ఇవి స్కూళ్లా..సూప‌ర్ మార్కెట్లా!?

     విజ్ఞానానికి ప‌ట్టుకొమ్మ‌ల్లా ఉండాల్సిన విద్యాల‌యాలు ఇప్పుడు వ్యాపార కేంద్రాలుగా మారిపోతున్నాయి. ముఖ్యంగా విద్య ప్ర‌యివేట్ సంస్థ‌ల చేతుల్లోకి వెళ్లాక వాణిజ్య ధోర‌ణి అనేది ఒక విధానంగా మారిపోయింది. విద్య‌ను కేవ‌లం లాభ‌సాటి వ్యాపారంగానే చూస్తున్నారు త‌ప్పితే సేవా దృక్ఫ‌థంతో చూసే వాళ్లు క‌రువ‌వుతున్నారు. ఒక‌వైపు చిన్న పిల్ల‌ల చ‌దువుల‌కు కూడా ల‌క్ష‌లాది రూపాయ‌ల ఫీజుల‌ను వ‌సూలు చేస్తూ మ‌రోవైపు పుస్త‌కాలు, యూనిఫామ్ లు, స్కూల్ బ్యాగ్ లు అంటూ ఒక‌ చిన్న సైజు వ్యాపారం చేస్తున్నారు. ఇన్నాళ్లు నిరాటంకంగా సాగిపోయిన ఈ దందాకు సెంట్ర‌ల్ బోర్డ్ ఆఫ్ సెకండ‌రీ ఎడ్యుకేష‌న్ (సీబీఎస్ఈ) ఇప్పుడు బ్రేక్ వేసింది. త‌మ గుర్తింపు పొందిన స్కూళ్లు ఇక‌పై విద్య పేరిట‌ ఎటువంటి అమ్మ‌కాలు జ‌ర‌పరాద‌ని ఆదేశాలు జారీ చేసింది. సామాజిక సేవ ప్ర‌తిపాదిక‌న ఏర్ప‌డిన స్కూళ్ల‌లో మూడు పువ్వులు ఆరు కాయ‌లుగా వ‌ర్ధిల్లుతున్నఈ లాభ‌సాటి వ్యాపారం సీబీఎస్ఈ ఆదేశాలతో ఆగిపోతుందా? ప‌్ర‌స్తుతం దేశంలో ఖ‌రీదైన వ్యవ‌హారంలా మారిపోయిన విద్య సామాన్యుడికి అందుబాటులోకి వ‌స్తుందా? 

ఖ‌రీదైన వ్య‌వ‌హారంగా విద్య‌

     ప్ర‌స్తుతం మ‌న దేశంలో అతి ఖ‌రీదైనవేంటో తెలుసా?  విద్య‌, వైద్యం..ప్ర‌తీ మ‌నిషికి అత్య‌వ‌స‌ర‌మైన, అతి ముఖ్య‌మైన ఈ రెండు అవ‌స‌రాలు ప్ర‌స్తుతం సామాన్యునికి అంద‌నంత ఎత్తులో ఉన్నాయి. ఈ కీల‌క రంగాల భాద్య‌త‌ల నుంచి ప్ర‌భుత్వం త‌ప్పుకోవ‌డంతో ప్ర‌యివేట్ రంగం ఇందులో పాగా వేసింది. విద్య‌ను, వైద్యం ను కేవ‌లం లాభ‌సాటి వ్యాపారంగా మాత్ర‌మే చూసే వాళ్ల సంఖ్య పెరిగిపోయింది. ఏవో కొన్ని సంస్థ‌ల‌ను మిన‌హాయిస్తే  మిగ‌తా వాళ్లు విద్య‌ను వ్యాపారంగానే చూస్తున్నారు. దీంతో అందివ‌చ్చిన ప్ర‌తీ అవ‌కాశం లోనూ వాళ్లు లాభాల‌నే ప్రాతిప‌దిక‌గా తీసుకుంటున్నారు. సూప‌ర్ మార్కెట్ల‌లో స్పెష‌ల్ సేల్ పెట్టిన‌ట్టు, స్కూళ్లు ప్రారంభం కాగానే యూనిఫాంలు, పుస్త‌కాలు, షూలు అంటూ చిన్న సైజు సేల్ ను ప్ర‌క‌టిస్తున్నారు. పైపైచ్చు త‌మ ద‌గ్గ‌రే కొనాలి ధ‌ర గురించి అడ‌గొద్దు అనే నియంతృత్వ రూల్ ఒక‌టి. ఈ అరాచ‌కాల‌పై ఎన్ని సార్లు త‌ల్లిదండ్రులు మొర‌పెట్టుకున్నా ఇప్ప‌టి వ‌ర‌కూ విని నాథుడే లేడు. దీంతో త‌ప్ప‌నిసరిగా వాళ్లు చెప్పిన ధ‌ర‌ను చెల్లించి వాళ్ల ద‌గ్గ‌రే స్టేష‌న‌రీ మొద‌లుకొని యూనిఫాంలు, పుస్త‌కాలు, బ్యాగులు అన్నీ కొనాల్సి వ‌స్తోంది. 

కంటితుడుపు చ‌ర్య‌లు స‌త్ఫ‌లితాల‌నివ్వ‌వు!

      విద్యా సంస్థ‌ల సూప‌ర్ మార్కెట్ వ్యాపారంపై ఇప్పుడు సీబీఎస్ఈ స్ప‌ష్ట‌మైన‌ ఆదేశాలు జారీ చేసింది. ఇక నుంచి ప్ర‌యివేట్ స్కూళ్ల‌లో వాణిజ్య ధోర‌ణి ఆగిపోతుంది అనుకుంటే మ‌న‌కంటే అమాయ‌కులు మ‌రొక‌రు ఉండ‌రు. ఇలా ఎందుకు చెప్పాల్సి వ‌స్తుందంటే గ‌తంలో కూడా సీబీఎస్ఈ ఇటువంటి ఆదేశాలు చాలానే జారీ చేసింది. అయినా వాటిని ప‌ట్టించుకున్న నాథుడే లేడు. 2008 లో కూడా స్కూళ్ల‌లో ఇలా యూనిఫామ్ లు పుస్త‌కాలు అమ్మ‌కూడ‌దంటూ సీబీఎస్ఈ ఒక ప్ర‌క‌ట‌న చేసింది. అయితే ఆ ఆదేశాన్ని స్కూల్ యాజ‌మాన్యాలు ప‌ట్టించుకున్న పాపాన పోలేదు. స‌రైన ప‌ర్య‌వేక్ష‌ణ‌, క‌ట్టుదిట్ట‌మైన నిర్వ‌హ‌ణ లేక‌పోవ‌డంతో అప్ప‌టి ప్ర‌క‌ట‌న కాల‌గ‌ర్భంలో కలిసిపోయింది. ఇన్నాళ్ల‌కు ఇప్పుడు మ‌ళ్లీ సీబీఎస్ఈ మ‌రోసారి స్కూళ్ల చిల్ల‌ర వ్యాపారంపై మ‌రోసారి ప్ర‌క‌ట‌న చేసింది. మ‌రి ఈసారైనా ప్ర‌యివేట్ స్కూల్ యాజమాన్యాల అత్యాశ‌పై ఉక్కుపాదం మోపుతుందో లేక ఎప్ప‌టిలానే హ‌డావుడి ప్ర‌క‌ట‌న‌లు చేసి త‌ర్వాత మిన్న‌కుండిపోతుందో వేచి చూడాలి. 

అత్యాశ‌కు అంతూ పొంతూ లేదా?

     అతిశ‌యోక్తి అనిపించినా ప్ర‌స్తుతం అధిక శాతం ప్ర‌యివేట్ స్కూళ్లు ఎలా త‌యార‌య్యాయంటే విద్యార్ధుల పేరెంట్స్ నుంచి ముక్కు పిండి ఎక్కువ డ‌బ్బులు ఎలా వ‌సూలు చేయాల‌న్న‌దానిపై అధికంగా దృష్టిపెడుతున్నాయి. నాణ్య‌త పేరు చెప్పి ఇష్టారాజ్యంగా ఫీజులు పెంచ‌డ‌మే కాదు కొత్త కొత్త విధానాల‌తో డ‌బ్బులు గుంజేందుకు మార్గాల‌ను క‌నిపెడుతున్నారు. పిల్ల‌వాడి యూనిఫామ్ బాగానే ఉన్నా ప్ర‌తీ సంవ‌త్స‌రం కొత్త యూనిఫామ్ కొనాల్సిందే. దీనికి తోడు బ్రాండెడ్ షూస్ , బ్రాండెడ్ స్కూల్ బ్యాగ్, పుస్తకాలు అన్నీ వాళ్ల ద‌గ్గ‌రే కొనాలి. బ‌య‌ట అంత‌కంటే మంచి నాణ్య‌మైనవి ఉన్నా అక్క‌డ కొనేందుకు వీలు లేదంటూ పేరెంట్స్ కు హెచ్చ‌రిక‌లు చేస్తున్నారు. ఇక ఈ మ‌ధ్య టెక్నాల‌జీ అప్ డేష‌న్ అంటూ ట్యాబ్లెట్లు, ఈ లెర్నింగ్ ప్లాట్ ఫామ్ లు అంటూ మ‌రికొంత గుంజుతున్నారు. పిల్ల‌ల చ‌దువుకు ఏ త‌ల్లిదండ్రులైనా అధిక ప్రాధాన్య‌త‌నిస్తారు. త‌మ‌కు స‌రైన సౌక‌ర్యాలు లేకున్నా నోరు క‌ట్టుకుని త‌మ పిల్ల‌ల‌కు ఫీజులు క‌డ‌తారు. త‌ల్లిదండ్రుల‌ ఈ మాన‌సిక స్థితినే అలుసుగా తీసుకుని ప్ర‌యివేట్ స్కూల్ యాజ‌మాన్యాలు పేట్రేగిపోతున్నాయి. 

ప‌ర్య‌వేక్ష‌ణ లేకుంటే ప్ర‌క‌ట‌న‌లు నిష్ఫ‌ల‌మే

    ప్ర‌యివేట్ స్కూళ్ల రిటైల్ అమ్మ‌కాల‌పై సీబీఎస్ఈ చేసిన ప్ర‌క‌ట‌న ఆహ్వానించ‌ద‌గిన‌దే. అయితే ఆ ఆదేశాలు క‌ఠినంగా అమ‌లు అయిన‌ప్పుడు మాత్ర‌మే త‌ల్లిదండ్రుల‌కు న్యాయం జ‌రుగుతుంది. అలా కాకుండా ప్ర‌క‌ట‌న‌లు చేసి చేతులు దులుపుకుంటే ఈ దందా ఇలానే కొన‌సాగుతుంది. ముఖ్యంగా ప్రయివేట్ స్కూళ్ల వ్యాపారాత్మ‌క ధోర‌ణి, అత్యాశ‌పై ప్ర‌భుత్వ సంస్థ‌లు ఎప్ప‌టిక‌ప్పుడు ప‌ర్య‌వేక్ష‌ణ జ‌ర‌పాలి. కొత్త త‌ర‌హా ప‌ద్ధ‌తుల‌తో పేరెంట్స్ నుంచి డ‌బ్బు గుంజే విధానాల‌కు అడ్డుక‌ట్ట వేయాలి. అప్పుడే విద్య సామాన్యుల‌కు అందుబాటులోకి వ‌స్తుంది. పుస్త‌కాలు, యూనిఫామ్ లు , షూస్, బ్యాగ్ ల అమ్మ‌కాల త‌ర‌హాలోనే ఫీజుల నియంత్ర‌ణ పై   కూడా ప్ర‌భుత్వం దృష్టి పెట్టాలి. స‌క‌ల సౌక‌ర్యాలు ఉన్న స్కూళ్లు వాళ్ల నాణ్య‌త‌కు త‌గ్గ‌ట్టు ఫీజులు వ‌సూలు చేసినా స్తోమ‌త ఉన్న త‌ల్లిదండ్రులు క‌ట్టేందుకు సిద్ధ‌ప‌డ‌తారు. చిన్న చిన్న స్కూళ్ల‌లో కూడా వేల‌కు వేలు ఫీజులు పెడితే మ‌ధ్య త‌ర‌గ‌తి ప్ర‌జ‌లు ఏమైపోవాలి. మొత్తానికి సీబీఎస్ఈ తాజా ఆదేశాలు స్కూల్ యాజ‌మాన్యాల‌కు చెంప‌పెట్టులాంటిదే. అయితే ఇది ఆరంభశూరత్వం కాకూడ‌ద‌ని మ‌నం కోరుకుందాం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com