ఎక్కడ నెగ్గాలో కాదు..ఎక్కడ 'తగ్గాలో' కూడా తెలియాలి!

        స‌మ‌యం చాలా విచిత్ర‌మైన‌ది అలాగే  క్లిష్ట‌మైన‌ది కూడా. టైం బాగాలేన‌ప్పుడు ఒక్కోసారి మ‌నం బ‌లం అనుకున్న‌దే మ‌న‌కు బ‌ల‌హీన‌త‌గా మారిపోవ‌చ్చు. ఇది వ్య‌క్తిగ‌త జీవితానికే కాదు వృత్తిగ‌త జీవితానికి కూడా అతికిన‌ట్టు స‌రిపోతుంది. ప్ర‌తీ ఒక్క‌రూ ఏదో ఒక సంద‌ర్భంలో సంక్షోభంలో చిక్కుకోవ‌డం ఖాయం. ముఖ్యంగా ఉద్యోగం జీవితం చిక్కుల్లో ప‌డ్డ‌ప్పుడు ఒక్కోసారి మ‌న శ‌క్తి సామ‌ర్ధ్యాలే మ‌న‌కు ప్ర‌తికూలాంశాలుగా మారిపోతూ ఉంటాయి. ఏదో ఒక ఉద్యోగంలో జాయిన్ అయితే చాలు అనుకున్న‌ప్పుడు అన్ని అర్హ‌త‌లు పెట్టుకుని ఈ జాబ్ నీకెందుకు అన్న ప్ర‌శ్న‌లు మ‌న‌కు చికాకును క‌లిగిస్తున్నాయి. ముఖ్యంగా కెరీర్ మ‌ధ్య‌లో బ్రేక్ వ‌చ్చిన వారికి అద‌న‌పు అర్హ‌త‌లు బాగా ఇబ్బందులకు గురిచేస్తాయి. ఇటువంటి ప‌రిస్థితిని హ్యాండిల్ చేయ‌లేక కొందరు ఆత్మ‌విశ్వాసాన్ని కూడా కోల్పోతూ ఉంటారు. అయితే ఇలాంటి సంక్షోభ ప‌రిస్థితుల్లో  అభ్య‌ర్ధులు కొన్ని జాగ్ర‌త్త‌లు పాటిస్తే 'ఓవర్ క్వాలిఫైడ్' సమస్య నుంచి బ‌య‌ట‌ప‌డొచ్చు. 

పెరిగిపోతున్న 'ఓవ‌ర్ క్వాలిఫైడ్' స‌మ‌స్య! 

    ప్ర‌స్తుత ప‌రిస్థితుల్లో చాలా మంది కెరీర్ మ‌ధ్య‌లో ఉద్యోగానికి రాజీనామా చేసి వ్యాపారాలు చేస్తున్నారు. మ‌రికొంద‌రు విభిన్న కార‌ణాల వ‌ల‌న ఉద్యోగానికి కొన్ని రోజులు బ్రేక్ ను ఇస్తున్నారు. ఇంకొంద‌రు కంపెనీ అంత‌ర్గ‌త కార‌ణాల‌తో ఉద్యోగాల‌ను పొగొట్టుకుంటున్నారు. ఇలా ర‌క‌ర‌కాల కార‌ణాల వ‌ల‌న ఉద్యోగ జీవితానికి కొంత కాలం దూర‌మై తిరిగి ఉద్యోగ ప్ర‌య‌త్నాలు చేస్తున్న వారు కొన్ని ఇబ్బందులను ఎదుర్కొంటున్నారు. అందులో ముఖ్య‌మైన‌ది ఓవ‌ర్ క్వాలిఫైడ్ స‌మ‌స్య‌. కంపెనీలు ఉద్యోగ ప్ర‌క‌ట‌న విడుద‌ల చేసిన‌ప్పుడే కావాల్సిన అర్హ‌త‌లు, నైపుణ్యాల‌ను స్పష్టంగా పేర్కొంటాయి. ఉదాహ‌ర‌ణ‌కు కంపెనీ బీటెక్ అభ్య‌ర్ధులు కావాలని ప్ర‌క‌ట‌న ఇచ్చిన‌ప్పుడు ఎంటెక్ అభ్య‌ర్ధి కూడా ద‌ర‌ఖాస్తు చేసుకున్న‌ప్పుడు కంపెనీలు దాన్ని ఓవ‌ర్ క్వాలిఫైడ్ గా ప‌రిగ‌ణిస్తాయి. అలాగే కెరీర్ లో కొంచెం అనుభవం ఉండి తక్కువ అర్హతలు ఉన్న ఉద్యోగానికి అప్లయ్ చేసినప్పుడు కూడా దాన్ని ఓవర్ క్వాలిఫైడ్ గానే చూస్తారు. ఇటువంటి పరిస్థితుల్లో అన్ని అర్హ‌త‌లు, అనుభ‌వం ఉన్న‌వాళ్ల‌కు అధిక వేత‌నం ఇవ్వాల‌న్న కార‌ణాల‌తో తక్కువ అర్హతలు, అనుభవం లేని వారికే కంపెనీలు పెద్దపీట వేస్తాయి. ఈ ప‌రిస్థితి ఓవ‌ర్ క్వాలిఫైడ్ అభ్య‌ర్ధుల‌కు స‌మ‌స్య‌గా మారుతోంది. అయతే నైపుణ్యాల ప‌రంగా ఎంప్లాయర్స్ ను ఆక‌ట్టుకుంటే ఈ స‌మ‌స్య‌ను అధిగ‌మించ‌డం పెద్ద క‌ష్ట‌మేమీ కాదు. అయితే గ‌తంలో తాము ప‌నిచేసిన దాని కంటే త‌క్కువ స్థాయిలో ప‌నిచేయాల్సి వ‌చ్చినా పాజిటివ్ గా తీసుకుని ప‌నిచేయాల్సివస్తుంది. ఈ ప‌రిస్థితుల్లో ఎప్పుడూ ప్ర‌తికూల ఆలోచ‌న‌లు మ‌న‌స్సుల్లోకి రాకుండా జాగ్ర‌త్త తీసుకోవాలి. 

ఎంప్లాయ‌ర్స్ కు విశ్వాసం క‌లిగించాలి

   'ఓవ‌ర్ క్వాలిఫైడ్' అభ్య‌ర్ధుల‌ను ఉద్యోగంలోకి తీసుకోవాల‌నుకున్న‌ప్పుడు ఎంప్లాయ‌ర్స్ విభిన్న ర‌కాలుగా ఆలోచిస్తారు ఎక్కువ అర్హ‌త‌ల‌తో ఈ ఉద్యోగానికి ఎందుకు వ‌స్తున్నాడు? అభ్య‌ర్ధికి ఏమైనా స్థిర‌త్వ లోపం ఉందా? అన్న దానితో పాటు కెరీర్ లో బ్రేక్ వ‌చ్చిన అభ్య‌ర్ధితో కంపెనీ ర‌హ‌స్యాలు బ‌హిర్గ‌త‌మ‌వుతాయి ఏమో అన్న భ‌యాలు కూడా వారికి ఉంటాయి. ఎంప్లాయ‌ర్స్ లో ఉండే ఇలాంటి భ‌యాల‌కు, ఆందోళ‌న‌ల‌కు అభ్య‌ర్ధి చాలా స్ప‌ష్ట‌మైన భ‌రోసా ఇవ్వాలి. త‌న‌కున్న అనుభ‌వం, అద‌న‌పు అర్హ‌త‌లు కంపెనీకి ఏ విధంగా ఉప‌యోగ‌ప‌డ‌తాయో స్ప‌ష్టంగా చెప్పి వారి ద‌గ్గ‌ర విశ్వాసాన్ని చూర‌గొనాలి. అదే విధంగా త‌న‌కు ప‌నిప‌ట్ల ఎంత నిబద్ధ‌త ఉంద‌న్న విష‌యాన్ని నిజాయితీగా వెల్ల‌డించాలి. అదే సయయంలో తనకు తక్కువ స్థాయిలో పనిచేసేందుకు ఎటువంటి నామోషీ లేదని అదే సమయంలో కంపెనీ పాలసీలకు అనుగుణంగా పనిచేస్తానని ఎంప్లాయర్స్ కు నమ్మకం కలిగేలా వ్యవహరించాలి. 

రెజ్యుమెలో మార్పులు చేసుకొండి

      త‌ప్ప‌నిస‌రి ప‌రిస్థితుల్లో కెరీర్ రీస్టార్ట్ చేయాల్సి వచ్చినప్పుడు ఓవ‌ర్ క్వాలిఫైడ్ స‌మ‌స్య అభ్య‌ర్ధుల‌ను క‌చ్చితంగా వేధిస్తుంది. దీనికి మాన‌సికంగా ముందుగానే సిద్ధ‌ప‌డి ఉండాలి. ఇంట‌ర్వ్యూలో స‌రైన సమాధానాలు చెప్పినా  జాబ్ రాకుంటే హెచ్ఆర్ వాళ్ల‌తో మాట్లాడాలి. వాళ్లు ఓవ‌ర్ క్వాలిఫైడ్ వ‌ల‌న మీకు జాబ్ రాలేదు అని చెపితే అభ్య‌ర్ధులు త‌క్షణం కొన్ని చ‌ర్య‌లు చేప‌ట్టాలి. అందులో ముఖ్య‌మైన‌ది రెజ్యుమెలో మార్పులు చేసుకోవ‌డం. ప్ర‌స్తుతం అప్ల‌య్ చేయాల‌నుకుంటున్న జాబ్ కు అనుగుణంగా మ‌న వ్య‌క్తిగ‌త స‌మాచారాన్ని కొంత‌వ‌ర‌కు త‌గ్గించుకోవాలి. ముఖ్యంగా అద‌న‌పు అర్హ‌త‌ల‌కు సంబంధించి చివ‌ర్లో స్వ‌ల్ప‌మాత్రంగానే చెప్పాలి. రెజ్యుమె అప్ డేట్ లేదా రీరైట్ మీతో సాధ్యం కాని ప‌క్షంలో నిపుణులైన రెజ్యుమె రైట‌ర్ల స‌హాయం తీసుకోవాలి. జాబ్ మార్కెట్లో మీకు ప్రొఫైల్ స‌రిపొయే రంగాల‌ను ఎంచుకుని అందుకు అనుగుణంగా మ‌రోవైపు ఓవ‌ర్ క్వాలిఫైడ్ అర్హ‌త‌ల‌కు త‌గిన‌ట్టు వ్య‌వ‌హ‌రించ‌డం నేర్చుకోవాలి. 

ఇబ్బందిని అవ‌కాశంగా మార్చుకోవాలి

   'ఓవ‌ర్ క్వాలిఫైడ్' వ‌ల‌న మీకు ఉద్యోగం రావ‌డం కష్టంగా మారిన‌ప్పుడు అభ్యర్ధులు కొన్ని జాగ్రత్తలు తీసుకోవాలి. ఇంట‌ర్వ్యూలో స‌మాధానాలు చెప్పిన‌ప్పుడు మీరు ప్ర‌స్తుత‌మున్న ప‌రిస్థితిని వారికి క్షుణ్ణంగా వివ‌రించండి. ఎందుకు ఈ రంగంలోకి రావాల‌నుకుంటున్నారో త‌న నైపుణ్యాలు కంపెనీకి ఏ విధంగా ఉప‌యోగ‌ప‌డ‌తాయో వారికి వివ‌రించే ప్ర‌య‌త్నం చేయండి. అదే విధంగా తాను ఓవ‌ర్ క్వాలిఫైడ్ అయిన‌ప్ప‌టికీ, నేర్చుకోవ‌డంలో మాత్రం ఇంకా విద్యార్ధినే అని, కొత్త విష‌యాలు నేర్చుకునేందుకు సిద్ధ‌మేనన్న సంకేతాలు ఇవ్వండి. ప్ర‌స్తుత ప్రొఫైల్ కు త‌న ఓవ‌ర్ క్వాలిఫైడ్ అర్హ‌త‌లు ఈ విధంగా ఉప‌యోగ‌ప‌డ‌తాయి అని వివ‌రంగా చెప్పిన‌ప్పుడు ఎంప్లాయ‌ర్స్ క‌చ్చితంగా సానుకూలంగా స్పందిస్తారు. అయితే ఇదే స‌మ‌యంలో  వ్య‌క్తిగ‌త స‌మ‌స్య‌లు, ఆర్థిక , ఉద్యోగ క‌ష్టాలు హెచ్ఆర్ కు అస్స‌లు చెప్ప‌కండి. ఎందుకంటే అది మీ ఉద్యోగ సాధ‌న‌పై ప్ర‌భావం చూప‌వ‌చ్చు . మిమ్మ‌ల్ని త‌క్కువ వేత‌నానికే ఒప్పించేందుకు ఎంప్లాయ‌ర్స్ ప్ర‌య‌త్నం చేయ‌వ‌చ్చు. ఈ విష‌యంలో ఎప్పుడూ రాజీప‌డ‌కండి. మీ అర్హ‌త‌లకు, మీ గౌర‌వానికి త‌గ్గ వేత‌నం ఉన్న‌ప్పుడే చిన్న ఉద్యోగంలైనా జాయిన్ కావ‌చ్చు. 

నిజాయితీగా ఉండండి

    ఓవ‌ర్ క్వాలిఫైడ్ అభ్య‌ర్ధులకు ఇంట‌ర్వూలో చాలా ప్ర‌శ్న‌లు ఎదుర‌వుతాయి. ఇన్ని అర్హ‌త‌లు ఉన్న నువ్వు ఈ ఉద్యోగానికి ఎందుకు అప్ల‌య్ చేసావు? కెరీర్ లో విరామం రావ‌డానికి కార‌ణ‌మేంటి? ఇంత కంటే మంచి ఉద్యోగం వ‌చ్చిన‌ప్పుడు నువ్వు మా సంస్థ‌ను వ‌దిలేస్తావా? ఇలా చాలా ప్ర‌శ్న‌లు ఇబ్బందిపెడ‌తాయి. వీట‌న్నింటికి సానుకూలంగా స‌మాధానాలు చెప్పాలి. త‌న అద‌న‌పు అర్హ‌త సంస్థ‌కు బాగా ఉప‌యోగ‌ప‌డుతుంద‌ని ఎంప్లాయ‌ర్స్ కు అర్ధమ‌య్యేలా చెప్ప‌గ‌ల‌గాలి. ఎందుకు ఈ జాబ్ కు అప్ల‌య్ చేయాల్సి వ‌చ్చిందో కూడా వివ‌రించండి. ఈ రంగంలో త‌న‌కున్న ఆస‌క్తి , ప‌నిపై శ్ర‌ద్ధ‌ను వాళ్ల‌కు ప్ర‌భావవంతంగా చెప్పండి. ఈ జాగ్ర‌త్త‌లు తీసుకుంటే ఓవ‌ర్ క్వాలిఫైడ్ స‌మ‌స్య అభ్య‌ర్ధుల‌ను వేధించ‌కుండా ఉంటుంది. అయితే ఈ క్రమంలో కొన్ని ఇబ్బందులు ఎదురైనా ఓవ‌ర్ క్వాలిఫైడ్ అభ్య‌ర్ధుల ఆత్మ‌విశ్వాసాన్ని కోల్పోకుండా ఉండ‌ట‌మే ఇక్క‌డ చాలా ముఖ్యం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com