ఈ 'ఛేంజ్'..ఓ ఛాలెంజ్ !

    ఈ నవీన సాంకేతిక యుగంలో మార్పు అనేది చాలా ముఖ్యమైన విషయం. వ్యక్తిగతంగా కావచ్చు, వృత్తిగతంగా కావచ్చు మార్పును ఆహ్వానించకపోతే మనుగడ కష్టంగా మారుతుంది. వ్యక్తిగత శీల నిర్మాణం, అభిరుచులు, సామాజిక బాధ్యతల విషయాన్ని పక్కన పెడితే కెరీర్ పరంగా మార్పు అనేది ప్రతీ ఒక్కరికి క్లిష్టతరమైన విషయం. చదువు తర్వాత ఎంతో శ్రమకొర్చి నిర్మించుకున్న ఒక కెరీర్ నుంచి మరొక కెరీర్ కు మారడం అనేది సవాలుతో కూడుకున్న వ్యవహారం. వ్యక్తిగత ఆసక్తి , అవకాశాలు, ఆదాయం ఇలా ఎన్నో విషయాలు కెరీర్ మార్పుకు కారణాలు. అయితే సరైన సమయంలో సరైన నిర్ణయం తీసుకోవడం, అప్రమత్తంగా వ్యవహరిస్తేనే ఈ మార్పు విజయవంతమవుతుంది. లేకుంటే కెరీర్ మార్పు మీకు పీడకలగా మిగలవచ్చు. పైపైచ్చు ఇది వ్యక్తిగతంగా, ఏకపక్షంగా తీసుకునే నిర్ణయం కాదు. కుటుంబ సభ్యులు, సహోద్యోగులు, స్నేహితులు ఇలా అందరి సహాయ సహకారాలతో తీసుకోవాల్సిన కీలక నిర్ణయం. తాత్కాలిక ప్రయోజనాలను, ఆకర్షణీయ హంగులకు అతీతంగా దూరదృష్టితో ఆలోచించి కెరీర్ లో మార్పుకు సమాయుత్తం కావాలి. 

ఎందుకీ కెరీర్ మార్పు? 

      ప్రస్తుతం ఒక వ్యక్తి   ఉద్యోగంలో స్థిరత్వం సాధించేటప్పటికీ అతనికి 30 ఏళ్లు నిండుతున్నాయి. అత్యున్నత విద్యాసంస్థల్లో చదివిన వారిని మినహాయిస్తే అధిక శాతం మంది యువతకు ఇదే వర్తిస్తుంది. తర్వాత వివాహం, పిల్లలు, కుటుంబ భాధ్యతలు ఆ ఉద్యోగిని సేఫ్ జోన్ వదిలి బయటకు రాకుండా చేస్తాయి. కానీ వేతనంలో వృద్ధి లేకపోవడం, ఉద్యోగ భద్రత తగ్గడం, బాస్ వేధింపులు,  చేసే పనిపై ఆసక్తి లేకపోవడంతో ఆ సేఫ్ జోన్ వదిలి కెరీర్ లో మార్పు చేసుకోవాలని, ప్రస్తుతం పనిచేస్తున్న రంగం వదిలి వేరే రంగంలోకి వెళ్లాలని చాలామంది భావిస్తున్నారు. అయితే కెరీర్ మార్పు అనే నిర్ణయం చాలా కష్టంతో, సవాలుతో కూడుకున్న నిర్ణయం. ఉన్న ఉద్యోగాన్ని వదిలేసి ఏమీ తెలియని కొత్త రంగంలోకి వెళ్లడం అంటే అంత సులువైన విషయమేమీ కాదు. ఇటువంటి సమయంలో కుటుంబ సభ్యులతో పాటు స్నేహితులు, శ్రేయోభిలాషులు వెనక్కు లాగుతారు. అయితే వాళ్లను ఒప్పించి ఎందుకు ఇటువంటి నిర్ణయం తీసుకోవాల్సి వస్తుందో వివరిస్తే వారివైపు నుంచి మద్ధతు దొరుకుతుంది. ఎందుకంటే కుటుంబ సభ్యుల మద్ధతు లేకుండా కెరీర్ మార్పు అనేది దాదాపు అసాధ్యం. 

స్పష్టత, ప్రణాళిక చాలా ముఖ్యం 

     ఉద్యోగంలో ఒక విభాగం నుంచి మరో విభాగానికి మారినప్పుడే అంతా చాలా కొత్తగా ఉంటుంది. అలాంటిది ఒక రంగం నుంచి వేరే రంగానికి మారాలనుకున్నప్పుడు ఎంత సన్నద్ధత ఉండాలి. ముఖ్యంగా కెరీర్ ను ఎందుకు మార్చుకుంటున్నారన్నదానిపై చాలా స్పష్టత ఉండాలి. అదే విధంగా నిజాయితీ, మార్పుకు మీరు చెపుతున్న కారణాల్లో సానుకూలత కచ్చితంగా ఉండాల్సిందే. ఇలా ఉన్నప్పుడే కుటుంబ సభ్యులు, స్నేహితులు మీరు తీసుకున్న కెరీర్ మార్పు నిర్ణయాన్ని స్వాగతిస్తారు. లేకుంటే వారి నుంచి ఎదురయ్యే ప్రశ్నలకు మీరు ఇబ్బందులకు గురవుతారు. తాజా సర్వేల ప్రకారం కెరీర్ చేంజ్ చేస్తున్న ప్రతీ ముగ్గురిలో ఇద్దరికి ఎందుకు కెరీర్ లో మార్పు చేసుకుంటున్నామన్నదానిపై క్లారిటీ ఉండటం లేదట. మీరు మాత్రం అన్ని విధాలుగా ఆలోచించాకే కెరీర్ మార్పు నిర్ణయం తీసుకొండి. మీరు తీసుకునే నిర్ణయం మీతో పాటు మీ కుటుంబాన్ని ప్రభావితం చేస్తుంది కాబట్టి వాస్తవ దృక్ఫథంలో ఆలోచించాలి. ఆర్థికంగా కుటుంబానికి ఎటువంటి ఇబ్బందులు కలుగుకుండా ముందుగానే ప్రణాళిక వేసుకోవాలి. ఉన్న ఆర్థిక వనరులను సమర్ధవంతగా వినియోగించుకోవాలి. ఆర్థిక ఇబ్బందులు ఉంటే మీరు తీసుకున్న నిర్ణయం నీరుగారిపోయే ప్రమాదం ఉంది. కాబట్టి కెరీర్ మార్పులో ఆర్థిక ప్రణాళిక, సరైన స్పష్టత చాలా ముఖ‌్యం. 

మీ బలాలు, బలహీనతలు తెలియాల్సిందే!

    మీకు తెలియని కొత్త రంగంలోకి అడుగుపెడుతున్నప్పుడు ఎన్నో సవాళ్లు ఉంటాయి. అక్కడి నైపుణ్యాలను నేర్చుకుని సంసిద్ధంగా ఉంటే మీ తొలి అడుగు విజయవంతమవుతుంది. ఈ విషయంలో మీ బలాలు, బలహీనతలను సరిగ్గా గుర్తించాలి. బలహీనతలు ఉండే వాటిని తొలిగించుకుని కొత్త రంగంలో రాణించేందుకు ప్రయత్నించాలి. అప్పటికే ఆ రంగంలో ఉన్న సీనియర్ల సలహాలను, సూచనలను తీసుకుని వాటికి అనుగుణంగా తనను తాను తీర్చిదిద్దుకోవాలి. అదే విధంగా వేరే రంగంలోకి వెళ్లాలనుకుంటున్న మీ అభిరుచి ఒక్కటే సరిపోదు. ఆ రంగంలో ఉన్న సవాళ్లు, సాధ్యాసాధ్యాలు మొదలైన వాటిని సరిగ్గా విశ్లేషించుకుని అడుగు వేయాలి. ప్రతీ రంగంలోనూ సవాళ్లు ఉంటాయన్న వాస్తవిక దృక్పథాన్ని అలవర్చుకోవాలి. ఉద్యోగ అన్వేషణకు కేవలం ఆన్ లైన్ పైనే ఆధారపడకుండా ఇతర మార్గాలను కూడా అన్వేషించాలి. మీరు పనిచేయాలనుకుంటున్న రంగంలోకి ఉద్యోగులు, హెచ్ ఆర్ సిబ్బందితో పరిచయాలు పెంచుకుంటే వాళ్లు ఇచ్చే రిఫరెన్స్ మీకు బాగా ఉపయోగపడుతుంది. ప్రస్తుతం చాలా ఉద్యోగాలకు ప్రకటనలు ఇవ్వడం లేదు. చాలా ఉద్యోగాలు కేవలం రిఫరెన్స్ ల ద్వారానే భర్తీ  చేస్తున్నారు. ఇలాంటి వాటిని ఉపయోగించుకుని మీ కెరీర్ ఛేంజ్ ను విజయవంతం చేసుకోవాలి. 

వాస్తవిక దృక్పథం ఉంటే మీదే విజయం

    ఇష్టం లేని ఉద్యోగం చేయడం ఎవరికైనా ఇబ్బందికరమైన విష‍యమే. కానీ కెరీర్ ఛేంజ్ అనేది సముద్రాన్ని దాటడం లాంటిది. ఒక్క చిన్న పొరపాటు జరిగినా మునిగిపోవడం ఖాయం. కాబట్టి స్పష్టతతో కూడిన బలమైన నిర్ణయం తీసుకుంటే మీకు ఆసక్తి ఉన్న అభిరుచి ఉన్న రంగంలోకి మీరు విజయవంతంగా ప్రవేశించవచ్చు. కానీ ప్రస్తుతం చాలామంది కెరీర్ మార్పుపై వాస్తవిక దృక్పథం లేకుండా వ్యవహరిస్తూ పొరపాటు నిర్ణయాలు తీసుకుంటున్నారు. అలా కాకుండా నిదానంగా ఆలోచించి సరైన నిర్ణయం తీసుకోవాలి. కుటుంబ సభ్యుల సహాయ, సహకారాలను తీసుకుంటే మీ మార్పు మరింత వేగంగా విజయం సాధిస్తుంది. అదే విధంగా కెరీర్ మార్పులో సమయం, సందర్భం కూడా చాలా ముఖ్యం. అన్ని విషయాలు సానుకూలంగా ఉన్నప్పుడే మీరు పనిచేస్తున్న రంగం నుంచి వేరే రంగానికి మారండి. అదే విధంగా ఆర్థిక ప్రణాళిక చాలా కీలకమని గుర్తించాలి. ఇన్ని రకాల జాగ్రత్తలు తీసుకున్నప్పుడు మీ కెరీర్ మార్పు తప్పకుండా విజయవంతమవుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com