కెరీర్‌లో ఈ 4 సలహాలు అస్సలు వినకండి!!

      ఇది పోటీ ప్రపంచం. మనం ఎంత బాగా పనిచేసినా దాన్ని సరిగ్గా ప్రచారం చేసుకోలేకుంటే రేసులో వెనుకబడినట్టే. ముఖ్యంగా కెరీర్ లో ఉన్నత స్థానానికి వెళ్లాలనుకుంటున్న ఉద్యోగులకు పనిని ప్రచారం చేసుకోవడం, సందర్భానుసారంగా వ్యవహరించడం చాలా అవసరం. ఈ క్రమంలో కొన్ని వాస్తవాలు తెలుసుకోలేకపోతే కెరీర్ పరుగులో ఇబ్బందులు ఎదుర్కోవాల్సి రావచ్చు. కొందరు ఇచ్చే సలహాలు, చదివిన విషయాలు వినడానికి కాస్త బాగున్నా ప్రజెంట్ ట్రెండ్ లో వాటిని అనుసరిస్తే వేగంగా ఎదిగేందుకు అవకాశం ఉండదు. ఎందుకంటే అవి గతంలో వర్కవుట్ అయి ఉండొచ్చు కానీ ప్రస్తుత ట్రెండ్ కు మాత్రం అవి ఏ విధంగానూ సరిపోవు. కాబట్టి స్వీయ విశ్లేషణ చేసుకుని వాస్తవితకు దగ్గరగా ఉంటూ సరైన సమయంలో తక్షణ నిర్ణయాలు తీసుకుంటేనే మీ కెరీర్ వెలిగిపోయేందుకు అవకాశం ఉంటుంది. చాలా మంచి సలహాలే అయినా ఇప్పటి ట్రెండ్ కు సరిపోని ఆ విషయాలపై ఓ లుక్కేద్దామా.

1. కష్టపడి పనిచేస్తే అన్నీ మన దగ్గరకే వస్తాయి!

       మంచి స్థాయికి వెళ్లాలంటే ప్రతీ ఒక్కరూ కష్టపడాల్సిందే. ఇందులో ఎటువంటి సందేహం లేదు.  అయితే ప్రజంట్ ట్రెండ్ లో మీరు కేవలం కష్టపడి పనిచేసినంత మాత్రాన మీరు కెరీర్ లో ఉన్నత స్థానానికి చేరుకోలేరు. ఎందుకంటే మీరు చేస్తున్న పనిని, మీ కష్టాన్ని మేనేజ్ మెంట్ కు  తెలియజేయాలి. దాని కోసం మీ పనిని ప్రచారం చేసుకోవాలి. 'నేను కష్టపడుతున్నా, మేనేజ్ మెంట్ గుర్తిస్తుంది' అనుకుంటే మీరు కెరీర్ లో వెనుకబడినట్టే. మీరు ఏం చేసారో ఎంత చాకచక్యంగా వ్యవహరించి కంపెనీకి లబ్ది చేకూర్చారో మీ లీడ్ కు మీ మేనేజర్ తెలిసేలా చేయండి. మీ కోలీగ్స్ కు చెప్పండి. ఇలా మీరు చేసిన పనిని మేనేజ్ మెంట్ కు తెలిసేలా చేస్తేనే మీ కష్టానికి ఫలితం దక్కుతుంది. ప్రమోషన్ వస్తుంది. లేకుంటే మీ కష్టం మీకు తప్ప ఎవ్వరికీ తెలియదు. 

2. అన్ని బాధ్యతలు నెత్తిన వేసుకోకండి!

      ఈ సలహా వినడానికి చాలా కరెక్ట్ అనిపించవచ్చు. అన్ని బాధ్యతలను తీసుకోవడం వలన ఉద్యోగంలో ఇబ్బందిపడతాం కదా అనొచ్చు. కానీ ప్రస్తుత కాలంలో కెరీర్ లో పైకి ఎదగాలంటే 'నేను ఫలానా పనినే చేస్తాను. వేరే బాధ్యతను తీసుకోలేను' అంటే అస్సలు కుదరదు. జీవితంలో, కెరీర్ లో ఉన్నత స్థానానికి వెళ్లాలంటే చొరవ చాలా ముఖ్యం. కంఫర్ట్ జోన్ నుంచి బయటకు వచ్చి కొత్త పని నేర్చుకోవడానికి, చేయడానికి సిద్ధపడాలి. దీని వలన కొత్త నైపుణ్యాలతో పాటు సరికొత్త అనుభవం పెరుగుతుంది. అన్నింటికంటే ముఖ్యంగా ఆత్మవిశ్వాసం పెరుగుతుంది. కాబట్టి మీ బాస్ నీకు ఫలానా రెస్పాన్సిబిలిటీ ఇస్తా అంటే ఆనందంగా స్వీకరించండి. ప్రయోగాలు చేసినప్పుడే మీ అసలైన సామర్ధ్యం బయటపడుతుంది. దీంతో మీకు కొత్త అవకాశాలకు కూడా మార్గం సుగగమవుతుంది. 

3. పనిచేస్తే చాలు డబ్బు ఎప్పుడైనా వస్తుంది!

        అవును నిజమే పనిచేస్తే డబ్బు వస్తుంది. కానీ డిమాండ్ ఉన్న పనిని సరైన సమయంలో చేస్తేనే మీకు డబ్బు వస్తుందని గుర్తించండి. డిమాండ్ లేని పనిని మీరు ఎంత చేసినా మీకు ఎంత అనుభవమున్నా అది మీకు డబ్బును తెచ్చిపెట్టదు. జాబ్ మార్కెట్ అనేది తనకు అవసరమైన పనిని చేస్తేనే డబ్బును ఇస్తుంది. కాబట్టి మార్కెట్లో ఏ పనికి , ఏ నైపుణ్యానికి డిమాండ్ ఉందో తెలుసుకుని దాని ప్రకారం నడుచుకోవాలి. ఈ క్రమంలో మీకు ఇష్టపనికి అంత డిమాండ్ లేకుంటే కచ్చితంగా కొత్త డొమైన్ పై పట్టు సాధించాల్సిందే. నైపుణ్యాలను అప్‌గ్రేడ్ చేసుకుంటే ఆత్మ సంతృప్తితో పాటు డబ్బును కూడా సంపాదించొచ్చు. మీకు ఇష్టం ఉంది కదా అని మార్కెట్లో డిమాండ్ లేని డబ్బు సంపాదించిపెట్టని నైపుణ్యాన్ని నేర్చుకోవడం వలన ఏంటి ప్రయోజనం? 

4. ఉద్యోగ భద్రత ఉన్న జాబ్ చూసుకోవాలి!

       మనం ముందు చెప్పుకున్నట్టు ఇది పోటీ ప్రపంచం. ఇక్కడ నైపుణ్యం ముఖ్యం కానీ  స్థిరత్వం కాదు. గవర్నమెంట్ జాబ్ అయినా కానీయండి. మంచి ఎమ్‌ఎన్‌సీ లో జాబ్ కానీయండి..నైపుణ్యాలు లేకుంటే ఎక్కడ మొదలుపెట్టారో అక్కడే ఉండాల్సి ఉంటుంది. ప్రభుత్వ ఉద్యోగంలో జాబ్ సెక్యూరిటీ ఉండొచ్చు కానీ మంచి స్థాయికి రావాలంటే మాత్రం అక్కడ కూడా నైపుణ్యాలే అవసరం. భవిష్యతో లో మంచి అవకాశాలున్న రంగాన్ని ఎంచుకోవడం, అప్ కమింగ్ టెక్నాలజీని అంచనా వేస్తూ స్కిల్స్ నేర్చుకుంటే మిమ్మల్ని ఆపడం ఎవరి తరం కాదు. ఒక్కముక్కలో చెప్పాలంటే కెరీర్ లో బాగా ఎదగడానికి అవకాశాలున్న రంగంలో ఉద్యోగం చూసుకోవాలి. అయితే ఏ రంగంలో ఉన్నా స్కిల్స్ ను ఎప్పటికప్పుడు అప్‌డేట్ చేసుకోవడం తప్పనిసరి అని మర్చిపోవద్దు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com