ఈ సరస్వతీ పుత్రులు ఇప్పుడు 'లక్ష్మీపుత్రులు'..ఎందుకు?

    గ‌డిచిన ద‌శాబ్ద కాలంలో సాంకేతికంగా వ‌చ్చిన ఎన్నో మార్పులు మానవ జీవితాన్ని స‌మూలంగా మార్చివేసాయి. ముఖ్యంగా రాకెట్ వేగంతో దూసుకొచ్చిన టెక్నాల‌జీ కొన్ని వృత్తుల‌కు మ‌హ‌ర్ద‌శ‌ను తీసుకొచ్చింది. గ‌తంలో క‌నీస ఆదాయాన్ని కూడా ఇవ్వ‌ని వృత్తులు ఇప్పుడు భారీగా కాసులు కురిపిస్తున్నాయి. అటువంటి ప్రొఫెష‌న్ల‌లో టీచ‌ర్ జాబ్ కూడా ఒక‌టి. ఒక‌ప్పుడు 'బ‌త‌క‌లేక బ‌డి పంతులు ఉద్యోగం' అనేవారు. కానీ ఇప్పుడు ప‌రిస్థితి మారిపోయింది. మంచి నైపుణ్యం, విష‌యాన్ని చెప్ప‌డంలో ఓర్పు, టెక్నాల‌జీని ఒడిసి ప‌ట్టుకోగ‌లిగే నేర్పు ఉండాలే కానీ ఉపాధ్యాయులు కూడా భారీగా డ‌బ్బు సంపాదించే అవ‌కాశాలు కొకొల్ల‌లు. ఆన్ లైన్ లెర్నింగ్ ఊపందుకున్నాక మంచి డిమాండ్ ఉన్న విభాగాల్లో టీచింగ్ ప్ర‌థ‌మ స్థానంలో నిలుస్తోంది. ఈ సువ‌ర్ణావ‌కాశాన్నిస‌ద్వినియోగం చేసుకుని చాలా మంది టీచ‌ర్లు, అత్యున్నత నిపుణుల‌తో స‌మానంగా డ‌బ్బు సంపాదిస్తున్నారు. 

దూసుకొచ్చిన ఆల్ లైన్ వేదిక‌లు 

    ఇప్పుడు విద్యార్ధికి అన్నింటా పోటీయే. స్కూల్ లో చెప్పిన పాఠాల‌కు అద‌నంగా ట్యూష‌న్ ఉంటే కానీ స‌రైన ఫ‌లితాలు రాని ప‌రిస్థితి.  పోటీలో నెగ్గ‌కుంటే రేసులో వెన‌క‌బ‌డి పోయే ప్ర‌మాదం ఉంది క‌నుకనే ట్యూష‌న్స్ పై పేరెంట్స్ కు అంత మ‌క్కువ‌. విద్యార్ధి స్కూల్ నుంచి ఇంటికి వ‌చ్చి మ‌ళ్లీ ప్ర‌యాణం చేసి వేరే ప్రాంతానికి వెళ్ల‌డం ప్ర‌స్తుత న‌గ‌ర జీవితంలో ఇబ్బంది కాబ‌ట్టే ఆన్ లైన్ లో ట్యూష‌న్స్ కు ఆద‌ర‌ణ పెరుగుతోంది. ఇందుకు అనుగుణంగానే చాలా సంస్థలు ఆన్ లైన్ ట్యూష‌న్ వేదిక‌ల‌ను త‌యారు చేస్తున్నాయి. ఇప్పుడు ఈ ప‌రిణామం టీచ‌ర్స్ కు అనుకోని వ‌రంలా మారింది. ఆన్ లైన్ ద్వారా విద్యార్ధుల‌కు పాఠాలు భోధిస్తూ టీచ‌ర్స్ అద‌న‌పు ఆదాయాన్ని సంపాదిస్తున్నారు.  ఆన్ లైన్ ట్యూష‌న్ వేదిక‌ల్లో  రిజిష్ట‌ర్ చేసుకుని  త‌మ‌కు అనుకూల స‌మ‌యాల్లో విద్యార్ధుల‌కు స‌బ్జెక్ట్ ను భోదిస్తున్నారు. ఆన్ లైన్ టీచింగ్ లో మూడు ద‌శ‌లు ఉంటాయి. స‌బ్జెక్ట్ పై అవ‌గాహ‌న‌, టెక్నాల‌జీతో అనుసంధానం, దూరంగా ఉన్న విద్యార్ధిని ద‌గ్గ‌ర‌గా ఉన్న‌ట్టు ఊహించుకుని పాఠం చెప్ప‌డం. ఈ మూడింటిని ఒక‌దానికి ఒక‌టి అనుసంధానం చేసి సంయుక్తంగా ఉప‌యోగించుకోగ‌లిగితే ఆన్ లైన్ టీచింగ్ అనేది చాలా మంచి కెరీర్ గా నిలుస్తుంది.

టీచ‌ర్ల‌కు స‌ద‌వ‌కాశాన్ని క‌ల్పిస్తున్న సంస్థ‌లు

           ప్ర‌స్తుతం  హైద‌రాబాద్ కేంద్రంగా ప‌నిచేస్తున్న 'ట్యూట‌ర్స్ ప్రైడ్', బెంగ‌ళూరు కేంద్రంగా ఉన్న‌ 'ట్యూట‌ర్ విస్టా' వంటి సంస్థ‌లు ఆన్ లైన్ లోనూ ఆఫ్ లైన్ లోనూ త‌మ సేవ‌ల‌ను అందిస్తున్నాయి. ఇందులో 'ట్యూట‌ర్స్ ప్రైడ్' వాళ్లు 'స‌ర్టిఫైడ్ ఆన్ లైన్ ట్యూట‌ర్ ప్రొగ్రామ్' ను అందిస్తున్నారు. ఆన్ లైన్ పాఠం చెప్పిన‌ప్పుడు విద్యార్ధికి పాఠం 30 సెక‌న్లు ఆల‌స్యంగా చేరుతుంది. రియ‌ల్ టైమ్ లో ఉండే ఈ 30 సెక‌న్ల స‌మ‌యాన్ని ఇత‌ర ప్ర‌జంటేష‌న్ ద్వారా ఎలా భ‌ర్తీ చేయాలి. విద్యార్ధికి ప్ర‌భావ‌వంత‌గా ఎలా పాఠం భోధించాలి వంటి విష‌యాల‌ను ఈ ప్రొగ్రామ్ లో 'ట్యూట‌ర్స్ ప్రైడ్' సంస్థ నేర్పుతుంది. ఈ సంస్థ‌లో ఆన్ లైన్ టీచింగ్ కు సంబంధించి ఎన్నో ఉద్యోగ అవ‌కాశాలున్నాయి. వీరు అక‌డమిక్ ఆన్ లైన్ ట్యూష‌న్స్ తో పాటు ఫిట్ నెట్, యోగా, క‌రాటే, క‌ళ‌లు వంటి వాటిని కూడా త‌మ సేవ‌ల్లో ప్ర‌వేశ‌పెట్టారు. దీని వ‌ల‌న టీచ‌ర్స్ తో పాటు ఇత‌ర వృత్తి నిపుణులు కూడా లాభ‌ప‌డే అవకాశముంది. ఆన్ లైన్ టీచింగ్ లో ఉన్న టెక్నాల‌జీని సొంతం చేసుకుని కాస్త స‌మ‌యం కేటాయిస్తే చాలు టీచ‌ర్స్ వేలాది రూపాయ‌లు సంపాదించుకునే వీలుంది.  

 పాఠాల‌కే పరిమితం కాదు

        ఆన్ లైట్ ట్యూష‌న్ వేదిక‌లు కేవలం క్లాస్ రూమ్ పాఠాలను అందించేందుకు మాత్ర‌మే ప‌రిమితం కావ‌డం లేదు. విద్యార్ధులకు త‌ర‌గ‌తి పాఠాల‌తో పాటు యోగా, క‌రాటే, స్విమ్మింగ్ వంటివి నేర్పించే టీచ‌ర్ల‌ను కూడా అందుబాటు లోకి తీసుకొచ్చాయి. వీటి ద్వారా విద్యార్ధులు చ‌దువుతో పాటు త‌మ ఆస‌క్తుల‌ను నేర్చుకునే అవ‌కాశం క‌ల్పిస్తున్నాయి. గ‌తంలో విద్యార్ధుల త‌ల్లిదండ్రుల‌కు ట్యూష‌న్ టీచ‌ర్ల‌ను,  క్రీడ‌ల‌ను నేర్పే నిపుణులను వెతికి ప‌ట్టుకోవ‌డం క‌ష్టసాధ్యంగా ఉండేది. ఆన్ లైన్ ట్యూష‌న్ వేదిక‌ల పుణ్య‌మాని అన్ని ఇప్పుడు విద్యార్ధికి కావాల్సిన అన్ని ర‌కాల టీచింగ్ సేవ‌లు ఒకే ద‌గ్గ‌ర దొరుకుతున్నాయి. ఈ ప‌రిణామం ఇటు టీచ‌ర్ల‌తో పాటు అటు విద్యార్ధుల‌కు వివిధ నైపుణ్యాలు నేర్పించే నిపుణుల‌కు కూడా లాభ‌దాయ‌కంగా మారింది. అన్నింటి కంటే ముఖ్యంగా విద్యార్ధి త‌ను నేర్చుకోవాల‌నుకుంటున్న‌ విష‌యాన్ని, ఆస‌క్తిని త‌క్కువ స‌మ‌యంలో, నాణ్య‌మైన టీచ‌ర్స్ , నిపుణుల ప‌ర్య‌వేక్ష‌ణ‌లో నేర్చుకుంటున్నాడు. 

పాఠాల‌ను అమ్ముతున్నారు!

     ఒకవైపు ఆన్ లైన్ ట్యూష‌న్ వేదిక‌లు శ‌ర‌వేగంగా అభివృద్ధి చెందుతుంటుంటే మ‌రోవైపు పాఠాల‌ను అమ్మే విధానం కూడా రంగ ప్ర‌వేశం చేసింది. స‌మ‌యం ఉన్న టీచ‌ర్లు ఆన్ లైన్ టీచింగ్ ద్వారా డ‌బ్బులు సంపాదిస్తుంటే,  అట్టే స‌మ‌యం లేని టీచ‌ర్లు పాఠాలు కొనుక్కుని విద్యార్ధుల‌కు భోధిస్తున్నారు. పాఠాల‌ను సులువైన ప‌ద్ధ‌తుల్లో భోదించే విధానాన్ని స‌క్సెస్ పుల్ టీచ‌ర్ల ద‌గ్గ‌ర్నుంచి మిగ‌తా టీచ‌ర్లు కొనుక్కుని త‌మ విద్యార్దుల‌కు పాఠం చెప్పే ట్రెండ్ ఇప్పుడు ఊపిరిపోసుకుంది. ఈ ట్రెండ్ ఇప్పుడు పాశ్చాత్య దేశాల్లో కొంద‌రు టీచ‌ర్ల‌కు కాసులు కురిపిస్తోంది. ఇందులో స‌క్సెస్ అయిన వారు త‌క్కువ స‌మ‌యంలోనే భారీ మొత్తంలో డ‌బ్బును సంపాదిస్తున్నారు. బ్రిట‌న్, అమెరికాల్లో ఒక్కో టీచ‌ర్ 6 కోట్ల రూపాయ‌ల నుంచి  12 కోట్ల రూపాయ‌ల వ‌ర‌కూ పాఠాలు అమ్మి సంపాదిస్తున్నారంటేనే అర్ధం చేసుకోవ‌చ్చు పాఠాలు ఎంత విలువైన‌వో. త్వ‌ర‌లో మ‌న దేశంలోనే ఈ పాఠాలు అమ్మే ప‌ద్ధ‌తి రంగ ప్ర‌వేశం చేస్తే టీచ‌ర్లు మరింత డ‌బ్బు సంపాదించేందుకు అవ‌కాశం ఏర్ప‌డుతుంది. 

ఈ స‌ద‌వ‌కాశాన్ని స‌ద్వినియోగం చేసుకొండి

     వ‌య‌స్సుతో సంబంధం లేదు, విష‌య ప‌రిజ్ఞానం ఉండి మంచి వాయిస్ ఉంటే ఎవ‌రైనా ఆన్ లైన్ టీచింగ్ లో రాణించొచ్చు. రానున్న రోజుల్లో ఆన్ లైన్ టీచింగ్ కు మంచి భ‌విష్య‌త్ ఉంద‌ని స‌ర్వేలు తేల్చిచెపుతున్నాయి. లైవ్ పాఠాలు, వీడియో పాఠాలకు కూడా ఆద‌ర‌ణ ఉన్న‌ప్ప‌టికీ అప్ప‌టిక‌ప్పుడు వ‌చ్చిన సందేహాల‌కు స‌మాధానం తెలుసుకునే వెసులుబాటు ఈ రెండు విధానాల్లో లేదు. అదే ఆన్ లైన్ టీచింగ్ లో ప్ర‌త్య‌క్షంగా సందేహాల‌ను నివృత్తి చేసుకునే వీలుంది. ఈ వెసులుబాటే ఆన్ లైన్ టీచింగ్ కు ఆద‌ర‌ణ‌ను పెంచుతోంది. ఒకప్పుడు అస‌లు ఇది సాధ్య‌మా అని మిలియ‌న్ డాల‌ర్ ప్ర‌శ్న‌లు రేకెత్తించిన‌ ఆల్ లైన్ టీచింగ్, ఇప్పుడు టీచ‌ర్ల‌కు మిలియ‌న్ డాల‌ర్ల‌ను కురిపిస్తోంది. ప్ర‌స్తుత టెక్నాల‌జీ ప్ర‌పంచంలో శ‌ర‌వేగంగా దూసుకుపోతున్న‌ ఈ న‌యా కెరీర్ పై  దృష్టి సారిస్తే  ఎవ‌రైనా ఆన్ లైన్ టీచింగ్ తో అద‌న‌పు ఆదాయం సంపాదించుకోవ‌చ్చు.   

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com