'దిశా నిర్దేశం' చేస్తూ మీ దశను మార్చుకోండి!

     ప్ర‌తీ ఒక్క‌రి జీవితంలో రెండు విష‌యాలు చాలా సంక్లిష్ట‌త‌తో కూడుకున్న‌వి. ఒక‌టి జీవిత భాగ‌స్వామి ఎంపిక.. రెండు కెరీర్ ఎంపిక‌. ఈ రెండు విష‌యాల్లో స‌రైన నిర్ణ‌యం తీసుకోకుంటే జీవితం క‌ష్టాల‌పాల‌వుతుంది. అయితే వీటి విష‌యంలో స‌రైన నిర్ణ‌యం తీసుకోవ‌డమ‌నేది అంత ఆషామాషీ విష‌య‌మేమీ కాదు. ముఖ్యంగా మ‌న మ‌న‌సుకు, మ‌న సామ‌ర్ధ్యానికి త‌గ్గ కెరీర్ ను ఎంచుకోవ‌డం కొంచెం క‌ష్ట‌మైన ప‌నే. స‌రిగ్గా ఇక్క‌డే కెరీర్ కౌన్సిల‌ర్లు కీలక పాత్ర పోషిస్తారు. ఏ చ‌దువు చ‌ద‌వాలో  ఏ ఉద్యోగం చేయాలో స‌త‌మ‌త‌మ‌వుతున్న‌వారికి కెరీర్ కౌన్సిల‌ర్లు దిశా నిర్దేశం చేస్తారు. ఒక విధంగా చెప్పాలంటే ప్ర‌వాహంలో అదుపు త‌ప్పే నావ‌ను స‌రైన దిక్కుకు న‌డిపించే చుక్కాని లాంటి వాళ్లు కెరీర్ కౌన్సిల‌ర్లు. కెరీర్ ఎంపిక అనేది క‌త్తిమీద సాములా మారిన ప్ర‌స్తుత ప‌రిస్థితుల్లో కెరీర్ కౌన్సిల‌ర్ల అవ‌సరం బాగా పెరిగింది. స‌రైన ప‌నితీరు క‌న‌బ‌ర్చాలే కానీ కెరీర్ కౌన్సిలింగ్ ను వృత్తిగా ఎంచుకున్న వారి భ‌విష్య‌త్ కు ఎటువంటి ఢోకా ఉండ‌దు!  

కెరీర్ కౌన్సిలింగ్ అంటే..? 

     ఒక‌ప్పుడు మ‌న స‌మాజంలో ఉమ్మ‌డి కుటుంబాలు ఉండేవి. అమ్మ‌, నాన్న‌, తాత‌య్య‌, నాన్న‌మ్మ‌, పెద‌నాన్న‌, పెద్ద‌మ్మ ఇలా అంద‌రు కుటుంబ స‌భ్యులు క‌లిసి మెలిసి జీవించేవారు. కుటుంబంలో ఎవ‌రికైనా ఏదైనా క‌ష్టం వ‌స్తే వారికి త‌గిన స‌ల‌హా ఇచ్చి స‌మ‌స్య‌ను ప‌రిష్కారం చేసేవారు. కానీ ప్ర‌స్తుత సామాజిక ప‌రిస్థితుల్లో అటువంటి ఆత్మీయ ప‌రిష్కారం క‌ర‌వ‌వుతోంది. అటువంటి ఆత్మీయ, న‌మ్మ‌క‌మైన స‌ల‌హా ఇచ్చే ఒక స‌న్నిహితుని పాత్ర పోషించేదే కెరీర్ కౌన్సిలింగ్. మిమ్మ‌ల్ని మీరు సంపూర్ణంగా తెలుసుకుని చేయాల్సిన పనికి అనుగుణంగా అవ‌స‌ర‌మైన విద్య, శారీర‌క‌, మాన‌సిక అర్హ‌త‌ల‌ను సాధించేందుకు కెరీర్ కౌన్సిలింగ్ విద్యార్ధుల‌కు, ఉద్యోగుల‌కు ఉప‌యోగ‌ప‌డుతుంది. దీంతో పాటు ప‌ని, వ్య‌క్తిగ‌త జీవితంలో తీసుకోవాల్సిన ముఖ్య‌మైన విష‌యాల‌ను ఎలా స‌మ‌న్వ‌యం చేసుకోవాలో కూడా తెలియజేస్తుంది. గ్రాడ్యుయేష‌న్ పూర్తి అయ్యాక ఉద్యోగాన్ని ఎంచుకోవాలా? లేక మ‌రిన్ని అర్హ‌త‌ల‌ను పెంచుకోవాలా? అన్నదానిపై నిర్ణ‌యం తీసుకోవ‌డం విద్యార్ధుల‌కు అంత సులువేమీ కాదు. అయితే ఈ విష‌యంలో కెరీర్ కౌన్సిల‌ర్లు స‌హాయం తీసుకుంటే అద్భుత‌మైన ఫ‌లితాల‌ను సాధించ‌వ‌చ్చు. విద్యార్ధులు శారీర‌కంగా, మాన‌సికంగా, ఉద్వేగాల ప‌రంగా స‌రైన నిర్ణ‌యాలు తీసుకోవ‌డం ప్రొఫెష‌న‌ల్ కౌన్సిలింగ్ తో సాధ్య‌మ‌వుతుంది. త‌న సామ‌ర్ధ్యాల‌కు అనుగుణంగా నైపుణ్యాల‌ను పెంచుకుని చ‌దువులోనూ ఆ త‌ర్వాత ఉద్యోగంలోనూ రాణించందుకు కెరీర్ కౌన్సిలింగ్ ఎంత‌గానో ఉప‌యోగ‌ప‌డుతుంది. 

కెరీర్ కౌన్సిల‌ర్ పాత్ర చాలా కీల‌కం!

    మనం ఇందాక చెప్పుకున్న‌ట్టు కెరీర్ కౌన్సిల‌ర్, విద్యార్ధికి ఒక స‌న్నిహిత మిత్రుడులాంటివాడు. విద్యార్ధికి ఉన్న సామ‌ర్ధ్యం, ఆస‌క్తి, ప్ర‌తిభ‌, వ్య‌క్తిగ‌త వైఖ‌రి ఇలా విభిన్న అంశాల‌ను బేరీజు వేసి అత‌ను ఎంచుకోవాల్సిన చ‌దువు, కెరీర్ విష‌యంలో కెరీర్ కౌన్సిల‌ర్ కీల‌క పాత్ర నిర్వ‌ర్తిస్తాడు. వాస్త‌వ పరిస్థితుల‌ను అంచ‌నా వేసి విద్యార్ధి స్వ‌తంత్రంగా నిర్ణ‌యాలు తీసుకోవ‌డంలో స‌హాయ‌ప‌డ‌తాడు. కెరీర్ కౌన్సిలింగ్ అనేది ప్ర‌ధానంగా నాలుగు అంశాల మీద ఆధారప‌డి ఉంటుంది. 

• వ్య‌క్తుల‌కు సంబంధించి వాళ్ల‌కుండే ఆస‌క్తులు, విలువ‌లు, సామ‌ర్ధ్యాలు, వ్య‌క్తిగ‌త జీవ‌న విధానం ఆధారంగా వాళ్ల‌లో స్వీయ చైత‌న్యం క‌లిగించడం.

• ఉద్యోగ అవ‌కాశాలు, స‌మాచారం, వ‌స‌తులతో విద్యార్ధుల‌ను అనుసంధానం చేసి వాళ్లకు చ‌దువు, కెరీర్ పై మ‌రింత అవ‌గాహ‌న క‌ల్పించ‌డం 

• విద్యార్ధులను స్వంతంగా నిర్ణ‌యాలు తీసుకునే విధంగా త‌యారు చేసి, ఆస‌క్తులు, విలువ‌లు, సామ‌ర్ధ్యాల‌కు అనుగుణంగా వాళ్లు స‌రైన కెరీర్ ను ఎంచుకునేలా తీర్చిదిద్ద‌డం.

• ఉద్యోగాన్వేష‌ణ‌లో పాటించాల్సిన మెళుకువ‌లతో పాటు  ఉద్యోగ జీవితంలో ఒడిదుడుకులు, మార్పులు, అభివృద్ధిలో వాళ్ల‌కు త‌గిన స‌ల‌హాలు ఇవ్వడం. 

ఈ అర్హ‌తలు ఉంటే కెరీర్ కౌన్సిల‌ర్ గా రాణించొచ్చు!

    కెరీర్ కౌన్సిల‌ర్ గా కెరీర్ ను ప్రారంభించేందుకు ప్ర‌త్యేకమైన విద్యార్హ‌త‌లు అవ‌స‌రం లేదు కానీ విష‌యాల్లో ప్రావీణ్య‌త ఉంటే ఇందులో రాణించవ‌చ్చు. సైకాల‌జీ, సోషియాల‌జీ, సోష‌ల్ వ‌ర్క్స్ లో గ్రాడ్యుయేష‌న్ చేసిన వాళ్లకు కెరీర్ కౌన్సిలింగ్ న‌ప్పుతుంది. ఇక వీటిల్లో పోస్ట్ గ్రాడ్యుయేష‌న్ డిప్లొమో చేస్తే మ‌రింత‌గా కెరీర్ లో దూసుకుపోవ‌చ్చు. ముఖ్యంగా సైకాల‌జీ చ‌దివిన వాళ్ల‌కు మ‌నుష్య స్వ‌భావం, ఉద్వేగాల‌కు స్పందించే విధానంపై ప‌ట్టు ఉంటుంది కాబ‌ట్టి వాళ్లు సులువుగా ఈ కెరీర్ లో ఇమిడిపోగ‌లుతారు. ఇటీవ‌లి కాలంలో టీచింగ్ వృత్తిలో ఉన్న‌వాళ్లు అందులో మంచి అనుభ‌వం ఉన్న‌వాళ్లు కెరీర్ కౌన్సిల‌ర్స్ గా రాణిస్తున్నారు. అయితే ఈ అర్హ‌త‌ల‌కు తోడు కెరీర్ కౌన్సిల‌ర్ కు కొన్ని ప్ర‌త్యేకమైన నైపుణ్యాలు క‌చ్చితంగా ఉండాల్సిందే. అవి ఏంటంటే..

• మంచి ప్ర‌భావ‌వంత‌మైన, ఎదుటి వాళ్ల‌ను ఆక‌ట్టుకోగ‌లిగే భావవ్యక్తీక‌ర‌ణ‌.

• పుస్త‌క ప‌ఠ‌నంపై ఆస‌క్తి ఉండి, వివిధ రంగాల‌కు చెందిన విష‌యాల‌పై ప‌ట్టు. 

• స‌హ‌నం క‌లిగి ఉండి అవ‌త‌లి వ్య‌క్తులు చెప్పే విష‌యాన్ని ఆస‌క్తిగా వినే నేర్పు. 

• ఒక విష‌యంపై వెంట‌నే అభిప్రాయానికి రాకుండా, ఎదుటి వాళ్ల చెప్పే స‌మ‌స్య‌ను ప‌రిష్క‌రించే మాన‌సిక ప‌రిప‌క్వ‌త‌.

• స‌మ‌కాలీన విషయాల‌పై ఎప్ప‌టిక‌ప్పుడు అప్ డేట్ అవుతూ అన్ని విష‌యాల‌పై ప‌ట్టు క‌లిగి ఉండాలి.

• ఎదుటి వ్య‌క్తుల‌కు స‌హాయం చేయాల‌నే మ‌న‌స్త‌త్వంతో పాటు కాస్త సున్నిత‌త్వం ఉండాలి.

• ప్రోత్సాహం అందించే గుణం ఉండాలి. క్లయింట్లు సంక్షోభంలో ఉన్న‌ప్పుడు వాళ్ల‌ను ప్రోత్సహిస్తూ భ‌రోసా క‌ల్పించాలి. 

అవ‌కాశాలు అపారం!

      కెరీర్ కౌన్సిలింగ్ కెరీర్ కు ప్ర‌స్తుతం అవకాశాల‌కు కొదువ లేదు. ఎందుకంటే ప్ర‌స్తుతం చాలా మంది విద్యార్ధుల‌కు, అభ్య‌ర్ధులకు స‌రైన కెరీర్ గైడెన్స్ లేక ఇబ్బందిప‌డుతున్నారు. ముఖ్యంగా ప‌ట్ట‌ణ ప్రాంతాల్లో దాదాపు 30 శాతం మంది గ్రాడ్యుయేట్లు ఉద్యోగాలు లేక నిరుద్యోగులుగా ఉన్నారు. అదే స‌మ‌యంలో స‌రైన అభ్య‌ర్ధులు లేక కొన్ని ఉద్యోగాలు ఖాళీగా ఉండిపోతున్నాయి. కెరీర్ కౌన్సిల‌ర్స్ ఈ అంత‌రాన్ని త‌గ్గించ‌డంలో కీల‌క పాత్ర పోషిస్తున్నారు.  ఇటీవ‌లి కాలంలో కెరీర్ కౌన్సిలింగ్, గైడెన్స్ పై అవ‌గాహ‌న పెర‌గ‌డంతో విద్యార్ధులు కెరీర్ కౌన్సిల‌ర్స్ స‌హాయం తీసుకుంటున్నారు. అదే విధంగా చేస్తున్న ఉద్యోగంపై సంతృప్తి లేని వాళ్లకు వీళ్ల స‌హాయం  అవ‌స‌రమ‌వుతోంది. మ‌రోవైపు విద్యా సంస్థ‌ల‌కు, కెరీర్ అండ్ స్టడీ అడ్వైజ‌రీ స‌ర్వీసెస్ సంస్థ‌ల‌కు కూడా భారీ సంఖ్య‌లో కెరీర్ కౌన్సిల‌ర్ల అవ‌స‌రముంది. దీంతో కెరీర్ కౌన్సిల‌ర్ కెరీర్ కు మంచి డిమాండ్ ఏర్ప‌డింది. పైన మేం చెప్పిన అర్హ‌త‌లు, నైపుణ్యాలు ఉన్న అభ్య‌ర్ధులు ఈ కెరీర్ పై దృష్టి సారించండి.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com