ఈ 'కోర్టు'లో మీకు సత్వర న్యాయం గ్యారంటీ!

     ఆట..ఈ రెండ‌క్ష‌రాల చిన్న ప‌దంలో ఒక జీవితంలోని మొత్తం వేదాంతం దాగి ఉంటుంది. నిర్ణీత స‌మ‌య‌ వ్య‌వ‌ధి గ‌ల ఆటలో ఎన్నో ఆటుపోట్లు. గెలుపు, ఓట‌మి, బాధ, ఆనందం, శ్ర‌మ‌, త్యాగం ఇలా చెప్పుకుంటూ పోతే ఎన్నో. విచిత్రంగా జీవితమ‌నే ఆట‌లో కూడా ఇవ‌న్నీ ఉంటాయి. నిజ జీవిత ఆట‌లో గెల‌వాలంటే క్రీడా మైదానంలో కూడా స‌త్తా చూపించ‌గ‌ల‌గాలి. ఎందుకంటే క్రీడ‌ల్లో నైపుణ్యం ప్ర‌ద‌ర్శించే ఆట‌గాడు త‌న వ్య‌క్తిగ‌త జీవితంలో ఎదుర‌య్యే స‌వాళ్ల‌నూ స‌మ‌ర్ధవంతంగా అధిగ‌మించ‌గ‌ల‌డు. శారీరకంగానే కాదు మాన‌సికంగానూ మ‌నిషిని దృఢంగా త‌యారు చేసే క్రీడ‌ల్లో ప్ర‌తీ త‌ల్లిదండ్రులు త‌మ పిల్ల‌ల‌ను ప్రోత్సాహించాలి.అద్భుతాలు సృష్టించాల‌న్నా, ఆనందాన్ని పొందాల‌న్నా, ఆటు పోట్ల‌ను ఎదుర్కొనే ధైర్యం కావాల‌న్నా ఆట‌లే మ‌న ముందున్న త‌క్ష‌ణ నివారణోపాయాలు.

ఆట‌లు సామ‌ర్ధ్యాన్ని వెలికి తీస్తాయి!

      స్పోర్ట్స్ ఆడేవాళ్లు మామూలు వ్య‌క్తుల క‌న్నా శారీర‌క దృఢ‌త్వం క‌లిగి ఉంటార‌న్న‌ది తెలిసిన విష‌య‌మే. అయితే మానసిక దృఢ‌త్వంలోనూ క్రీడాకారులు సాధార‌ణ వ్య‌క్తుల కంటే 100 రెట్లు మెరుగ్గా ఉంటారు. గెల‌వ‌డం వ‌ల‌న వ‌చ్చే ఆనందంతో పాటు గెల‌వాల‌నే ప‌ట్టుద‌ల, త‌ప‌న వారిని ఉన్న‌త‌స్థానంలో నిలుపుతుంది. ఇక ఓట‌మి ఎదురైన‌ప్పుడు దాన్నుంచి త‌గిన పాఠాలు నేర్చుకుని తిరిగి ఎలా పైకి లేవాల‌న్న విష‌యాన్ని ఆట‌లు నేర్పించిన‌ట్టుగా ఇంకేవీ నేర్పించ‌లేవు. క్రీడ‌లు ఒక సాధార‌ణ‌ వ్య‌క్తిని అసాధార‌ణ‌ మ‌నిషిగా తీర్చిదిద్దుతాయి. అమెరికా మాజీ అధ్య‌క్షుడు బ‌రాక్ ఒబామా త‌న భార్య మిచెల్లీ ప్రేమ‌లో ఉన్న‌ప్పుడు ఆమె కుటుంబం నుంచి కొన్ని ప‌రీక్ష‌లు ఎదుర్కోవాల్సి వ‌చ్చింది. మిచెల్లీ కుటుంబం ఒబామాకు ఎన్ని విద్యార్హ‌త‌లు అన్న విష‌యం కంటే అత‌ను క్రీడ‌ల్లో చూపించే చొర‌వను, ఒడుపును చూసే ఆమెను అత‌నికిచ్చి వివాహం చేసేందుకు అంగీక‌రించారు. మైదానంలో ఆట‌గాడు చూపించే ప‌ట్టుద‌ల‌, శ‌క్తి సామ‌ర్ధ్యాలే అత‌ని జీవితంలో ఏం సాధిస్తాడ‌న్న‌ది నిర్ణ‌యిస్తాయి. మిచెల్లీ కుటుంబం ఒబామా సామ‌ర్ధ్యాన్ని, స‌త్తాను ముందుగానే గుర్తించ‌డానికి ఇదే  కార‌ణం. క్రీడ‌లు అనేవి మ‌నిషికి ఎంత అవ‌స‌ర‌మో తెలియ‌జేందుకే ఈ విష‌యాన్ని చెప్పాల్సి వ‌చ్చింది.

స‌త్వ‌ర న్యాయం ఆట‌ల్లోనే సాధ్యం!

     స‌త్వ‌ర న్యాయం ఆట‌ల్లో ఎలా సాధ్య‌మ‌వుతుందన్న సందేహం మీకు రావ‌చ్చు. మ‌న వ్య‌క్తిగ‌త జీవితంలో ఒక వ్య‌క్తి త‌నకు న్యాయం జ‌ర‌గ‌లేద‌ని భావిస్తే  కోర్టు, జిల్లా కోర్టు, హైకోర్టు, సుప్రీంకోర్టు ఇలా అన్ని కోర్టుల త‌లుపు త‌డ‌తాడు. క్రీడాకారుడికి మాత్రం ఆట‌లో ఇటువంటి స‌మ‌స్య‌లు ఎదురుకావు. అత‌నికి క్రీడా కోర్టులోనే త‌క్ష‌ణ న్యాయం జ‌రుగుతుంది. విజ‌య‌మా, అప‌జ‌య‌మా అన్న‌ది అదే కోర్టులో త‌క్ష‌ణం తేలిపోతుంది. దీంతో జ‌రిగిన‌దాన్ని అక్క‌డితో వ‌దిలేసి నూత‌న‌ శ‌క్తితో అత‌ను కొత్త స‌వాలుకు సిద్ధ‌మ‌వుతాడు. ఈ నైజ‌మే ఒక క్రీడాకారుడ్ని, ఒక సామాన్య మ‌నిషిని వేరు చేస్తుంది. ఆట‌లో త‌ను నేర్చుకున్న అద్భుత పాఠాల‌ను నిజ జీవితంలోనూ అన్వ‌యించుకుంటూ ఉన్న‌త స్థితికి చేరుకునేంద‌కు ఆట‌గాడికి అవ‌కాశ‌ముంది. కానీ క్రీడ‌ల‌పై ఆస‌క్తి లేని ఒక సామాన్యుడు ఇవ‌న్నీ సాధించాలంటే ఎంతో కృషి చేయాల్సి ఉంటుంది. ఎవ‌రిపై ఆధార‌ప‌డ‌కుండా స్వంత నిర్ణ‌యాలు తీసుకోవ‌డం, ఫ‌లితాల‌కు బాధ్య‌త వహించ‌డం క్రీడాకారులకు చిన్న‌తనం నుంచే అల‌వ‌డుతుంది. దీని వ‌ల‌న ఆత్మ‌విశ్వాసం పెరుగుతుంది. ప్ర‌స్తుతం చాలా మంది స్వంత నిర్ణ‌యాలు తీసుకోలేక‌, ప్ర‌తీదానికీ ఎవరో ఒక‌రిపై ఆధార‌ప‌డుతూ జీవితాన్ని, ఆత్మ‌విశ్వాసాన్ని పొగొట్టుకుంటున్నారు. ఇలాంటి ప‌రిస్థికి అడ్డుక‌ట్ట వేయాంటే పిల్ల‌లు క్రీడ‌ల‌పై ఆస‌క్తి పెంచుకునేలా త‌యారు చేయాల్సి ఉంది.

అద్భుతాలు ఆవిష్కృత‌మ‌వుతాయి!

      భార‌త నెంబ‌ర్ వ‌న్ బ్యాడ్మింట‌న్ క్రీడాకారిణి సైనా నెహ్వాల్ అయితే ఆట త‌న జీవితాన్ని మార్చేసింద‌ని ఎన్నో సంద‌ర్భాల్లో చెప్పుకుంటా వ‌స్తోంది. జీవితం అంటే క్రీడా జీవితం ఒక‌టే అనుకునేరు, తన వ్య‌క్తిగ‌త జీవితం కూడా ఆట వ‌ల్ల మారిపోయింద‌ని ఆమె వెల్ల‌డించింది. క‌ష్టాలు వ‌చ్చిన‌ప్పుడు ఎలా వ్య‌వ‌హ‌రించాలి, ఓట‌మిని ఎలా భ‌రించాలి, విజయం కోసం ఎలా క‌ష్ట‌ప‌డాలి అన్న విష‌యాల‌ను ఆటే నాకు నేర్పింద‌ని సైనా చెపుతోంది. వ్య‌క్తిగ‌త జీవితంలో ఎత్తు ప‌ల్లాలు చ‌విచూసిన‌ప్పుడు ఆట‌లో నేర్చుకున్న విష‌యాలే త‌న‌ను కాపాడాయ‌న్న‌ది ఆమె స్వీయ అనుభ‌వం. ఇక క‌ల‌లో కూడా ఊహించ‌ని అద్భుతాలు కూడా ఆట‌తోనే సాధ్యం. త‌ను చ‌దువుకున్న భార‌తీయ విద్యా భ‌వ‌న్ లో ఎక్క‌డో ఓ మూల కూర్చున్న సైనా, త‌న ఆట‌తో విజ‌యాలు సాధించి  అదే స్కూల్ లో ముఖ్య అతిధిగా వేదిక‌పై కూర్చోవ‌డం ఆమెకు మ‌ర్చిపోలేని అనుభూతి. ఇక ఒలింపిక్ పతకం సాధించిన పీ.వీ. సింధు జీవితం నేటి తరానికి స్పూర్తిదాయకం. ఆట ద్వారా ఎన్నో అవార్డులు, రివార్డులు ఆమె చెంతకు చేరాయి. ఆమె ప్రతిభను మెచ్చి ఏపీ ప్రభుత్వం డిప్యూటీ కలెక్టర్ ఉద్యోగం ఇచ్చింది. కేవలం ఉన్నత చదువులతోనే మంచి స్థానానికి చేరుకోవచ్చని భ్రమపడేవారికి ఈ క్రీడాకారులు విజయాలు ఒక పాఠం లాంటివి.  పిల్ల‌లు ఆట అన‌గానే చికాకుగా ముఖం పెట్టే త‌ల్లిదండ్రులు ఈ విష‌యాల్ని గ‌మ‌నించాలి. ఆట అనేది కెరీర్ లా కాక‌పోయినా పిల్ల‌వాడి మాన‌సిక , శారీర‌క వికాసానికి అవ‌స‌ర‌మ‌ని గుర్తిస్తే ఆరోగ్యవంత‌మైన విద్యార్ధుల త‌యార‌వుతారు.

క్రీడా సందేశం ఏంటో తెలుసా?

    ఇటీవ‌ల కాలంలో క్రీడా నేప‌థ్యంతో వ‌స్తున్న సినిమాల‌న్నీ  హిట్ అవుతున్నాయి. ఎందుకు..అంటే ఆయా సినిమాల్లో ఉండే ఆట‌తో ప్ర‌తీ ఒక్క‌రూ క‌నెక్ట్ అవుతారు కాబ‌ట్టి. దంగ‌ల్, సుల్తాన్, మేరీ క్యామ్, ధోనీ, సాలా ఖ‌దూస్ వంటి సినిమాల్లో క్రీడాకారులు వ్య‌క్తిగ‌త జీవితాల‌తో పాటు వారి క్రీడా జీవితాల్లోని ఆసక్తిక‌ర అంశాల‌ను చూపించారు. అంత‌ర్లీన‌యంగా అందులో ఉండే సందేశం, డ్రామా సాధార‌ణ వ్య‌క్తుల‌నూ చేర‌గ‌లుగుతుంది. క్ర‌మ‌శిక్ష‌ణ‌తో మెల‌గ‌డం, గురువుల‌ను గౌర‌వించ‌డం, ల‌క్ష్య సాధ‌న‌కు క‌ఠోర శ్ర‌మ చేయ‌డం ఇవ‌న్నీ క్రీడ‌లు మ‌న‌కు ఇచ్చే గొప్ప సందేశాలు. అయినా మ‌న దేశంలో త‌ల్లిదండ్రులు మాత్రం ఆట‌లు అన‌గానే ముఖం చిట్లిస్తారు. పిల్ల‌ల్ని ఇంజినీరింగ్ , డాక్ట‌ర్ చ‌దివించాల‌నే ప‌ట్టుద‌ల ఉండొచ్చు. కానీ వాళ్ల జీవితంలోంచి ఆట‌ల‌ను పూర్తిగా తొలిగించే మొండి ప‌ట్టుద‌ల స‌రికాదు. స‌రిగ్గా స‌మ‌య పాల‌న చేసుకుంటే విద్యార్ధుల జీవితంలో క్రీడ‌ల‌కూ చోటివ్వొచ్చు. మ‌నం ముందు చెప్పుకున్న‌ట్టు జీవిత‌మనే ఆట‌లో గెల‌వాలంటే నిజ‌మైన ఆట‌లో గెలుపోట‌ములు తెలిసుండాలి. లేకుంటే ఎవ‌రైనా బొక్క బోర్లా ప‌డాల్సిందే.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com