ఇంటర్వ్యూ అనే యుద్ధంలో గెలవాలంటే ఇవన్నీ ఉండాలి!

      'యుద్ధం'లో గెల‌వాలంటే యుద్ధ నైపుణ్యాల‌తో పాటు మంచి 'ఆయుధం' చాలా ముఖ్యం. ఎంత‌టి వీరుడైనా స‌రైన ఆయుధం లేక‌పోతే విజ‌యం సాధించ‌లేడు. అలాగే అద్భుత‌మైన ఆయుధ‌మున్నా యుద్ధం చేసే నైపుణ్యం లేక‌పోతే అది ప‌నికిరాని వ‌స్తువుగానే మిగిలిపోతుంది. ఈ యుద్ధ సూత్రాల‌నే విద్యార్ధులు, ఉద్యోగులు త‌మ కెరీర్ ప్రిప‌రేష‌న్ కు అన్వ‌యించుకోవాలి. ప‌రీక్ష‌లు, ఇంట‌ర్వూల‌కు స‌న్న‌ద్ధ‌మైన‌ప్పుడు మీ నైపుణ్యాల‌కు, అర్హ‌త‌ల‌కు ప‌దును పెట్టుకోండి. స‌రైన స‌న్న‌ద్ధ‌త లేకుండా రంగంలోకి దిగితే ఎదురుదెబ్బ‌లు తప్ప‌వ‌న్న విష‌యాన్ని విద్యార్ధులు గుర్తించాలి. అదే విధంగా విఫ‌లం చెందిన‌ప్పుడు ఓట‌మిని నిజాయితీగా ఒప్పుకోవ‌డం నేర్చుకోవాలి. ఓట‌మికి సాకులు వెత‌క‌డం మొద‌లుపెడితే కెరీర్ లోనూ, వ్య‌క్తిత్వ నిర్మాణ‌లోనూ ఎప్ప‌టికీ అభివృద్ధి సాధ్యం కాదు. ఓట‌మిని విజ‌యానికి పునాదిగా మ‌లుచుకుంటే ప‌రీక్ష‌ల్లో అయినా ఇంట‌ర్వ్యూలో అయినా గెలుపు మీ ముంగిట నిలుస్తుంది. 

మీ ఆయుధాల‌కు ప‌దును పెట్టుకొండి!

       ఒక చెట్టును న‌రికేందుకు 2 గంట‌ల స‌మ‌య‌మిస్తే తెలివైన వాడు అందులో గంట‌న్న‌ర స‌మయాన్ని త‌న గొడ్డ‌లిని ప‌దును పెట్టుకోవ‌డానికి ఉప‌యోగిస్తాడు. గొడ్డ‌లి ప‌దునుగా ఉన్న‌ప్పుడు అత‌నికి అర‌గంట‌లో చెట్టును న‌ర‌క‌డం పెద్ద విష‌య‌మేమీ కాదు. అదే గొడ్డ‌లి ప‌దునుగా లేక‌పోతే రెండు గంట‌లు కాదు క‌దా 4 గంట‌ల స‌మ‌యం వెచ్చించినా ప‌ని పూర్తికాదు. ఇదే విధంగా విద్యార్ధులు ఇంట‌ర్వ్యూకు వెళ్లేముందు త‌మ అర్హ‌త‌ల‌కు అద‌నంగా త‌మ నైపుణ్యాల‌కు ప‌దును పెట్టుకోవాలి. ప్ర‌స్తుతం ఎంప్లాయ‌ర్స్ కేవ‌లం విద్యార్హ‌త‌ల‌నే కొల‌మానంగా చూడ‌టం లేదు. విద్యార్హ‌ల‌తో పాటు విద్యార్ధికి అద‌నంగా ఏయే నైపుణ్యాలు వ‌చ్చ‌న్న‌ది కూలంకుషంగా ప‌రిశీలిస్తున్నారు. ముఖ్యంగా భావ వ్య‌క్తీక‌ర‌ణ‌కు పెద్ద పీట వేస్తున్నారు. భావ వ్య‌క్తీక‌ర‌ణ‌తో పాటు త‌ను ఎంచుకున్న రంగంలో అద‌న‌పు అర్హ‌త‌ల‌ను ప్ర‌భావవంతంగా ప్ర‌జంట్ చేయ‌గ‌లిగిన వారికే ఉద్యోగం ద‌క్కుతుంది. పోటీ విప‌రీతంగా ఉన్న ఈ త‌రుణంలో ఒక్క ఉద్యోగానికి వంద‌ల మంది పోటీప‌డుతున్నారు. ఇటువంటి ప‌రిస్థితుల్లో అత్యున్న‌త ప్ర‌తిభ క‌న‌బ‌ర్చిన వారినే విజ‌యం వ‌రిస్తుంది. 

ఈ మూడు 'ఎమ్' ల‌పై దృష్టిపెట్టండి!

      యుద్ధ స‌న్న‌ద్ధ‌త‌లా ఇంట‌ర్వ్యూలో కూడా విద్యార్ధులకు ప‌టిష్ఠ‌మైన స‌న్న‌ద్ధ‌త ఉండాలి. ఈ స‌న్న‌ద్ధ‌త సామాగ్రిలో మూడు 'ఎమ్' లు చాలా ముఖ్య‌మైన‌వి అవి మెన్, మెటీరియ‌ల్, మాస్ట‌ర్ ప్లాన్. ఇందులో మెన్ అంటే  వ్య‌క్తిగ‌త ఆరోగ్యంతో, మంచి ఆహార్యం క‌లిగి ఉండి ఎదుటి వారిని ఆక‌ట్టుకునేలా ఉండాలి. ఇక మెటీరియ‌ల్ అంటే విష‌య ప‌రిజ్ఞానం. ఇంట‌ర్వ్యూకు కావ‌ల‌సిన నైపుణ్యాలు, అర్హ‌త‌లతో పాటు స‌మ‌కాలీన విష‌యాల ప‌ట్ల అవ‌గాహ‌న క‌లిగి ఉండాలి. ఇక మాస్ట‌ర్ ప్లాన్ విష‌యానికొస్తే ఇంట‌ర్వ్యూ సన్న‌ద్ధ‌త ఎప్పుడూ మెరుగ్గా ఉండాలి. దీని కోసం ప‌క్కా ప్ర‌ణాళిక త‌యారు చేసుకుని  త‌మ బ‌లాల‌ను, బ‌ల‌హీన‌త‌ల‌ను అంచనా వేసుకుని వాటికి అనుగుణంగా విద్యార్ధులు సంసిద్ధులు కావాల్సి ఉంటుంది. ఉన్న సామ‌ర్ధ్యాల‌కు మ‌రింత ప‌దును పెట్టుకోవ‌డం, లేని సామ‌ర్ధ్యాల‌ను నేర్చుకోవ‌డం చేయాలి. లేకుంటే ఇంట‌ర్వ్యూలో మీకంటే మెరుగైన అభ్య‌ర్ధుల నుంచి ఎదుర‌య్యే పోటీని త‌ట్టుకోవ‌డం క‌ష్టంగా ఉంటుంది.ఈ విష‌యంలో విద్యార్ధులు త‌గిన జాగ్ర‌త్త‌లు తీసుకోవాలి. 

సాకులు చెప్ప‌డం మానుకొండి! 

        యుద్ధంలో ఓడిన‌ప్పుడు సాకులు చెప్పేవాడిని వీరునిగా గుర్తించ‌రు. శ‌త్రువు దొంగ‌దెబ్బ తీసాడు..వాడికి అదృష్టం క‌లిసొచ్చింది..ఇలాంటివి చెప్పేవారు అభివృద్ధి సాధించ‌లేరు. ఎందుకంటే యుద్ధం చేత‌గానివాడే ధ‌ర్మం గురించి మాట్లాడ‌తాడ‌న్న‌ది ఒక నానుడి. మీరు కూడా ఇంట‌ర్వ్యూ అనే యుద్ధంలో  ఎలా గెల‌వాలి అని మాత్ర‌మే ఆలోచించండి. అలా కాకుండా సాకులు వెతుక్కుంటూ కూర్చుంటే న‌ష్ట‌పోయేది మీరే. మీ వైఫల్యాల‌ను, బ‌ల‌హీన‌త‌ల‌ను ఒప్పుకోవ‌డానికి అస్స‌లు సందేహించ‌కండి. వాటిని ఒప్పుకుంటూనే మీరు బ‌ల‌హీనంగా ఉన్న విభాగాల్లో ప‌ట్టు సాధించేందుకు ప్ర‌య‌త్నించండి. అప్పుడే విజ‌య‌వంత‌మైన వ్య‌క్తిగా నిలుస్తారు. వ్య‌క్తి అని ఎందుకు చెప్పాల్సి వ‌స్తుందంటే ఇది వ్యక్తిగ‌త జీవితానికీ వ‌ర్తిస్తుంది. ఇంట‌ర్వ్యూలో ఒక‌వేళ విఫ‌ల‌మైతే ప్ర‌శాంతంగా కూర్చుని ఎక్క‌డ త‌ప్పు జ‌రింగిద‌న్న‌దానిపై స్వీయస‌మీక్ష చేసుకోవాలి. వాటిని ఒక పేప‌ర్ పై రాసుకుని రానున్న ఇంట‌ర్వ్యూలో ఈ త‌ప్పుల‌ను ఎట్టి ప‌రిస్థితుల్లోనూ పున‌రావృతం కాకుండా చూసుకొండి. ఒకవేళ మీ నైపుణ్యాలు త‌క్కువ‌గా ఉండ‌టం వ‌ల‌నే ఉద్యోగం రాలేద‌ని అనిపిస్తే వెంట‌నే స్కిల్స్ ను అప్ డేట్ చేసుకునేందుకు ఏ మాత్రం ఆల‌స్యం చేయ‌కండి. 

ఆత్మ‌విశ్వాస‌మే విజ‌యానికి వార‌ధి!

      ఇంట‌ర్వ్యూలో విఫ‌ల‌మైన సంద‌ర్భంలో సాకులు వెత‌క‌డం మాన‌డంతో పాటు ఆత్మ‌విశ్వాసాన్ని కోల్పోకుండా చూసుకోవ‌డం చాలా ముఖ్యం. ప్ర‌తీ వ్య‌క్తికి కొన్ని బ‌లాలు, బ‌ల‌హీన‌త‌లు ఉంటాయి. ఈ ముఖాముఖీలో నా బ‌ల‌హీన‌త‌లు బ‌య‌ట‌ప‌డ్డాయి. ఇకపై అలా జ‌ర‌గ‌కుండా చూసుకోవాల‌ని ధృఢంగా నిర్ణ‌యించుకోవాలి. అవ‌స‌రం అనుకుంటే కొన్ని నైపుణ్యాల‌ను పెంచుకోవాలి. అన్నింటి కంటే ముఖ్యంగా భావ‌వ్య‌క్తీక‌ర‌ణ నైపుణ్యాల‌ను ఎప్ప‌టిక‌ప్పుడు ప‌దును పెట్టుకుంటూ ఉండాలి. మనం ముందుగా చెప్పుకున్న‌ట్టు యుద్ధానికి వెళ్తున్న‌ప్పుడు విజ‌యం సొంతం కావాలంటే ఆయుధాలు స‌రిగ్గా ఉండాలి. అప్పుడే విజ‌యం సాధ్య‌మ‌వుతుంది. ఇంట‌ర్వ్యూ అనే యుద్ధంలో గెలవాలంటే నైపుణ్యాలు, భావ‌వ్య‌క్తీక‌ర‌ణ‌, అర్హ‌త‌లు వంటి మీ ఆయుధాల‌ను స‌రి చూసుకుని రంగంలోకి దిగితే మీదే విజ‌యం. ఈ క్ర‌మంలో ఒక‌టి రెండు ప‌రాజ‌యాలు ఎదురైనా ఆత్మ‌విశ్వాసంతో దూసుకుపొండి. ఓట‌మి లేకుండా విజ‌యం సాధ్యం కాదు. ఎందుకంటే ఓట‌మి నుంచి నేర్చుకునే గుణ‌పాఠాలే మిమ్మ‌ల్ని విజ‌య‌తీరాల‌కు చేరుస్తాయి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com