కాలేజీ ప్రెష‌ర్స్ గుర్తుంచుకోవాల్సిన 5 ముఖ్యమైన విష‌యాలు!
త్వ‌ర‌లో వేస‌వి సెల‌వులు ముగిసిపోనున్నాయి. ఎంసెట్ , నీట్ అంటూ ఇన్నాళ్లూ ర‌క‌ర‌కాల పోటీ ప‌రీక్ష‌ల‌తో కుస్తీ ప‌ట్టిన విద్యార్ధులు వాళ్ల జీవితంలో ఒక ముఖ్యమైన ద‌శ‌లోకి అడుగుపెట్ట‌నున్నారు. డిగ్రీ లో కాలేజీలోకి అడుగుపెట్టే ఆ క్ష‌ణం ప్ర‌తీ విద్యార్ధికి ఉద్వేగాన్ని క‌లిగిస్తుంది. తాను పెద్దవాడ్ని అయ్యానన్న భావ‌న, త‌ల్లిదండ్రుల ఆకాంక్ష‌ల‌ను నెర‌వేర్చాల‌న్న బాధ్య‌త, త‌న మ‌న‌సుకు న‌చ్చిన ప‌ని చేయాల‌న్న ఆత్రుత ఇలా విభిన్న భావోద్వేగాల క‌ల‌యిక ఆ ఫీలింగ్. అయితే కొత్త‌గా డిగ్రీలోకి అడుగుపెట్టిన విద్యార్ధులు కొన్ని విషయాలను త‌ప్ప‌నిస‌రిగా గుర్తుంచుకోవాల‌ని విద్యా నిపుణులు సూచిస్తున్నారు. కాలేజీ వాతావ‌ర‌ణం, తోటి వారితో సృహుద్భావం, విద్యార్ధిగా మెల‌గ‌డంలో తీసుకోవాల్సిన జాగ్రత్తలు ఇలా విభిన్న విష‌యాల‌పై అవ‌గాహ‌న పెంచుకుని కాలేజీలో అడుగుపెడితే విజయవంతమైన విద్యార్ధిగా రాణించ‌వ‌చ్చు.
1. వాస్త‌వ ప‌రిస్థితుల‌ను తెలుసుకొండి!
ప్ర‌స్తుతం వ‌స్తున్న చాలా సినిమాల్లో విద్యార్ధి జీవితం రంగుల‌మ‌యంగా, సంతోషంగా, ఉల్లాసంగా గ‌డిచిపోతున్న‌ట్టు చూపిస్తారు. నిజ‌జీవితంలో కూడా కాలేజీ జీవితం సినిమాలో చూపించిన‌ట్టుగా ఉండ‌టుంద‌ని అనుకోవ‌డం భ్ర‌మ అవుతుంది. సినిమాకు జీవితానికి చాలా తేడా ఉంటుంది. ఈ విష‌యంలో విద్యార్ధుల వాస్త‌వానికి ద‌గ్గ‌ర‌గా మ‌సులుకోవాల్సి ఉంటుంది. ప్ర‌స్తుతం చాలా కాలేజీలు చ‌దువుకే అధిక ప్రాధాన్య‌త‌నిస్తున్నాయి. స్పెష‌ల్ క్లాస్ లు, సెష‌న్ లు నిర్వ‌హిస్తూ మీకు మీ స్కూల్ లైఫ్ ను గుర్తుకు తెస్తాయి. కాలేజీ లైఫ్ అంటే మీరేదో ఊహించుకున్న‌ప్పుడు దానికి విరుద్ధంగా జ‌రిగితే నిరుత్సాహ‌ప‌డ‌తారు. కాబ‌ట్టి రియాల్టీని అర్ధం చేసుకుంటే ఎటువంటి స‌మ‌స్య‌లు ఉండ‌వు. డిగ్రీ చ‌దువు అనేది ప్ర‌స్తుతం విద్యార్ధికి అత్యంత కీల‌కంగా మారింది. డిగ్రీలో చూపించిన ప్ర‌తిభ ఆధారంగానే మంచి ఉద్యోగం సాధించేందుకు, కెరీర్ లో స్థిర‌ప‌డేందుకు మార్గం సుగ‌గ‌మ‌వుతుంది. అందుకే కాలేజీలు కూడా డిగ్రీ స్థాయిలో చ‌దువుకే అధిక ప్రాధాన్య‌త‌నిస్తున్నాయి. కాబ‌ట్టి విద్యార్ధులు ఈ విష‌యంపై అవ‌గాహ‌న పెంచుకంటే చ‌దువుతో పాటు కాలేజీ లైఫ్ ను ఎంజాయి్ చేసేందుకు అవ‌కాశం ఏర్ప‌డుతుంది.
2. వేష‌ధార‌ణపై జాగ్ర‌త్త వ‌హించండి!
కాలేజీ జీవితం అన‌గానే మనం వేరే లోకం లోకి వ‌చ్చేసాం! మనం ఏం డ్రెస్ వేసుకున్నా అడిగేవాడు లేడు అనుకుంటారు. ఈ విష‌యంపై విద్యార్ధులు జాగ్ర‌త్త వహించాలి. వేష‌ధార‌ణ అనేది అంత‌ర్గ‌త భావాల‌కు బాహ్య రూపం అని గుర్తించాలి. దానికి త‌గ్గ‌ట్టుగానే హుందాగా ఉండే దుస్తులు ధ‌రించాలి. ఫ్యాష‌న్ ను ఫాలో అవుతూనే హుందాత‌నాన్ని తీసుకొచ్చే డ్రెస్ ల‌కు ప్రాధాన్య‌త‌నివ్వాలి. కాలేజీలో విచ్చ‌ల‌విడి డ్రెస్ లు ధ‌రిస్తే మీ స్నేహితులు న‌వ్వుకునేందుకు మీరు ఓ సాధ‌నంగా మారుతారు. కాలేజీలో, క్లాస్ రూమ్ లో ఉన్న‌ప్పుడు కాలేజీ యాజ‌మాన్యం సూచించిన డ్రెస్ కోడ్ ను పాటించాలి. మిగ‌తా స‌మ‌యాల్లో కూడా మీ వ్య‌క్తిత్వాన్ని, మీ అభిరుచిని వ్య‌క్త‌ప‌రిచే డ్రెస్ ల‌ను ధ‌రించాలి. కాలేజీ జీవితంలో మంచి డ్రెస్ సెన్స్ ను అల‌వాటు చేసుకుంటే అది మీ కెరీర్ కు ఎంత‌గానో ఉప‌యోగ‌ప‌డుతుంది. రంగుల ఎంపిక, దుస్తులు ధ‌రించే విధానంపై ప‌ట్టు ఉండే ఇంట‌ర్వ్యూలో మీకు మ‌రో అద‌న‌పు అర్హ‌త స‌మ‌కూరిన‌ట్టే.
3. నేర్చుకోవ‌డానికి సిగ్గు, బిడియం ఆటంకం కావొద్దు!
కాలేజీ జీవితంలో విద్యార్ధులు నేర్చుకోవాల్సిన అతి ముఖ్యమైన విష‌యం ఒక‌టుంది. అది ఏంటంటే ఇక‌పై అన్ని నిర్ణ‌యాలు నేనే తీసుకోవాలి. ప్ర‌తీ దానికీ వేరే వాళ్ల‌పై ఆధార‌ప‌డ‌టం మానుకోవాలి. అని విద్యార్ధులు త‌మ‌ను తాము చైత‌న్య ప‌ర్చుకోవాలి. మీరు మ‌నుష్యుల‌తో ఎలా మెల‌గాలి? స‌మ‌స్య‌లు వ‌చ్చిన‌ప్పుడు ఎలా స్పందించాలి? భావోద్వేగాల‌ను ఎలా అదుపు చేసుకోవాలి? ఇలాంటి విషయాలను త‌ర‌గ‌తి గ‌దిలో ప్రొఫెస‌ర్లు మీకు చెప్ప‌రు. ఈ విషయాలను మీకు మీరుగానే నేర్చుకోవాల్సి ఉంటుంది. సిగ్గు, బిడియం వ‌దిలి అంద‌రితో క‌లిసి పోవ‌డం కూడా నేర్చుకోవాలి. స‌బ్జెక్ట్ లో మీకు తెలియ‌ని విష‌యాలు ఉంటే వెంట‌నే సిగ్గు ప‌డ‌కుండా మీకొచ్చిన సందేహాల‌ను ప్రొఫెస‌ర్ తోనే లేక తోటి విద్యార్ధుల‌తోనే పంచుకుని సందేహాల‌ను నివృత్తి చేసుకోవాలి. లేకుంటే మీ సందేహం మీలోనే ఉండిపోతుంది. మీరు త‌ర‌గ‌తిలో వెనుక‌బ‌డిపోతారు. కాబ‌ట్టి ఎటువంటి సందేహం వ‌చ్చినా వెంట‌నే తీర్చుకోవ‌డం అల‌వాటు చేసుకోవాలి.
4. ర్యాగింగ్ పై అప్ర‌మ‌త్త‌త ముఖ్యం!
4. ర్యాగింగ్ పై అప్ర‌మ‌త్త‌త ముఖ్యం!
కొత్త‌గా కాలేజీలో చేరిన విద్యార్ధులు మొట్ట‌మెద‌టిగా ఎదుర‌య్యే స‌మ‌స్య ర్యాగింగ్. ర్యాగింగ్ అనేది చ‌ట్ట‌విరుద్ధం. అయితే మీకు ర్యాగింగ్ ఎదురుకాగానే ఉద్వేగానికి లోనై ఫిర్యాదు వ‌ర‌కూ వెళ్లిపోకండి. మొద‌ట మీ సీనియ‌ర్లు మీతో చెప్తున్నారో శ్ర‌ద్ధ‌గా వినండి. చిన్న చిన్న ఆట‌లు, పాట‌లు పాడ‌మంటే భ‌య‌ప‌డ‌కుండా పాడండి. మీతో సాన్నిహిత్యం పెంచుకునేందుకే సీనియ‌ర్లు అలా చేస్తున్నారంటే ర్యాగింగ్ ను చిన్న విష‌యంగా తీసుకుని వాళ్ల‌తో క‌లిసిపోండి. సీనియ‌ర్ల‌తో మంచి సంబంధాలు క‌లిగి ఉండ‌టం మీకు కాలేజీ జీవితంలో మేలు చేస్తుంది. అలా కాకుండా వాళ్ల ర్యాగింగ్ శృతి మించుతున్న‌ట్టు మీకు అనిపిస్తే త‌క్ష‌ణం ఫిర్యాదు చేయండి. సీనియ‌ర్ల‌తో మ‌న‌సు విప్పి మాట్లాడేందుకు, స‌మ‌స్య‌ల‌ను చెప్పుకునేందుకు కొన్ని సార్లు స‌ర‌దా ర్యాగింగ్ మీకు అక్క‌ర‌కొస్తుంది. ర్యాగింగ్ లోని తీవ్ర‌త‌ను, స‌ర‌దాను గుర్తించ‌గ‌లిగే మాన‌సిక స్థితిని పెంచుకొండి.
5. ఈవ్ టీజింగ్ పై కేర్ ఫుల్ గా ఉండండి!
అప్ప‌టి వ‌ర‌కూ గ‌ర్ల్స్ స్కూల్స్ లో చ‌దువుకుని తొలిసారిగా కో ఎడ్ కాలేజీ కి వ‌చ్చిన అమ్మాయిలు ఈవ్ టీజింగ్ ప‌ట్ల జాగ్ర‌త్త‌గా వ్య‌వ‌హ‌రించాలి. కొంద‌రు పోకిరీల నుంచి ఎదుర‌య్యే కామెంట్స్ కు ఎలా స్పందించాల‌న్న‌దానిపై చాలా క్లియ‌ర్ గా ఉండాలి. చిన్న చిన్న కామెంట్ల‌కు, ప‌రిహాసాల‌కు అమ్మాయిలు స్పందించ‌కుండా ఉంటేనే మంచిది. ప్ర‌తీదానికి అతిగా స్పందించ‌డం కూడా మ‌న‌ల్ని ఒక్కోసారి ఇబ్బందుల్లో ప‌డేస్తుంది. అలా అని ఆత్మ గౌర‌వం దెబ్బ‌తినేలా కామెంట్లు చేస్తే ఉపేక్షించాల్సిన అవసరం లేదు. ఈ విష‌యంలో ఆడ‌పిల్ల‌లు త‌గిన జాగ్రత్తలు తీసుకోవాలి. ఈవ్ టీజింగ్ మితిమీరిన‌ట్టు అనిపిస్తే మేనేజ్ మెంట్ దృష్టికి తీసుకెళ్లండి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment