ట్రెండ్ సెట్ చేయాలంటే, ట్రెండ్ ఫాలో కావాల్సిందే!

      సాంకేతిక‌త తీసుకొచ్చిన సౌక‌ర్యాల‌తో మ‌న చుట్టూ ఉన్న ప్ర‌పంచం చాలా వేగంగా మార్పు చెందుతోంది. దానికి అనుగుణంగా మనం కూడా మార‌కుంటే పోటీలో వెన‌క‌బ‌డిపోతాం. రేసులో నిల‌వాలంటే కొన్ని త‌ప్ప‌నిస‌రి నైపుణ్యాల‌ను నేర్చుకోవాల్సిందే. జాబ్ మార్కెట్లో ప్ర‌వేశించి మంచి ఉద్యోగాన్ని సాధించాల‌ని ప్ర‌య‌త్నిస్తున్న విద్యార్ధులు ఈ మార్పుల‌న్నింటినీ గ‌మ‌నించి ఎప్ప‌టిక‌ప్పుడు అప్ డేట్ కావాల్సి ఉంది.  గ‌తంలో ఉన్న‌ట్టు అర్హ‌త‌లు, నైపుణ్యాల‌ను రాసిన రెజ్యుమె పంపిస్తే ఉద్యోగం వ‌చ్చే రోజులు పోయాయి. సోష‌ల్ మీడియా మొద‌లుకుని జాబ్ సెర్చ్ వ‌ర‌కూ త‌న‌దైన ముద్ర చూపించిన‌ప్పుడే మంచి ఉద్యోగంలో కుదురుకునేందుకు అవ‌కాశం ఏర్ప‌డుతుంది. లేకుంటే రేసులో త‌మ‌ని దాటుకుని వెళ్లే వారి సంఖ్య పెరిగిపోతుంద‌ని విద్యార్ధులు గుర్తించాలి. ప్ర‌జంట్ జాబ్ మార్కెట్లో ఏం మార్పులు చోటుచేసుకున్నాయో, ఎంప్లాయ‌ర్స్ ఏ కోరుకుంటున్నారో గ‌మ‌నించి వాటికి అనుగుణంగా త‌మ‌ను తాము మ‌లుచుకోవాలి. 

ఉద్యోగాల ఎంపిక‌లో ట్రెండ్ మారిపోయింది

    ప్ర‌స్తుతం అన్ని కంపెనీల ఏకైక ల‌క్ష్యం ఖ‌ర్చును వీలైనంత మేర త‌గ్గించుకోవ‌డం. ఆన్ లైన్ ఇంట‌ర్వ్యూలు అయినా వ‌ర్చువ‌ల్స్ ఇంట‌ర్వ్యూలు అయినా ఇవ‌న్నీ కంపెనీల ఖర్చు త‌గ్గింపు చ‌ర్య‌ల్లో ఒక భాగ‌మే. అభ్య‌ర్ధుల‌ను ఎంపిక చేసుకునేందుకు రోజుకో కొత్త విధానాన్ని అనుస‌రిస్తున్న కంపెనీలు ప్ర‌స్తుతం సోష‌ల్ మీడియాను వేదిక‌గా చేసుకున్నాయి. ప్ర‌స్తుతం దాదాపు 80 శాతానికి పైగా కంపెనీలు సోష‌ల్ మీడియా ద్వారానే ఉద్యోగుల‌ను ఎంపిక చేసుకుంటున్నాయి. ప్ర‌ధానంగా లింక్డ్ఇన్, ఫేస్ బుక్, ట్విట్ట‌ర్ ల ద్వారానే అధికంగా హైరింగ్ జ‌రుగుతోంది. ఈ ట్రెండ్ ను విద్యార్ధులు క‌చ్చితంగా గుర్తించాలి. ఆయా సోష‌ల్ మీడియా వెబ్ సైట్ల‌లో ప్రొఫైల్స్ ను ఆక‌ర్ష‌ణీయంగా తీర్చిదిద్దుకోవాలి. రెజ్యుమె కు ఎంత ప్రాధాన్య‌నత‌నిస్తున్నారో  సోష‌ల్ మీడియా ప్రొఫైల్స్ కు కూడా అంతే ప్రాధాన్య‌త‌నివ్వాలి. ముఖ్యంగా లింక్డ్ ఇన్, స్కిల్ పేజేస్ వంటి వెబ్ సైట్లలో మీ మీ రంగాల‌కు సంబంధించి ప్రొఫైల్స్ ను క్రియేట్ చేసుకోవ‌చ్చు. ఇలా చేయ‌డం వ‌ల‌న మీ ప్రొఫైల్స్ ను మీ రంగాల‌కు సంబంధించిన వారు చూస్తారు. దీని వ‌ల‌న మీకు ఉద్యోగం దొర‌క‌డం సులభ‌మ‌వుతుంది. 

సోష‌ల్ మీడియాలో మీ న‌డ‌వ‌డిక ముఖ్యం! 

    సోష‌ల్ మీడియాలో న‌డ‌వ‌డిక ఏంటి అనుకుంటున్నారా? ఇందాకే చెప్పుకున్న‌ట్టు హైరింగ్ లో ట్రెండ్ పూర్తిగా మారిపోయింది. ఉద్యోగానికి ఎంప్లాయ‌ర్ ను మిమ్మ‌ల్ని ఎంపిక చేసుకునే ముందు మీ సోష‌ల్ మీడియా ప్రొఫైల్ ను క్షుణ్ణంగా పరిశీలిస్తారన్న విష‌యం తెలుసుకొండి. సోష‌ల్ మీడియా లో మీ అభిప్రాయాలు, మీరు పెట్టిన పోస్ట్ లు, మీ చేసిన లైక్ లు ఇలా అన్నింటినీ ఎంప్లాయ‌ర్స్ స్కాన్ చేస్తారు. సోష‌ల్ మీడియాలో మీరు పెట్టిన కామెంట్లు, అభిప్రాయాల ఆధారంగానే వారు మీ వ్య‌క్తిత్వంపై ఒక అభిప్రాయానికి వ‌స్తారు. కాబ‌ట్టి సోష‌ల్ మీడియాలో నేను ఏం చేసుకున్నా నా వ్య‌క్తిగ‌తం, అంతా నా ఇష్టం అనుకునే రోజులు పోయాయి. సోష‌ల్ మీడియాలో సమాజం ప‌ట్ల భాధ్య‌త‌, స‌మ‌స్య‌ల ప‌ట్ల మీ దృక్ఫ‌ధం చాలా ముఖ్యం. మీ ఆస‌క్తులు కూడా ఇక్క‌డ ప్ర‌ధాన పాత్ర పోషిస్తాయి. అస‌భ్య‌క‌ర కామెంట్లు, అనుచిత విష‌యాల‌కు లైక్ చేస్తే మీకు ఎన్ని నైపుణ్యాలున్నా ఎంప్లాయ‌ర్స్ మీ వైపు క‌న్నెత్తి చూడ‌రు. మీ వ్య‌క్తిత్వాన్ని, మీ అభిరుచుల‌ను, మీ భాధ్య‌త‌ను అదే స‌మ‌యంలో మీ నైపుణ్యాల‌ను ప్ర‌తిబింబించేలా మీ సోష‌ల్ మీడియా ప్రొఫైల్ ను ఆక‌ర్ష‌ణీయంగా ఎప్ప‌టిక‌ప్పుడు అప్ డేట్ చేసుకొండి. 

'జాబ్ అల‌ర్ట్స్' తో  అల‌ర్ట్ గా ఉండండి

    ప్ర‌స్తుతం ఉద్యోగాల ఎంపిక విధానం అంతా డిజిట‌ల్ మోడ్ లోకి మారిపోయింది. మార్కెట్లో ఉన్న ల‌క్ష‌లాది ఉద్యోగాల్లో త‌మ ప్రొఫైల్ కు స‌రిపోయే జాబ్ ను వెతికిప‌ట్టుకోవ‌డం విద్యార్ధుల‌కు స‌వాలు. ఈ విష‌యంలో కొన్ని జాగ్ర‌త్త‌లు తీసుకుంటే ఈ స‌వాల‌ను సులువుగా అధిగ‌మించ‌వ‌చ్చు. ప్ర‌స్తుతం ఆన్ లైన్ జాబ్ లిస్టింగ్ వెబ్ సైట్స్ తో పాటు సోష‌ల్ మీడియా, స‌ర్వీస్ ప్రొవైడ‌ర్లు, మీడియా హౌస్ లు జాబ్ అల‌ర్ట్స్ ను పంపిస్తున్నాయి. ఆయా సైట్ల‌లో రిజిష్ట‌ర్ కావ‌డం ద్వారా జాబ్ అల‌ర్ట్స్ ను పొంద‌వ‌చ్చు. దీని వ‌ల‌న అధిక స‌మ‌యం ఆదా అవుతుంది. అలా కాకుండా జాబ్ లిస్టింగ్ సైట్ల‌లో సెర్చ్ చేస్తూ కూర్చుంటే టైమ్ వృధా అవుతుంది. స‌రైన విధంగా ప్రొఫైల్ ను సెట్ చేసుకుంటే ఆయా సంస్థ‌లే ఎస్ఎంఎస్ లేదా ఈమెయిల్ ద్వారా జాబ్ అల‌ర్ట్స్ ను పంపిస్తాయి. రెజ్యుమె, ప్రొఫైల్ తో పాటు స‌రైన విధంగా జాబ్ అల‌ర్ట్స్ ను పొందటం కూడా అంతే ముఖ్య‌మ‌ని విద్యార్ధులు గుర్తించాలి. జాబ్ అల‌ర్ట్స్ లో విద్యార్ధులు ప్ర‌ధానంగా కీవ‌ర్డ్స్ , లోకేష‌న్, రోల్, ఎక్స్ పెక్టేడ్ శాల‌రీ తదిత‌ర విష‌యాల‌ను చాలా జాగ్ర‌త్త‌గా సెట్ చేసుకోవాలి. ఈ విష‌యంలో జాగ్ర‌త్త‌గా లేకుంటే వేరే రంగాల‌కు చెందిన రోల్స్, వేరే ప్రాంతం వంటి ఇత‌ర జాబ్ అల‌ర్ట్స్ వ‌చ్చి అంతా గంద‌ర‌గోళంగా ఉంటుంది. కాబ‌ట్టి జాబ్ సెర్చింగ్ వెబ్ సైట్ల‌లో అల‌ర్ట్స్ ను పెట్టుకున్న‌ప్పుడు విద్యార్ధులు ఈ జాగ్ర‌త్తలు తీసుకుంటే వేగంగా ఉద్యోగాన్ని పొందేందుకు వీలు క‌లుగుతుంది. 

మార్పుల‌ను నిశితంగా గ‌మ‌నించండి 

      వేగంగా పరుగులు పెడుతున్న ఈ సాంకేతిక యుగంలో విద్యార్ధి నిత్య చైత‌న్య స్ర‌వంతిలా ఉండాలి. చ‌దువు పూర్తయింది మంచి మార్కులు సంపాదించాను మంచి ఉద్యోగం వ‌స్తుంది అంటే ఇప్పుడు అది కుదిరే ప‌నికాదు. టెక్నాల‌జీ వినియోగంలో యాక్టివ్ గా ఉంటేనే ఉద్యోగాలు వెతుక్కుంటూ వ‌స్తాయి. జాబ్ మార్కెట్లో ట్రెండ్ ఎలా ఉంది? డిమాండ్ ఉన్న కోర్సులేమిటి? ఎంప్లాయ‌ర్స్ ఏం కోరుకుంటున్నారు? ఇవ‌న్నీ ఎప్ప‌టిక‌ప్పుడు తెలుసుకుని వాటికి అనుగుణంగా త‌మను తాము మ‌లుచుకున్న‌ప్పుడే మ‌నుగ‌డ సాధ్య‌మ‌వుతుంది. సోష‌ల్ మీడియాలో మ‌నం ఎవ‌రికీ జ‌వాబుదారీ కాద‌న్న‌ట్టు వ్య‌వ‌హ‌రిస్తూ అస‌భ్య‌క‌ర పోస్టులు కామెంట్స్ అస్స‌లు పెట్ట‌కండి. ఇది మీ భవిష్య‌త్ ను ప్ర‌భావితం చేస్తుంది. సోష‌ల్ మీడియాలో భాధ్య‌త‌తో కూడిన హుందాత‌నంతో మీ ప్రొఫైల్ ను ఆక‌ర్ష‌ణీయంగా తీర్చిదిద్దుకుంటే ఫలితాలు వ‌స్తాయి. ఈ విష‌యాన్ని ప్ర‌తీ విద్యార్ధి తప్ప‌కుండా గుర్తించాలి. మార్పుల‌ను సునిశితంగా గ‌మ‌నిస్తూ ఆ మార్పుల‌కు అనుగుణంగా త‌న‌ను తాను మార్చుకున్న‌ప్పుడే ఈ పోటీ ప్ర‌పంచంలో విద్యార్ధి నెగ్గుకురాగలుగుతాడు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com