రిలాక్స్ అయిపోతే 'రిస్క్' లో ప‌డ‌తారు!

     'హమ్మ‌య్య ఉద్యోగం వ‌చ్చేసింది..ఇక కాలు మీద కాలు వేసుకుని హాయిగా కాలం వెళ్ల‌దీయొచ్చు' అని అనుకుంటున్నారా? అయితే మీరు ఇబ్బందుల్లో ప‌డ్డ‌ట్టే. ఎందుకంటే ప్ర‌జంట్ వ‌ర్క్ క‌ల్చ‌ర్ లో మీరు అనుక్ష‌ణం అప్ డేట్ కావాల్సిందే. అనుదినం మీ నైపుణ్యాల‌ను అభివృద్ధి చేసుకోవాల్సిందే. లేదంటే కంపెనీలు నిర్దాక్షిణ్యంగా మిమ్మ‌ల్ని బ‌య‌ట‌కు సాగ‌నంపుతాయి. విద్యార్ధులు చ‌దువు పూర్తి చేసి ఉద్యోగాన్ని సాధించినప్ప‌టికీ ఎప్ప‌టికీ నిత్య విద్యార్ధుల్లా మెల‌గాలి. నిరంత‌రం అధ్య‌య‌నం చేయ‌డంతో పాటు ఎప్ప‌టిక‌ప్పుడు కొత్త నైపుణ్యాల‌ను నేర్చుకుంటూ కొత్త స‌మాచారాన్ని సేక‌రిస్తూ అప్ టు డేట్ గా ఉండాలి. ఇలా ఉంటేనే ఈ జ‌మానా ఉద్యోగ జీవితంలో విజ‌యం సాధించ‌గ‌లుగుతారు. లేకుంటే ఉద్యోగం వ‌చ్చింద‌న్న ఆనందం ఆవిరి కావ‌డానికి ఎక్కువ రోజులు ప‌ట్ట‌దు. 

చ‌ట్రంలో ఇరుక్కుపోవ‌ద్దు!

      చాలా మంది ఉద్యోగులు ఒక్క‌సారి ఉద్యోగం వ‌చ్చాక ఆ చ‌ట్రంలో ఇరుక్కుపోతారు. దీని వ‌ల‌న కెరీర్ లో పెద్ద‌గా ఎదుగుద‌ల లేకుండా 'ఎక్క‌డ వేసిన గొంగ‌డి అక్క‌డే' అన్న చందంగా ఉండిపోతారు. ఇలా ఉండిపోవ‌డం దీర్ఘ‌కాలంలో ఉద్యోగికి తీవ్ర‌మైన న‌ష్టం క‌లుగ‌జేస్తుంది. అలా కాకుండా త‌మ ఆలోచ‌నా ప‌రిధిని పెంచుకుని ప్రస్తుతం చేస్తున్న ఉద్యోగంలో ఎదుగుద‌ల లేక‌పోతే అదే ఉద్యోగంలో ఉన్న ఇత‌ర అవ‌కాశాల‌ను వెతుక్కోవాలి. ఒక వెబ్ సైట్లో కంటెంట్ రైట‌ర్ గా ప‌నిచేస్తున్నఒక ఉద్యోగి త‌న కెరీర్ లో త‌గిన ఎదుగుద‌ల లేక‌పోతే త‌న‌కున్న కంటెంట్ రాసే నైపుణ్యాల‌తో, బాగా మాట్లాడ‌గ‌లిగే చాతుర్యంతో ఎల‌క్ట్రానిక్ మీడియాలో లో ఉద్యోగం కోసం ప్ర‌య‌త్నించ‌వ‌చ్చు. దీని వ‌ల‌న అత‌ని కెరీర్ లో మంచి పెరుగుద‌ల క‌నిపిస్తుంది. మీకున్న నైపుణ్యాలు గుర్తించ‌గ‌ల‌గ‌డంతో పాటు వాటిని స‌రైన విధంగా ప్ర‌మోట్ చేసుకోగ‌ల‌గ‌డం పైనే విజ‌యం ఆధార ప‌డి ఉంటుంద‌ని గుర్తించండి.

అవ‌కాశాల‌ను ఎవ‌రికి వారే సృష్టించుకోవాలి!

       మీ కెరీర్ ప్లానింగ్ కు సంబంధించి ఎప్పుడూ ఇత‌రుల కంటే ఒక అడుగు ముందే ఉండేలా ప్లాన్ చేసుకోవాలి. దీని కోసం కెరీర్ పై ఎప్ప‌టికప్పుడు స‌మీక్ష చేసుకోవాలి. ప్ర‌జంట్ కెరీర్ ట్రండ్ పై పూర్తి అవ‌గాహ‌న‌తో ఉండాలి. ఇలా ఉండ‌టం వ‌ల‌న ఉద్యోగం భ‌ద్ర‌త చిక్కుల్లో ప‌డ్డ‌ప్పుడు చాలా సుల‌భంగా ఆ సంక్షోభం నుంచి బ‌య‌ట‌ప‌డేందుకు వీలు క‌లుగుతుంది. అవ‌స‌ర‌మైతే మీకున్న నైపుణ్యాల‌ను ద్వారా సంబంధింత రంగాల్లో కొత్త కెరీర్ కు బాట‌లు వేసుకోవాలి. అవ‌స‌ర‌మైతే, మంచి భ‌విష్య‌త్ ఉంద‌ని భావిస్తే కెరీర్ ను పూర్తిగా మార్చుకునేందుకు కూడా సిద్ధ‌ప‌డొచ్చు. అయితే ఈ విష‌యంలో అప్ర‌మ‌త్త‌త అవ‌స‌రం. ప్ర‌తీ అడుగు ఆచితూచి వేయాలి. కెరీర్ ఛేంజింగ్ లో ఏ మాత్రం పొర‌పాటు జ‌రిగినా అది మీ ఉద్యోగ జీవితాన్ని , వ్య‌క్తిగ‌త జీవితాన్ని పెను ప్ర‌మాదంలో ప‌డేస్తుంది. ఈ విష‌యంలో కొంచెం జాగ్ర‌త్త వ‌హించాలి. కొత్త అవ‌కాశాల‌ను సృష్టించుకోవ‌డంలో మీకు మీరు స‌హాయ‌ప‌డినంత‌గా వేరే వ్య‌క్తులు స‌హాయ‌ప‌డ‌లేర‌ని గుర్తించాలి. 

మార్గ సూచీ ఉంటే గ‌మ్యం చేర‌డం తేలిక 

      ఉద్యోగికి ఒక స్ప‌ష్ట‌మైన రోడ్ మ్యాప్ ఉంటే గ‌మ్యం చేరుకోవ‌డం అత‌నికి సుల‌భ‌త‌ర‌మ‌వుతుంది. ఎందుకంటే గ‌మ్యం లేని ప్ర‌యాణం పెను ప్ర‌మాదాల‌కు దారితీస్తుంది. ఒక ల‌క్ష్యం పెట్టుకుని దానికి అనుగుణంగా స్ప‌ష్ట‌మైన ప్ర‌ణాళిక సిద్ధం చేసుకుని రెడీగా ఉండండి. స్వ‌ల్ప‌కాలిక ల‌క్ష్యాల‌తో పాటు దీర్ఘ‌కాలిక ల‌క్ష్యాల‌ను కూడా ఏర్ప‌రుచుకోండి. వాటిని స‌రైన విధంగా విభ‌జించుకుని ఆ ల‌క్ష్యాల‌ను చేరుకునేందుకు తీవ్రంగా శ్ర‌మంచండి. ప్ర‌ణాళిక లేకుండా చేసే శ్ర‌మ స‌రైన ఫ‌లితాలను ఇవ్వ‌ద‌ని గుర్తించండి. ప్ర‌ణాళిక‌కు శ్ర‌మ తోడైతేనే విజ‌యం సులభ‌మ‌వుతుంద‌న్న విజేత‌ల మాట‌ల‌ను గుర్తుకుతెచ్చుకొండి. ఈ ప్ర‌యాణంలో వృత్తి ప‌రంగానే కాకుండా వ్య‌క్తిగ‌తంగా కూడా కొత్త విష‌యాల‌ను నేర్చుకోవ‌డంలో ముందు ఉండండి. కొత్త విష‌యాల‌ను నేర్చుకోవడానికి స‌మ‌యం, వ‌య‌స్సు , సిగ్గు ఇలాంటి అడ్డంకులు ఏర్ప‌రుచుకోకండి. 

స్ప‌ష్ట‌త ఉంటే భ‌విష్య‌త్ మీదే

     ఉన్న‌త శిఖ‌రాల‌ను అధిరోహించాల‌ని క‌ల‌లు కంటున్న ఒక సంస్థ‌కైనా, వ్య‌క్తికైనా స్ప‌ష్ట‌త అనేది చాలా ముఖ్యం. స్ప‌ష్ట‌త  లేకుండా చేసే ప‌ని స‌రైన ఫ‌లితాల‌ను ఇవ్వ‌దు.  వ‌చ్చే ఏడాది ఏ స్థాయిలో ఉండాల‌నుకుంటున్నారో, ఏ స్థాయి జీతం తీసుకోవాల‌నుకుంటున్నారో, మ‌రో ఐదేళ్లు త‌ర్వాత ప‌రిస్థితి ఏమిటి ఇలా విష‌యాల‌పై చాలా స్ప‌ష్ట‌త‌తో ఉండండి. దీని కోసం కెరీర్ ప్లానింగ్ పై ఎప్ప‌టిక‌ప్పుడు స‌మీక్ష జ‌రుపుకొండి. కెరీర్ లో ఎదిగేందుకు వ‌చ్చిన ఏ చిన్న అవ‌కాశాన్ని కూడా జార‌విడ‌వ‌కుండా రెండు చేతుల‌తో అందిపుచ్చుకొండి. ఇలా ఉద్యోగంపై కెరీర్ పై నిరంత‌రం స‌మీక్ష చేసుకుంటూ స్ప‌ష్ట‌మైన ప్ర‌ణాళిక‌తో ఉంటే కెరీర్ లో ఉన్న‌త స్థితికి చేరుకోవ‌చ్చు. ఒక వేళ అనుకోని విధంగా ఉద్యోగ భ‌ద్ర‌త ప్రమాదంలో ప‌డిన‌ప్పుడు కూడా కంగారు ప‌డ‌కుండా ఆ సంక్షోభాన్ని ఎదుర్కొనేందుకు అవ‌స‌ర‌మైన ధైర్యం ల‌భిస్తుంది. కాబ‌ట్టి విద్యార్ధులు ఉద్యోగం సంపాదించిన మరుక్ష‌ణం నుంచి కెరీర్ ప్లానింగ్ పై కూడా దృష్టి సారిస్తే భ‌విష్య‌త్ లో మెరుగైన స్థితిలో ఉంటారు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com