జీతం ముఖ్యమా? జీవితం ముఖ్యమా?

  చాలా రోజులు త‌ర్వాత క‌లుసుకున్న ఇద్దరు పాత స్నేహితులు మధ్య సంభాష‌ణ ఎలా మొద‌లవుతుంది? "ఏరా... ఎలా ఉన్నావ్? ఏం ఉద్యోగం చేస్తున్నావ్? జీతం ఎంత‌?" వాళ్లిద్ద‌రి మ‌ధ్య సంభాష‌ణ ఇలా సాగుతుంది. ఇప్పుడు యువ‌త ప్రాధాన్య‌త‌నాంశాల్లో జీత‌మే ప్ర‌థ‌మ స్థానాన్ని ఆక్ర‌మించింది. స్నేహితులే కాదు స‌మాజంలో ఎక్క‌డికెళ్లినా ఎదుర‌య్యే ప్ర‌శ్న‌...జీతం ఎంత అనే. అయితే ఈ జీతం అనే ప‌దం ఒత్తిడిని పెంచే బ్ర‌హ్మ రాక్ష‌సిలా త‌యారైంద‌న్న విష‌యాన్ని చాలా మంది గుర్తించ‌డం లేదు. ఇష్టం లేని ప‌నిచేస్తూ ఆరోగ్యాన్ని ప‌ణంగా పెడుతూ సాధించేదేమిటి అన్న ప్ర‌శ్న ఇప్పుడు చాలా బ‌లంగా త‌లెత్తుతోంది. గెలుపంటే ఏంటో ఇంత‌వ‌ర‌కూ ఒక్క‌డూ కూడా వివ‌ర‌ణ ఇవ్వ‌కున్నా ఎక్కువ జీతాన్నే గెలుప‌నుకుంటున్న యువ‌త మ‌రింత అగాధంలోకి కూరుకుపోతున్నారు. అభిరుచి ఉన్న రంగాన్ని ఎంచుకున్న‌ప్పుడు కాస్త జీతం త‌క్కువైనా ఫర్వాలేద‌నే ప్రాథ‌మిక సూత్రాన్ని విస్మ‌రించ‌డం ఇప్పుడు పెను ప్ర‌మాదంగా మారుతోంది. 

జీతం ఎక్కువ వ‌స్తే లైఫ్ సెటిల్ అయిన‌ట్టేనా? 

     టీవీ చూస్తూనో లేక పేప‌ర్ చ‌దువుతూనో భోజ‌నం చేస్తే మ‌న పెద్ద‌వాళ్లు ఏం చెపుతారు. అన్నం తింటున్న‌ప్పుడు తింటున్న దానిపై శ్ర‌ద్ధ పెట్టి తినాలి అని చెపుతారు. అలా ఆస్వాదించి తిన‌డం వ‌ల‌న మ‌న‌కు ఆనందం క‌లుగుతుంది అదే టైంలో ఆ ఆహారం మ‌న శ‌రీరానికి మంచి శ‌క్తిని ఇస్తుంది. పావుగంట, అరగంట పాటు చేసే భోజ‌నాన్నే ఆస్వాదిస్తూ చేయాలి అని చెప్పినప్పుడు రోజుకి 10 గంట‌లు చేసే ప‌నిని ఇంకెంత ఆస్వాదించాలి?  అలా ఆస్వాదించ‌లేన‌ప్పుడు మ‌నకు అసంతృప్తే కాదు మాన‌సిక అనారోగ్య‌మూ క‌లుగుతుంది. ఫ‌లితం రెండేళ్లు, మూడేళ్లు ప‌నిచేయ‌గానే చేస్తున్న ప‌నిపై ఆస‌క్తిని కోల్పోతున్నారు. దీంతో ఉత్పాద‌క‌త దారుణంగా దెబ్బ‌తింటున్న‌ట్టు కొన్ని స‌ర్వేలు ఇప్ప‌టికే వెల్ల‌డించాయి. పనిలో ఆసక్తి లేక ఒత్తిడిని అనుభవించడం వల్ల ఒక వ్యక్తి వ్యక్తిగత జీవితం కూడా అస్తవ్యస్తంగా తయారవుతోంది. ఫలితంగా కుటుంబాలు విచ్ఛిన్నమవుతున్నాయి. కొందరు ధైర్యం చేసిన తమకు ఆసక్తి ఉన్న రంగంలోకి మారేందుకు ప్రయత్నిస్తుంటే మరికొందరు ఎలాంటి ధైర్యం చేయలేక ఒత్తిడిని తట్టుకోలేక అనారోగ్యాన్ని కొని తెచ్చుకుంటున్నారు. 

ఆస‌క్తి, అభిరుచులే కీల‌కం 

     'ఆనందమే జీవన మకరందం' అన్నాడో సినీ కవి. ఎంత డబ్బు సంపాదించినా, ఎంత ఎత్తుకు ఎదిగినా మనిషికి కావాల్సింది ఆనందమే.  ఆసక్తి, అభిరుచి ఉన్న పని చేస్తేనే ఆనందం సొంతమవుతుంది. అయితే ప్రస్తుత సామాజిక పరిస్థితుల్లో నాణ్యమైన జీవితానికి డబ్బు కూడా చాలా ముఖ్యమే కదా అన్న ప్రశ్న ఇక్కడ తలెత్తుతుంది. అవును డబ్బు ముఖ్యమే కానీ అది మన మనశ్సాంతిని, ఆనందాన్ని పెంచినప్పుడే దానికి విలువ కానీ హరించినప్పుడు ఎంత డబ్బు ఉన్నా అది కొరగాకుండా పోతుంది. ప్రస్తుత యువత ఈ చిన్న వ్యత్యాసాన్ని గుర్తించి తమ కెరీర్ ను నిర్మించుకోవాలి. తమకు ఆసక్తి ఉన్న రంగాన్ని తమకు జీవనభృతిని అందించే ఉద్యోగంగా మలుచుకోవాలి. ఇంజినీరింగ్, మెడిసిన్ చట్రంలో పడి విద్యార్ధులు ఎంతలా నలిగిపోతున్నారో, వారి అభిరుచులను ఎలా చంపుకుంటున్నారో, మన విద్యావిధానం ఎలాంటి దుస్థితిలో ఉందో ..అన్న విషయాన్ని '3 ఇడియట్స్' లాంటి సినిమాల్లో చాలా స్పష్టంగా తెలియజెప్పారు. ప్రస్తుతం తనకు అభిరుచి ఉన్న రంగంలో కెరీర్ ను నిర్మించుకుంటాను అని ఒక విద్యార్ధి అంటే ఒప్పుకునే తల్లిదండ్రులు ఎంతమంది ఉంటున్నారు? 

అవకాశాలకు కొదువే లేదు

     ఒక కుర్రవానికి గిటార్ వాయించడంలో ప్రావీణ్యం ఉంది. మంచి మ్యూజిక్ కంపోజర్ గా కెరీర్ ను నిర్మించుకోవాలనేది అతని కల. పదేళ్ల క్రితం అయితే అతను తనకు ఇష్టమైన కెరీర్ ను నిర్మించుకుని, జీవితంలో స్థిరపడేందుకు చాలా కష్టపడాల్సి వచ్చేది. కానీ ప్రస్తుతం ఆసక్తి, అభిరుచి, పని పట్ల శ్రద్ధ ఉండాలే కానీ ఏ రంగంలో  అయినా దూసుకుపోవచ్చు. చేస్తున్న పని పట్ల నిబద్ధతతో వ్యవహరిస్తే కొంచెం సమయం పట్టినా డబ్బు ఆటోమేటిక్ గా వస్తుంది. విజయవంతమైన యువత కెరీర్ ను ఉదాహరణగా తీసుకుంటే మనకు ఇదే విషయం స్పష్టమవుతుంది. ప్రపంచంలో అతిపెద్ద ఆర్ధిక వ్యవస్థగా మారేందుకు పరుగులు పెడుతున్న మన దేశంలో అవకాశాలకు కొదువే లేదు. దానికి కావాల్సిందల్లా కష్టపడే తత్వం, కాస్త చొరవ. ఇవి ఉంటే ఎన్నో అవకాశాలు మీ కోసం ఎదురుచూస్తున్నాయి. జీతం కోసం ఇష్టం లేని పనిచేస్తూ మానసిక ఒత్తిడి గురవడమా? లేక ధైర్యం చేసి మన మనస్సుకు ఆనందాన్ని కలిగించే పని చేస్తూ జీతం సంపాదించుకోవడమా? అన్నది మనం  చేతుల్లోనే ఉంది. యువతకు ఈ విషయంలో తల్లిదండ్రులు, ఉపాధ్యాయులు అండగా నిలవాలి. వాళ్ల కలల కెరీర్ ను నిర్మించుకునేందుకు వాళ్లకు సహాయ సహకారాలు అందించాలి. అలా కాకుండా వాళ్లకు ఇష్టం లేకుండా ఇంజినీరింగ్, మెడిసిన్ చట్రంలో వాళ్లను తోసేస్తే వాళ్లు జీవితాంతం మానసిక సంఘర్షణను అనుభవించక తప్పదు. 

జీవితానికి, జీతానికి తేడాను గుర్తించండి 

    ఎక్కువ జీతం వస్తున్న వారు సమర్ధులు..తక్కువ జీతం వస్తున్న వారు అసమర్ధులు అన్న భావమే ప్రస్తుతం సమాజంలో యువతపై, వారి తల్లిదండ్రులపై ఒత్తిడిని పెంచుతోంది. ఈ పరిస్థితిని కచ్చితంగా బద్దలు గొట్టాలి. ఒక విద్యార్ధికి ఆసక్తి ఉన్న కోర్సుల్లోనే అతన్ని జాయిన్ చేయాలి. ఆ విషయంలో అతనికి స్పష్టత కొరవడినప్పుడు తల్లిదండ్రులు అతనికి మార్గనిర్దేశనం చేయాలి. అతను జీవితంలో స్థిరపడేందుకు అవసరమైన సహాయ, సహకారాలు అందించాలి. ఒక కెరీర్ పై ఒక పనిపై వాళ్లకు సంపూర్ణ స్పష‌్టత ఉన్నప్పుడు వాళ్లను నిరుత్సాహపర్చకుండా, ప్రోత్సహించాలి. అప్పుడే మంచి నిపుణులతో కూడిన ఆరోగ్యవంతమైన సమాజం తయారవుతుంది. ప్రస్తుతం ఎన్నో ఉపాధి మార్గాలున్నాయి. విద్యార్ధి చేయాల్సింది తన గమ్యాన్ని నిర్ణయించుకుని, తనకు ఆసక్తి ఉన్న రంగాన్ని ఎంచుకుని అందులో కష్టపడి పనిచేయాలి. అలా కాకుండా అస్పష్టతతో ఇష్టం లేని పనిచేస్తూ జీవితంపై నియంత్రణను కోల్పోకండి. జీతం కంటే జీవితం ముఖ్యమైనదని గుర్తించండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com