లైఫ్ కావాలంటే 'లైవ్' లో ఉండాలి!
ఇప్పుడు కంపెనీల ముందున్న అతిపెద్ద స‌వాలు స‌మ‌ర్ధ‌వంత‌మైన మాన‌వ వ‌న‌రుల ఎంపిక. ప్ర‌స్తుతం నైపుణ్యం ఉన్న విద్యార్ధుల సంఖ్య స్వ‌ల్పంగా ఉన్నందున కంపెనీలకు అభ్యర్ధులను ఎంపిక చేసుకోవ‌డం అతిపెద్ద స‌మ‌స్య‌గా ప‌రిణ‌మించింది. దీనికి తోడు స‌మ‌ర్ధ‌వంత‌మైన అభ్య‌ర్ధులు వల‌స‌ల బాట ప‌ట్ట‌డంతో కంపెనీల హెచ్ఆర్ ల‌కు ఇంట‌ర్వ్యూలు క‌త్తిమీద సాములా మారిపోయాయి. ఇటువంటి ప‌రిస్థితుల్లో సాంకేతికతను ఉప‌యోగించుకుని కంపెనీలు ఆన్ లైన్ వేదిక ద్వారా ఇంట‌ర్వ్యూల‌ను నిర్వ‌హిస్తూ టాలెంట్ ను వెత‌క‌డంతో పాటు స‌మ‌యాన్ని డ‌బ్బునూ ఆదా చేసుకుంటున్నాయి. ఉద్యోగాన్వేష‌ణ‌లో ఉన్న అభ్య‌ర్ధులు ఈ కొత్త మార్పుపై క‌చ్చితంగా అవ‌గాహ‌న పెంచుకోవాల్సిందే. లైవ్ లో ప్రత్యక్షంగా ఇంటర్వ్యూ ను ఎదుర్కొవడం వలన మనలో సృజనాత్మకతను మరింత ప్రభావవంతంగా ప్రదర్శించే వీలు కలుగుతుంది. లేకుంటే ఈ పోటీ ప‌రుగు పందెంలో వెనుక‌బ‌డిపోవ‌డం ఖాయం.
ఆన్ లైన్ తో కొత్త మార్పులు
సంప్ర‌దాయ ప‌ద్ధ‌తుల్లో ఇంట‌ర్వ్యూలు నిర్వ‌హించ‌డం ప్ర‌స్తుతం కంపెనీలకు భారంగా మారింది. దీంతో కంపెనీలు ప్ర‌త్యామ్నాయ మార్గాల‌పై దృష్టి సారించాయి. అందులో భాగంగానే ఆన్ లైన్, వ‌ర్చువ‌ల్ ప‌ద్ధ‌తుల్లో ఇంట‌ర్వ్యూలు నిర్వ‌హించి అభ్య‌ర్ధుల ఎంపిక‌ను చేప‌డుతున్నాయి. ఇది ఇప్ప‌టికిప్పుడు చోటుచేసుకున్న కొత్త మార్పు కానప్ప‌టికీ, ఇటీవ‌లి కాలంలో కంపెనీలు మ‌ళ్లీ ఆన్ లైన్ విధానంపై ఎక్కువ‌గా దృష్టి కేంద్రీక‌రించాయి. కంపెనీలు ఆన్ లైన్ లోనే జాబ్ బోర్డ్స్ పెట్డ‌డం వలన వాటికి చాలా స‌మ‌యం ఆదా అవుతోంది. అంద‌ర్నీ ఇంట‌ర్వ్యూకు పిలిచే అవసరం లేకుండా ఆన్ లైన్ లో అభ్య‌ర్ధుల వ‌డ‌బోత చాలా సులువుగా జ‌రిగిపోతోంది. ఒకే దెబ్బ‌కు రెండు పిట్ట‌లు అన్న చందంగా నైపుణ్యం లేని అభ్య‌ర్ధుల వ‌డ‌బోత‌తో పాటు కంపెనీలకు కావ‌ల్సిన స‌ర్వే కూడా జ‌రిగిపోతోంది. త‌మ‌కు అవసరం అనుకున్న అభ్య‌ర్ధిని స్కైప్ ద్వారానే చాలా కంపెనీలు ఇంట‌ర్వ్యూలు చేస్తున్నాయి. అటు అభ్య‌ర్ధికి ఇటు కంపెనీకి డ‌బ్బు , స‌మ‌యం ఆదా చేసే ఈ విధానం ఇప్పుడు జాబ్ మార్కెట్ లో హాట్ టాపిక్ గా మారింది.
ఊపందుకుంటున్న వ‌ర్చువ‌ల్ జాబ్ ఫెయిర్స్
ఇప్పుడు చాలా కంపెనీలు ప్ర‌త్యేకించి చిన్న కంపెనీలు వ‌ర్చువ‌ల్ జాబ్ ఫెయిర్స్ ను నిర్వ‌హిస్తున్నాయి. దీని వలన వాటికి ఎక్కువ సిబ్బంది, కార్యాల‌యం వంటి ఖ‌ర్చులు లేకుండానే ఇంట‌ర్వ్యూలు నిర్వ‌హించే వీలు చిక్కుతోంది. మ‌రో వైపు అభ్యర్ధులకు కూడా త‌క్కువ ఎంట్రీ ఫీజుతో ఇటువంటి వ‌ర్చువ‌ల్ జాబ్ ఫెయిర్స్ లో పాల్గొనేందుకు అవ‌కాశం క‌లుగుతోంది. మ‌రోవైపు అభ్య‌ర్ధి రెజ్యూమె, భావ‌వ్య‌క్తీక‌ర‌ణ నైపుణ్యాల‌ను అంచ‌నా వేసి వారిని సెలెక్ట్ చేసుకోసుకునే విధానం స‌ర‌ళ‌త‌రంగా రూపుదిద్దుకుంది. అటు అభ్యర్ధులకు కూడా కంపెనీకి సంబంధించిన పూర్తి వివరాలను తెలుసుకునే అవ‌కాశం క‌లుగుతోంది. ఇక అప్ప‌టికే ఉద్యోగం చేస్తూ కొత్త కంపెనీకి మారుదామ‌నుకుంటున్న‌వారికి కూడా ఈ విధానం చాలా ఉప‌యోగ‌క‌రంగా ఉంటోంది. అప్ప‌టిక‌ప్పుడు త‌న ఎంపిక, ప్యాకేజీ త‌దిత‌ర వివరాలను తెలుసుకోగ‌ల‌గ‌డంతో చాలా మందికి కంపెనీలు మార‌డం సులువుగా మారుతోంది. సంప్ర‌దాయ ఇంట‌ర్వ్యూలో ఇలాంటి సౌక‌ర్యాలు అభ్య‌ర్ధికి అందుబాటులో ఉండ‌క‌పోవ‌డంతో ఇప్పుడు వ‌ర్చువ‌ల్ ఇంట‌ర్వ్యూలు క్ర‌మంగా పెరుగుతున్నాయి.
సాంకేతికతను అర్ధం చేసుకోవాలి
ప్ర‌స్తుతం కంపెనీలు ఆన్ లైన్ విధానంలో రెండు ప‌ద్ధ‌తుల ద్వారా ఇంట‌ర్వ్యూల‌ను నిర్వ‌హిస్తున్నాయి. అవి లైవ్ వీడియో ఇంటర్వ్యూ, ప్రీ రికార్డెడ్ ఇంటర్వ్యూ. లైవ్ వీడియో ఇంట‌ర్వ్యూలో అభ్యర్ధులను రియ‌ల్ టైమ్ లోనే ఇంట‌ర్వూ చేస్తారు. అభ్య‌ర్ధి సామ‌ర్ధ్యాల‌ను ప్రత్యక్షంగా ప‌రిశీలిస్తారు. ఆ సెష‌న్ ను రికార్డ్ చేసి మిగ‌తా స‌భ్యులు ప‌రిశీల‌న చేసి తుది ఎంపిక‌ను ప్ర‌క‌టిస్తారు. ఇక ప్రీ రికార్డెడ్ ఇంట‌ర్వ్యూలో ముందుగానే సిద్ధం చేసిన ఇంట‌ర్వ్యూను అభ్య‌ర్ధి ఎదుర్కోవాల్సి ఉంటుంది. ఆ త‌ర్వాత హెచ్ఆర్ వాళ్లు ఆ వీడియోను ప‌రిశీలించి స‌ద‌రు అభ్య‌ర్ధి నైపుణ్యాల‌ను బేరీజు వేసి ఎంపిక‌ను ఖ‌రారు చేస్తారు. ఇప్పుడు చిన్న, మధ్య స్థాయి కంపెనీల్లో ఈ ట్రెండ్ బాగా ఊపందుకుంటోంది. కాబ‌ట్టి అభ్య‌ర్ధులు ఆన్ లైన్ ఇంట‌ర్వ్యూల‌ను ఎదుర్కొనేందుకు మాన‌సికంగా సంసిద్ధంగా ఉండాలి. దానికి త‌గ్గ నైపుణ్యాల‌ను మెరుగుప‌ర్చుకోవాలి. మార్పుల‌కు అనుగుణంగా త‌న‌ను తాను మార్చుకున్న‌ప్పుడే పోటీ ప్ర‌పంచంలో మ‌న‌గ‌లం అన్న విష‌యాన్ని విద్యార్ధులు గుర్తించాలి.
సోష‌ల్ మీడియా.. అవ‌కాశాల గ‌ని
ఖ‌ర్చు త‌గ్గింపు చ‌ర్య‌ల్లో భాగంగా కంపెనీలు ఇప్పుడు సోష‌ల్ మీడియాను కూడా ఉద్యోగాల భ‌ర్తీకి వేదిక‌గా చేసుకుంటున్నాయి. త‌మ కంపెనీ అవ‌స‌రాలు, ప‌ని సంస్కృతిని ప్ర‌తిబింబించేలా సోష‌ల్ మీడియాలో పోస్ట్ లు పెడుతున్నాయి. ఉద్యోగార్ధులు వీటిపై కూడా దృష్టి సారించి వాటి అవ‌స‌రాల‌కు అనుగుణంగా త‌మ‌ను తాము మ‌లుచుకుంటే ఉద్యోగం చిక్కిన‌ట్టే. రానున్న రోజుల్లో స‌రికొత్త మార్పుల‌కు శ్రీకారం చుట్టే కృత్రిమే మేథ‌స్సు, రోబోటిక్స్ లు ఆటోమేష‌న్ ను తెర‌మీద‌కు తీసుకురానున్నాయి. స‌మ‌ర్ధులైన అభ్య‌ర్ధుల ఎంపిక‌లో కంపెనీలు కృత్రిమ మేథ‌ను కూడా ఉప‌యోగించే అవ‌కాశాలున్నాయి. ఈ కొత్త మార్పుకు విద్యార్ధులు ఇప్ప‌టి నుంచే మాన‌సికంగా సిద్ధం కావాలి. అభ్య‌ర్ధుల ఎంపిక‌లో ఆన్ లైన్, వ‌ర్చువ‌ల్ ఇంట‌ర్యూలతో పాటు భ‌విష్య‌త్ లో రాబోయే కొత్త మార్పులు కూడా అటు కంపెనీలకు, ఇటు విద్యార్ధుల‌కు లాభం చేకూరుస్తాయ‌న‌డంలో ఎటువంటి సందేహం లేదు.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment