చదివింది గుర్తుండిపోవాలంటే ఈ '5 టెక్నిక్స్' నేర్చుకోవాల్సిందే!

       వేస‌వి సెల‌వులు పూర్త‌య్యాయి. ఇక స్కూళ్లు, కాలేజీలు త్వ‌ర‌లో తెరుచుకోబోతున్నాయి. విద్యార్ధులకు మ‌ళ్లీ ఎప్ప‌టిలా చ‌దువు, ప‌రీక్ష‌లు, మార్కులు అంటూ హ‌డావుడి మొద‌లు. స‌మ‌య నిర్వ‌హ‌ణ త‌ర్వాత విద్యార్ధుల‌ను ఎక్కువ‌గా ఇబ్బంది పెట్టేది చ‌దివింది గుర్తుపెట్టుకోవ‌డ‌మే. క్లాస్ రూమ్ లో నేర్చుకున్న విష‌యాన్ని, ఇంటి ద‌గ్గ‌ర చ‌దివిన పాఠాన్ని టీచ‌ర్ కు చెప్పాల్సి వ‌చ్చిన‌ప్పుడు లేదా ప‌రీక్ష హాల్లో పేప‌ర్ పై రాయాల్సి వ‌చ్చిన‌ప్పుడు చాలా మంది విద్యార్ధులు ఇబ్బంది ప‌డ‌తారు. ఎందుకంటే ఎంత‌బాగా చ‌దివినా పాఠం గుర్తుండ‌క‌పోవ‌డ‌మే వారి స‌మ‌స్య‌కు కార‌ణం. అయితే కొన్ని జాగ్ర‌త్త‌లు తీసుకుంటే విద్యార్ధులు ఈ స‌మ‌స్య నుంచి గ‌ట్టెక్క‌వ‌చ్చు. తెలివైన విద్యార్ధుల‌తో పోల్చుకుంటే సాధార‌ణ విద్యార్ధులు కొంచెం ఎక్కువ స‌మ‌యం కేటాయించాల్సి వ‌చ్చినా కొన్ని ప‌ద్ధ‌తులు పాటిస్తే వారికి చ‌దివింది గుర్తుండిపోతుంది. ఈ సింపుల్ టెక్నిక్స్ తో కొంచెం స్మార్ట్ వ‌ర్క్ చేస్తే హార్డ్ వ‌ర్క్ చేసినంత ఫ‌లితాన్నిపొందొచ్చు. కాస్త బ‌ద్ద‌కాన్ని వ‌దిలించుకుని మీపై మీరు న‌మ్మ‌కం ఉంచితే మిమ్మ‌ల్ని ఆప‌డం ఎవ‌రి త‌రమూ కాదు.

1. మైండ్ కు సాధన నేర్పండి!

    చ‌దువు అనే ప‌దం విన‌గానే చాలా మంది విద్యార్ధులు భ‌య‌ప‌డుతూ, కంగారు, కంగారుగా ఉంటారు. అసలు చ‌దువు అన‌గానే మీకెందుకు కంగారు పుడుతోంది?  చ‌దువును ఆస్వాదించ‌డం అల‌వాటు చేసుకుంటే మీరు స‌మ‌స్య నుంచి గ‌ట్టెక్క‌వ‌చ్చు. ఒక పాఠంలో ఎన్ని కొత్త ప‌దాలు, కొత్త విష‌యాలు ఉంటాయి వాటిని నేర్చుకుంటూ ఆనందించ‌డం నేర్చుకోండి. ఉదాహ‌ర‌ణ‌కు మీరు ఏదైనా న‌వ‌ల చ‌దువుతున్న‌ప్పుడో లేక సినిమా చూస్తున్న‌ప్పుడో   ఆనందాన్ని, ఉత్సాహాన్ని అనుభ‌విస్తారు క‌దా?  సినిమాలోని డైలాగులు మీకు చాలా రోజులు గుర్తుండిపోతాయి కూడా.  అలానే పాఠం చ‌దువుతున్న‌ప్పుడు కూడా దాన్ని ఆస్వాదించండి. సాంకేతిక ప‌దాలు దొర్లిన‌ప్పుడు వాటిని ఒక  నోట్ బుక్ లో రాసుకుని వాటికి అర్ఢాలు కూడా రాసుకొండి. మీరు ఖాళీగా ఉన్న స‌మ‌యంలో ఆ ప‌దాల‌ను ఒక్క‌సారి గుర్తుకు తెచ్చుకొండి. ఇలా చేయ‌డం వ‌ల‌న అవి మీ మైండ్ లో బ‌లంగా నిక్షిప్త‌మైపోతాయి. ఈ సింపుల్ టెక్నిక్ తో పాఠ‌మైనా, కొత్త విష‌య‌మైనా మీ బుర్ర‌లో చాలా రోజుల పాటు గుర్తుండిపోతుంది.

2. చ‌ర్చించండి!

      మీరు ఏదైతే విష‌యాన్ని త‌ర‌గ‌తి గ‌దిలో నేర్చుకున్నారో దాన్ని ప్రాక్టిక‌ల్ మార్గంలో పెట్ట‌డానికి ఒక అద్భుత‌మైన ప‌ద్ధ‌తి ఉంది. మీరు నేర్చుకున్న విష‌యాన్ని ఫ్రెండ్స్ తోనూ, మీ క్లాస్ మేట్స్ తోనూ చ‌ర్చించ‌డం నేర్చుకొండి. ఇలా ఒక విష‌యంపై చ‌ర్చిస్తే చాలా ముఖ్య‌మైన విష‌యాల‌ను నేర్చుకునేందుకు అవ‌కాశం క‌లుగుతుంది. ఆ చ‌ర్చ‌లో విభిన్న అభిప్రాయాలు, ఆలోచ‌న‌లు వ్య‌క్త‌మ‌వుతాయి. దీని వ‌ల‌న స‌ద‌రు విష‌యం మీ మ‌స్తిష్కంలో చాలా రోజుల పాటు ముద్ర‌ప‌డిపోతుంది. జ్ఞాప‌కశ‌క్తిని పెంచుకునేందుకు, నేర్చుకున్న విష‌యం  ఎక్కువ రోజులు గుర్తుండేందుకు చ‌ర్చ అనేది చాలా బాగా ఉప‌యోగ‌ప‌డుతుంది. ఒక అంశాన్ని విభిన్న వ్య‌క్తుల‌తో డిస్క‌స్ చేయ‌డం వ‌ల‌న మీ సామ‌ర్ధ్యం, మీ ప‌రిశీల‌నా శ‌క్తితో  పాటు ఇత‌రులు శ‌క్తి సామ‌ర్ధ్యాలపై కూడా మీకు ఒక అంచ‌నా ఏర్ప‌డుతుంది.

3. ప్ర‌యోగాలు చేయండి!

      ఎదైనా ఒక విష‌యాన్ని ప్రాక్టిక‌ల్ గా నేర్చుకుంటే అది చూపించే ప్ర‌భావం అంతా ఇంతా కాదు. మీరు ప్ర‌యోగాలు చేసి నేర్చుకున్నఒక‌ విష‌యం ఎన్ని రోజులైనా మీకు గుర్తుండి తీరుతుంది. ఒక అద్భుత‌మైన మాట‌ను మ‌నం ఇక్క‌డ గుర్తుకు చేసుకుందాం. నేర్పిస్తే మ‌ర్చిపోతాను, చూపిస్తే గుర్తుపెట్టుకుంటాను, మ‌మేకం చేస్తే దానితో పాటే ఎప్ప‌టికీ ఉండిపోతాను.  జ్ఞాప‌క‌శ‌క్తిని పెంచుకునే విష‌యంలో ఈ మాట నూటికి నూరు శాతం ఉప‌యోగ‌ప‌డుతుంది. మీరు నేర్చుకోవాల‌నుకుంటున్న విష‌యాన్ని ప్ర‌యోగాలు చేసి నేర్చుకుంటే అది మీకు మ‌రింత ప్ర‌భావవంతంగా అర్ధ‌మ‌వుతుంది. దీనికి తోడు మీరు ప్ర‌యోగాలు చేసి ఒక విష‌యాన్ని నేర్చుకోవ‌డం మిమ్మ‌ల్ని ప్ర‌త్యేక‌మైన వ్య‌క్తిగా నిల‌బెడుతుంది. మీ స్నేహితుల నుంచి టీచ‌ర్స్ నుంచి మీకు ప్ర‌శంస‌లు కూడా ద‌క్కుతాయి.  

4. పోల్చుకోండి!

   ఇక్క‌డ పోల్చుకోవ‌డం అంటే ఇత‌రుల‌తో మిమ్మ‌ల్ని మీరు పోల్చుకోవ‌డం కాదు. మీరు రోజువారీ చూసే ప్ర‌తీ విష‌యాన్ని మీ స్ట‌డీ ప‌ద్ధ‌తుల‌తో స‌రిపోల్చి చూసుకోవ‌డం. ఉదాహ‌ర‌ణ‌కు ఒక చెట్టు నుంచి ఆకు రాలి కింద‌ప‌డితే భూమి, ఆక‌ర్ష‌ణ శ‌క్తి కి సంబంధించి మీ ఫిజిక్స్ లో ఉన్న విష‌యాల‌ను ఒకసారి గుర్తుకు తెచ్చుకుని స్ఫూర్తిని పొందాలి. ఇలా చేయ‌డం వ‌ల‌న మీరు నేర్చుకున్న విష‌యాలు ఎప్పుడూ మీ మ‌స్తిష్కంలోనే ఉండేందుకు అవ‌కాశం ఉంటుంది. కొత్త విష‌యాల‌ను నేర్చుకునేందుకు కుతూహ‌లం, త‌ప‌న ఉన్న‌ప్పుడు  ఎదుర‌య్యే ప్ర‌తీ విష‌యాన్ని మీకు అనుకూలంగా మార్చుకోవ‌చ్చు. మీరు చూసిన విష‌యాన్ని ప్ర‌యోగ‌శాల‌లో నిరూపించేందుకు మీ ప్ర‌య‌త్నం చేసిన‌ప్పుడు మీకు తెలియ‌కుండానే ఆ విష‌యంపై మీకు ప‌ట్టు ఏర్ప‌డుతుంది.

5. కీల‌క ప‌దాలను గుర్తు పెట్టుకొండి!

      పెద్ద పెద్ద స‌మాధానాలను గుర్తుపెట్టుకోవ‌డం ఎవ‌రికైనా క‌ష్ట‌మే. అయితే ఒక సింపుల్ టెక్నిక్ తో దీన్ని అధిగ‌మించ‌వ‌చ్చు.  కొన్ని ముఖ్యమైన ప‌దాల‌ను గుర్తుపెట్టుకుంటే స‌మాధానం రాయ‌డం సుల‌భ‌మ‌వుతుంది. స‌మాధానం చ‌దువుతున్న‌ప్ప‌డే కీల‌క ప‌దాల‌ను అండ‌ర్ లైన్ చేసుకుని వాటిని గుర్తుపెట్టుకోవాలి. దీని వ‌ల‌న ప‌రీక్ష హాల్లో కూర్చున్న‌ప్పుడు ప్ర‌శ్న‌కు త‌గ్గ‌ట్టు ఆ కీల‌క ప‌దాల‌ను మ‌న‌నం చేసుకుంటే స‌మాధానాన్ని చాలా సులువుగా రాసేందుకు వీలు క‌లుగుతుంది. మంచి జ్ఞాప‌క‌శ‌క్తే చురుకైన బ్రెయిన్ కు సంకేతం కాబ‌ట్టి ఈ టెక్నిక్స్ ను పాటించి చ‌దువులో రాణించండి.

    ఇప్పుడు మ‌నం చెప్పుకున్న ఈ టెక్నిక్స్ తో పాటు ఇంటి ద‌గ్గ‌ర చ‌దివే విష‌యంలో కొన్ని జాగ్ర‌త్త‌లు తీసుకుంటే విద్యార్ధులు మంచి ఫలితాల‌ను సాధించ‌వ‌చ్చు.

• ప్ర‌శాంతంగా చ‌ద‌వాలంటే మంచి ప్ర‌దేశం, ప‌రిస‌రాలు చాలా ముఖ్యం.

• చ‌దువుకునే గ‌దిలో ఎటువంటి పోస్టర్ లు లేకుండా జాగ్ర‌త్త ప‌డండి. గ‌దిలో కేవ‌లం పుస్త‌కాలు మాత్ర‌మే ఉండాలి.

• తెల్ల‌వారుజాము 4 గంట‌ల నుంచి 7 గంట‌ల వ‌ర‌కూ చ‌దువుకునేందుకు అనువైన స‌మ‌యం.

• ఉద‌యం పూట చ‌దవాలి , సాయింత్రం పూట నేర్చుకున్న విష‌యాల్ని మ‌న‌నం చేసుకోవాలి.

• గ‌దిలో ఇష్ట‌దైవం ఫోటో పెట్టుకుంటే మంచిది.

• చ‌దువుకున్న విష‌యాల‌ను నోట్స్ గా రాసుకుంటే బాగా గుర్తుంటాయి.

• చ‌దువుకునే గ‌ది ఇంటికి పైన ఉంటే మంచిది.

• శుభ్రంగా స్నానం చేసి వ‌దులు దుస్తులు ధ‌రించి, సౌక‌ర్య‌వంతంగా చ‌దివేందుకు కూర్చోవాలి.

• స్వీట్లు, మాంసాహారం, ఆయిల్ ఫుడ్స్ తిని చ‌దివేందుకు కూర్చుంటే ఇబ్బందిక‌రంగా ఉండొచ్చు.

• అన్నింటికంటే ముఖ్యంగా చ‌దువుకునే గ‌దిలోకి ఎల‌క్ట్రానిక్స్ గాడ్జెట్స్ ను తీసుకురావ‌ద్దు.

• చ‌దివే చ‌దువు హృద‌యం నుంచి మెద‌డుకు వెళ్లిన‌ప్పుడే అది నిజ‌మైన చ‌దువు అనిపించుకుంటుంది.

     ఈ టెక్నిక్స్ , జాగ్ర‌త్త‌లు తీసుకుని ఒక ప్ర‌ణాళిక ప్రకారం చ‌దివితే ఎటువంటి విద్యార్ధి అయినా చ‌దువులో మంచి ప్ర‌తిభ క‌నబ‌ర్చేందుకు అవ‌కాశం ఉంటుంది.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com