారు. మ‌న ప్రాచీవ విద్యావిధానంలో విద్యార్ధిని ప్ర‌కృతితో, మ‌నుషుల‌తో, స‌మాజంతో మ‌మేకం చేసి వాటినుంచి పాఠాల‌ను బోధించే వారు.కానీ ప్ర‌స్తుత కార్పోరేట్ మార్కుల విద్యా విధానంలో విద్యార్ధికి స‌మాజం, ప్ర‌కృతి అంటే ఏమిటో కూడా తెలియ‌దు. అందుకే ఈ కాలంలో ఎన్ని చ‌దువులు చ‌దివినా సాటి మ‌నిషిని, ప్ర‌కృతిని గౌర‌వించే మాన‌వీయ విలువ‌లు విద్యార్ధుల్లో క‌నిపించ‌డం లేదు.  

సామాజిక స‌మ‌స్య‌ల‌ను తెలుసుకొండి 

     చుట్టూ ఉన్న‌ మ‌నుష్యులు, ప‌రిస్థితులు, స‌మ‌స్య‌లు ఇలా ప్ర‌తీ విష‌యాన్ని విద్యార్ధి అవ‌గాహ‌న చేసుకోవాలి. ఈ విష‌యంలో టీచ‌ర్స్ , పేరెంట్స్ కూడా త‌గిన జాగ్ర‌త్త‌లు తీసుకోవాలి. చిన్న‌త‌నం నుంచే త‌ల్లిదండ్రులు త‌మ పిల్ల‌ల‌కు డ‌బ్బు విలువ‌ను, స‌మ‌స్య‌కు స్పందించడం , సాటి వారికి సాయం చేయ‌డం, అన్యాయంపై నిల‌దీయ‌డం వంటివి నేర్పించాలి. విద్యార్ధులు కూడా ప్ర‌తీ రోజూ కొంత స‌మ‌యాన్ని త‌న‌చుట్టూ ఏం జ‌రుగుతుందో, ఏ స‌మ‌స్య‌లు ఉన్నాయో, సాటి మ‌నుష్యులు ఎన్ని బాధ‌లు ప‌డుతున్నారో అన్న విష‌యాలు తెలుసుకోవ‌డానికి కేటాయించాలి. దీని వ‌ల‌న సామాజిక స్పృహ పెరుగుతుంది. ఏ విష‌యానికి అధిక ప్రాధాన్య‌తనివ్వాలి, ఏ విష‌యాన్ని ప‌క్క‌న పెట్టాలి అన్న‌దానిపై స్ప‌ష్ట‌త వ‌స్తుంది. మ‌న దేశంలో వేలాదిమంది రైతులు ఆత్మ‌హ‌త్య‌లు చేసుకుంటున్నారు. కాలికి వేసుకునే చెప్పుల‌ను ఏసీ షోరూమ్ ల‌లో అమ్ముతుంటే, రైతులు పండించే పంట‌ను రోడ్డు ప‌క్క‌న అమ్ముకునే దుస్థితి ఇక్క‌డ ఉంది. ఇలాంటి విష‌యాల‌పై అవ‌గాహ‌న తెచ్చుకున్న‌ప్పుడు దేనికి ఎక్కువ ప్రాధాన్య‌త‌నివ్వాలి? అన్న విష‌యం తెలుస్తుంది. కేవ‌లం ప‌దివేల రూపాయ‌ల అప్పును తీర్చ‌లేక మ‌న దేశంలో రైతులు ఆత్మ‌హ‌త్య చేసుకుంటున్నారంటే విద్యార్ధులు స్పందించాల్సింది రైతు స‌మ‌స్య‌ల‌పైనా? వినోదం పంచే సినిమాల‌పైనా? 

ఆ రెండు విష‌యాలే మిమ్మ‌ల్ని కాపాడుతాయి!

     ప్ర‌తీ విద్యార్ధి త‌న చ‌దువు, వ్య‌క్తిత్వ నిర్మాణంపై అధిక దృష్టి కేంద్రీక‌రించాలి. బాగా చ‌దువుకున్న‌ప్పుడే వ్య‌క్తిగ‌త అభివృద్ధి సాధ్య‌మ‌వుతుంది. ప్ర‌ణాళిక బ‌ద్ధంగా, క‌ష్ట‌ప‌డి చ‌దివిన‌ప్పుడు అత్యున్న‌త ఫ‌లితాలు క‌చ్చితంగా వ‌స్తాయి. అదే స‌మయంలో విద్యార్ధులు వ్యక్తిత్వ నిర్మాణంపై కూడా దృష్టి పెట్టాలి. కుటుంబంపై శ్ర‌ద్ధ‌, సమాజంపై బాధ్య‌త‌, స‌మ‌స్య‌ల‌పై స్పంద‌న ఇలా అన్ని విష‌యాల్లోనూ ప‌రిపూర్ణ‌త సాధించాలి. అస్స‌లు ప్రాధాన్య‌త ఇవ్వ‌కూడ‌ని అంశాల‌కు అతిగా స్పందిచ‌డం మాని స‌మాజానికి ఉప‌యోగ‌ప‌డే విష‌యాలపై దృష్టి పెట్టాలి. త‌న మొద‌టి ప్రాధాన్య‌త కుటుంబానికి ఇచ్చి , మిగిలిన స‌మ‌యాల్లో స‌మాజంలో మ‌మేకం అవుతూ సామాజిక రుగ్మ‌త‌ల‌పై, స‌మ‌స్య‌ల‌పై స్పందించ‌డం నేర్చుకోవాలి. ఈ క్ర‌మంలో సోష‌ల్ మీడియాను ప్ర‌భావ‌వంతంగా ఉప‌యోగించుకోవాలి. స‌మ‌స్య‌ల‌ను అంద‌రికీ తెలియ‌జేస్తూ వారిలో చైత‌న్యం తెచ్చేందుకు ప్ర‌య‌త్నించాలి. అలా కాకుండా సినిమా విష‌యాల‌ను, టైం పాస్ వ్య‌వ‌హారాల‌ను చ‌ర్చిస్తే మిమ్మ‌ల్ని మీరు బాధ్యతాయుత‌మైన పౌరులుగా చెప్పుకోలేరు. ఒక కంపెనీ ఉత్ప‌త్తిని మీరు ప్ర‌చారం చేయ‌రు క‌దా? ఎందుకంటే వ్యాపారం చేసుకునే కంపెనీయే ఆ ప‌ని చూసుకుంటుంది. అలానే సినిమా కూడా ఒక వ్యాపార‌మే. వాళ్ల వ్యాపారం వాళ్లు చేసుకుంటారు? దేశంలో ఎన్నో స‌మ‌స్య‌ల‌ను గాలికొదిలి వాళ్ల సినిమా ప్ర‌చారాన్ని కూడా మీరే చేస్తామంటే మీకంటే అమాయ‌కులు, వెర్రివాళ్లు ఎవ‌రూ ఉండ‌రు. 

సినిమా అంటే కేవ‌లం 3 గంట‌ల వినోదం!

   ప్ర‌స్తుతం సినిమాలు అంటే నిజ‌జీవితంలో అస్సలు సాధ్యం కాని విష‌యాల‌ను 3 గంట‌ల్లో చేసి చూపించ‌డం (ప్రేర‌ణ‌నిచ్చే వాస్త‌విక సినిమాలు వీటికి మిన‌హాయింపు). వాటి అంతిమ ల‌క్ష్యం ప్రేక్ష‌కుల‌కు వినోదాన్ని పంచ‌డం. సినిమా చూసే వారు కూడా దాన్ని వినోదంగానే చూడాలి త‌ప్పితే సీరియ‌స్ గా తీసుకుంటే వాళ్ల‌కే న‌ష్టం. విద్యార్ధులు కూడా సినిమాలో మంచి విష‌యాల‌ను ప్రేర‌ణ‌గా తీసుకోవాలి.విద్యార్ధికి అయినా కెరీర్ లో అభ్య‌ర్ధికి అయినా స‌మ‌యం అనేది చాలా ముఖ్యం. ఇటువంటి విలువైన స‌మయాన్ని వేరొక‌రి వ్యాపారాన్ని ప్ర‌మోట్ చేయ‌డానికి ఉప‌యోగించ‌కండి. మీ విలువైన స‌మ‌యాన్ని కెరీర్ నిర్మాణానికి, సామాజిక స‌మ‌స్య‌ల ప‌రిష్కారానికి వినియోగించండి. అప్పుడే మాత్ర‌మే దేశానికి ఉప‌యోగ‌ప‌డే అస‌లు సిస‌లైన బాధ్య‌తాయుత‌మైన పౌరులు అనిపించుకుంటారు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com