భ‌లే ఛాన్సులే..ల‌ల‌లాం..ల‌ల‌లాం..ల‌క్కీ ఛాన్సులే!

        పెద్ద నోట్ల ర‌ద్దు త‌ర్వాత భార‌త ఆర్థిక రంగంలో కొన్ని విప్ల‌వాత్మ‌క మార్పులు చోటుచేసుకున్నాయి. ముఖ్యంగా న‌గ‌దు ర‌హిత డిజిట‌ల్ లావాదేవీలు అనూహ్యంగా పెరిగాయి. అక్ర‌మ లావాదేవీల‌కు అడ్డుక‌ట్ట వేసేందుకు ప్ర‌భుత్వం మ‌రిన్ని చ‌ర్య‌లను చేప‌డుతోంది. ఆధార్ కార్డుతో పాన్ కార్డును అనుసంధానం చేసే ప్ర‌క్రియ ఇప్ప‌టికే ప్రారంభమైంది. త్వ‌ర‌లో వ‌స్తు సేవ‌ల ప‌న్ను (జీఎస్టీ) అమ‌ల్లోకి రానుంది. ఇవ‌న్నీ కెరీర్ టైమ్స్ లో ఎందుకు చెప్పాల్సి వ‌స్తుందంటే జ‌రుగుతున్న ఈ కీల‌క మార్పులు మ‌న దేశంలో ఆర్థిక సేవ‌ల రంగాన్ని కొత్త పుంత‌లు తొక్కిస్తున్నాయి. దీంతో ఈ రంగంలో వ‌చ్చే మూడేళ్ల‌లో వేల సంఖ్య‌లో ఉద్యోగాల క‌ల్ప‌న జ‌ర‌గ‌బోతోంది. విద్యార్ధులు స‌రైన ప‌ద్ధ‌తిలో దృష్టి పెట్టాలే కానీ ఈ సువ‌ర్ణావ‌కాశాన్ని అందిపుచ్చుకోవ‌డం ఏమంత క‌ష్టం కాదు.

ఈ ఛాన్స్ ను ఎవ‌రైనా అందిపుచ్చుకోవ‌చ్చు!

       ఆర్థిక సేవ‌ల రంగంలో స్థిర‌ప‌డాలంటే ఎకాన‌మిక్స్ చ‌ద‌వాలి. లేదంటే స్పెష‌లైజేష‌న్ కోర్సులు చేయాలి అనుకుంటే మీరు పొర‌ప‌డిన‌ట్టే. సాధార‌ణ బీకాం, బీఎస్సీ డిగ్రీల‌తో కూడా ఈ రంగంలో ఉద్యోగాలు పొంద‌వ‌చ్చు.ఈ విష‌యంలో మీకు మ‌రింత క్లారిటీ కావాలంటే ఆర్ధిక సేవ‌ల రంగం అంటే ఏమిటో ముందుగా తెలుసుకోవాల్సిందే. ఆర్ధిక సేవ‌ల రంగం అంటే చాలా మంది బ్యాంకింగ్ రంగ‌మే అని అనుకుంటారు. ఇది కొంత వ‌ర‌కే వాస్త‌వం. ఆర్థిక సేవ‌ల రంగంలో బ్యాంకుల‌తో పాటు బీమా, మ్యూచువ‌ల్స్ ఫండ్స్ , నాన్ బ్యాంకింగ్ ఫైనాన్సియ‌ల్ సంస్థ‌లు, స్టాక్ బ్రోకింగ్ కంపెనీలు కూడా ఉంటాయి. నోట్ల ర‌ద్దు త‌ర్వాత స్టాక్ మార్కెట్లోకి పెట్టుబ‌డుల ప్రవాహం పెరిగింది. గ‌డిచిన ఆర్ధిక సంవ‌త్స‌రంలో మ్యూచువ‌ల్ ఫండ్స్ పెట్టుబ‌డులు భారీగా పెరిగాయి. ఇక బీమా, సెకండ‌రీ మార్కెట్ కార్య‌కలాపాలు నిర్వ‌హించే బ్రోకింగ్ సంస్థ‌ల వ్యాపారం కూడా వృద్ధి చెందుతోంది. దీంతో ఇప్పుడు ఈ రంగంలో నైపుణ్యం క‌ల్గిన మానవ వ‌న‌రుల‌కు డిమాండ్ ఏర్ప‌డింది. స‌రైన ప్ర‌ణాళిక ఉండాలే కానీ ఇంజినీరింగ్ చ‌దివిన విద్యార్ధుల‌తో పాటు సాధార‌ణ డిగ్రీ అర్హ‌త‌గా ఉన్న‌ విద్యార్ధులు కూడా ఆర్ధిక సేవ‌ల రంగంలోకి ఎంట‌ర్ కావ‌చ్చు.

కెరీర్ కు ధీమా...బీమా రంగం!

    ఆర్థిక సేవ‌ల రంగంలో బ్యాంకుల త‌ర్వాత ఎక్కువ‌గా ఉద్యోగాలు క‌ల్పిస్తున్న‌ది ఇన్సూరెన్స్ రంగమే. రానున్న మూడేళ్ల‌లో బీమా రంగం వేలాది ఉద్యోగాలు క‌ల్పించ‌నున్న‌ది. ఒక అంచ‌నా ప్ర‌కారం స్పెష‌లైజ్డ్ విభాగాల‌కు సంబంధించి బీమా రంగానికి 2020 నాటికి 50 వేల మంది నిపుణుల అవ‌స‌ర‌ముంద‌ని తెలుస్తోంది. ఇన్సూరెన్స్ సెక్టార్ లో ఉన్నత శిఖ‌రాల‌కు చేరుకోవాలంటే యాక్చుయేరియ‌ల్ సైన్స్ అనే ప్ర‌త్యేక‌మైన కోర్సు చేయాల్సిందే. ఏ వ‌య‌స్సు వారికి ఎంత ప్రీమియం ప‌డుతుంది? ఒక పాల‌సీకి ఎంత ప్రీమియం ఉండాలి అన్న‌ది నిర్ణ‌యించేది యాక్చుయేరియ‌ల్ సైన్స్ నిపుణులే. ఈ యాక్చుయేరియ‌ల్ నిపుణుల అవ‌స‌రం బీమా కంపెనీల‌కు వేల‌ల్లో ఉంటే ఉత్తీర్ణ‌త సాధించి బ‌య‌ట‌కు వ‌స్తున్న వారి సంఖ్య వంద‌ల్లోనే ఉండ‌టం విశేషం. స‌రైన శ్ర‌ద్ధ‌, ప‌ట్టుద‌ల క‌న‌బ‌రిస్తే ఈ కోర్సు  పూర్తి చేసి బీమా రంగంలో ఉన్న‌త స్థానంలో స్థిర‌ప‌డ‌వ‌చ్చు. ఇక యాక్చుయేరియ‌ల్ నిపుణుల‌తో పాటు పాల‌సీ ప్రీమియం విధి విధానాలు త‌యారు చేసే అండ‌ర్ రైట‌ర్స్ నిపుణుల‌కు కూడా ఇన్సూరెన్స్ సెక్టార్ లో మంచి డిమాండ్ ఉంది. యాక్చుయేరియ‌ల్ సోసైటీ ఆఫ్ ఇండియాతో పాటు మ‌రికొన్ని సంస్థ‌లు కూడా ఈ నిపుణుల‌ను త‌యారు చేసేందుకు ప్ర‌త్యేక కోర్సుల‌ను నిర్వ‌హిస్తున్నాయి.

ప‌న్నులు, పెట్టుబ‌డులే మీకు భ‌రోసా!

     2020 నాటికి మ‌న దేశీయ క్యాపిట‌ల్ మార్కెట్స్ మూడింత‌ల వృద్ధిని న‌మోదు చేయ‌డం ఖాయ‌మ‌ని ఫిక్కీ విడుద‌ల చేసిన తాజా నివేదిక‌లో పేర్కొంది. దీంతో ఇప్పుడు మ్యూచువ‌ల్ ఫండ్ సెక్టార్ కూడా ఇప్పుడు ఉద్యోగాల‌ను క‌ల్పించ‌డంలో బీమా రంగం లానే ముందు వ‌రుస‌లో ఉంది. ఇన్వెస్ట‌ర్ల నిధుల‌ను స్టాక్ ఆఫ్ష‌న్స్ లో పెట్టుబ‌డులుగా పెట్టే మ్యూచువ‌ల్ ఫండ్ కంపెనీల‌కు రానున్న ఐదేళ్ల‌లో 35 వేల మంది నిపుణుల అవ‌స‌రం ఉంది. ఫండ్ మేనేజ‌ర్, రీసెర్చ్ అన‌లిస్ట్, ఆప‌రేష‌న్స్ అండ్ అడ్మినిస్ట్రేష‌న్ నిపుణుల విభాగంలో ఉద్యోగాలు రానున్నాయి. క్ల‌యింట్ అవ‌స‌రాల‌కు అనుగుణంగా ఏ కంపెనీ షేర్లు కొనాలి? ఏ కంపెనీల్లో పెట్టుబ‌డులు పెట్టాలి? వ‌ంటి విష‌యాల‌పై ప‌ట్టు సాధిస్తే ఈ రంగంలో ఉన్న‌త స్థానానికి చేరుకోవ‌చ్చు. నేష‌న‌ల్ స్టాక్ ఎక్స్ఛేంజీతో పాటు కొన్ని ఇనిస్టిట్యూట్ లు మ్యూచువ‌ల్ ఫండ్ రంగంపై ప్ర‌త్యేక కోర్సుల‌ను అందిస్తున్నాయి. మ్యూచువ‌ల్ ఫండ్స్ తో పాటు టాక్సేష‌న్ రంగం ఇటీవ‌లి కాలంలో విసృత‌మ‌వుతోంది. ప్ర‌స్తుతం అంద‌రూ టాక్స్ కార్యకలాపాల‌ను ప్ర‌త్యేక క‌న్స‌ల్టెన్సీల ద్వారానే నిర్వ‌హిస్తున్నారు. దీంతో టాక్సేష‌న్ నిపుణుల‌కు అవ‌స‌రం బాగా పెరిగిపోయింది. వ్య‌క్తిగ‌త టాక్స్ తో పాటు వెల్త్  టాక్స్, ఎక్సైజ్ టాక్స్ , కార్పోరేట్ టాక్స్ ఇలా ప‌లు ర‌కాల టాక్స్ ల పరిధి పెర‌గ‌డంతో వీరికి అవ‌కాశాలు వెల్లువ‌లా వ‌స్తున్నాయి. కంపెనీ సెక్ర‌ట‌రీతో పాటు సీఏ, ఐసీడ‌బ్ల్యుఏ కోర్సులు చేసిన వారి టాక్సేష‌న్ విభాగంలో మంచి అవ‌కాశాలు ఎదురు చూస్తున్నాయి.

నైపుణ్య‌ముంటే అవ‌కాశాల వెల్లువ‌!

    ఇక వీట‌న్నింటితో పాటు ఆర్థిక సేవ‌ల రంగంలో మ‌రో ముఖ్య‌మైన విభాగ‌మైన స్టాక్ మార్కెట్ల‌లో కూడా రానున్న రోజుల్లో అవ‌కాశాల‌కు కొదువ లేదు. 2022 నాటికి మ‌న దేశీయ స్టాక్ మార్కెట్ల‌కు 1.2 ల‌క్ష‌ల మంది నిపుణుల అవ‌స‌ర‌ముంద‌ని స‌ర్వేలు చెపుతున్నాయి. ట్రేడింగ్ విభాగంతో పాటు ఐపీఓ, రీసెర్చ్ ఆప‌రేష‌న్స్ లో ప‌లు అవ‌కాశాలు ఉన్నాయి. స్టాక్ మార్కెట్ నిపుణుల‌ను త‌యారు చేసేందుకు బాంబే స్టాక్ ఎక్స్ఛేంజీతో పాటు నేష‌నల్ స్టాక్ ఎక్స్ఛేంజీ కూడా ప్ర‌త్యేక కోర్సుల‌ను అందిస్తున్నాయి. అకౌంటింగ్ స్కిల్స్, స్టాక్ మార్కెట్ విష‌యాల్లో నేర్పుగా, అప్ర‌మ‌త్తంగా వ్య‌వ‌హ‌రించే ద‌క్ష‌త‌, వేగంగా స్పందించే గుణంతో పాటు సంద‌ర్భానుసారంగా నిర్ణ‌యాలు తీసుకునే వేగం, మార్కెట్ ప‌రిస్థితుల‌పై నిరంత‌ర అవ‌గాహ‌న ఉంటే ఆర్థిక సేవ‌ల రంగంలో మీదే భ‌విష్య‌త్.  మీకు వీటిలో ఆస‌క్తి ఉంటే  మీ నైపుణ్యాల‌ను పెంచుకుని మంచి ఉన్న‌త స్థానానికి చేరేందుకు ఇదొక సువ‌ర్ణావ‌కాశం.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com