ఎల్‌కేజీ అడ్మిషన్ కు ఇక్కడ 'స్పెషల్ కోచింగ్' ఇవ్వబడును!!

     గ‌డిచిన ద‌శాబ్ద కాలంలో మ‌న స‌మాజంలో కొన్ని స్ప‌ష్ట‌మైన మార్పులు చోటు చేసుకున్నాయి. వ్య‌క్తిగ‌త, ఆర్థిక‌, మానవ సంబంధాల్లోని మార్పుల‌ను  అనుస‌రించి పిల్ల‌ల పెంప‌కం, పోష‌ణ‌, చ‌దువు వంటి విష‌యాల్లో ఊహ‌కంద‌ని ప‌రివర్త‌న‌ను ఇప్పుడు మ‌నం చూస్తున్నాం. ముఖ్యంగా సంతానం విష‌యంలో స్య‌యంప‌రిమితులు విధించుకున్న నేప‌థ్యంలో త‌ల్లిదండ్రులు పిల్ల‌ల చ‌దువుకు ఎన‌లేని ప్రాధాన్య‌త‌ను ఇస్తున్నారు. మ‌నం గ‌తంలో చెప్పుకున్న‌ట్టు త‌మ ఆర్థిక స్థితిని అధిగ‌మించి పిల్ల‌ల‌కు నాణ్య‌మైన విద్య‌ను అందించేందుకు పేరెంట్స్ తాప‌త్ర‌య‌ప‌డుతున్నారు. దీంతో కొన్ని అగ్ర‌శ్రేణి స్కూళ్ల‌లో అడ్మిష‌న్ దొర‌క‌డ‌మే గ‌గ‌నంలా మారిపోయింది. ఎల్ కేజీలో ప్ర‌వేశానికి కూడా తల్లిదండ్రుల తెలివితేట‌ల‌కు పరీక్ష పెట్టి సంతృప్తి చెందితేనే పిల్ల‌వానికి అడ్మిష‌న్ ఇస్తున్నారు. దీంతో అడ్మిష‌న్ ను ఎలాగైనా పొందేందుకు త‌ల్లిదండ్రులు స్పెష‌ల్ క్లాస్ ల‌కు వెళ్లి కోచింగ్ లు తీసుకుంటున్నారు. ముఖ్యంగా ప్ర‌తిష్టాత్మ‌క స్కూళ్ల‌లో అడ్మిష‌న్ కావాల‌నుకుంటున్న‌ త‌ల్లుల కోసం కొన్ని సంస్థ‌లు ప్ర‌త్యేక త‌ర‌గ‌తుల‌ను కూడా నిర్వ‌హిస్తున్నాయి. 

త‌ల్లిదండ్రుల‌కు స‌వాలుగా మారిన పిల్ల‌ల పెంప‌కం 

     మ‌నం ఇందాక చెప్పుకున్న‌ట్టు సామాజికంగా చోటుచేసుకున్న‌ మార్పులు పిల్ల‌ల పోష‌ణ‌, వారి చ‌దువు, భ‌విష్య‌త్ నిర్మాణం వంటి వాటిని క‌ఠినమైన విష‌యాలుగా మార్చివేసాయి. దీంతో డ‌బ్బు సంపాద‌నకు అధిక ప్రాధాన్య‌త ఏర్ప‌డుతోంది. భార్యాభ‌ర్త‌లు ఇద్ద‌రూ పనిచేస్తేనే కానీ సామాజిక హోదా చిహ్నాలైన కారు, ఇల్లు, బ్యాంక్ బ్యాలెన్స్ స‌మ‌కూర్చుకోవ‌డం సాధ్యం కాకుండా ఉంది. వీటితో పాటు పిల్ల‌ల‌కు మంచి నాణ్య‌మైన చ‌దువు చెప్పించాల‌న్న అతిముఖ్య‌మైన భాధ్య‌త కూడా నేటి త‌రం త‌ల్లిదండ్రుల‌కు అతిపెద్ద స‌వాలు. ముఖ్యంగా మంచి నాణ్య‌త క‌లిగిన ఉన్నత విద్యా సంస్థ‌ల్లో చ‌దివించేందుకు కాస్త స్తోమ‌త ఉన్న పేరెంట్స్ రెడీ అవుతున్నారు. దీంతో ఎల్ కేజీ స్థాయి నుంచే క‌స‌ర‌త్తు మొద‌ల‌వుతోంది. త‌ల్లిదండ్రులిద్ద‌రూ ప‌నిచేసే వ్య‌క్తులు కాబ‌ట్టి పిల్ల‌వాడి భ‌విష్య‌త్ ను తీర్చిదిద్దేందుకు ఎంత మొత్తమైనా వెచ్చింది మంచి స్కూళ్ల‌లో జాయిన్ చేస్తున్నారు. అయితే పిల్ల‌వాని భ‌విష్య‌త్ నిర్మాణంలో స్కూల్ పాత్ర కంటే త‌ల్లిదండ్రుల పాత్రే అధికం కాబ‌ట్టి స్కూల్ యాజ‌మాన్యాలు తల్లిదండ్రుల అర్హ‌త‌లు, సామ‌ర్ధ్యాలు చూసాకే అడ్మిష‌న్ ను ఇస్తున్నాయి. 

స‌రైన స‌మాధానం చెప్ప‌కుంటే 'నో అడ్మిష‌న్'!

    ఇప్పుడు చాలా మంచి పేరున్న‌ స్కూళ్ల‌లో ప్ర‌వేశాలు అంత సుల‌భ‌మేమీ కాదు. త‌ల్లిదండ్రుల‌కు ప్ర‌త్యేక ఇంట‌ర్వ్యూ నిర్వ‌హించి అందులో సంతృప్తిక‌రంగా స‌మాధానాలు చెప్పిన వారి పిల్ల‌ల‌కే అడ్మిష‌న్ ఇస్తున్నారు. ఈ న‌యా ట్రెండ్ ఇప్పుడు పేరెంట్స్ కు అతిపెద్ద స‌వాలుగా మారింది.  ముఖ్యంగా పిల్ల‌ల పెంప‌కంలో త‌ల్లుల పాత్ర ముఖ్యం కాబ‌ట్టి ఇంట‌ర్వ్యూలో వాళ్ల‌నే అధికంగా ప్ర‌శ్న‌లు వేస్తున్నారు. ఎంత ఫీజు క‌ట్టేందుకు రెడీ అయినా పేరెంట్ ఇంట‌ర్వ్యూలో త‌డ‌బాటుకు గురైనా, స‌రైన స‌మాధానాలు చెప్ప‌లేకున్నా పిల్ల‌వానికి నో అడ్మిష‌న్. దీంతో స్కూల్ అడ్మిష‌న్ ఇంట‌ర్వ్యూ అంటే త‌మ జాబ్ ఇంట‌ర్వ్యూ కంటే అధికంగా భ‌య‌ప‌డిపోతున్నారు పేరెంట్స్. దీనికి తోడు భార్య‌భ‌ర్త‌లు ఇద్ద‌రూ ఉద్యోగ‌స్తులైతే సాయింత్రం ఇంటికి ఇద్ద‌రూ ఆల‌స్యంగా వ‌స్తే అటువంటి వాళ్ల పిల్ల‌ల‌కు కూడా స్కూళ్లు అడ్మిష‌న్స్ ఇవ్వ‌డం లేదు. పిల్ల‌ల‌తో స‌రైన క్వాలిటీ టైమ్ గ‌డ‌ప‌నప్పుడు చిన్నారులు మానసిక వికాసం జ‌ర‌గ‌ద‌ని స్కూల్ యాజ‌మాన్యాలు చెపుతున్నాయి. పోనీ స్కూళ్లు వాళ్లు విధించిన నియ‌మాల‌కు అనుగుణంగా అన్ని ప‌రిస్థితులు ఉన్నా ఇంట‌ర్వ్యూ గండం గ‌ట్టెక్కితే కానీ సీటు దొర‌క‌డం దుర్ల‌భం. 

ప్ర‌త్యేక త‌ర‌గతులు 

    విన‌డానికి కాస్త విడ్డూరంగా ఉన్నా ఇప్పుడు పిల్ల‌ల అడ్మిష‌న్ల కోసం త‌ల్లిదండ్రులు స్పెష‌ల్ కోచింగ్ తీసుకుంటున్నారు. ముఖ్యంగా త‌ల్లులు ఇంట‌ర్వ్యూలో యాజ‌మాన్యం వాళ్లు అడిగే ప్ర‌శ్న‌ల‌కు త‌డ‌బ‌డ‌కుండా స‌మాధానాలు చెప్పేందుకు ప్ర‌త్యేక త‌ర‌గ‌తుల‌కు హాజ‌ర‌వుతున్నారు. ఇక త‌ల్లుల‌కు ప్ర‌త్యేక శిక్ష‌ణ ఇచ్చేందుకు కొన్ని సంస్థ‌లు కూడా వెలిశాయి. త‌ల్లుల‌కు అనువైన స‌మ‌యంలో ఒకటి రెండు గంట‌లు వీరు ప్ర‌త్యేక తర‌గ‌తులు నిర్వ‌హిస్తున్నారు. ఇందులో స్కూల్ యాజ‌మాన్యాలు అడిగే ప్ర‌శ్న‌ల‌కు ఎలా స‌మాధానాలు చెప్పాలి. త‌డ‌బ‌డ‌కుండా ఎలా మాట్లాడాలి? అప్ప‌టిక‌ప్పుడు స‌మ‌య‌స్పూర్తిగా ఎలా సంద‌ర్భాన్ని గెల‌వాలి? వ‌ంటి అంశాల‌పై త‌ర్ఫీదునిస్తున్నారు. దేశ రాజ‌ధాని న్యూఢిల్లీతో పాటు ముంబ‌య్, కోల్ క‌తా, బెంగ‌ళూరు, హైద‌రాబాద్ లాంటి మెట్రో న‌గ‌రాల్లో ఇప్పుడు ఇదే ట్రెండ్ క‌నిపిస్తోంది. సివిల్స్, జాబ్ ఇంట‌ర్వ్యూలకు ప్రిపేర్ అయినంత సీరియ‌స్ గా త‌ల్లులు తమ పిల్ల‌ల అడ్మిష‌న్ కోసం స్పెష‌ల్ క్లాస్ లకు హాజ‌ర‌వుతున్నారు. 

ఈ అగ్ని ప‌రీక్ష‌ను ఎదుర్కోవాల్సిందే! 

     పిల్ల‌ల‌ను స్కూళ్ల‌లో జాయిన్ చేసుకునేందుకు త‌ల్లిదండ్రుల‌కు ఈ క‌ఠిన ప‌రీక్ష‌లు దేనికి అన్న విమ‌ర్శ‌లు ఉన్నా స్కూల్ యాజ‌మాన్యాలు వాటిని ప‌ట్టించుకోవ‌డం లేదు. కొన్ని సంద‌ర్భాల్లో త‌ల్లిదండ్రుల‌ను సివిల్స్ త‌ర‌హాలో క‌ఠిన ప్ర‌శ్న‌లు అడిగి ఇబ్బందులు పెడుతున్నార‌నే విమ‌ర్శలు కూడా చెల‌రేగాయి. అయినా మంచి స్కూళ్ల‌లో అడ్మిష‌న్ కోసం త‌ల్లిదండ్రులు ఇంట‌ర్వ్యూను ఎదుర్కొనేందుకు సిద్ధ‌మ‌వుతూనే ఉన్నారు. ఈ  విష‌యంలో స్కూల్ యాజ‌మాన్యాల వాద‌న మ‌రోలా ఉంది. పిల్ల‌వాడు స్కూల్ లో నేర్చుకునేది 25 శాత‌మేన‌ని మిగ‌తా విష‌య‌మంతా అత‌ను త‌ల్లిదండ్రుల నుంచే నేర్చుకుంటాడ‌ని, అందుకే వారి వ్య‌క్తిత్వం, అర్హ‌త‌ల ఆధారంగా అడ్మిష‌న్ ఇస్తున్నామ‌ని స్కూల్ యాజ‌మాన్యాలు చెపుతున్నాయి. త‌ల్లిదండ్రులు ఎదుర్కొంటున్న ఈ అడ్మిష‌న్ ఇంట‌ర్వ్యూ ఇబ్బందిని తొలిగించేందుకు ప్ర‌య‌త్నిస్తూనే కొన్ని సంస్థ‌లు త‌మ‌కు తాము కొత్త అవకాశాల‌ను సృష్టించుకుంటున్నాయి. మ‌న స‌మాజంలో మ‌న విద్యా విధానంలో అనూహ్యంగా చోటు చేసుకున్న ఈ కొత్త మార్పును ఇష్టం లేకున్నా ఆహ్వానించాల్సిందే. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com