'బీరు' భార‌త పౌరులు!

             ఉడుకు ర‌క్తం, ఉక్కు నరాల‌తో ఉర‌క‌లెత్తే యువ‌త‌ర‌మే ఏ దేశానికైనా స‌హ‌జ వ‌న‌రుల‌ను మించిన అద్భుత సంప‌ద‌. యువ‌త ఆరోగ్యంగా, ప‌టిష్టంగా, స‌క్ర‌మ‌మైన మార్గంలో ఉన్న‌ప్పుడు ఆ దేశం అభివృద్ధి సాధించ‌డం న‌ల్లేరు మీద న‌డ‌కే. ప్ర‌స్తుతం ప్ర‌పంచంలో అభివృద్ధి చెందిన, అభివృద్ధి చెందుతున్న దేశాల‌ను తీసుకుంటే అక్క‌డ యువ‌త‌రానిదే కీల‌క పాత్ర‌. అధిక శాతం మంది యువ జ‌నాభాతో ప్ర‌పంచంలోనే న‌వ యువ దేశంగా కీర్తించ‌బ‌డుతున్న ఇండియా అభివృద్ధి దిశ‌గా సాగుతోంది. అయితే అద్భుతాల‌ను సృష్టించాల్సిన ఈ యువ శ‌క్తి ఇప్పుడు మాద‌క ద్ర‌వ్యాలు, మ‌త్తు ప‌దార్ధాల బారిన ప‌డి నిర్వీర్యంగా మార‌డం ఆందోళ‌న క‌లిగిస్తోంది. ముఖ్యంగా విద్యార్ధి ద‌శ‌లో చెడు వ్య‌స‌నాల బారిన ప‌డి  యువ‌కులు త‌మ బంగారు భ‌విష్య‌త్ ను నాశ‌నం చేసుకుంటున్నారు. కాలేజీలు, విశ్వ‌విద్యాల‌యాల్లో విచ్చ‌ల‌విడిగా దొరుకుతున్న డ్ర‌గ్స్, పెరిగిపోతున్న మ‌ద్యం అల‌వాటు, వారి జీవిత గ‌మ్యాన్ని ప‌త‌నం వైపు న‌డిపిస్తున్నాయి. దీంతో భావి భార‌త పౌరులుగా ఎద‌గాల్సిన యువ‌త‌రం 'బీరు' భార‌త పౌరులుగా మిగిలిపోతున్నారు. 

'మ‌త్తు'కు చిత్త‌వుతున్న‌విద్యార్ధులు!

     మన తెలుగు రాష్ట్రాల్లో ఇప్పుడు అంద‌ర్నీ ఆందోళ‌న‌కు గురిచేస్తున్న విష‌యం డ్ర‌గ్స్. మ‌రింత ఆందోళ‌న క‌లిగించే విష‌యం ఏంటంటే వీటికి అధిక శాతం మంది విద్యార్ధులు బానిస‌లుగా మార‌డ‌టం. ప‌టిష్ట ప‌ర్య‌వేక్ష‌ణ క‌రువ‌వ‌డంతో గ‌డిచిన కొన్నాళ్లుగా మ‌త్తు ప‌దార్ధాల స్మ‌గ్లింగ్, వాడ‌కం చాప‌కింద నీరులా విస్త‌రిస్తోంది. ముఖ్యంగా విశ్వ‌విద్యాల‌యాల్లో వీటికి బానిస‌లుగా మారి విద్యార్ధులు భ‌విష్య‌త్ ను నాశ‌నం చేసుకుని జీవ‌చ్ఛ‌వాలుగా మారుతున్నారు. స‌ర‌దాగా స్నేహితుల‌తో మొద‌లుపెట్టిన ఈ భ‌యంక‌ర‌మైన‌ అల‌వాటు వారి భ‌విష్య‌త్ ఛిద్రం చేసి పారేస్తోంది. మ‌న తెలుగు రాష్ట్రాల్లో ఇటీవ‌ల వెలుగు చూసిన కేసుల్లో డ్ర‌గ్స్ వినియోగం పెరుగుతున్న తీరు చూసి పోలీసులే విస్తుపోయారు. మొద‌ట విద్యార్ధుల‌కు డ్ర‌గ్స్ ను చిన్న‌గా అల‌వాటు చేస్తున్న డీల‌ర్లు త‌ర్వాత వాటిని అధిక ధ‌ర‌కు అమ్ముతున్నారు. వాటిని కొనే స్థోమత లేని విద్యార్ధులు డ్ర‌గ్స్ ను స‌ర‌ఫ‌రా చేసే డీల‌ర్లుగా మారిపోతున్నారు. పోలీసుల‌కు దొరికితే భ‌విష్య‌త్ అంధ‌కార‌మ‌వుతుంద‌న్న భ‌యం కూడా లేకుండా డ్ర‌గ్స్ సేవ‌నం కోసం ఎంత‌టి నేరాల‌కైనా బ‌రి తెగిస్తున్నారు. 

విశ్వ‌విద్యాల‌యాల్లో తిష్ట వేసిన డ్ర‌గ్స్ భూతం 

       రెండేళ్ల క్రితం వ‌ర‌కూ హైద‌రాబాద్ లో కొన్ని విశ్వ‌విద్యాల‌యాల‌కు ప‌రిమిత‌మైన డ్ర‌గ్స్ ఇప్పుడు శర‌వేగంగా విస్త‌రిస్తోంది. హైద‌రాబాద్ తో పాటు విజ‌య‌వాడ‌, విశాఖ‌ప‌ట్నం వంటి పెద్ద న‌గ‌రాల్లో కూడా డ్ర‌గ్స్ కేసులు బ‌య‌ట‌ప‌డుతున్నాయి. ధ‌న‌వంతులు, గ్లామ‌ర్ ఫీల్డ్ లో ఉన్న‌వారికే ప‌రిమిత‌మైన ఈ డ్ర‌గ్ సంస్కృతి విశ్వ‌విద్యాల‌యాల్లోకి రావ‌డ‌మే అంద‌రికీ ఆందోళ‌న క‌లిగిస్తోంది. ప‌టిష్టమైన నిఘా క‌ర‌వ‌వ‌డంతో గ‌డిచిన  కొన్నాళ్లుగా డ్ర‌గ్స్ భూతం జ‌డ‌లు విప్పుతోంది. విశాఖ‌ప‌ట్నంలో డ్ర‌గ్స్ వినియోగంతో పాటు గంజాయి వాడ‌కం అధికంగా ఉన్న‌ట్టు పోలీసు విచార‌ణ‌లో తేలింది. ఆంధ్ర విశ్వ విద్యాల‌యంలో కొంద‌రు విద్యార్ధులు గంజాయి సేవిస్తూ, అమ్ముతూ పోలీసుల‌కు చిక్క‌డంతో అస‌లు విష‌యం బ‌య‌ట‌ప‌డింది. కొంద‌రు వ్య‌క్తులు ఉద్దేశ‌పూర్వ‌కంగానే విద్యార్ధుల‌కు డ్ర‌గ్స్ ను అల‌వాటు చేయిస్తున్నార‌ని తెలుస్తోంది. ఇటువంటి వాళ్ల వ‌ల‌లో చిక్కుకోకుండా విద్యార్ధులు అప్ర‌మ‌త్తంగా ఉండాలి. ఇటువంటి అవాంఛ‌నీయ అల‌వాట్లు విశ్వ‌విద్యాల‌యాల్లో ఉన్న‌ట్టు తెలిస్తే ముందుగా ఆ విష‌యాన్ని త‌ల్లిదండ్రుల‌కు తెలియ‌జేసి త‌ర్వాత పై అధికారుల‌కు చేర‌వేయాలి. 

త‌ల్లిదండ్రుల ప‌ర్యవేక్ష‌ణ చాలా ముఖ్యం 

        ఒక విద్యార్ధి ఇంటి నుంచి బ‌య‌ట‌కు వెళ్లిన ద‌గ్గ‌ర్నుంచి స్కూల్ లో అత‌నేం చేస్తున్నాడు? స‌్నేహితులు ఎలాంటి వారు? బ‌య‌ట ఏం చేస్తున్నాడు? ఇలాంటి విష‌యాల‌ను త‌ల్లిదండ్రులు అప్పుడ‌ప్పుడూ ఒక కంట క‌నిపెడుతూ ఉండాలి. పిల్ల‌ల‌పై న‌మ్మ‌కం ఉంచ‌డం ముఖ్య‌మే కానీ పూర్తిగా ప‌ర్య‌వేక్ష‌ణ లేకుండా ఉండ‌టం మంచిది కాదు. ప్ర‌స్తుతం చాలా మంది త‌ల్లిదండ్రులు ఇద్ద‌రూ వాళ్ల వాళ్ల ప‌నుల్లో బిజీ అయిపోయి పిల్ల‌ల‌ను ప‌ట్టించుకోవ‌డం మానేస్తున్నారు. ఇలాంటి పొర‌పాట్లే పిల్ల‌ల భ‌విష్య‌త్ ను నాశ‌నం చేస్తున్నాయి. దీంతో పాటు అడిగినవ‌న్నీ వెంట‌నే స‌మాకూర్చ‌డం పెద్ద విలాసవంత‌మైన లైఫ్ స్టైల్ ను అల‌వాటు చేయ‌డం చేస్తున్నారు. దీంతో జీవితంలో క‌ష్ట‌ప‌డి సాధించుకోవాల్సిన విష‌యాల‌న్నింటినీ చిన్న‌తనంలోనే చ‌విచూడ‌టం వ‌ల‌న చాలా మంది విద్యార్ధులు మ‌రింత ఆనందం కోసం ఈ డ్ర‌గ్స్, మ‌ద్య‌పానం వంటి వ‌క్ర‌మార్గాలు  ప‌డుతున్నారు. ఈ విష‌యంపై త‌ల్లిదండ్రులు స్వీయ స‌మీక్ష చేసుకుని పిల్లల భ‌విష్య‌త్ కు బాట‌లు వేయాలి. క‌ష్టం విలువ‌ను, క‌ష్ట‌ప‌డి ఒక వ‌స్తువును కొనుక్కున్న‌ప్పుడు క‌లిగే ఆనందాన్ని వారికి అర్ధ‌మ‌య్యేలా చెప్పాలి. 

ప్ర‌కృతితో, స‌మాజంతో మ‌మేకం కావాలి

      ప్ర‌స్తుత స‌మాజంలో విద్యార్ధులు, త‌ల్లిదండ్రులు ప్ర‌తీ క్ష‌ణం అప్రమ‌త్తంగా ఉండాల్సిన అవ‌స‌రముంది. గ‌ల్లీల్లో హుక్కా సెంట‌ర్లు, వైన్ షాప్ లు, డ్ర‌గ్స్ తో వ‌ల విసిరే స్మ‌గ్ల‌ర్లు. ఇన్ని ప్ర‌మాదాల న‌డుమ విద్యార్ధులు ప్ర‌తీ క్ష‌ణం క్ర‌మశిక్ష‌ణ‌తో న‌డుచుకోవాలి. మ‌ద్యపానం, డ్ర‌గ్స్ అనేవి జీవితాన్ని నాశ‌నం చేసే విష‌యాల‌ని తెలుసుకోవాలి. వాటి జోలికి వెళ్ల‌కుండా స్వీయ నియంత్ర‌ణ విధించుకోవాలి. ఏ వ‌స్తువునైనా క‌ష్ట‌ప‌డి సంపాదించుకున్న‌ప్పుడు క‌లిగే ఆనందాన్ని అనుభ‌వించాలి. అదే విధంగా స‌మాజం ప‌ట్ల భాద్య‌త , ప్ర‌కృతి ప‌ట్ల ప్రేమను క‌లిగి ఉండాలి. ప్ర‌కృతిలో ఉండే అందానికి స్పందించే గుణం క‌లిగి ఉంటే అందులో వ‌చ్చే ఆనందం అనంతంగా ఉంటుంది. అప్పుడు ఇలాంటి మ‌త్తు పదార్ధాల గురించి ఆలోచించే ప‌ని ఉండ‌దు. అదే విధంగా స్నేహితులే వ్య‌క్తిత్వాన్ని నిర్ణ‌యిస్తార‌ని విద్యార్ధులు గుర్తించాలి. వ్య‌స‌నాలు, చెడు అల‌వాట్లు ఉన్న స్నేహితుల్ని వీలైనంత తొంద‌ర‌గా వ‌దిలించుకోవ‌డం మంచిది. ఒక్క చిన్న త‌ప్పు అంద‌మైన జీవితాన్ని నాశ‌నం చెయ్య‌కుండా ఉండాలంటే విద్యార్ధులు ఈ విష‌యాల‌ను గుర్తించుకుని డ్ర‌గ్స్ కు, మ‌ద్య‌పానానికి దూరంగా ఉండాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com