నా చావు నేను చ‌స్తా..నీకెందుకు?

    మ‌న దేశంలో గ‌డిచిన రెండు ద‌శాబ్దాల కాలంలో ప్ర‌జ‌ల‌ సామాజిక స్థితిగ‌తులు, మానవ సంబంధాలు, మ‌న‌గ‌డ‌ల్లో  చాలా స్ప‌ష్ట‌మైన మార్పులు చోటు చేసుకున్నాయి. ముఖ్యంగా దిగువ మ‌ధ్య‌త‌ర‌గ‌తి వారు ఎగువ మ‌ధ్య‌త‌ర‌గ‌తి వ‌ర్గంగా స్థాన‌చ‌ల‌నం పొందారు. నాణ్య‌మైన జీవ‌నం, సౌక‌ర్యాలు అందుబాటులోకి వ‌చ్చాయి. లింగ భేధం లేకుండా అంద‌రూ ఆర్ధిక స్వాతంత్రం సంపాదించుకున్నారు. అయితే ఇన్ని మార్పులు జ‌రిగినా మ‌న సామాజిక వ్య‌వ‌స్థ‌లో జీర్ణించుకుపోయిన కొన్ని అనుచిత సాంఘిక అల‌వాట్లు మాత్రం అలానే ఉండిపోయాయి.  ము‌ఖ్యంగా గురివింద గింజ సామెతలా నేను ఏంటి? నేను ఏం సాధించాను? అన్న విషయాన్ని వదిలేసి..నువ్వు ఏం సాధించావు? ఏం చేస్తున్నావు? అని అడిగే వారు అధికంగా ఉన్నారు. సమాజం నుంచి నువ్వు ఏం చేస్తున్నావు అన్న ప్రశ్న విద్యార్ధికి అనుక్షణం ఎదురవుతూనే ఉంటుంది.   కొత్త త‌రానికి చికాకు తెప్పించే పాత‌త‌రం వారి ఈ అర్ధం లేని ప్ర‌శ్న‌ల ప‌రంప‌ర‌కు ఎలా స‌మాధానం చెప్పాల‌న్న‌ది కూడా ఇప్పుడు ముఖ్య‌మైన విష‌యమే. సోసైటీలో ఏం మాట్లాడకూడదో నేర్చుకోవడం చాలా ముఖ్యం. మాన‌వ సంబంధాల‌పై పెను ప్ర‌భావం చూపే ఈ అనుచిత ప్ర‌శ్న‌ల నుంచి ఎవ‌ర్నీ బాధ పెట్ట‌కుండా త‌ప్పించుకోవ‌డం కూడా ఒక క‌ళే. 

త‌ప్పించుకు తిరుగువాడే ధ‌న్యుడు సుమ‌తీ!

    ఏం ఉద్యోగం చేస్తున్నావు? ఎప్పుడు పెళ్లి చేసుకుంటావు? ఇప్ప‌టికీ జీవితంలో ఎందుకు స్థిర‌ప‌డ‌లేదు? ఇలాంటి ప్రశ్న‌లు గ్రాడ్యుయేష‌న్ పూర్తి చేసిన ప్ర‌తీ విద్యార్ధి ఎదుర్కొనే ఉంటాడు. టీనేజీ దాటి య‌వ్వ‌నంలోకి అడుగుపెట్టిన కొత్త త‌రం కుర్రాళ్ల‌కు ఇలాంటి ప్ర‌శ్న‌లు చికాకు క‌లిగించ‌డంలో ఆశ్చ‌ర్యం లేదు. ఉద్యోగాన్వేష‌ణ‌లో కెరీర్ ప‌రంగా, వ్య‌క్తిగ‌తంగా ఎన్నో ఒత్తిడుల‌ను ఎదుర్కొంటున్న విద్యార్ధుల‌కు ఇది ఇప్పుడు స‌వాలు మారుతోంది. ముఖ్యంగా కుటుంబ  స‌మావేశాల్లోనూ, వేడుక‌ల్లోనూ పాత‌త‌రం బంధువులు నుంచి స‌వాల‌క్ష ప్ర‌శ్న‌లు ఎదురుకావొచ్చు. ఇలాంటి సంద‌ర్భాలు ఇప్పుడు మానవ సంబంధాల‌కు, విద్యార్ధి వ్య‌క్తిగ‌త ప‌రిణితికి స‌వాలుగా నిలుస్తున్నాయి. స‌హ‌నం కోల్పోయిన చాలా మంది యువ‌తీ యువ‌కులు మా త‌ల్లిదండ్రులే అడ‌గ‌డం లేదు మీకెందుకు అంటూ కొంచెం ఘూటుగా స‌మాధాన‌మిస్తున్నారు. కానీ ఇది స‌రైన ప‌ద్ధ‌తి కాద‌న్న‌ది వ్య‌క్తిత్వ వికాస నిపుణుల సూచ‌న‌. అవ‌త‌లి వ్య‌క్తి అహం దెబ్బ‌తినేలా మాట్లాడ‌టం, వ్య‌వ‌హ‌రించ‌డం మ‌న వ్య‌క్తిత్వ నిర్మాణంలో లోపాన్ని ఎత్తి చూపుతుంది. పాత‌త‌రం వాళ్ల నుంచి ఇబ్బందిక‌ర ప్ర‌శ్న‌లు ఎదురైన‌ప్పుడు కొంచెం ప‌రిణితితో మ‌రికొంచెం ఓర్పుతో వ్య‌వ‌హ‌రిస్తే ఆ సంద‌ర్భాన్ని దాటవేయ‌వ‌చ్చు. 

మానవ సంబంధాలు చాలా కీల‌కం 

    ఎన్ని వృత్తిగత నైపుణ్యాలు నేర్చుకున్నా అందులో ప్రావీణ్యం సంపాదించినా వాటిని స‌రైన విధంగా అమ‌ల్లో పెట్టాలంటే వ్య‌క్తిత్వం కూడా చాలా ముఖ్యం. ముఖ్యంగా విద్యార్ధులు నైపుణ్యాలపై శ్ర‌ద్ధ పెడుతున్నారు కానీ వ్య‌క్తిత్వ వికాసంపై అశ్ర‌ద్ధ చూపిస్తున్నారు. మిగ‌తా విష‌యాలు జీవితంలో అనుభ‌వం ద్వారా మెల్ల‌గా నేర్చుకుంటారు కానీ మాన‌వ సంబంధాల‌ను మాత్రం చాలా జాగ్ర‌త్త‌గా కాపాడుకోవాలి. ఈ విష‌యంలో త‌ల్లిదండ్రులతో పాటు ఉపాధ్యాయులు కూడా విద్యార్ధుల‌కు మార్గ‌నిర్దేశ‌నం చేయాలి. జీవితంలో మానవ సంబంధాల ప్రాముఖ్య‌త‌ను ఈ త‌రం విద్యార్ధులకు అర్ధ‌మ‌య్యే విధంగా చెప్పాలి. మ‌న బంధువుల నుంచి ఇబ్బందిక‌ర‌మైన ప‌రిస్థితులు ఏర్ప‌డినా, ప్ర‌శ్న‌లు ఎదురైనా దుందుడుకు స‌మాధానాలు కాకుండా ప‌రిణితితో కూడా స‌మాధానాలు చెప్పి వాళ్ల మెప్పును పొందాలి. మ‌నం చెప్పే స‌మాధానాలే మ‌న త‌ల్లిదండ్రుల పెంప‌కానికి గీటురాయిగా నిలుస్తాయి. కాబ‌ట్టి స‌హ‌నంతో వ్య‌వ‌హ‌రించాలి. 

త‌ప్పించుకోవ‌డంలో నైపుణ్యం ఉండాల్సిందే!

     కొంద‌రు యువ‌తీ, యువ‌కులు త‌మ బంధువుల నుంచి అప్ర‌స్తుత‌, అనుచిత ప్ర‌శ్న‌లు ఎదురుకాగానే స‌హ‌నం కోల్పోతారు. నేను ఏం చ‌దివితే నీకెందుకు? నేను ఏం చేస్తే నీకెందుకు? నాకు న‌చ్చిన విధంగా నేను ఉంటాను..అడ‌గడానికి మీరెవ‌రు? అంటూ హ‌ద్దులు దాటేస్తారు. పెద్ద గొంతుతో స‌మాధానం చెప్ప‌డం ఎప్పుడూ మంచి విద్యార్ధి ల‌క్ష‌ణం కాదు. మ‌న‌కు న‌చ్చ‌ని ప్ర‌శ్న‌లు అడ‌గ్గానే స‌హ‌నం కోల్పోవ‌డం కూడా మంచిది కాదు. ఉద్యోగం కోసం ప్ర‌య‌త్నిస్తున్నాను. ఇది చేద్దామ‌ని నిర్ణ‌యించి ఇలా చేస్తున్నాను అని ఓపిగ్గా స‌మాధానం చెప్పండి. మీకు న‌చ్చ‌కున్నా సంభాష‌ణ అదే విష‌యంపై జ‌రుగుతుంటూ వెంట‌నే టాపిక్ ను మార్చేయండి. వేరే విష‌యాన్ని ప్ర‌స్తావించి ఆ విష‌యానికి అక్క‌డితో ముగింపు ఇచ్చేందుకు ప్ర‌య‌త్నించండి. ఇలా చేయ‌డం వ‌ల‌న మీ బంధువుల వ‌ద్ద మీరు స‌హ‌నం కోల్పోకుండా, వారితో సంబంధాలు తెంచుకోకుండా ఉండేందుకు స‌హాయ‌ప‌డుతుంది. 

ఓపిక అల‌వ‌ర్చుకొండి

     ఓపిక అనేది మాన‌వ సంబంధాల్లో చాలా కీల‌క‌మైన అంశం. మ‌న‌కు ఎన్ని ఇబ్బందులున్నా, క‌ష్టాలున్న‌ప్ప‌టికీ ఎదురైన ప్ర‌తీ సంఘ‌ట‌న‌కు సానుకూలంగా స్పందించ‌డం మ‌న వ్య‌క్తిత్వాన్ని , మ‌న గౌర‌వాన్ని పెంచుతుంది. మ‌నం పైన చెప్పుకున్న‌ట్టు మ‌న బంధువుల విష‌య‌మే కాదు మ‌న సొంత కుటుంబ స‌భ్యుల విష‌యంలోనూ మ‌నం ఓర్పుగా వ్య‌వ‌హ‌రిస్తేనే నెగ్గుకురాగ‌లం. లేకుంటే వ్య‌క్తిగ‌త జీవితంలో ఇబ్బందులు త‌ప్ప‌వు. వ్య‌క్తిగ‌త  జీవితం స‌రిగ్గా లేకుండా మ‌నం ఎన్న‌టికీ వృత్తిగ‌త జీవితంలో ఎదుగుద‌ల‌ను చూడ‌లేం. కాబ‌ట్టి అటు ఆఫీస్ లో అయినా ఇటు ఇంట్లో అయినా చ‌క్క‌ని చిరున‌వ్వుతో అంద‌ర్నీ స‌మ‌న్వ‌యం చేసుకుంటూ వెళితే మ‌న ప‌నులు చాలా సులువుగా నెర‌వేరుతాయి. స‌మాజంలో, కెరీర్ లో మ‌న ప్ర‌తిష్ట  పెరుగుతుంది. ఇబ్బందిక‌ర‌మైన ప్ర‌శ్న‌లు, ప‌రిస్థితులు ఎదురైన‌ప్పుడు స‌హ‌నం కోల్పోకుండా అక్క‌డి నుంచి ప‌క్క‌కు జ‌రిగే క‌ళ‌ను నేర్చుకుంటే  జీవితంలో విజ‌యం మీ చెంత‌నే ఉంటుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com