మీ ఇంజినీరింగ్ డిగ్రీని 'ఆకర్షణీయం'గా మార్చడం ఎలా?

         తాజాగా కాస్త మెరుపు త‌గ్గినా ఇప్పటికీ ఇంజినీరింగ్ డిగ్రీకి ఉన్నవిలువ ఏమాత్రం త‌గ్గ‌లేదు. ఉన్న‌త చ‌దువులో విద్యార్ధులు, త‌ల్లిదండ్రుల ప్ర‌థ‌మ ఎంపిక ఇంజినీరింగే. అయితే మారిన ప‌రిస్థితులు, సామాజిక ఒత్తిడిల నేప‌థ్యంలో విద్యార్ధులు కొన్ని ఎంపిక చేసిన ఇంజినీరింగ్ డిగ్రీల‌నే చ‌దివేందుకు మొగ్గు చూపుతున్నారు. అయితే దుర‌దృష్ట‌క‌ర‌మైన విష‌యం ఏంటంటే ఇంజినీరింగ్ పూర్తికాగానే కంపెనీలు త‌మ‌కు రెడ్ కార్పెట్ ప‌రుస్తాయ‌ని చాలా మంది విద్యార్ధులు భావిస్తున్నారు. కానీ వాస్త‌వం మాత్రం వారు ఊహకు అంద‌ని విరుద్ధంగా ఉంది. ఇంజినీరింగ్ డిగ్రీ చేత‌పట్టుకుని ఇంట‌ర్వ్యూకు వెళితే ఉద్యోగం వ‌చ్చే ప‌రిస్థితుల‌కు కాలం చెల్లిపోయింది. ఏదో మొక్కుబ‌డిగా ఒక మేజ‌ర్ ప్రాజెక్ట్, ఒక మిని ప్రాజెక్ట్ చేసే రెజ్యుమెలో చూపిస్తే మిమ్మ‌ల్ని గుంపులో గోవిందంలా జ‌మ‌క‌ట్టేస్తారు. కెరీర్ లో పునాది బ‌లంగా ఉండాలంటే ఇంజినీరింగ్ చ‌దివే నాలుగేళ్లూ కొత్త విష‌యాల‌ను నేర్చుకోవాలి. విద్యార్ధుల ఒక విష‌యాన్ని బాగా గుర్తుపెట్టుకోవాలి. మీరు ఎంచుకున్న కెరీర్ కోసం మీరు క‌ష్ట‌ప‌డ‌న‌ప్పుడు, జీవితం నిర్ణ‌యించే ప‌నిని ఇష్టం లేకున్నా చేయాల్సి వ‌స్తుంది. కాబ‌ట్టి మీరు చదువుతున్న స‌మ‌యంలోనే మీ జీవిత గ‌మ్యాన్ని, మీ మ‌న‌సుకు న‌చ్చిన ప‌నిని గుర్తించండి, దానికోసం క‌ష్ట‌ప‌డండి.

ఆరంభం అదిరిపోవాలి 

         ఇంజినీరింగ్ కాలేజీలో చేరిన కొత్త‌లో మీలో ఉన్న ఉత్సాహాన్ని, ఇష్టాలను ఒకచోట‌కు చేర్చండి. అలా చేర్చిన మీ ఆస‌క్తుల‌కు ఒక రూపాన్ని ఇచ్చేందుకు ప్ర‌య‌త్నాలు చేయండి.మీరో ఉర‌క‌లేసే ఉత్సాహాన్ని సానుకూల మార్గం వైపు మ‌ళ్లించండి. ఒక స‌మ‌స్య‌ను గుర్తించి దానిపై మీ పూర్తి సామ‌ర్ధ్యాల‌ను కేంద్రీక‌రించండి. మీ రోజువారీ జీవితంలో చికాకును క‌లిగించే విష‌యాల‌కు ప‌రిష్కారం క‌నుగొన‌కుండా మీరు వ‌దిలేస్తారా? మీకు బైక్ స‌రిగ్గా స్టార్ట్ కాకుండా ఇబ్బంది పెడుతున్న‌ప్పుడు, ఫోన్ హ్యాంగ్ అయ్యి అస‌హ‌నం క‌లిగిన‌ప్పుడు ఆ స‌మ‌స్య‌ల‌ను మ‌నం అలాగే వ‌దిలేయం క‌దా? వీలైనంత త్వ‌ర‌గా వాటిని ప‌రిష్క‌రించుకుంటాం. అలానే ఎక్కువ క‌ష్ట‌సాధ్యంగా ఉన్న ఒక ప‌నిని గుర్తించి మీ భుజానికెత్తుకొండి. దానికి వెనుక ఉన్న ఇబ్బందులు, అసాధ్యాల‌ను అస్సలు ప‌ట్టించుకోకండి. కేవ‌లం మీకు ఆస‌క్తి ఉందా లేదా అన్న‌దే చూసుకొండి. ఆసక్తి ఉంటే చాలా ప‌రిష్కార మార్గాలు వాటంత‌ట అవే వెతుక్కుంటూ వ‌స్తాయి. ఈ మినీ టాస్క్ లో మీ అభిరుచుల‌ను ఇష్ట‌ప‌డే స్నేహితులు స‌హాయం తీసుకొండి. దీనివ‌ల‌న విభిన్న మ‌న‌స్త‌త్వాలు ఉన్న‌వారితో ప‌నిచేయ‌డం, బృంద నిర్మాణం వంటి వాటిపై అవ‌గాహ‌న వ‌స్తుంది. 

నైపుణ్యాల‌ను అభివృద్ధి చేసుకోవాలి 

   మొద‌టి ఏడాది స‌మ‌స్య‌ల‌ను అర్ధం చేసువోవ‌డానికి స‌మ‌యం కేటాయించిన విద్యార్ధులు రెండో సంవ‌త్స‌రంలో నైపుణ్యాల‌ను అభివృద్ధి చేసుకోవ‌డంపై దృష్టి పెట్టాలి. మ‌న‌సుంటే మార్గ‌ముంటుంది అన్న‌ట్టుగా నేర్చుకోవాల‌నే ఆసక్తి ఉండాలి కానీ ఎన్నో విధాలుగా నైపుణ్యాల‌ను ప‌దును పెట్టుకోవ‌చ్చు. అనువైన స‌మయాన్ని ఎంచుకుని ఏదైనా ఒక సంస్థ‌లో ఇంట‌ర్న్ షిప్ చేయండి. సంస్థ మీ నుంచి ఏం కోరుకుంటుందో ఆ విధంగా క‌ష్ట‌ప‌డి ప‌నిచేయండి. మీకై ఒక గుర్తింపును క్రియేట్ చేసుకొండి. కంపెనీలోని ఉద్యోగుల‌తో సామ‌ర‌స్య‌పూర్వక సంబంధాల‌ను పెంపొందించుకొండి. లేకుంటే  ఏదైనా ఒక నైపుణ్యానికి సంబంధించి ఒక బృందంలో కానీ క్ల‌బ్ లో కానీ జాయిన్ అవ్వండి. ఒకవేళ మీ క‌ళాశాల‌లో అటువంటివి లేక‌పోతే మీ స్నేహితుల స‌హాయం తీసుకుని మీరే ఒక టీమ్ ను త‌యారు చేయండి. ఈ రెండు ప‌నులు కుద‌ర‌క‌పోతే మీ ప్రాజెక్ట్ కు సంబంధించి మీ కాలేజీకి బ‌య‌ట పనిని నేర్చుకొండి. దీని వ‌ల‌న మీ నైపుణ్యంతో పాటు మీకు వాళ్లు ఇచ్చే స‌ర్టిఫికేట్ కూడా ప‌నికొస్తుంది. అయితే పేప‌ర్ స‌ర్టిఫికేట్ ఎందుకూ ప‌నిరాద‌న్న విష‌యాన్ని క‌చ్చితంగా గుర్తించాలి. మీకు నిజంగా నైపుణ్యం ఉన్న‌ప్పుడే ఆ స‌ర్టిఫికేట్ కు విలువ వ‌స్తుంది.

స్పెష‌లైజేష‌న్ ను ఎంచుకొండి

     మొద‌టి ఏడాదిలో ప్ర‌యోగాలు, రెండో ఏడాదిలో నైపుణ్యాల‌ను నేర్చుకున్న ఇంజినీరింగ్ విద్యార్ధులు మూడో ఏడాదిలో త‌న భ‌విష్య‌త్ గ‌మ్యాన్ని నిర్దేశించుకోవాలి. గుర్తించిన  విభిన్న ఆసక్తుల్లో నిజ‌జీవితంలో ప‌నిచేయ‌డానికి ఒక దానిని ఎంచుకోవాలి. ఆ ప‌నిచేస్తే మీకు ఆనందం కలుగుతుందో లేదా అన్న విష‌యాన్ని జాగ్ర‌త్తగా గ‌మ‌నించండి. వేరే అప్ప‌టికే ఆ ప‌నిని చేస్తున్నా మీరు మ‌ళ్లీ దానిని ఎంచుకోవ‌డానికి మీరేమీ సందేహించాల్సిన అవ‌స‌రం లేదు. మీ మ‌న‌సుకు ఆ ప‌ని న‌చ్చిందా లేదా వాస్త‌వంగా నా భ‌విష్య‌త్ కు ఎంత‌వ‌ర‌కూ ఉప‌యోగ‌ప‌డుతుంది అన్న‌దానిపైనే దృష్టి పెట్టండి. ఐదో సెమెస్ట‌ర్ లో మీ ఎంచుకున్న స్పెష‌లైజేష‌న్ ను ఆస్వాదిస్తూ ప‌నిచేయండి. దీంతో మీరు సంతోషంగా ఉంటే ఆరో సెమెస్ట‌ర్ లోనూ దానినే కొన‌సాగించండి. ఇందులో గంద‌ర‌గోళం ప‌డాల్సిన విష‌యం లేదు.  

ఆస‌క్తుల‌పై స్ప‌ష్ట‌త తెచ్చుకొండి

       ఇక చివ‌రి ఏడాదిలోకి వ‌చ్చేసరికి విద్యార్ధికి ఏ ప‌నిచేయాల‌న్న దానిపై ఒక స్ప‌ష్ట‌త వ‌చ్చి తీరాలి. అయితే ప్ర‌స్తుతం చాలామంది ఇంజినీరింగ్ విద్యార్ధుల‌కు చివ‌రి ఏడాదిలో కూడా ఏం చేయాల‌న్న‌దానిపై క్లారిటీ ఉండ‌టం లేదు. ఎక్కువ మార్కులు సాధించిన ఓ మూడు, నాలుగు స‌బ్జెక్ట్ ల‌ను గుర్తించి అందులో ఒక దాన్నుంచి ప్రాజెక్ట్ చేయండి. రెండు మూడు నెల‌ల త‌ర్వాత అందులో సంతృప్తి ల‌భిస్తే అదే మీకు బాగా ఆస‌క్తి ఉన్న రంగ‌మ‌ని నిర్ణ‌యానికి వ‌చ్చేందుకు వీలు క‌లుగుతుంది. ఇంజినీరింగ్ నాలుగేళ్ల‌లో ప్రాజెక్ట్ లు, ఇంట‌ర్న్ షిఫ్ లు చేస్తే మీ కెరీర్ కు అది రాచ‌బాట వేస్తుంది. నిజంగా మీ మ‌న‌సుకు న‌చ్చిన ప‌నిని గుర్తించేందుకు కూడా వీలు చిక్కుతుంది. ఇంజినీరింగ్ విద్యార్ధులు మ‌నం పైన చెప్పుకున్న ఈ నాలుగు అంశాల‌ను జాగ్ర‌త్త‌గా గ‌మ‌నించి ఆచ‌రిస్తే వాళ్ల నైపుణ్యాల‌కు ఢోకా ఉండ‌దు. చ‌దువు పూర్త‌యి ఇంట‌ర్వ్యూకు వెళ్లిన‌ప్పుడు మీరు ముందుకు చేసిన ఈ క‌స‌ర‌త్తు అద్భుతంగా ప‌నిచేస్తుంది. ఇప్పుడు సంస్థ‌ల‌కు కావాల్సింది మామూలు ఇంజినీరింగ్ డిగ్రీలు కాదు నైపుణ్యాలతో నిండిన ఇంజినీరింగ్ డిగ్రీలు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com