ఇక్కడ ఆడవాళ్లు కొంచెం 'తక్కువ సమానం'!

  ప్ర‌స్తుత స‌మాజంలో మ‌హిళ‌లు కూడా పురుషుల‌తో స‌మానంగా అన్ని రంగాల్లోనూ రాణిస్తున్నారు.ఆకాశంలోనూ, అవకాశంలోనూ వాళ్లు సగం. అయితే వాస్తవ పరిస్థితులు ఎలా ఉన్నాయంటే స్త్రీలు, పురుషులు సమానమే, కానీ పురుషుడు 'కాస్త ఎక్కువ సమానం' అన్న చందంగా వ్యవస్థ ఉంది. క‌ష్టించి ప‌నిచేయ‌డంలోనూ భాధ్య‌త‌ల‌ను స‌క్ర‌మంగా నిర్వ‌ర్తించ‌డంలోనూ మ‌హిళ‌లు పురుషుల‌కు ఏమాత్రం తీసిపోరు. ఇంకా చెప్పాలంటే పురుషుల కంటే మ‌హిళ‌లే అధికంగా శ్ర‌మ‌ప‌డుతున్నారు. ఒక‌వైపు ఇంటి నిర్వ‌హ‌ణ‌, పిల్ల‌ల పోష‌ణ‌, వంట ప‌ని చేస్తూనే మ‌రోవైపు ఆఫీస్ విధుల్లో రాణిస్తూ ఏకకాలంలో రెండు భాధ్య‌త‌ల‌కు న్యాయం చేస్తున్నారు. ముఖ్యంగా కార్యాల‌యాల్లో మ‌హిళ‌ల ప‌ని సామ‌ర్ధ్యం పురుషుల‌కు స‌రిస‌మానంగా ఉంటుంది. అయితే వేత‌నాల పెంపులో మాత్రం మ‌హిళ‌ల‌పై వివ‌క్ష కొన‌సాగుతోంది. పురుషుల‌తో స‌మానంగా ప‌నిచేసినా పురుష ఉద్యోగుల‌తో పోల్చుకుంటే మ‌హిళా ఉద్యోగుల జీతాలు త‌క్కువ‌గా ఉంటున్న‌ట్టు స‌ర్వేలు చెపుతున్నాయి. వేత‌నాల పెంపు, ప‌దోన్న‌తుల‌ విష‌యంలో కొన‌సాగుతున్న ఈ లింగ వివ‌క్ష రానున్న రోజుల్లో దేశ‌ ఉత్ప‌త్తి సామ‌ర్ధ్యాన్ని దెబ్బ‌తీసే ప్ర‌మాద‌ముంది. 

లింగ వివక్ష వెనక్కు లాగుతోంది! 

        ఒక‌ప్పుడు ఆడ‌పిల్ల‌ను ఇంటి నుంచి బ‌య‌ట‌కు పంపేందుకు ఇష్ట‌ప‌డ‌ని మ‌న దేశంలో గ‌డిచిన కొన్నేళ్ల‌లో గ‌ణ‌నీయ‌మైన మార్పులు వ‌చ్చాయి. త‌ల్లిదండ్రులు ఆడ‌పిల్ల‌ల‌ను, మగ‌పిల్ల‌ల‌తో స‌మానంగా చ‌దివించ‌డ‌మే కాకుండా ఉద్యోగాలు చేసేందుకు కూడా అనుమ‌తినిస్తున్నారు. దీంతో ఉద్యోగాల్లో మ‌గ‌వాళ్ల‌కు కొత్త పోటీ ఎదురైంది. ప్ర‌పంచీక‌ర‌ణ పుణ్య‌మాని ప‌లు బ‌హుళ జాతి కంపెనీలు మ‌న దేశంలో కొలువుతీరాయి. దీంతో ఉద్యోగ, ఉపాధి అవ‌కాశాలు మెరుగుప‌డ్డాయి. మ‌హిళ‌లు ధైర్యంగా అడుగు ముందుకేసి మంచి సంస్థ‌ల్లో ఉద్యోగాల‌ను సాధిస్తున్నారు. ఇక్క‌డ వ‌ర‌కూ బాగానే ఉంది. అయితే మ‌హిళ‌లు ఉద్యోగాలు సంపాదించినంత వేగంగా ప‌దోన్న‌తులు, వేత‌నాల పెంపును సాధించ‌లేక‌పోతున్నారు. పురుషుల‌కు ఏమాత్రం తీసిపోని విధంగా ప‌నిచేసినా ప్ర‌పంచ‌వ్యాప్తంగా మ‌హిళ‌ల‌కు ఈ విష‌యంలో అన్యాయం జ‌రుగుతోంద‌ని స్త్రీవాదులు ఆగ్ర‌హం వ్య‌క్తం చేస్తున్నారు. కంపెనీ ఉన్న‌త స్థానాల్లో ఉన్న పురుషులు చూపించే లింగ వివ‌క్ష మూలంగానే మ‌హిళ‌ల‌కు అన్యాయం జ‌రుగుతోంద‌ని ఆరోపిస్తున్నారు. ముఖ్యంగా ప్రసూతి సెలవులు, తదనంతర పదోన్నతుల విషయంలో మహిళలకు సరైన న్యాయం జరగడం లేదని ఇదివరకే చాలా సంస్థలు కుండబద్దలు కొట్టాయి. 

లింగ స‌మాన‌త్వం మాట‌ల‌కే ప‌రిమితం! 

       ఆఫీస్ లో లింగ వివ‌క్ష అనేది ఏదో మ‌న ఒక్క దేశంలోనే లేదు. అభివృద్ధి చెందిన, చెంతుతున్న దేశాల్లో ఇప్ప‌టికీ మ‌హిళ‌ల‌ను రెండో త‌ర‌గ‌తి పౌరులుగానే చూస్తున్నార‌ని స్టాన్ ఫ‌ర్డ్ యూనివ‌ర్సిటీకి చెందిన  క్లేమన్ ఇన్ స్టిట్యూట్ ఫర్ జెండ‌ర్ రీసెర్చ్ అనే సంస్థ వెల్ల‌డించింది.  చాలా మంది మేనేజ‌ర్లు మ‌హిళా ఉద్యోగులను ప‌దోన్న‌తులు లేకుండా తొక్కేయాల‌ని చూస్తున్న‌ట్టు ఆ సంస్థ తెలిపింది. పురుషు ఉద్యోగుల‌కు ఇచ్చే ప్రోత్సాహం మ‌హిళా ఉద్యోగుల‌కు క‌ర‌వ‌వుతుంద‌ని చెప్పింది. ముఖ్యంగా మంచి భావ‌వ్య‌క్తీక‌ర‌ణ‌, ప‌నిలో దూసుకుపోయే త‌త్వం ఉన్న మ‌హిళా ఉద్యోగుల‌ను పైకి రాకుండా పురుష మేనేజ‌ర్లు అడ్డుకుంటున్నార‌ట‌. అన్ని కంపెనీల్లోనూ ఇటువంటి వాతావ‌ర‌ణ‌మే ఉండ‌క‌పోవ‌చ్చు కానీ క్లేమ‌న్ ఇన్ స్టిట్యూట్ చాలా కంపెనీల్లో రీసెర్చ్ చేసి ఈ విష‌యాల‌ను తేల్చింది. లింగ‌స‌మానత్వం అంటూ లెక్చ‌ర్లు దంచేవాళ్లు కూడా మ‌హిళ‌లు ఉన్న‌త స్థానానికి రావ‌డాన్ని స‌హించ‌లేరని కుండ‌బ‌ద్ద‌లు కొట్టింది.

ప్ర‌తికూల వ్యాఖ్య‌ల‌కు బెదిరిపోకండి!

    ప్ర‌స్తుతం బ‌హుళ జాతి కంపెనీల్లో బృందాల‌ను విజ‌య‌వంతంగా న‌డిపించ‌డంలో మ‌హిళ‌లే ముందున్నారు.ఓపిక‌,అంద‌రితో క‌లిసిపోయే తత్వం వారిని టీమ్ లీడ‌ర్లుగా నిల‌బెడుతోంది. అయితే పై అధికారుల నుంచి మాత్రం మ‌హిళ‌లు కొన్నిఇబ్బందుల‌ను ఎదుర్కొంటున్నారు.మ‌హిళ‌ల విజయాన్నిస‌హించ‌లేక‌పోవ‌డం, వివ‌క్ష చూపించ‌డం స‌ర్వసాధార‌ణ‌మైపోయిందని స‌ర్వేలు చెపుతున్నాయి. అయితే ఇటువంటి ఇబ్బందులు త్వ‌ర‌లోనే స‌మిసిపోతాయ‌ని వారు చెపుతున్నారు. ప్ర‌తికూల వ్యాఖ్య‌లు, ప‌రుష మాట‌లు ఎదురైన‌ప్పుడు మ‌హిళా ఉద్యోగులు ధైర్యంగా ఉండాల‌ని వారు సూచిస్తున్నారు. క‌ష్ట‌ప‌డి ప‌నిచేసే వారిని అడ్డ‌గించ‌డం ఎవ‌రి త‌రం కాదు. అటువంటి వాళ్లు స్వ‌ల్పకాలానికి ఇబ్బంది పెట్ట‌గ‌ల‌రేమో కానీ అభివృద్ధిని అడ్డుకోలేరు. ఈ విషయాన్ని గుర్తించి కంపెనీ ఉన్న‌తిని శ్ర‌మిస్తూ, అప్ప‌గించిన బాధ్య‌త‌ను స‌క్ర‌మంగా నిర్వ‌ర్తిస్తే ఫ‌లితాలు అనుకూలంగా వ‌స్తాయి. కెరీర్ లో మ‌హిళా ఉద్యోగులు ఈ విష‌యాల‌ను గుర్తుపెట్టుకుంటే విజ‌యం వ‌రిస్తుంది. 

ప్ర‌తిభే కొల‌మానం!

     ప్ర‌స్తుతం కొన్ని సంస్థ‌ల్లో లింగ వివ‌క్ష కొన‌సాగుతున్న‌ప్ప‌టికీ రానున్న రోజుల్లో క్ర‌మంగా త‌గ్గిపోవ‌చ్చు. ఎందుకంటే కంపెనీలు ఎప్పుడూ ప్ర‌తిభ‌కే పెద్దపీట వేస్తాయి. ప్ర‌తిభ‌, మంచి ప‌నిత‌నం ఉన్న‌వాళ్ల‌ని ఎట్టి ప‌రిస్థితుల్లోనూ వ‌దులుకోవు. కిందస్థాయిలో ఉన్న లింగవివ‌క్ష‌ను కంపెనీలు ఇప్పుడిప్పుడే గుర్తిస్తున్నాయి. దానికి అనుగుణంగానే కొన్ని చ‌ర్య‌ల‌ను కూడా చేపట్టాలి. ప‌దోన్న‌తుల‌లోనూ, వేత‌నం పెంపులోనూ ప‌నితీరునే ప్రాతిప‌దిక‌గా తీసుకోవాలి, ఇందులో లింగ భేదం అస్స‌లు ఉండ‌కూడ‌దు.ప్ర‌స్తుతం కంపెనీ నియామ‌కాల్లో చాలా కంపెనీలు లింగ వైవిధ్యాన్ని అమ‌లు చేయ‌డం లేదు. అలా కాకుండా ఉద్యోగుల్లో ఆడ‌, మ‌గ స‌మాన‌మైన నిష్ప‌త్తిలో ఉండేలా చ‌ర్య‌లు చేప‌ట్టాలి.  మ‌హిళా ఉద్యోగుల ఉత్ప‌త్తి సామ‌ర్ధ్యాన్ని గుర్తించి కొన్ని కంపెనీలు ఇప్ప‌టికే వాళ్ల‌కు పెద్ద‌పీట వేసాయి. రానున్న రోజుల్లో మ‌హిళా ఉద్యోగుల సంఖ్య‌ను మ‌రింత పెంచాలి. ఇలాంటి చ‌ర్య‌లు చేప‌ట్టిన‌ప్పుడే ఎటువంటి లింగ వివ‌క్ష‌కు తావులేకుండా మంచి ప‌ని వాతావ‌ర‌ణాన్ని క‌ల్పించి, మ‌హిళల అభివృద్ధికి కృషి చేయాలి. మ‌హిళ ఎటువంటి వివ‌క్ష‌ను ఎదుర్కొన‌కుండా, సామాజిక, ఆర్థిక స్వాతంత్రం సాధించిన‌ప్పుడు మాత్ర‌మే మ‌న దేశం నిజ‌మైన అభివృద్ధిని సాధిస్తుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com