సూటిగా,సుత్తిలేకుండా..చాగంటి వారిలా..!

   ఒక విష‌యాన్ని స‌ర‌ళంగా, సూటిగా చెప్ప‌డంలోనే వ్య‌క్తి విజ‌యం ఆధార‌ప‌డి ఉంటుంది. ఎంతటి విష‌య ప‌రిజ్ఞాన‌మున్నాన‌లుగురికి అర్ధ‌మ‌య్యేలా చెప్ప‌లేకుంటే అది వ్య‌ర్ధంగానే మిగిలిపోతుంది. భావ వ్య‌క్తీక‌ర‌ణ‌లో స‌ర‌ళ‌త చాలా కీల‌క‌మైన విష‌యం. ఈ విష‌యాన్ని క‌చ్చితంగా గుర్తుపెట్టుకుంటేనే అటు టీచ‌ర్ అయినా ఇటు విద్యార్ధి విజ‌యం సాధించ‌గ‌లుగుతారు. సంక్లిష్ట‌మైన ప‌దాల‌ను వాడుతూ అవ‌త‌లి వ్య‌క్తుల‌ను ఆక‌ట్టుకోవాల‌నుకుంటే అది ఎప్ప‌టికీ మంచి ఫ‌లితాల‌ను ఇవ్వ‌దు. విజ‌యం సాధించిన వ్య‌క్తుల జీవితాల‌ను క్షుణ్ణంగా ప‌రిశీలిస్తే ఈ విష‌యం అర్ధ‌మ‌వుతుంది. ఇప్పుడు విద్యార్ధికి వృత్తిగ‌త నైపుణ్యాల‌తో పాటు భావ‌వ్య‌క్తీక‌ర‌ణ కూడా చాలా ముఖ్యమైన అర్హ‌త‌గా మారిపోయింది. అటువంటి కీల‌క‌మైన భావ‌వ్య‌క్తీక‌ర‌ణలో త‌గిన మార్పులు చేసుకుని అవ‌త‌లి వ్య‌క్తులకు హ‌త్తుకునేలా చెప్ప‌గ‌లిగిన‌ప్పుడే స‌క్సెస్ ద‌రికి చేరుతుంది. 

ఎలా చెప్పామ‌న్న‌దే ముఖ్యం

   వేట‌లో సూటిగా బాణం వేయ‌డంలో ఎంత నేర్పు ఉండాలో భావ‌వ్య‌క్తీక‌ర‌ణ‌లో విష‌యాన్ని సూటిగా చెప్ప‌గ‌ల‌గ‌డంలో అంతే నేర్పు ఉండాలి. ఎంత‌టి సంక్లిష్ట‌మైన విష‌యాన్నైనా క్లుప్తీక‌రించి ప్ర‌భావవంతంగా చెప్ప‌గ‌ల‌గ‌డ‌మే అన్నింటిక‌న్నా చాలా ముఖ్యం. ఈ విష‌యంలో విద్యార్ధి త‌గిన సాధ‌న చేయాల్సిందే. ఇప్పుడు కంపెనీలు అభ్య‌ర్ధుల నుంచి ఆశిస్తున్న అర్హ‌త‌ల జాబితా మారిపోయింది. నైపుణ్యంతో పాటు భావ‌వ్య‌క్తీక‌ర‌ణ‌కు వారు పెద్ద‌పీట వేస్తున్నారు. ఇటువంటి సంద‌ర్భంలో విద్యార్ధి త‌న‌ను తాను మార్చుకోవాలి. ప‌ద సంప‌ద‌ను పెంచుకుంటూనే అదే స‌మ‌యంలో వాటిని ఎక్క‌డ వాడాలి  అన్న‌దానితో పాటు విష‌యం చెప్పేట‌ప్పుడు అవ‌త‌లి వారికి సులువుగా అర్ధం అవుతుందా లేదా అన్న‌ది ప‌రిశీల‌న చేసుకోవాలి. విష‌యాన్ని చెప్ప‌డంలో త‌డ‌బాటు ఉన్నా సుదీర్ఘంగా చెపుతున్నా దాన్ని వెంట‌నే స‌రి చేసుకోవాలి. ప‌రిజ్ఞానం కంటే స్ప‌స్ట‌త ముఖ్య‌మ‌న్న విష‌యం గుర్తిస్తే విద్యార్ధి భావ‌వ్య‌క్తీక‌ర‌ణ‌లో లోపాలు తొంద‌ర‌గా తొలిగిపోతాయి. 

స‌ర‌ళంగా చెప్పేవాళ్లే విజేత‌లు

    చాగంటి కోటేశ్వ‌ర్రావు గారి పేరు తెలియ‌ని వారు ఇప్పుడు మ‌న తెలుగు రాష్ట్రాల్లోనే లేరు. త‌న ప్ర‌వ‌చ‌నాల‌తో ఆయ‌న ఎంత కీర్తి గ‌డించారో అంద‌రికీ తెలిసిందే. ఎంద‌రు ప్ర‌వ‌చ‌న‌కారులు ఉన్నా చాగంటి గారే అంత‌లా ప్రాచుర్యం పొంద‌డానికి కార‌ణం ఆయ‌న చెప్పే విష‌యం స‌ర‌ళంగా ఉండ‌ట‌మే. చ‌దువుకున్న వారితో పాటు నిరక్ష్య‌రాస్యులకు కూడా అర్థ‌మ‌య్యేలా చెప్ప‌గ‌ల‌గ‌డ‌మే ఆయ‌న విజ‌య‌ర‌హ‌స్యం. నేటి విద్యార్ధులు రేపు ఉద్యోగులుగా మారిన‌ప్పుడు ఈ విష‌యాన్ని త‌ప్ప‌కుండా గుర్తుపెట్టుకుని త‌న వృత్తి జీవితానికి అన్వయించుకోవాలి. వినియోగ‌దారుల‌తో లావాదేవీలు జ‌రిపిన‌ప్పుడు కానీ కాంట్రాక్ట్ ఇచ్చే క్లయింట్ తో మాట్లాడిన‌ప్పుడు కానీ సూటిగా, సులువైన భాష‌లో మాట్లాడితే అవ‌త‌లి వ్య‌క్తులు త్వ‌ర‌గా ఇంప్రెస్ అవుతారు. మ‌నం ప‌నిచేస్తున్న కంపెనీపై మంచి అభిప్రాయాన్ని ఏర్ప‌రుచుకోవ‌డంతో పాటు వ్య‌క్తిగ‌తంగా ఎటువంటి డాంబికాలు లేని వ్య‌క్తిగా మ‌న‌ల్ని గుర్తిస్తారు. అలా కాకుండా పెద్ద పెద్ద ప‌దాలు వాడుతూ మ‌న భాషా ప‌రిజ్ఞానాన్ని , ఆ సంద‌ర్భానికి అవ‌స‌రం లేని నైపుణ్యాల‌ను ప్ర‌ద‌ర్శిస్తే మొద‌టికే మోసం రావ‌చ్చు. 

పాఠం విద్యార్ధికి ఉల్లాసం కావాలి 

   ప్ర‌స్తుతం భోధ‌న‌లో టీచ‌ర్లు కూడా ఇదే ర‌క‌మైన ప‌ద్ధ‌తుల‌ను అనుస‌రించాలి. త‌ర‌గ‌తి గ‌దిలో విద్యార్ధి అర్ధ‌మ‌య్యే విధంగా స‌ర‌ళ‌మైన భాష‌లో చెప్ప‌గ‌లిగిన‌ప్పుడే విద్యార్ధులు పాఠం సారాన్ని త్వ‌ర‌గా గ్ర‌హించ‌గ‌లుగుతారు.  త‌ర‌గ‌తిలో స్థాయితో సంబంధం లేకుండా పాఠం పిల్ల‌ల మ‌న‌స్సులో బ‌లంగా నాటుకున్న‌ప్పుడే టీచ‌ర్ భోధ‌న‌లో విజ‌యం సాధించిన‌ట్టు. ఈ విష‌యాన్ని గుర్తించి ఉపాధ్యాయుడు క‌ఠినమైన ప‌దజాలం ఉప‌యోగించ‌కుండా  ఉదాహ‌ర‌ణ‌ల‌తో, తేలిక‌పాటి ప‌దాల‌తో పాఠం చెప్పినప్పుడు విద్యార్ధులు మ‌రింత‌ సులువుగా అర్ధం చేసుకోగ‌లుగుతారు. అవ‌స‌ర‌మైతే చిన్న క‌థ‌ల‌ను చెప్పి విష‌యాన్ని పిల్ల‌ల బుర్ర‌లోకి మ‌రింత సులువుగా విష‌యాన్ని జొప్పించే ప్ర‌య‌త్నం చేయాలి. ఇలా చేయ‌డం వ‌ల‌న పాఠం అంటే విద్యార్ధులు ఆస‌క్తి చూపిస్తారు. త‌ర‌గ‌తి గ‌దిలో ఆస‌క్తిక‌ర‌మైన వాతావ‌ర‌ణాన్ని సృష్టించే భాధ్య‌త ఉపాధ్యాయుడిదే.     స‌ర‌ళంగా, సూటిగా పాఠం చెప్పే త‌త్వాన్ని ఉపాధ్యాయుడు గ్ర‌హించిన‌ప్పుడే ఇది సాధ్య‌మ‌వుతుంది. 

సంక్లిష్ట‌త‌కు కాలం చెల్లింది

  ఇప్పుడు మ‌నం ఏ వ‌స్తువును తీసుకున్నా దాన్ని ఎంత సుల‌భంగా వాడ‌గ‌లం అన్న‌దానిపైనే దాని మ‌నుగ‌డ ఆధార‌ప‌డి ఉంది. సౌక‌ర్యాల‌కు అల‌వాటు ప‌డిన ప్ర‌జ‌ల‌కు ప్ర‌తీ దాన్నీ మ‌రింత‌ సుల‌భ‌త‌రం చేయ‌డ‌మే ఇప్పుడు కంపెనీల అంతిమ ల‌క్ష్యం. ప్ర‌తీ ఒక్కరూ తీరిక‌లేని కార్య‌క‌లాపాల‌తో బిజీ బిజీ జీవితాల‌ను గ‌డుపుతున్నారు. ఇలాంటి త‌రుణంలో సంక్లిష్టంగా, సుదీర్ఘంగా విష‌యాన్ని చెప్ప‌డం అంటే మ‌నం వెనక‌బ‌డిపోయిన‌ట్టే. ఉద్యోగంలో అయినా వ్య‌క్తిగ‌త జీవితంలో అయినా ఏ విష‌యాన్ని అయినా సూటిగా, స్ప‌ష్టంగా త‌క్కుక స‌మ‌యంలో చెప్ప‌గ‌ల‌గాలి. ఈ విష‌యాన్ని గుర్తించి విద్యార్ధులు త‌న భావ వ్య‌క్తీక‌ర‌ణ‌లో స‌ర‌ళ‌త‌, స్ప‌ష్ట‌త‌, స‌మ‌యానికి అధిక ప్రాధాన్య‌త‌నిచ్చి అందులో త‌గిన మార్పులు చేసుకోవాలి. ఇక ఉపాధ్యాయులు కూడా ఇదే విష‌యాన్ని గుర్తించి సుదీర్ఘంగా కాకుండా పిల్ల‌ల‌కు చిన్న చిన్న ఉదాహ‌ర‌ణ‌ల‌తో ఆస‌క్తిక‌రంగా పాఠం చెప్తే వాళ్లు దాన్ని త్వ‌ర‌గా అర్ధం చేసుకోగ‌లుగుతారు.   

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com