సీరియ‌స్ గా తీసుకుంటే 'ఈ కెరీర్' ను మించిందే లేదు!
ఆఫీస్ కు వెళ్ల‌కుండా ఎవ‌రి కిందా ప‌నిచేయ‌కుండా,న‌చ్చిన‌ప్పుడు మాత్ర‌మే ప‌నిచేస్తూ మంచి వేత‌నం సంపాదిస్తే ఎలా ఉంటుంది. చాలా అద్భుతంగా ఉంటుంది క‌దా? ప్ర‌స్తుతం ఆఫీసుల్లో ఎదుర్కొనే ఇబ్బందులు చాలానే ఉంటున్నాయి. భ‌రించ‌లేని బాజిసం, ఊపిరి స‌ల‌ప‌ని టార్గెట్ల ఒత్తిడి , ఉద్యోగాన్ని భారంగా మారుస్తున్నాయి. ఇటువంటి ప‌రిస్థితుల్లో అస‌లు ఆఫీస్ కే వెళ్ల‌కుండా, ఇంటిపట్టునే ఉంటూ, న‌చ్చిన టైం లో ప‌నిచేస్తూ, మంచి జీతం సంపాదిస్తే ఎంత బాగుంటుందో క‌దా! ఇటువంటి ఆలోచ‌న ఉన్న‌వారికి ప్ర‌స్తుత సాంకేతిక ప‌రిజ్ఞానం స‌రికొత్త అవకాశాల‌ను క‌ల్పిస్తోంది. స్వేచ్ఛ‌ను అనుభ‌విస్తూనే మంచి సంపాద‌న పొందాల‌నుకునేవారి క‌ల‌ల‌ను ప్రీలాన్సింగ్ ఉద్యోగాలు నిజం చేస్తున్నాయి. చేయాల‌నుకుంటున్న ప‌నిపై మంచి ప‌ట్టు, భాధ్య‌త‌తో, నిజాయితీతో ప‌నిచేసే తత్వం ఉన్న‌వారికి ఫ్రీలాన్సింగ్ ఇప్పుడు మంచి ఆప్ష‌న్ గా మారుతోంది. న‌చ్చిన స‌మ‌యంలో ప‌నిచేస్తూ ఫ్రీలాన్పింగ్ ఉద్యోగాల్లో రాణించాల‌నుకుంటున్న వాళ్లు కొన్ని జాగ్రత్తలు తీసుకుంటే ఇందులో రాణించేందుకు అవ‌కాశం క‌లుగుతుంది.
ఊపందుకుంటున్నఫ్రీలాన్సింగ్ ట్రెండ్!
ఫ్రీలాన్సింగ్ అనేది మ‌న‌కు కొత్త కావచ్చు కానీ విదేశాల్లో ఇది చాలా పాపుల‌ర్. అక్క‌డ చాలా మంది యువ‌త ఫ్రీలాన్సింగ్ ద్వారానే భారీ మొత్తంలో డ‌బ్బును సంపాదిస్తున్నారు. మ‌న దేశంలో మాత్రం గ‌డిచిన రెండు మూడేళ్ల నుంచి ఫ్రీలాన్సింగ్ ట్రెండ్ ఊపందుకుంటోంది. తీరిక స‌మ‌యాల్లో ప‌నిచేస్తూ మంచి మొత్తాన్ని సంపాదించడం అన్న కాన్సెప్టే ఫ్రీలాన్సింగ్ ఇంతలా ఆద‌ర‌ణ పొంద‌డానికి ప్ర‌ధాన కారణం. ఇందులో అటు ప‌నిచేయించుకుంటున్న సంస్థ‌ల‌తో పాటు ఇటు ప‌నిచేస్తున్న వ్య‌క్తులు కూడా త‌మ నిర్దేశిక ల‌క్ష్యాల‌ను సాధించుకుంటున్నారు. తాజా లెక్క‌ల ప్ర‌కారం 53 మిలియ‌న్ల ఫ్రీలాన్స్ ఉద్యోగాల‌తో అమెరికా మొద‌టి స్థానంలో ఉండ‌గా, ఆల‌స్యంగా రంగప్ర‌వేశం చేసినా 15 మిలియ‌న్ల ఉద్యోగాల‌తో ఇండియా రెండో స్థానంలో నిలిచింది. మ‌న దేశంలో ప్ర‌తీ ఏడాది దాదాపు 10 నుంచి 15 ల‌క్ష‌ల మంది వ‌ర‌కూ ఫ్రీలాన్సర్స్ గా మారుతున్నారు. ఇండియాలో ఉన్న ఫ్రీలాన్సర్స్ లో అధిక శాతం మంది మ‌హిళ‌లే. పిల్ల‌ల పోష‌ణ కోసం ఇంటిప‌ట్టున ఉంటున్న మ‌హిళ‌లు ఖాళీ స‌మ‌యంలో ఫ్రీలాన్సర్స్ గా ప‌నిచేస్తూ ఆదాయాన్ని పొందుతున్నారు. కంపెనీలు కూడా ఫ్రీలాన్సర్స్ ప‌నిలో మ‌హిళ‌ల‌కే పెద్ద పీట వేస్తున్నాయి.
నైపుణ్యాల‌ను గుర్తించండి
మీరు ప్ర‌స్తుతం చేస్తున్న ప‌నినే ఫ్రీలాన్సింగ్ గా మార్చుకోవ‌డం సరియైన‌దే కానీ మీ ద‌గ్గ‌ర అద‌న‌పు నైపుణ్యాలు ఉంటే అది మీకు మ‌రింత‌గా లాభిస్తుంది. ఫ్రీలాన్సింగ్ చేయాల‌నుకుంటున్న వారు ముందుగా త‌మ నైపుణ్యాల‌పై ఒక అంచ‌నాకు రావాలి. మ‌న‌కు బాగా తెలిసిన ఏదో ఒక ప‌నినే ఫ్రీలాన్సింగ్ గా చేద్దామ‌నుకుంటే అంత‌గా వ‌ర్క‌వుట్ కాదు. ఒక రెండు మూడు పనులను చేస్తే మంచి మొత్తంతో పాటు క్ల‌యింట్ల నుంచి మంచి పేరును, న‌మ్మ‌కాన్ని కూడా సంపాదించుకోవ‌చ్చు. అలా అని అన్నిర‌కాల పనులను చేద్దామ‌ని ప్ర‌య‌త్నించ‌కండి. మీకు ఏయే నైపుణ్యాలు వ‌చ్చో వాటిని ఒక పేప‌ర్ పై రాసుకొండి. అందులో మ‌రింత నైపుణ్య‌త సాధించాల్సిన‌వి ఏమైనా ఉంటే దానికోసం శిక్ష‌ణ పొంది సాధికార‌త సాధించండి. ఎందుకంటే ఏదో ఒక్క ప‌నే చేస్తే క్లైంట్ మిమ్మ‌ల్ని అంత సీరియ‌స్ గా తీసుకోక‌పోవ‌చ్చు. అందుకే సెకండ‌రీ స్కిల్స్ కు ఎప్ప‌టిక‌ప్పుడు ప‌దును పెట్టుకుంటూ ఉండాలి. ఇలా చేయ‌డం వ‌ల‌న క్లయింట్ కు మీపై మ‌రింత న‌మ్మ‌కం పెరుగుతుంది.
మిమ్మ‌ల్ని మీరు ప్ర‌మోట్ చేసుకోండి 
మీరు ఫ్రీలాన్స‌ర్ గా మారాల‌నుకుంటున్న‌ప్పుడు కొన్ని ముఖ్యమైన పనులను చేయాలి. మీ గురించి, మీ నైపుణ్యాల గురించి అంద‌రికీ తెలిసేలా ఒక మంచి పోర్ట్ ఫోలియోను క్రియేట్ చేసుకొండి. ఫేస్ బుక్ పేజీ లేదా బ్లాగ్ , లింక్డ్ ఇన్ ఇలా ఏదైనా ఒక సోష‌ల్ మీడియాలో మీ ప్రోఫైల్ ను త‌యారు చేయండి. దీని ద్వారా మీ నైపుణ్యాలు, మీ ఉద్దేశం అంద‌రికీ తెలిసేలా చూసుకొండి. దీని త‌ర్వాత మీ ఫ్రీలాన్సింగ్ కెరియ‌ర్ పై ఒక అవ‌గాహ‌న‌కు రండి. ఈ కెరీర్ ద్వారా డ‌బ్బు, పేరు సంపాదించాల‌నుకుంటున్న‌ప్పుడు కొన్ని జాగ్రత్తలు తీసుకోవ‌డం తప్పనిసరి. వారంలో ఎన్ని రోజులు, ఎన్ని గంట‌లు ఫ్రీలాన్సింగ్ కోసం కేటాయించ‌గ‌ల‌రు, ఎలాంటి క్లైంట్ లతో ప‌నిచేయాల‌నుకుంటున్నారు? అన్న‌దానిపై ఒక స్ప‌ష్ట‌త తెచ్చుకొండి. అలాగే చేస్తున్న ప‌నికి తీసుకునే పారితోష‌కం విష‌యంలో కూడా క‌చ్చితంగా ఉండండి. త‌క్కువ డ‌బ్బుల‌కు అయినా ప‌నిచేస్తాను అన్న‌ట్టు వ్య‌వ‌హ‌రిస్తే ముందు ముందు క్లయింట్ మీతో ఎక్కువ ప‌నిని త‌క్కువ మొత్తంతో చేయించుకునేందుకు ప్ర‌య‌త్నిస్తాడు. ఈ విష‌యంలో స్ట్రిక్ట్ గా ఉండండి. పారితోష‌కం, కాపీరైట్ నిబంధ‌న‌లు, హ‌క్కులు ఇలా అన్నింటిపై ముందుగానే క్లయింట్ తో ఒక ఒప్పందానికి వ‌చ్చే మంచింది.
న‌మ్మ‌కం చాలా ముఖ్యం!
ఫ్రీలాన్సింగ్ అంటే ఇంటిపట్టునే కూర్చొని న‌చ్చిన టైం లో పని చేసి వేల‌కు వేలు సంపాదించవ‌చ్చు అనుకోవ‌డంలో త‌ప్పులేదు. ఎందుకంటే ఇది నిజ‌మే కాబ‌ట్టి. కానీ ఇందులో కూడా కొన్ని ఇబ్బందులు ఉన్నాయి. ఫ్రీలాన్పింగ్ అనేది అనుకున్నంత సులువైతే కాదు. క్లయింట్ ఇచ్చిన గ‌డువులోగా నాణ్య‌త‌తో, రాజీ లేకుండా ప‌నిని చేసి ఇచ్చిన‌ప్పుడే అత‌నికి మ‌న‌పై న‌మ్మ‌కం కుదురుతుంది. అలా కాకుంటా న‌చ్చిన‌ట్టు ప‌నిచేస్తూ అనుకున్న టైం కి ప్రొడ‌క్ట్ ఇవ్వ‌కుంటే త‌ర్వాత క్లయింట్ మ‌న ముఖం కూడా చూడ‌డు. క్లయింట్ న‌మ్మ‌కం చూర‌గొనిన‌ప్పుడు మాత్ర‌మే ఫ్రీలాన్సింగ్ మంచి కెరీర్ గా నిలుస్తుంది. సింపుల్ గా చెప్పాలంటే న‌మ్మ‌కం అనేది చాలా ముఖ్యం. ప్రారంభంలో విమ‌ర్శలు వ‌చ్చినా ఇబ్బందులు వ‌చ్చినా క్లయింట్ కు ఇబ్బందిక‌ల‌గ‌కుండా వ్య‌వ‌హ‌రించాలి. అప్పుడే ఫలితం ద‌క్కుతుంది. ఫ్రీలాన్సింగ్ ను ఏదో స‌ర‌దాగా డ‌బ్బులు కోసం కాకుండా ఒక ఎంట‌ర్ ప్ర‌న్యూర్ షిప్ గా భావించి సీరియ‌స్ గా క‌నుక చేస్తే దీనిని మించిన కెరీర్ మ‌రొక‌టి ఉండ‌దు.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment