అదృష్టాన్ని జేబులో పెట్టుకు తిరగడం ఎలా?

       జీవితంలో మ‌న‌కు ఏదీ సుల‌భంగా దొర‌క‌దు. క‌ష్ట‌ప‌డైనా లేదంటే పోరాటం చేసైనా దాన్ని సంపాదించుకోవాల్సిందే. ఇందులో ఎవ‌రికీ ఎటువంటి మిన‌హాయింపులు లేవు. ఉన్న‌త స్థానానికి ఎద‌గాల‌నుకుంటున్న వారు మ‌రీ ముఖ్యంగా వ్యాపారంలో రాణించి ధ‌న‌వంతులుగా మారాల‌నుకుంటున్న వాళ్లు కొన్ని విష‌యాలను త‌ప్ప‌క గుర్తుపెట్టుకోవాలి. భ‌విష్య‌త్ ను అంచ‌నా వేయ‌గ‌లిగే నైపుణ్యం, స‌వాళ్ల‌ను ఎదుర్కోగ‌లిగే ధైర్యం ఉన్నవాళ్లే వ్యాపారం అనే గోదాలో విజ‌యం సాధించ‌గ‌లుగుతారు. రేప‌టిని ద‌ర్శించే దూర‌దృష్టి, ఆర్థిక క్ర‌మ‌శిక్ష‌ణ‌, మ‌నుష్యుల‌తో వ్య‌వ‌హ‌రించే నేర్పు, ప‌రిస్థితుల‌కు త‌గ్గ‌ట్టు మార్పు చేసుకునే గుణం..ఇవ‌న్నీ ఉంటేనే విజ‌యం సాధ్య‌మ‌వుతుంది. విజ‌యవంత‌మైన వ్యాపార‌వేత్త‌గా, వంద‌లో ఒక‌డిగా వెలిగిపోవాలంటే అదృష్టం అనే సాధార‌ణ మందు కంటే నైపుణ్యం అనే దివ్యౌష‌ధం త‌ప్ప‌నిస‌రి.

నైపుణ్యం ఉంటే న‌క్క‌తోక తొక్కిన‌ట్టే!

      ఒక విజ‌యవంత‌మైన వ్య‌క్తి లేదా వ్యాపార‌స్తుడు వ‌రుస‌గా విజ‌యాలు సాధిస్తూ ఉంటే అంద‌రూ అత‌న్ని ఆకాశానికెత్తేస్తూ ఉంటారు. అత‌ను ప‌ట్టింద‌ల్లా బంగార‌మే అంటూ పొగ‌డ్త‌ల జ‌ల్లు కురిపిస్తారు. అలాగే ఇంకో వ్య‌క్తి వ్యాపారాల్లో న‌ష్ట‌పోతూ, అప్పుల పాల‌వుతూ ఇబ్బందులు ప‌డుతుంటే న‌ష్ట‌జాత‌కుడు అని విమ‌ర్శలు గుప్పిస్తారు. ఇది స‌మాజ ధ‌ర్మం. ఒక వ్య‌క్తి ప‌ట్టింద‌ల్లా బంగారం కావాలంటే అదృష్టం ఉండాలేమో కానీ ఏకంగా బంగారాన్నే ప‌ట్టుకోవాలంటే మాత్రం నైపుణ్యం ఉండాల్సిందే. ఒక వ‌స్తువు లేదా ఒక విష‌యం భ‌విష్య‌త్ లో బంగారం అవుతుంద‌ని ఊహించి దాన్ని ప‌ట్టుకోవ‌డ‌మే నైపుణ్యం. భ‌విష్య‌త్ ను దూర‌దృష్టితో ద‌ర్శించ‌గ‌లిగే నైపుణ్యమే బిల్ క్లింట‌న్, వారెన్ బ‌ఫెట్ ల‌ను  ప్ర‌పంచ కుబేరులను చేసింది. ఇప్పుడు వెల్లువ‌లా వ‌స్తున్న స్టార్ట‌ప్ లు కూడా దేనికి డిమాండ్ ఉందో, రానున్న రోజుల్లో మార్కెట్లో ఏది హ‌ల్ చ‌ల్ చేయ‌నుందో ఊహించి ప్రారంభిస్తున్న‌వే. నైన్ టూ ఫైవ్ జాబ్ తో జీవితం సాగుతుంది కానీ ధ‌న‌వంతులం ఎప్ప‌టికీ కాలేం అన్న‌ది గ్ర‌హించే చాలా మంది వ్యాపారాన్ని ఎంచుకుంటున్నారు. అయితే ఉద్యోగం చేయ‌డం అంత సుల‌భం కాదు వ్యాపారంలో రాణించడం. దానికి భ‌విష్య‌త్ ను ఊహించే నైపుణ్యంతో పాటు ప‌ని గంట‌లు చూసుకోకుండా క‌ష్ట‌ప‌డ‌గ‌లిగే ఇష్టం ఉండాలి.

వ్యాపారంలో మానసిక బ‌లం ఉండాలి!

       వ్యాపారంలో ఉన్న‌త స్థానానికి చేరాల‌నుకుంటున్న వాళ్లు ముందుగా త‌మ మానసిక స్థితిపై ఒక అంచ‌నాకు వ‌స్తే మంచిది. అదేంటి మాన‌సిక స్థితి స‌రిగా లేకుండానే వ్యాపారం మొద‌లుపెడ‌తారా అని సందేహం రావ‌చ్చు. ఇక్క‌డ మ‌నం చ‌ర్చింకుంటున్న మానసిక స్థితి అంటే వ్యక్తి యొక్క అల‌వాట్లు, జీవ‌న విధానం, మ‌నుష్యుల‌తో మెలిగే విధానం ఇలా విభిన్న విష‌యాల‌ను ప‌రిగ‌ణ‌న‌లోకి తీసుకోవాల్సి ఉంటుంది. ఉదాహ‌ర‌ణ‌కు మీరే ఒక వ్యాపారాన్ని ప్రారంభించి వ్యాపార‌వేత్త‌గా ఎద‌గాల‌నుకుంటున్నారు. అప్పుడు మీకు  ఉండాల్సిన,  ఉండ‌కూడ‌ని కొన్ని ల‌క్ష‌ణాలను చ‌ర్చిద్దాం. మ‌నం రోజువారీ చేసే చాలా చిన్న చిన్న ప‌నులు, అల‌వాట్లు మ‌న వ్యాపార భ‌విష్యత్ ను నిర్దేశిస్తాయి.

• మీరు అన్నం తినేట‌ప్పుడు కూర‌ల్లో వ‌చ్చే క‌రివేపాకును ప్లేట్ బ‌య‌ట ప‌డేస్తున్నారా?  లేక ప్లేట్ లో ఒక మూల‌గా ఉంచి భోజ‌నాన్ని కొన‌సాగిస్తున్నారా?  మీరు క‌రివేపాకును ప్లేట్ లోనే ఒక మూల‌గా ఉంచి ఒడుపుగా మీ భోజ‌నాన్ని చేసిన‌ప్పుడు మీరు మంచి వ్యాపార‌వేత్త‌గా రాణిస్తారు. ఎందుకంటే చిన్న చిన్న ఆటంకాల‌ను ఒడుపుగా ప‌క్క‌న పెట్టి మీ ప‌నిని నిర్వ‌హించుకునే సామ‌ర్ధ్యం మీకు జ‌న్మ‌తః ఉంది.

• మీ గ‌ది అంతా కాస్త మురికిగా, కొంచెం స‌ర్దిపెట్టి లేన‌ట్టు ఉందా?  లేక చ‌క్క‌గా పేర్చిన‌ట్టు మ్యూజియంలా ఉందా? గ‌ది కాస్త నిర్వ‌హ‌ణ లేన‌ట్టు ఉంచుకున్న వాళ్లే వ్యాపారవేత్త‌లుగా రాణిస్తారు.  రూమ్ ను మ్యూజియంలా చ‌క్క‌గా స‌ర్దుకుంటూ కూర్చుంటే వాళ్లు రూమ్ లోనే ఉండిపోతారు. బ‌య‌ట‌కెళ్లి వ్యాపారం చేయ‌లేరు!

• మీరు ట్రాఫిక్ లో వాహ‌నం డ్రైవ్ చేసుకుంటూ వెళ్తున్న‌పుడు కూడా మీ మాన‌సిక స్థితిని  మీరు అంచ‌నా వేసుకోవ‌చ్చు. ఎదుటి వ్యక్తి వాహ‌నాన్ని అనుస‌రించి వెళ్తున్నారా?  లేక ముందుగానే ఆ వ్య‌క్తి గమ‌నాన్ని అంచ‌నా వేసి దానికి అనుగుణంగా మీ వాహ‌న వేగంలో మార్పులు చేసుకుంటున్నారా? అవ‌స‌ర‌మైనప్పుడు గేర్లు మార్చి వేగం పెంచ‌గ‌లిగే వాడే వ్యాపారానికి స‌రిపోతాడు.

• మీరు రుణం ఇచ్చిన వారితో మ‌న‌సు విప్పి మాట్లాడే నేర్పు ఉండాలి. లేకుంటే వ్యాపారానికి అస్స‌లు ప‌నికిరారు. వ్యాపారంలో విభిన్న వ్య‌క్తుల నుంచి, సంస్థ‌ల నుంచి రుణాల‌ను స‌మీక‌రించాల్సి ఉంటుంది. ఎంతో మంది వ్య‌క్తుల‌తో డ‌బ్బుతో లావాదేవీలు నిర్వ‌హిస్తూ అది ఒక‌రి నుంచి మ‌రొక‌రికి ప్ర‌వ‌హించేలా చేయ‌గ‌లిగే సామ‌ర్ధ్యం ఉండాలి. ఇంగ్లీష్ అక్ష‌ర‌మాల‌లో ఉన్న 24 అక్ష‌రాల్లా విభిన్న వ్య‌క్తుల‌తో సావ‌ధానంగా వ్య‌వ‌హ‌రిస్తూ అంద‌రితో డ‌బ్బు వినిమ‌యం జ‌రిగేలా చేయ‌గ‌ల‌గాలి.

• ఉద‌యం 9 నుంచి సాయింత్రం 5  వ‌ర‌కు మాత్ర‌మే ప‌నిచేస్తాను అనే వాళ్లు వ్యాపారానికి అస్స‌లు ప‌నికిరారు. ఉద‌యం 5 నుంచి రాత్రి 9 వ‌ర‌కూ క‌ష్ట‌ప‌డ‌గ‌లిగే గుణం ఉంటేనే వ్యాపార‌వేత్త‌గా రాణించే అవ‌కాశం ఉంది.

నిజాయితీ లేకుంటే న‌ట్టేట మునుగుతారు!

      విజ‌య‌వంత‌మైన వ్యాపార‌వేత్త‌గా ఎద‌గాలంటే మ‌నం పైన చెప్పుకున్న మాన‌సిక ల‌క్ష‌ణాల‌కు తోడు మ‌రికొన్ని ముఖ్య‌మైన అర్హ‌త‌ల‌ను కూడా క‌లిగి ఉండాలి. అర్హ‌త‌లు అంటే విద్యార్హ‌త‌లు అనుకునేరు. వ్యాపారంలో అతి ముఖ్య‌మైన ఆ అర్హ‌త‌లు ఏంటంటే నిజాయితీ, మ‌నుష్యుల‌తో స‌రిగ్గా వ్య‌వ‌హ‌రిస్తూ సంబంధాల‌ను కాపాడుకునే నేర్పు . నిజాన్ని ఎంత‌మందిలో ఉన్నా నిర్భ‌యంగా నిజాయితీగా ఒప్పుకోవ‌డం మంచి వ్యాపార‌వేత్త ల‌క్ష‌ణాల్లో ఒక‌టి. ప్ర‌తీదానికి సిగ్గుప‌డుతూ, భ‌య‌ప‌డుతూ బెరుకుగా ఉండేవాళ్లు వ్యాపారానికి అస్స‌లు స‌రిపోరు. అదే విధంగా సోర్స్ ను అందించి వ్యాపారాభివృద్ధికి స‌హాయ‌ప‌డిన వారిని నిరంత‌రం గుర్తుపెట్టుకోవాలి. వాళ్ల‌కు త‌గిన ప్రోత్సాహ‌కం అందించాలి. ఎందుకంటే సోర్స్ అనేది న‌ది దాట‌టానికి ఉప‌యోగించే తెప్ప‌లాంటిది. న‌దిని దాటి తెప్ప‌ను త‌గ‌లేస్తే రెండో సారి న‌ది దాటాల్సి వ‌చ్చిన‌ప్పుడు ఇబ్బందుల్లో ప‌డ‌తారు. వ్యాపారవేత్త‌గా ఎద‌గాల‌నుకుంటున్న వాళ్లు ఈ విష‌యాన్ని గుర్తుపెట్టుకోవాలి. అలా తెప్ప‌ను వాడుకుని వ‌దిలేస్తే అది వ్యాపారానికి పెద్ద దెబ్బ‌లా మారుతుంది.

సంబంధాల‌ను ప‌దిలంగా చూసుకొండి!

    వ్యాపారంలో రిలేష‌న్ అనేది చాలా ముఖ్యం. వ్యాపార‌వేత్త‌లుగా రాణించాల‌నుకునేవాళ్లు రిలేష‌న్స్ కు అధిక ప్రాధాన్య‌త‌నివ్వాలి. ఎటువంటి క్లిష్ట ప‌రిస్థితుల్లోనూ మంచి సంబంధాల‌ను పొగొట్టుకోకుండా జాగ్ర‌త్త ప‌డాలి. నైపుణ్యం, మ‌నం పైన చ‌ర్చించుకున్న ల‌క్ష‌ణాల‌తో పాటు ఇచ్చిన మాట‌కు క‌ట్టుబ‌డి ఉండ‌టం అన్న ల‌క్ష‌ణం క‌లిగి ఉంటే రిలేష‌న్స్ ప‌దిలంగా ఉంటాయి. వ్యాపారంలో ఎత్తుప‌ల్లాలు స‌హ‌జం. అటువంటి సంద‌ర్భంగా మాన‌సిక బ‌లంతో ఆ ప‌రిస్థితిని అధిగ‌మించాలి. ఈ క్ర‌మంలో మ‌న ఇబ్బందుల‌ను క్ల‌యింట్ల‌కు తెలియ‌కుండా చూసుకోవాలి. మీ ఉత్ప‌త్తి ని ప్ర‌మోట్ చేసేట‌ప్పుడు ప‌రిధిల్లోనే ఉండండి. ఇంట‌ర్నెట్ వినియోగం పెరిగాక అంద‌రికీ అన్ని విష‌యాల‌పై అవ‌గాహ‌న పెరిగింది. కాబట్టి అవ‌త‌లి వ్య‌క్తి తెలివైన వాడు అన్న దృష్టికోణంలోనే మ‌న ప్ర‌చారం ఉండాలి. పట్టింద‌ల్లా బంగారం కావ‌డం అన్న‌ది అదృష్టం కావ‌చ్చు. కానీ అదృష్టం అనే ప‌దాన్ని నైపుణ్యంగా మార్చుకుంటే మీకు వ్యాపార రంగంలో ఇక తిరుగే ఉండ‌దు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com