బాబూమోహన్..అజారుద్దీన్..నారాయణ..???

    పిల్ల‌లు త‌ల్లిదండ్రుల క‌ల‌ల‌కు, ఆశ‌ల‌కు ప్ర‌తిరూపాలు. ప్ర‌కృతి సూత్రాల ప్ర‌కారం ఈ ప్ర‌పంచంలో ప్ర‌తీ జీవి త‌న పిల్ల‌ల‌ను కంటి రెప్ప‌లా కాపాడుకుంటుంది. అయితే తెలివితేట‌ల్లో మిగ‌తా జీవుల కంటే ఎంతో ఉన్న‌తమైన స్థితిలో ఉన్న మ‌నిషి మాత్రం పిల్ల‌ల పెంపకం విష‌యంలో త‌న భాద్య‌త‌ల‌ను మ‌రుస్తున్నాడు. అభివృద్ధి మంత్రం జ‌పిస్తూ టెక్నాల‌జీ వెంట ప‌రుగు తీస్తూ కొన్ని విష‌యాల్లో తిరిగి రాతియుగ‌పు అజ్ఞాన‌పు స్థితికి చేరుకుంటున్నాడు. ఈ కాలంలో పిల్ల‌ల‌కు ఎంత మంచి చ‌దువులు చెప్పించినా, ఎన్ని ఆస్తులు కూడ‌బెట్టినా వాళ్ల‌పై స‌రైన ప‌ర్య‌వేక్ష‌ణ లేకుంటే అవ‌న్నీ బూడిద‌లో పోసిన ప‌న్నీరే అవుతాయి. తాజాగా నారాయ‌ణ విద్యాసంస్థ‌ల అధినేత‌, ఏపీ మంత్రి నారాయ‌ణ కుమారుడు నిషిత్ మ‌ర‌ణం మ‌న‌కు కొన్ని గుణపాఠాలు నేర్పింది. వృత్తిగ‌తంగా ఎంత ఉన్న‌తంగా ఎదిగినా ఎంత బిజీగా ఉన్నా పిల్ల‌ల‌పై త‌ల్లిదండ్రుల‌కు ప‌ర్య‌వేక్ష‌ణ ఉండాల‌న్న‌దే ఆ విలువైన గుణ‌పాఠం.

స‌రిదిద్ద‌డంలో స‌రిహ‌ద్దులా..?

      పిల్ల‌లు ఎంత పెద్ద వాళ్లైనా  త‌ల్లిదండ్రుల దృష్టిలో వాళ్లు ఎప్ప‌టికీ చిన్న‌పిల్ల‌లే. కానీ పిల్ల‌లు పెరుగుతున్న ఒక్కో ద‌శ త‌ల్లిదండ్రుల‌కు కొత్త బాధ్య‌త‌ల‌ను మోసుకొస్తుంది. ముఖ్యంగా వాళ్ల క‌ళాశాల స్థాయికి వ‌చ్చేస‌రికి వాళ్లపై ప‌ర్య‌వేక్ష‌ణ త‌ప్ప‌నిస‌రి. ప‌ర్య‌వేక్ష‌ణ అంటే పిల్ల‌ల్ని అనుక్ష‌ణం వెంటాడుతూ, వాళ్ల స్వేచ్ఛ‌ను హ‌రించి, వాళ్ల‌ను అనుమానించ‌మ‌ని కాదు. వాళ్ల‌కు స‌రైన ప్రేమ‌ను పంచుతూనే వాళ్లు ఏం చేస్తున్నారు? బ‌య‌ట ఎలా ప్ర‌వ‌ర్తిస్తున్నారు? ఎటువంటి అల‌వాట్ల‌ను క‌లిగి ఉన్నారు? వాళ్ల భావోద్వేగాల్లో ఏమైనా విప‌రీత‌మైన మార్పులు చోటుచేసుకుంటున్నాయా? అన్న విష‌యాల‌ను త‌ల్లిదండ్రులు నిశితంగా గ‌మ‌నించాలి. ల‌క్షలాది మంది విద్యార్ధుల‌కు విద్యా బుధ్దులు నేర్పి వాళ్ల‌ను గాడిన పెట్టే మ‌హ‌త్త‌ర బాధ్య‌త‌ను నెత్తిన పెట్టుకున్న నారాయ‌ణ విద్యా సంస్థల‌కు అధిప‌తి, నారాయ‌ణ‌. అటువంటి నారాయ‌ణ గారికే త‌న క‌న్న కొడుకుపై స‌రైన ప‌ర్య‌వేక్ష‌ణ లేక‌పోవ‌డం విచార‌క‌రం. (ఈ విషాద స‌మ‌యంలో ఆయ‌న్ను మ‌రింత బాధ‌పెట్టాల‌న్న‌ది మా ఉద్దేశ్యం కాదు.  దీని వ‌ల‌న తల్లిదండ్రుల ఆలోచ‌న‌లో మార్పు వ‌స్తే మంచిద‌న్న‌దే మా కోరిక‌) గ‌తంలో వేగంగా కారు డ్రైవ్ చేస్తూ చాలా సంద‌ర్భాల్లో నితీష్ పోలీసుల‌కు దొరికిపోయాడు. అప్పుడే నారాయ‌ణ గారు త‌న కొడుకును మందలించి, త‌ను ఏం చేస్తున్నాడో, ఎలా డ్రైవ్ చేస్తున్నాడో గ‌మ‌నిస్తూ త‌గిన ప‌ర్య‌వేక్ష‌ణా చ‌ర్య‌లు తీసుకుంటే ఇంత పెద్ద విషాదం చోటుచేసుకునేది కాదు. పేరెంటింగ్ లో అతి ముఖ్య‌మైన ప‌ర్య‌వేక్ష‌ణ‌ను త‌న కొడుకు విష‌యంలో నారాయ‌ణ గారు స‌రిగ్గా చేయ‌క‌పోవ‌డ‌మే అత‌నికి గుండె కోత‌ను మిగిల్చింది.

విషాదాల నుంచి పాఠాలు నేర్వ‌కుంటే ఎలా?

      విద్యార్ధులు క‌ళాశాల స్థాయికి వ‌చ్చినప్పటి నుంచి వాళ్లలో భావోద్వేగాల ప‌రంగా చాలా మార్పులు చోటుచేసుకుంటాయి. నిజం చెప్పాలంటే స‌రిగ్గా ఇక్క‌డే వాళ్ల‌కు త‌ల్లిదండ్రుల అవ‌స‌రం  అధికంగా ఉంటుంది. బ‌య‌ట ప్ర‌పంచంలో ఊరిస్తున్న ఎన్నో వక్ర‌మార్గాలైన‌ చెడు స్నేహాలు, ప్రేమ వ్య‌వ‌హారాలు, మ‌ద్య‌పానం, డ్ర‌గ్స్ వాళ్ల‌ను ఉచ్చులోకి లాగేస్తాయి. ఇటువంటి ద‌శ‌లోనే త‌ల్లిదండ్రులు వాళ్ల‌ను, వాళ్ల మానసిక స్థితిని అదుపులో పెట్టాలి. వాళ్ల‌కు స‌రైన ల‌క్ష్యం ఏర్ప‌రిచి, వాళ్ల‌కు డ‌బ్బు విలువ‌ను, వ‌స్తువుల విలువ‌ను, కాలం విలువ‌ను, జీవితం విలువ‌ను నేర్పించాలి. డ‌బ్బుతో వ‌చ్చే సౌక‌ర్యాల‌ను వాళ్ల‌కు విచ్చ‌ల‌విడిగా అందేలా చేస్తే వాళ్ల బంగారు భ‌విష్య‌త్ నాశ‌నం కావ‌డం త‌థ్యం. ఈ విష‌యంలో త‌ల్లిదండ్ర‌లు త‌గిన జాగ్ర‌త్త‌లు వ‌హించాలి. భావోద్వేగాల ప‌రంగా హైప‌ర్ గా ఉన్నవాళ్ల‌కు వాహ‌నాల‌ను కొనివ్వ‌డం, డ‌బ్బును అందించ‌డం చేస్తే వాళ్ల జీవితాన్ని నాశ‌నం చేసిన వాళ్ల‌వుతారు. డిగ్రీ కూడా పూర్తికాకుండానే స‌రైన ఉపాధిలో కుదురుకోకుండానే చాలా మంది ధ‌న‌వంతుల పిల్ల‌లు పెద్ద ఖ‌రీదైన కార్ల‌ను, బైక్ ల‌ను న‌డుపుతున్నారు. ఆ ఖ‌రీదైన కార్ల‌లో వేగంగా దూసుకుపోవ‌డంలో ఆనందాన్ని వెతుక్కుంటూ అత్యంత విలువైన జీవితాల‌ను అర్థాంత‌రంగా ముగిస్తున్నారు.

పర్యవేక్షణ లోపమే ఈ శాపం!

     గ‌తంలో ఎంద‌రో ప్ర‌ముఖుల పిల్ల‌లు, యువ‌కులు మితిమీరిన వేగంతో ప్ర‌యాణిస్తూ తమ ప్రాణాల‌ను పొగొట్టుకున్నారు. త‌ల్లిదండ్రులు ఎంత ఉన్న‌త స్థితిలో ఉన్నా పిల్ల‌ల‌పై విప‌రీత‌మైన ప్రేమ‌, ప‌ర్య‌వేక్ష‌ణ లోపం వ‌లనే ఈ విషాదాలు చోటుచేసుకున్నాయి. ఆ కుటుంబాల‌కు క‌లిగిన బాధ‌ను, విషాదాన్ని పంచుకోలేక‌పోయినా వాటి నుంచి గుణ‌పాఠ‌మైనా నేర్చుకోవాలి క‌దా?

• సినీ న‌టుడు బాబూ మోహ‌న్ కుమారుడు 2003 లో బైక్ యాక్సిడెంట్ లో చ‌నిపోయారు.

• సినీ న‌టుడు కోట శ్రీనివాస‌రావు కుమారుడు 2010 లో ఔట‌ర్ రింగ్ రోడ్ లో త‌న హైస్పీడ్ బైక్ కు జ‌రిగిన ప్ర‌మాదంలో చ‌నిపోయారు.

• 2011 లో ఔట‌ర్ రింగ్ రోడ్డులో మాజీ క్రికెట‌ర్ అజారుద్దీన్ కుమారుడు మ‌ర‌ణించారు. ఈయ‌న ప్ర‌యాణిస్తున్న హైఎండ్ బైక్ ప్ర‌మాదానికి గురైంది.

• 2011 లో మాజీ మంత్రి కోమ‌టిరెడ్డి వెంక‌ట్ రెడ్డి కుమారుడు ప్ర‌తీక్ రెడ్డి ప్ర‌యాణిస్తున్న‌కారు ఓఆర్ఆర్ లో ప్ర‌మాదానికి గురైంది. ఈ ప్ర‌మాదంలో ప్ర‌తీక్ తో పాటు మ‌రో ఇద్ద‌రు మ‌ర‌ణించారు.

• 2012 లో మాజీ మంత్రి పులి వీరన్న కుమారుడు ప్ర‌వీణ్ తేజ కూడా ఓఆర్ఆర్ లో జ‌రిగిన కారు ప్ర‌మాదంలో మ‌ర‌ణించారు.

• 2015 లో మాజీ డీజీపీ పేర్వారం రాములు మ‌నుమ‌డు వ‌రుణ్ ప‌రార్ కూడా కారు ప్ర‌మాదంలో మ‌ర‌ణించారు.

• 2017 లో ఏపీ మంత్రి నారాయ‌ణ కుమారుడు నిషిత్ కూడా కారు ప్రమాదంలోనే మ‌ర‌ణించారు.

ప్రేమ‌ను, ప‌ర్య‌వేక్ష‌ణను స‌మ‌న్వ‌యం చేసుకోండి!

       ప్ర‌తీ త‌ల్లిదండ్రుల‌కు త‌మ పిల్ల‌లంటే అప‌రిమిత‌మైన ప్రేమ ఉంటుంది. ఉండాలి కూడా. కానీ ప్రేమ వ్యామోహంగా మారిన‌ప్పుడే అస‌లు స‌మ‌స్య వ‌చ్చిప‌డుతుంది. పిల్ల‌ల‌పై ఎంత ప్రేమ ఉన్నా వాళ్ల‌ను అదుపులో పెట్టే ప‌ర్య‌వేక్ష‌ణ చాలా ముఖ్యం. లేకుంటే అది విప‌రిణామాల‌కు దారితీస్తుంది. మ‌ధ్య‌త‌ర‌గ‌తి కుటుంబాల్లో కంటే ఆర్థికంగా స్థిర‌ప‌డిన కుటుంబాల్లోనే పిల్ల‌ల‌పై ప‌ర్య‌వేక్ష‌ణ క‌ర‌వుతున్న‌ట్టు స్ప‌ష్ట‌మ‌వుతోంది. డ‌బ్బు సంపాద‌న‌, వృత్తి, వ్యాపారాల్లో బిజీగా గ‌డుపుతూ పిల్ల‌లు ఏం చేస్తున్నారు? ఎలా ప్ర‌వ‌ర్తిస్తున్నార‌న్న విష‌యాన్ని విస్మ‌రిస్తున్నారు. పిల్ల‌ల‌కు ప్రేమ‌తో పాటు వాళ్ల‌కు కొంచెం క‌ట్ట‌డి కూడా పెట్టాలి. ఉరికే న‌దికి అడ్డుక‌ట్ట వేయ‌కంటే వృధాగా స‌ముద్రం పాల‌వుతుంది. అలానే ఉడుకుర‌క్తంతో ఉర‌క‌లేసే యువ‌త‌కు కూడా త‌ల్లిదండ్రులు ప‌గ్గాలు వేయాలి. ప్రేమ‌ను పంచుతూనే ఏది మంచి ఏది చెడు..ఈ ప‌ని చేయ‌డం వ‌ల‌న క‌లిగే ప‌ర్య‌వ‌సానాలు ఏమిటి? అన్నదానిపై వాళ్ల‌కు అనుభ‌వ‌పూర్వ‌కంగా వివ‌రించాలి. అలా కాకుండా డ‌బ్బు, వ్యాపారం, కెరీర్ అంటూ వాళ్ల‌ను ప‌ట్టించుకోనంత బిజీ అయితే వాళ్ల జీవితం అస్త‌వ్య‌స్థ‌మ‌వుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com